Сәрһати 83

Диԝаред Оршәлиме

ҺӘЛА бьньһерʹә ль вьр чь дьԛәԝьмә! Исраели диԝаред Оршәлиме ава дькьн. Ԝәкә 152 сал пешда, чахе Нәбукәднәсәр пʹадша Оршәлим зәфт кьр, әԝи ӧса жи диԝаред ԝи һьлшандьбу у дәрийед ԝи жи шәԝьтандьбу. Паши ԝе йәке һʹәта ве дәме диԝаред Оршәлиме нә һатьбун ава кьрьне.

Ле бьдә һʹәсаве хԝә, бейи диԝара, исраелийа чаԝа хԝә тʹәхмин дькьрьн. Әԝана бь тьрс дьжитьн, чьмки нәйаред ԝан һеса дькарьбун бькʹәтана шәһәр у шәрʹкьрана тʹәви ԝан. Ле ахьрийа-ахьрийе мерәк бь наве Нәһәмийа али ԝан дькә кӧ диԝара тʹәзәда ава бькьн. Ле гәло Нәһәмийа кʹи йә?

 Нәһәмийа жь шәһәре Суса йә, у әԝ исраели йә. Те бира тә кӧ Мордокʹай у Әстәр ханьм жи жь Суса бун. Нәһәмийа щәм пʹадша ԛӧльх дькә, ләма жи Мордокʹай у Әстәр ханьм сәва ԝи нас бун у незик бун. Ле Кʹьтеба Пироз дьвежә кӧ Нәһәмийа нә кӧ щәм Аһʹашԝероше мере Әстәр ԛӧльх дькьр, ле щәм Артаһшашт, йе кӧ паши Аһʹашԝерош бу пʹадша.

Ча әм ида пеһʹәсийан, Артаһшашт пʹадшаки гәлә дьлрʹәʹм бу. Әԝи гәлә пʹәрә да Әзра сәва авакьрьна пʹарьстгәһа Йаһоԝа. Ле Әзра перʹа нәгиһанд кӧ диԝара жи ава бькә. Ԝәрʹен әм пебьһʹәсьн Нәһәмийа чаԝа әв шьхӧл пек ани.

Нәһәмийа бәр пʹадша мәйгәри дькьр, демәк мьԛати шәрава пʹадша дьбу. Әв шьхӧләкә фәрз бу, чьмки әԝ гәрәке мьԛат буйа, ԝәки дьжмьн жәʹре нәкьнә шәраве у пʹадша нәйе кӧштьне.

Паши ԝе йәке ча Әзра пʹәрә сәва авакьрьне станд ԝәкә 13 сал дәрбаз бьбу. Рʹожәке бьре Нәһәмийа Һанани тʹәви чәнд мера жь Оршәлиме һатьбу, кӧ сәрики Нәһәмийа хә. Ԝана гьли кьр Нәһәмийарʹа, ԝәки диԝаред шәһәр тʹӧнә нә у чьԛа кӧл-дәрде исраелийа һәнә. Нәһәмийа гәлә бәрхԝә кʹәт у дәстпекьр дәрһәԛа ве йәке Йаһоԝарʹа дӧа бькә.

Рʹожәке пʹадша дина хԝә дайе кӧ Нәһәмийа мәʹдәкьри йә у ԝи пьрси: «Тӧ чьрʹа ӧса мәʹдәкьри йи?» Нәһәмийа ԝирʹа гьли кьр кӧ диԝаред Оршәлиме тʹӧнә нә у щьмәʹт жи нава кӧл-дәрда йә, ләма жи әԝ бәрхԝә дькʹәвә. Һинге пʹадша жь ԝи пьрси: «Ле хԝәстьна тә чь йә?»

Нәһәмийа готе: «Бьһелә әз һәрʹьм Оршәлиме, ԝәки диԝаред ԝи тʹәзәда ава бькьм». Әм заньн кӧ Артаһшашт гәлә баш бу, ләма жи әԝи һишт кӧ Нәһәмийа һәрʹә, ле сәрда жи али Нәһәмийа кьр у сәва авакьрьне дар дәст хьст. Һьнә ԝәʹдә шунда Нәһәмийа һатә Оршәлиме у һʹәму нетед хԝә щьмәʹтерʹа гьли кьр. Әв нет дьле исраелийа хԝәш һат у ԝана гот: «Кʹа әм авакьрьне дәстпекьн».

Гава дьжмьнед ԝан дәрһәԛа авакьрьне пеһʹәсийан һерс кʹәтьн у готьн: «Әм гәрәке һәрʹьн у ԝана бькӧжьн, у бь ве йәке авакьрьне бьдьнә сәкьнандьне». Ле Нәһәмийа пеһʹәсийа дәрһәԛа ве йәке. Әԝи шур у рʹьм да хәваткʹаред хԝә гӧтә ԝан: «Жь нәйаред хԝә нәтьрсьн. Ле шәрʹ бькьн тʹәви ԝан сәва жьн-зарʹед хԝә, бьрайед хԝә у сәва малед хԝә».

Щьмәʹт жи гәлә мерхас бьбу. Ԝана чʹәкед хԝә шәв рʹож һазьр дьгьртьн, у һьн жи авакьрьна диԝара нәдьданә сәкьнандьне. Ӧса ԝана диԝаред Оршәлиме нава 52 рʹожа ава кьрьн. Ньһа щьмәʹта исраели дь Оршәлимеда бе хоф хԝә тʹәхмин дькьрьн. Нәһәмийа у Әзра ԛанунед Хԝәде мәрийа һин дькьрьн у щьмәʹт гәлә бәхтәԝар бу.

Ле бәхтәԝарийа ԝан йәкә нә мина бәре бу, чьмки ньһа пʹадше Фарьстане ль сәр ԝан сәркʹарти дькә у дьхԝази-нахԝази әԝана гӧрʹа ԝида ньн. Ле Йаһоԝа соз дьдә исраелийарʹа, кӧ пʹадшаки ну ԝе ԝанрʹа бе кʹьвш кьрьне, йе кӧ әʹдьлайийе ԝе бинә мәрийарʹа. Гәло кʹи йә әв пʹадша? Әԝе чаԝа әʹдьлайийе бинә сәр әʹрде? Ԝәкә 450 сал ԝе дәрбаз бьн, кӧрʹәки гьринг у навдар ԝе бе буйине у щава ван пьрса ԝе бенә әʹйан кьрьне. Дь сәрһатийа дьнда әме һәма дәрһәԛа ве йәке хәвәр дьн.

Нәһәмийа сәре 1 һʹәта 6.