Сәрһати 64
Сьлеман Пʹарьстгәһе Ава Дькә
ПЕШИЙА мьрьна хԝә Даԝьд рʹебәри һишт Сьлеманрʹа сәва авакьрьна пʹарьстгәһе. Әв рʹебәри жь Йаһоԝа бу. Ԝәʹде пʹадшатийа хԝә дь сала чарада Сьлеман дәстпедькә авакьрьна пʹарьстгәһе. Һʹәфт сал у нив лазьм һатьн кӧ пʹарьстгәһ бе ава кьрьне. Ԝәкә дәһә һʹәзар мер пʹарьстгәһ ава дькьрьн, у гәлә пʹәрә лазьм һатьн сәва авакьрьне, чьмки дь пʹарьстгәһеда гәлә тьшт жь зерʹ у зива һатьн чекьрьне.
Дь пʹарьстгәһеда, ча мина дь коне Йаһоԝада, дӧ отʹахе фәрз һәбун. Әԝ отʹах жь отʹахед кон дӧ щар мәстьр бун. Дь отʹаха пешьнда Сьлеман ԛӧтʹийа пәймане дани, ле һʹәму тьштед дьне йе кӧ дь конеда һәбун, Сьлеман дани отʹаха дӧда.
Чахе пʹарьстгәһ ава бу, ԝана әʹйдәкә мәзьн кʹьвш кьрьн. Ль сәр ви шькьли тӧ дькари бьвини ча Сьлеман бәр пʹарьстгәһе ль сәр чока рʹуньштийә у Хԝәдерʹа дӧа дькә. Сьлеман готә Йаһоԝа: «Ԝа әʹзмане-әʹзмана нькарьн тә щиԝар кьн, ле кʹӧ ма әԝ пʹарьстгәһ йе кӧ мьн ава кьр. Ле Хԝәдайе мьн, һиви тә дькьм, бьбьһе ԝан дӧа йе кӧ щьмәʹта тә ԝе жь вьр тәрʹа дӧа бькьн».
Гава Сьлеман дӧайе хԝә хьлаз кьр, агьр жорда ль сәр ԛӧрбангәһе һат у ԛӧрбана ԝан шәԝьтанд. Ль нав пʹарьстгәһе рʹонайа жь Йаһоԝа дьчʹурьси. Бь ве йәке һатә фәʹмкьрьне кӧ Йаһоԝа бьһист у ԛәбул кьр дӧайе Сьлеман, у әв пʹарьстгәһ жи дьле ԝи хԝәш һат. Пʹарьстгәһ жь коне пироз һе баш бу, у щьмәʹт ида дь пʹарьстгәһеда сәре хԝә бәр Йаһоԝа датанин.
Нава гәлә сала Сьлеман бь биланийе сәркʹарти дькьр у щьмәʹт бәхтәԝар бу. Ле Сьлеман гәлә жьн жь ԝәлатед дьнена хԝәрʹа ани, йе кӧ Йаһоԝарʹа ԛӧльх нәдькьрьн. Дьвини ча жьнәкә ԝи сәре хԝә бәр пʹут датинә? Хьлазийе ԝана ӧса кьр кӧ Сьлеман жи дәстпекьр сәре хԝә бәр пʹута данә. Зани жь бо ве йәке чь ԛәԝьми? Әԝи ида нә бь рʹәʹмтийе ль сәр мәрийа һʹӧкӧмти дькьр. Әԝ бу дьлкʹафьр у щьмәʹт бьн пʹадшатийа ԝи ида бәхтәԝар нибун.
Жь ве йәке Йаһоԝа гәлә ль сәр Сьлеман һерс кʹәт у ләма жи готе: «Әзе пʹадшатийе жь тә бьстиньм у бьдьмә кәсәки дьн. Әв йәк паши әʹмьре тә ԝе бьԛәԝьмә, ԝәʹде сәркʹартийа кӧрʹе тә. Ле әз нахԝазьм кӧ жь кӧрʹе тә пʹадшатийа ль сәр тʹәмамийа щьмәʹте бе стандьне». Ԝәрә әм пебьһʹәсьн ча әв йәк ԛәԝьми.
1 Дирок 28:9-21; 29:1-9; 1 П’адшати 5:1-18; 2 Дирок 6:12-42; 7:1-5; 1 П’адшати 11:9-13.