Сәрһати 72

Хԝәде Али Һьзԛийа Пʹадша Дькә

ЗАНИ чьрʹа әв мер Йаһоԝарʹа дӧа дькә? Гәло чьрʹа әԝи ван нәма бәр ԛӧрбангәһа Йаһоԝа дани? Наве ԝи мерьки Һьзԛийа йә у әԝ пʹадше дӧ бәрәкед исраелийа йә. Ньһа әԝ кʹәтийә рʹожәкә гәлә хьрав. Ле гәло чьрʹа?

Әскәред Ашуре ида ԛьрʹа пʹадшатийа 10 бәрәкед исраели анин. Йаһоԝа әв йәк һишт, чьмки щьмәʹте 10 бәрәка гәлә хьрав бьбун. Ньһа әскәред Ашуре ида һазьр бун кӧ бенә дора дӧ бәрәкед исраели жи.

Пʹадше Ашуре һәма һежа нәмә шандә Һьзԛийарʹа, у һәма ван нәма Һьзԛийа дани бәр Йаһоԝа. Бь ван нәма әԝана ԛәрфе хԝә Йаһоԝа дькьрьн у дьготьн Һьзԛийарʹа ԝәки әԝ тʹәсмил бә. Аһан чьрʹа Һьзԛийа Йаһоԝарʹа дӧа дькә: «Йа Хԝәдайе мьн Йаһоԝа, мә жь пʹадше Ашуре хьлаз кә. У бьра тʹәмамийа мьләта бьзаньбьн ԝәки тʹәне тӧ йи Хԝәде». Гәло Йаһоԝа дӧайе Һьзԛийа ԝе бьбьһе?

Һьзԛийа пʹадшаки баш ә. Әԝ мина пʹадшед 10 бәрәкед исраели у мина баве хԝә Аһаз хьрав нинә. Һьзԛийа тʹьме һʹәму ԛанунед Йаһоԝа хԝәй дькьр. Ләма жи, гава Һьзԛийа дӧайе хԝә хьлаз кьр, Ишайа пʹехәмбәр әʹламәтийа жь Йаһоԝа дәрбази ԝи кьр: «Пʹадше Ашуре ԝе накʹәвә Оршәлиме, у әскәред ԝи жи, ԝе незики Оршәлиме набьн. Һәла һе тʹирәк жи шәһәре накʹәвә».

Ньһа дина хԝә бьдә шькьле жере. Зани әв әскәред кӧшти кʹи нә? Әв әскәред ашури нә. Йаһоԝа мьлйакʹәтәки хԝә шанд, у әԝи дь нава шәвәкеда 185 000 әскәред Ашуре кӧшт. Ӧса пʹадше Ашуре да дәр у вәгәрʹийа ԝәлате хԝә.

Дӧ бәрәкед исраели һатьнә хьлазкьрьне, мәрьв диса жи дь әʹдьлайийеда дьжитьн. Ле чахе Һьзԛийа мьр, кӧрʹе ԝи Мьнашә бу пʹадша. Мьнашә у кӧрʹе ԝи Амон, һәр дӧ жи пʹадшаки хьрав бун. Ләма жи ԝәлат бь зӧлмийе у нәһәԛийе тʹьжә бьбу. Чахе Амон пʹадша бь дәсте хӧламед хԝә һатә кӧштьне, кӧрʹе ԝи Йошийа бу пʹадше дӧ бәрәкед исраели.

2 П’адшати 18:1-36; 19:1-37; 21:1-25.