Сәрһати 77
Ԝана Сәре Хԝә Бәр Пʹут Данәни
ТЕ БИРА тә кӧ әм дәрһәԛа се гәдед щаһьл пеһʹәсийан? Бәле, әԝана һәвалед Данийел бун, йе кӧ жь сәр тʹәхт-сьфьре пʹадше хԝарьн нәдьхԝарьн. Бабилонийа навед ԝан данин Шәдрак, Мәшак у Абәд-Нәго. Ле ньһа бьньһерʹә әԝана чь дькьн. Гәло чьрʹа әԝана мина мәрийед дьне сәре хԝә ль бәр пʹут данайньн? Ԝәрә әм пебьһʹәсьн.
Те бира тә кӧ Йаһоԝа Дәһә ԛанун, йане Дәһә тʹәми, ньвиси бу? Йәк жь ван ԛануна дьвежә: «Хенщи мьн, бәр тʹӧ хӧданед дьн сәре хԝә данәйньн». Рʹастә әв ԛанун сәва се гәдед щаһьл һеса нибу бьԛәдиньн, ле әԝана йәкә пәй ве ԛануне дьчун у ԝи дьле хԝәда хԝәйи дькьрьн.
Әв пʹуте тӧ ль сәр шькьл дьвини, Нәбукәднәсәр пʹадшайе Бабилоне чекьрьбу. Әԝи гази гәлә меред навдар у гьринг кьрьбу, ԝәки әԝана сәре хԝә ль бәр дайньн. Нәбукәднәсәр ӧса жи готә һʹәму мәрийа: «Гава һун дәнге кʹӧлама, борʹийа у чәнга бьбьһен, һун гәрәке бькʹәвьн ль сәр чока у сәре хԝа ль бәр пʹуте зерʹ дайньн. Ле әԝ кәсед кӧ сәре хԝә бәр пʹут данәнин, ԝе бенә авитьне нав фьрʹна бь агьрва вехьсти».
Ле Шәдрак, Мәшак у Абәд-Нәго сәре хԝә ль бәр пʹут данәнин. Гава Нәбукәднәсәр әв йәк пеһʹәсийа, әԝ гәлә һерс кʹәт. Әԝи гази ԝан кьр, у диса щарәке жи жь ԝан хԝәст кӧ әԝана сәре хԝә ль бәр пʹут дайньн. Ле гӧмана Шәдрак, Мәшак у Абәд-Нәго ль сәр Йаһоԝа бу. Ԝана готә Нәбукәднәсәр: «Хԝәдайе әм ԝирʹа ԛӧльх дькьн, дькарә мә хьлаз кә. Ле һәрге әԝ мә хьлаз накә, йәкә әм сәре хԝә ль бәр пʹуте зерʹ данайньн».
Жь бо ван гьлийа Нәбукәднәсәр һе зедә һерс кʹәт. Ләма жи әԝи хӧламед хԝәрʹа фәрман да: «Фьрʹне һʹәфт щара һе гӧр вехьн!» Паше әԝи гази әскәред хԝәйә ԛәԝат кьр, ԝәки Шәдрак, Мәшак у Абәд-Нәго гьредьн у бавежьнә фьрʹне. Фьрʹнә ӧса ԛайим дьшьхӧли, кӧ әв әскәр жь алава агьр мьрьн. Ле Гәло чь сәре Шәдрак, Мәшак у Абәд-Нәго һат, нә ԝана авитьнә фьрʹне?
Гава пʹадша незики фьрʹне бу, тьрсәкә мәзьн кʹәтә дьле ԝи. Әԝи пьрс кьр: «Әв чь әщев ә, нә мә тʹәне се мәри гьреда у авитә фьрʹне?»
«Бәле, мә һәма ӧса жи кьр», хӧлама щава хԝә дан.
Ле Нәбукәднәсәр гот «Ле әз нав агьр чар мәрийа дьвиньм, әԝана гьредайи ниньн у һьн жи агьр зийане ԝанарʹа найнә. Йе чара жи мина мьлйакʹәта йә». Әԝ һе незики фьрʹне бу у кьрә гази: «Шәдрак! Мәшак! Абәд-Нәго! Жь ԝьр дәркʹәвьн, Хԝәдайе ԝә һун ԝирʹа ԛӧльх дькьн Хԝәдайе Һьмзор ә!»
Гава әԝана жь фьрʹне дәркʹәтьн, һәр кәс жь ԝан дит кӧ ԝана жь агьр ԛә зийанәк жи нәстандьн. Паше Нәбукәднәсәр гот: «Бьра Хԝәдайе Шәдрак, Мәшак у Абәд-Нәго рʹумәт бә, әԝи ԝана хьлаз кьр бь мьлйакʹәтәки хԝә, чьмки ԝана хенщи Хԝәдайе хԝә, сәре хԝә бәр тʹӧ кәси данәнин у пʹутпʹарьсти нәкьрьн».
Әв сәрһати мәсәләкә баш ә сәва мә, ԝәки чь жи нибә тʹьме гӧмана хԝә бьдьнә Йаһоԝа у ԝирʹа амьн бьминьн!
Дәркʹәтьн 20:3; Данийел 3:1-30.