Сәрһати 69

Кәчʹьк Аликʹари Дьдә Мере Навдаррʹа

ЗАНИ әв кәчʹька бьчʹук чь хәвәр дьдә? Әԝ гьли дькә ве кʹӧлфәтерʹа дәрһәԛа пʹехәмбәрәки Хԝәде бь наве Елиша, у ӧса жи дәрһәԛа кʹәрәмәта, йе кӧ әԝи бь аликʹарийа Хԝәде дькьр. Әве кʹӧлфәте ԛә тьштәк дәрһәԛа Йаһоԝа ньзаньбу, чьмки әԝ нә жь исраелийа йә. Кʹа әм пешийе пебьһʹәсьн әв кәчʹька бьчʹук ча һатә мала ве кʹӧлфәте.

Әв кʹӧлфәт жь мьләте Сурйа йә. Мере ԝе Нәʹман сәркʹаре әскәред сурйайе йә. Йед сурийи әв кәчʹька исраели һьлданә дил у анин мала Нәʹман кӧ әԝ жьна ԝирʹа хӧламтийе бькә.

Нәʹман бь нәхԝәшийа гьран, бь кʹотибуне нәхԝәш бьбу. Жь бо ве нәхԝәшийе һәла һе бәдәне мәрийа жи гәни дьбә. Ләма жи кәчʹька бьчʹук гьлийе ӧса готә жьна Нәʹман: «Тʹәхмина мьн, кӧ һәрге хԝәйе мьн Нәʹман һәрә ль Исраеле щәм пʹехәмбәре Йаһоԝа, әԝ ԝе бькарьбә Нәʹман жь кʹотибуне ԛәнщ кә». Һьнә ԝәʹдә шунда әв гьли гьһиштьнә һʹәта Нәʹман.

Нәʹман гәлә дьхԝәст ԛәнщ буйа, ләма жи әԝи кʹаре хԝә кьр у чу ль Исраеле. Гава Нәʹман гьһиштә Исраел, әԝ перʹа-перʹа чу мала Елиша. Елиша жи ԛӧльхкʹарәки хԝә шанд бал Нәʹман кӧ әԝ Нәʹманрʹа бежә, ԝәки сәва ԛәнщбуне әԝ гәрәке һәʹфт щара бькʹәвә чʹәме Урдӧне. Нәʹман жи һерсә-һерс гот: «Чи йә, чʹәмед мә тʹӧнә бун, йане чʹәмед ԝан жь чʹәмед ԝәлате мә баштьр ьн?!» У бь ван гьлийа әԝи пьшта хԝә да ԝан кӧ пашда вәгәрʹә мал.

Ле хӧламе ԝи дәстпекьрьн ԝирʹа бежьн: «Ахайе мә, һәрге Елиша тәрʹа тьштәки чәтьн бьгота, тәйе бькьра, рʹаст ә? Ле әԝи тьштәки һеса тәрʹа гот, чьрʹа тӧ нахԝази гӧрʹа ԝи бьки у хԝә аве хи?» Нәʹман гӧрʹа ԝан кьр у һʹәфт щара кʹәтә ава Урдӧне. Хьлазийе әԝи дина хԝә да кӧ бәдәна ԝи ԛәнщ бу у әԝ ида сах-сьламәт ә!

Нәʹман пʹьрʹ ша дьбу, әԝ вәгәрʹийа мала Елиша у готә ԝи: «Ньһа әз заньме кӧ нав тʹәмамийа дьнйайе тʹәне Хԝәдайе исраелийа йә рʹаст. Ләма жи бь кʹәрәма хԝә ван пʹешкʹеша жь мьн ԛәбул кә у һьлдә». Ле чьмки Нәʹман һәма бь ԛәԝата Йаһоԝа һатә ԛәнщ кьрьне, Елиша фәʹм дькьр кӧ кьред ԝи ԝе нәрʹаст буйа һәрге әԝи ван пʹешкʹеша һьлда, ләма жи Елиша ван пʹешкʹеша һьлнәда. Ле аликʹарчийе ԝи Гәһази гәлә дьхԝәст ԝан пʹешкʹеша бьстанда.

Ләма жи Гәһази тьштәки ӧса кьр. Гава Нәʹман чу, әԝи да пәй ԝан у готә Нәʹман: «Елиша мьн шанд кӧ әз ԝәрʹа бежьм, ԝәки әԝ һьнә жь ԝан пʹешкʹеша дьхԝазә, сәва һәвалед хԝә, йе кӧ һежа һатьн мала ԝи». Бь рʹастийе әв дәрәԝ бу. Ле Нәʹман әв йәк те дәрнәхьст у һьнә пʹешкʹеш да Гәһази.

Гәһази вәгәрʹийа мал. Елиша ида һʹәму тьшт занә, чьмки Йаһоԝа кьред Гәһази ԝирʹа әʹйан кьрьбу. Елиша готә Гәһази: «Чьмки тә әв тьштәки хьрав кьрийә, нәхԝәшийа Нәʹман, кʹотибун, ԝе дәрбази тә бә». Гава Елиша гьлийе хԝә хьлаз кьр, Гәһази перʹа-перʹа бь кʹотибуне нәхԝәш кʹәт!

Жь ве сәрһатийе әм чь дькарьн һин бьн? Йа пешьн, әм гәрәке мина ԝе кәчʹька бьчʹук хәвәр дьн дәрһәԛа Йаһоԝа. Бь ве йәке әме гәлә ԛәнщийе бькьн. Йа дӧда, әм гәрәке мина Нәʹман ԛӧрә нибьн у бе әгләкьрьне тʹьме гӧрʹа ԛӧльхкʹаред Йаһоԝа бькьн. Йа сьсийа жи әм тʹӧ щар гәрәке мина Гәһази дәрәва нәкьн. Бьньһерʹә чьԛа тьшт әм дькарьн жь хԝәндьна Кʹьтеба Пироз һин бьн!

2 П’адшати 5:1-27.