Сәрһати 75

Чар Гәдә Ль Бабилоне

НӘБУКӘДНӘСӘР пʹадша һʹәму исраелийед хԝәнди тʹәви хԝә бьрә Бабилоне. Паше әԝи жь нав ԝан, һьнә гәде щаһьл жьбарт, йе кӧ жь һʹәмушка бәдәԝ у аԛьлтьр бун, у чар гәде ӧса тӧ дькари ль сәр ви шькьли бьвини. Наве йәки Данийел ә, йе дьненарʹа жи бабилонийа наве ӧса данин: Шәдрак, Мәшак у Абәд-Нәго.

Нәбукәднәсәр дьхԝәст ԝан гәда бьда һинкьрьне, ԝәки пашԝәхтийе әԝана ԝирʹа ԛӧльх кьн. Се сал әԝана гәрәке бьһатана һинкьрьне у паше нав ԝан жь һʹәмушка аԛьлтьр ԝе бьһатана жьбартьне сәва кӧ али пʹадша бькьн проблема сафи кьн. Пʹадша ӧса жи дьхԝәст, ԝәки ԝәʹде һинбуне әԝана сьһʹәт-ԛәԝат бьн у сәр хԝә бьн. Ләма жи Нәбукәднәсәр фәрман да, ԝәки хԝарьне баш жь тʹәхт-сьфьре ԝи, бьдьнә ԝан гәде щаһьлрʹа.

Ньһа дина хԝә бьдә Данийел. Әԝ тʹәви сәркʹаре тʹәмамийа хӧламед пʹадша хәвәр дьдә, наве ԝи Ашкәназ бу. Данийел ԝирʹа дьвежә кӧ әԝ нахԝазә ԝан хԝарьнед бьһа жь тʹәхт-сьфьре пʹадша бьхԝә. Ләма жи Ашкәназ бь әʹщьз дьвежә: «Пʹадша хԝәха ида ԛьрар кьр һуне чь бьхԝьн у чь жи вәхԝьн. Ле һәрге һун жь гәдед дьне һе сьст у нә сьһʹәт-ԛәԝат бенә хӧйане, пʹадша ԝе мьн бькӧжә».

Ләма жи Данийел ида дьчә щәм мьԛатчийе хԝә, йе кӧ Ашкәназ ль сәр ԝан кʹьвш кьрьбу. Данийел гӧтә ԝи: «Бь кʹәрәма хԝә мә нава 10 рʹожа бьщерʹьбинә, тʹәне ав у хԝарьнед бь пʹьнщарʹа у бе гошт бьдә мә. Паше мә бәрамбәри гәдед дьне бькә, йе кӧ хԝарьна пʹадша дьхԝьн, у тӧйе бьвини кʹи жь мә ԝе һе рʹьнд бе хӧйане».

Мьԛатчи ԛайил бу тʹәви Данийел, у гава 10 рʹож дәрбаз бун Данийел у се һәвалед ԝи, жь гәдед дьне һе сьһʹәт-ԛәԝат дьһатьн хӧйане. Ләма жи мьԛатчи һишт кӧ әԝана дәԝса хԝарьнед пʹадша, диса жи хԝарьне бе гошт у пʹьнщарʹа бьхԝьн.

Се сал дәрбаз бун у ԝан һʹәму гәда бьрьн бәр Нәбукәднәсәр. Пʹадша тʹәви ԝан һʹәмушка хәвәр да у те дәрхьст кӧ Данийел у се һәвалед ԝи жь һʹәмушка аԛьлтьр ьн. Ләма жи Нәбукәднәсәр һишт ԝана щәм хԝә, ԝәки аликʹари бьдьнә ԝи. Данийел, Шәдрак, Мәшак у Абәд-Нәго, щава һʹәму пьрсед пʹадша у һʹәму чәтьнайа, жь аԛьлбәндед у кʹәшишед пʹадша, 10 щара баштьр дькарьбун сафи кьрана.

Данийел 1:1-21.