Сәрһати 79
Данийел Авитнә Бире Тʹәви Шера
ԜӘЙ ль һʹале Данийел! Әԝ кʹәтә бире нав шера! Гәло чьрʹа әв йәк ԛәԝьми? Кʹи Данийел авитә бире? Кʹа әм пебьһʹәсьн.
Ньһа ль Бабилоне Дарйус пʹадшатийе дькә. Дарйус Данийел гәлә һʹәз дькә, чьмки әԝ мәрики ԛәнщ у билан ә. Дарйус кʹьвш кьр Данийел ча сәркʹарәки мәзьн дь пʹадшатийа хԝәда. Жь бо ве йәке гәләка дәстпекьрьн һʹәвсудийе Данийел бькьн. Аһан ԝана чь кьр.
Әԝана чунә щәм Дарйус у ԝирʹа готьн: «Йа пʹадшайе мә, мә ԛьрар кьр кӧ ԛанунәкә ӧса бе ньвисаре, ԝәки һәр кәс нава 30 рʹожа бьра хенщи тә тʹӧ кәсирʹа дӧа нәкьн. Ле кʹи жи гӧрʹа ве ԛануне нәкьр, бьра бе авитьне бире тʹәви шера». Дарйус һаш пе тʹӧнә бу чьрʹа әԝана дьхԝазьн ве ԛануне дәрхьн. Ле әв фькьр дьле ԝи хԝәш һат, ләма жи әԝи изьн да кӧ ве ԛануне бьньвисьн. Ньһа әв ԛанун ида нькарә бе гӧһастьне.
Данийел пеһʹәсийа дәрһәԛа ве йәке, ле йәкә әԝ дьчә мала хԝә, ԝәки ча һәр гав Хԝәдерʹа дӧа бькә. Әԝ меред хьрав заньбун кӧ Данийел йәкә ԝе Хԝәдайе хԝә Йаһоԝарʹа дӧа бькә. Әԝан тʹьре кӧ нета ԝан ԝе бе гьһиштьне, ләма жи әԝана ша дьбун.
Гава Дарйус фәʹм кьр чьрʹа ԝана дьхԝәст әв ԛанун дәрхьста, әԝ гәлә бәр хԝә кʹәт. Ле ида дәрәнг бу, әԝи нькарьбу ԛанун бьда гӧһастьне. Ләма жи дьхԝази-нахԝази әԝи фәрман да кӧ Данийел бавежьнә нав шера. Ле әԝи готә Данийел: «Гӧмана мьн һәйә, кӧ Хԝәдайе тӧ ԝирʹа ԛӧльх дьки, ԝе тә хьлаз кә».
Дарйус ӧса бәр хԝә дькʹәт кӧ тʹәмамийа шәве нькарьбу рʹаза. Бьньһерʹә ль сәр шькьл те кʹьвше кӧ әԝи чь кьр. Сьбәһ зу әԝ перʹа-перʹа чу бәр бира шера у гази Данийел кьр: «Данийел, ԛӧльхкʹаре Хԝәдайе сах! Дьбә кӧ, Хԝәдайе тә, тә жь шера хьлаз кьрийә?»
Ԝи чахи Данийел щава хԝә да: «Хԝәдайе мьн мьлйакʹәтәки хԝә шанд у дәве шера да гьртьне, у ԝана тʹӧ зийан нәданә мьн».
Шабуна пʹадша беһʹәсав бу. Әԝи фәрман да, ԝәки Данийел жь бире дәрхьн. Паше Дарйус ԝан меред хьрав, йе кӧ дьхԝәстьн Данийел бькӧжьн, авитә нав шера. Шера перʹа-перʹа һәстуйед ԝан һур-һури кьрьн, ӧса кӧ әԝана нә жи гьһиштьнә бьне бире.
Паше Дарйус пʹадша сәва һʹәму мәрийа гьлийе ӧса ньвиси: «Әз фәрман дьдьм, ԝәки һәр кәс бьра ԛәдьре Хԝәдайе Данийел бьгьрә. Әԝ кʹәрәмәтед мәзьн дькә. Әԝи ԛӧльхкʹаре хԝә Данийел жь дәве шера хьлаз кьрийә».
Данийел 6:1-28.