Сәрһати 74

Мере Кӧ Нәдьтьрсийа

ҺӘЛА бьньһерʹә ча әв мәри ԛәрфе хԝә мерәки щаһьл дькьн. Гәло әв мер кʹи йә? Әԝ пʹехәмбәрәки Хԝәде гәлә гьринг ә, у наве ԝи Йерәмийа йә.

Йаһоԝа кʹьвш кьр Йерәмийа ча пʹехәмбәр паши ԝе йәке, ча Йошийа дәстпекьр ԝәлат жь пʹута тʹәмьз кә. Ле Йерәмийа тʹьре кӧ әԝ һе щаһьл ә кӧ бьбә пʹехәмбәр, ләма жи Йаһоԝа ԝи гӧман дькә кӧ әԝ ԝе әʹсәйи али Йерәмийа бькә.

Йерәмийа ширәт дькьр исраелийа, ԝәки әԝана жь кьред хԝәйе нәрʹаст вәгәрʹьн. Әԝи дьготә ԝан: «Әԝ хӧданед кӧ мьләтед дьнена ль бәр ԝан сәре хԝә датиньн, хӧданед ԛәлп ьн». Ле гәләка дәԝса ԝе йәке кӧ Йаһоԝарʹа ԛӧльх кьн, йәкә сәре хԝә бәр пʹута датанин. Гава Йерәмийа дьготә ԝан кӧ Хԝәде ԝе диԝана ԝан бькә сәва кьред ԝанә хьрав, әԝана ԛәрфе хԝә пе дькьрьн у пе дькʹәнийан.

Сал дәрбаз бун у Йошийа пʹадша мьр. Се мәһ шунда кӧрʹе ԝи Йаһойаким бу пʹадша. Йерәмийа диса жи дьготә мәрийа: «Һәрге һун жь нәһәԛийед хԝә вәнәгәрʹьн, Йаһоԝа ԝе Оршәлиме һьлшинә». Кʹаһина жи Йерәмийа гьртьн у дәстпекьрьн ль сәр ԝи бькьнә ԛужини: «Тӧ ча гьлийе ӧса дьвежи, тӧ йе кӧштьне йи». Паше ԝана готә мире Исраеле: «Йерәмийа гәрәке бе кӧштьне, чьмки әԝ пешбәри шәһәре мә хәвәр дьдә».

Гәло ньһа Йерәмийа ԝе чь бькә? Әԝ йәкә натьрсә! Әԝи готә ԝан һʹәмушка: «Йаһоԝа мьн шандә щәм ԝә, ԝәки әв һʹәму тьшт әз ԝәрʹа бежьм. Һәрге һун хԝә рʹаст нәкьн, Йаһоԝа ԝе Оршәлиме һьлшинә. Ле һәрге һуне мьн бькӧжьн, бьзаньбьн кӧ ԝә мәрики нә нәһәԛ кӧшт».

Мире Исраеле һишт кӧ Йерәмийа бьжи, ле щьмәʹт йәкә йа хԝә дькьрьн. Пашԝәхтийе Нәбукәднәсәр пʹадше Бабилоне, бь шәрʹ дәркʹәт пешбәри Оршәлиме. Хьлазийе әԝи исраелийа кьрә бьн ԛоле хԝә. Нәбукәднәсәр һʹәзар-һʹәзара исраелийа бьрә Бабилоне ча дил. Тәйе чь тʹәхмин кьра һәрге мәрийед хәриб тә бьвьрана ԝәлатәки дур у нәнас?

Йерәмйа 1:1-8; 10:1-5; 26:1-16; 2 П’адшати 24:1-17.