Сәрһати 73

Пʹадше Баш Дь Исраеледа

ЙОШИЙА һе һʹәйшт сали бу чахе бу пʹадше дӧ бәрәкед исраелийа. Әԝ һе гәлә бьчʹук бу кӧ сәркʹартийе бькә, ләма жи чәнд меред мәзьн али ԝи дькьрьн, ԝәки әԝ сәркʹартийа щьмәʹте бькә.

Паши ԝе йәке ча Йошийа бу пʹадша, әԝ нава һʹәфт сала һе зедә педьһʹәсийа дәрһәԛа Йаһоԝа. Әԝи чʹәʹв дьда пʹадшед ӧса баш, ча мәсәлә Даԝьд, Йеһошәфат у Һьзԛийа. Дәрбәке, чахе әԝ һе щаһьл бу, әԝи тьштәки мерхаси кьр.

Ида гәлә сала щьмәʹта исраели хьрави дькьрьн. Әԝана сәре хԝә ль бәр хӧданед ԛәлп датанин у пʹутпʹарьсти дькьрьн. Ләма жи Йошийа һьнә әскәред хԝә һьлда у дәстпекьр ԝәлат жь пʹутпʹарьстийе тʹәмьз кә. Әв хәватәкә гәлә гьран бу, чьмки гәлә мәрийа сәре хԝә бәр хӧданед ԛәлп датанин. Вьр, ль сәр шькьл тӧ дькари бьвини ча Йошийа у әскәред ԝи пʹута һурдәхԝәши дькьн.

Пашԝәхтийе Йошийа се мер кʹьвш кьр, ԝәки әԝана рʹебәрийа шьхӧле тʹәзәкьрьна пʹарьстгәһе бькьн. Пʹәрә бона тʹәзәкьрьне жь мәрийа дьһатә тʹоп кьрьне, у дьанин щәм ван мера. Дәма әԝана пʹарьстгәһ тʹәзә дькьрьн, кʹаһине пешьн бь наве Һилкийа кʹьтебәкә гәлә фәрз дь пʹарьстгәһеда дит. Әв кʹьтеба ԛануна Хԝәде бу, йе кӧ гәлә сал пешда Йаһоԝа бь дәсте Муса да ньвисаре. Әв кʹьтеб нава гәлә сал ӧнда бьбу, ле ньһа һатә дитьне.

Әв кʹьтеб анин щәм Йошийа, у әԝи хԝәст кӧ кʹьтеб ԝирʹа бе хԝәндьне. Гава әԝи дьбьһист, әԝи фәʹм кьр кӧ кал-бавед ԝи ԛә гӧрʹа ԛанунед Хԝәде нәдькьрьн. Жь бо ве йәке әԝ гәлә бәрхԝә кʹәт у кʹьнщ ль сәр хԝә ԛәльшаньд, әв йәк ль сәр шькьл рʹьнд те кʹьвше. Йошийа гот: «Йаһоԝа гәлә һерсә ль сәр мә, чьмки кал-бавед мә ԛанунед ве кʹьтебе хԝәй нәкьрьнә».

Йошийа фәрман да Һилкийа, кʹаһине пешьнрʹа, ԝәки әԝ пебьһʹәсә һәла Йаһоԝа чь ԝе бькә сәре ԝан. Һилкийа чу щәм жьнәки бь наве Һулда, йе кӧ пʹехәмбәр бу, у же пьрси. Әԝе жи жь Йаһоԝа әʹламәтийа ӧса дәрбази Йошийа кьр: «Оршәлим у һʹәму мәрийед теда ԝе бенә диԝан кьрьне, чьмки ԝана сәре хԝә бәр хӧданед ԛәлп датанин у тʹәмамийа ԝәлат бь нәһәԛийе тʹьжә кьрьн. Ле чьмки тә, Йошийа, тьштед ԛәнщ кьрийә, һʹәта тӧ сах и әзе диԝана хԝә найньм ль сәр ԝан мәрийед нәһәԛ».

2 Дирок 34:1-28.