Сәрһати 78
Ньвисара Сәр Диԝер
БӘЛШАТСАР нәбийе Нәбукәднәсәр ә, у ньһа дь Бабилонеда әԝ пʹадшатийе дькә. Дәрбәке Бәлшатсар пʹадша һʹәзара мәрийед гьринг тʹәглиф дькә щәм хԝә ль сәр кʹефәкә гәлә мәзьн. Әԝана жь кʹасед зерʹ у зив вәдьхԝарьн, йе кӧ бабилонийа жь пʹарьстгәһа Йаһоԝа дь Оршәлимеда һьлдабун. Ле бьньһерʹә чь ль вьр дьԛәԝьмә! Ньшкева дәсте мәрьвәки һатә хӧйане, йе кӧ пе тʹьлийа хԝә тьштәки ль сәр диԝер дьньвиси. Зьраве һʹәмушка ԛәтийабу.
Бәлшатсар гази аԛьлбәнда дькә у дьвежә: «Кʹи жь ԝә бькарьбә ван гьлийа бьхунә у шьровәкә, ԝе һәбунәкә мәзьн бьстинә у нава пʹадшатийеда щийе сьсийа ԝе бьгьрә». Ле тʹӧ кәс ньвисара сәр диԝаре нькарә, нә бьхԝьнә нә жи шьровәкә.
Гава дийа пʹадша дәнге ԝан дьбьһе, дькʹәвә ве ода мәзьн у пʹадшарʹа дьвежә: «Лаԝо, һиви тә дькьм ӧса бәрхԝә нәкʹәвә. Ль вьр мерәк һәйә, йе кӧ хӧданед пироз нас дькә. Чахе калке тә Нәбукәднәсәр һе сах бу, әԝи әв мер ль сәр һʹәму аԛьлбәнда кʹьвш кьрьбу. Наве ԝи Данийел ә. Бьшинә пәй ԝи, у әԝ ԝе тәрʹа һʹәму тьшти шьровәкә».
Данийел перʹа-перʹа анинә щәм пʹадша. Пешийе Данийел ван һʹәму пʹешкʹеша, йе кӧ пʹадша соз дабу, инкʹар дькә. Паше шьровәдькә чьрʹа Йаһоԝа Нәбукәднәсәр жь тʹәхте пʹадшатийе авит: «Нәбукәднәсәр гәлә ԛӧрә бьбу, у ләма Йаһоԝа ԝи щәза кьр», Данийел готә Бәлшатсар.
Паше әԝи сәрда зедә кьр: «Ле тә һʹәму тьштед кӧ сәре калке тә ԛәԝьмин заньбу, ле йәкә мина ԝи ԛӧрә буйи. Тә кʹасед зерʹ у зив жь пʹарьстгәһе Йаһоԝа һьлдайә у жь ԝан вәдьхԝи. Дәԝса ԝе йәке ԝәки сәре хԝә ль бәр Әʹфьрандаре Мәзьн дайни, тӧ хӧданед жь дара у кәвьра рʹумәт дьки. Ләма жи Хԝәде бь дәстәки гьлийед ӧса ньвисийә».
«Аһан вьра чь те готьне: ‹МӘНӘ, МӘНӘ, ТӘКӘЛ у ПӘРӘС›».
«МӘНӘ те һʹәсаве кӧ Йаһоԝа рʹожед пʹадшатийа тә жьмарти йә, у кʹотасийа ԝи ани. ТӘКӘЛ те һʹәсаве, ԝәки тӧ ль сәр мезине һати кʹьшандьне у гәлә кем һати дитьне. Ле ПӘРӘС те һʹәсаве, ԝәки пʹадшатийа тә ԝе бькʹәвә бьн дәсте Мәдийайе у Фарьса».
Чахе Данийел һе хәвәр дьда, әскәред Мәдийайе у Фарьса рʹасти жи дәстпекьрьн дадьнә Бабилоне. Ԝана шәһәр зәфт кьр у Бәлшатсар кӧштьн. Ньвисара ль сәр диԝаре һәма ԝе шәве һатә сәри! Ле гәло чь ԝе сәре исраелийа бьԛәԝьмә? Дәрһәԛа ве йәке әме паше пебьһʹәсьн, кʹа пешийе әм бьньһерʹьн чь һатә сәре Данийел.
Данийел 5:1-31.