Йерәмийа Нәдьсәкьни у Тʹьме Дәрһәqа Йаһоwа Хәбәр Дьда

Чахе әм мәрийарʹа дәрһәqа Йаһоwа хәбәр дьдьн, щарна жь бо ве йәке әwана дькарьн qәрфе хwә мә бькьн йан жи ль сәр мә һерс кʹәвьн. У әв йәк дькарә ль сәр мә öса һʹöкöм кә, wәки әме ида нәхwазьн дәрһәqа Йаһоwа хәбәр дьн. Тʹәви тә qә тьштед öса qәwьмийә?~ Кʹьтеба Пироз гьли дькә дәрһәqа хортәки, йе кö Йаһоwа һʹьз дькьр, ле һьндьк мабу әwи даннасинкьрьна хwә бьда сәкьнандьне. Наве wи Йерәмийа бу. Дьхwази һе зедә дәрһәqа wи пебьһʹәси? Wәре әм бьньһерʹьн.

Чахе Йерәмийа һе гәләк щаһьл бу, Йаһоwа готә wи, wәки әw гәрәке мәрийа әʹлам кә, кö шьхöлед хwәйә хьраб бьһельн. Йерәмийарʹа чәтьн бу әве йәке бькә, у әw тьрсийа. Әwи готә Йаһоwа: ‹Әз ньзаньм чь у ча бежьм. Нә әз һе гәләк щаһьл ьм›. Ле Йаһоwа готе: ‹Нәтьрсә. Әзе али тә бькьм›.

Паши wе йәке Йерәмийа дәстпекьр бежә мәрийа, кö һәрге әwана шьхöлед хwәйә хьраб нәһельн у нәйенә гöһастьне, һьнге әwана wе бенә щәзакьрьне. Ча тö дьшьрмиш дьби, мәри гöһ данә Йерәмийа у шьхöлед хьраб һиштьн?~ На. Әwана дәстпекьрьн qәрфе хwә wи бькьн у ль сәр wи һерс кʹәвьн. Һьнәка жи һәла һе дьхwәстьн әwи бькöжьн! Ле гәло һьнге Йерәмийа чь ль сәр хwә тʹәхмин кьр, ча дьшьрмиш дьби?~ Әw тьрсийа у гот: ‹Әз ида дәрһәqа Йаһоwа тʹö щар хәбәр надьм›. Ле бь рʹастийе, әwи шьхöле даннасинкьрьна хwә да сәкьнандьне?~ На, әw нәсәкьни. Йерәмийа гәләк Йаһоwа һʹьз дькьр, ләма жи нькарьбу хwә кәр кьра у хәбәр нәда дәрһәqа Йаһоwа. У чьмки Йерәмийа шьхöле хwә нәда сәкьнандьне у дәсте хwә данәхьст, Йаһоwа әw гöман кьрийә кö wе хьлаз кә.

Мәсәлә, щарәке һьнә мәрьвед хьраб Йерәмийа гьртьн у авитьнә чʹәла кʹур, йа кö бь һʹәрʹийе тʹьжә бу. Ль wьр Йерәмийа бе хwарьн у ав һиштьн. Әw меред хьраб дьхwәстьн wәки Йерәмийа дь чʹәледа бьмьрийа. Ле бь аликʹарийа Йаһоwа әw хьлаз бу!

Тö чь дәрс дькари сәва хwә жь Йерәмийа һьлди?~ Рʹаст ә щарна әw дьтьрсийа жи, ле йәкә нәдьсәкьни у тʹьме дәрһәqа Йаһоwа хәбәр дьда. Чахе тö жи мәрийарʹа хәбәр ди дәрһәqа Йаһоwа, дьqәwьмә әwана wе qәрфе хwә тә бькьн йан жи ль сәр тә һерс кʹәвьн. Жь бо ве йәке дьбәкә тö дәстпеки бьтьрси у бьхәльфи. Ле чь жи һәбә тʹö щар нәсәкьнә у дәрһәqа Йаһоwа тʹьме мәрийарʹа хәбәр дә. Һьнге чаwа кö Йаһоwа али Йерәмийа кьр, wе али тә жи бькә.