Сәрһати 84
Мьлйакʹәт Һатә Щәм Мәрйәм
НАВЕ ԝе кәчʹьке бәдәԝ Мәрйәм ә. Мәрйәм исраели йә у әԝ дь Ньсрәтеда дьжи. Хԝәде заньбу кӧ Мәрйәм ԛизәкә гәлә баш ә. Ләма жи әԝи мьлйакʹәтәк бь наве Щьбрайил шанд щәм ԝе кӧ тьштәк ԝерʹа бежә. Ле гәло Щьбрайил чь гәрәке бежә Мәрйәм? Ԝәрә әм пебьһʹәсьн.
Щьбрайил гьлийед ӧса готе: «Сьлав ль тә ԛизька кʹәрәм кьри, Йаһоԝа тʹәви тә йә». Чьмки әв щара пешьн ә кӧ Мәрйәм рʹасти мьлйакʹәт һат, у һьн жи әԝе фәʹм нәкьр сьлава ԝи чь дьһатә һʹәсаве, ләма жи Мәрйәм шәпьрзә бу. Ле мьлйакʹәт һатә бәр дьле ԝе.
Щьбрайил ле бь гьлийед ӧса һеса кьр: «Мәрйәм, нәтьрсә! Чьмки тә кʹәрәм жь Хԝәде станд, у ләма жи Хԝәде бь тәрʹа кʹәрәмәтәк ԝе бькә. Ньһа те һʹәмлә дәрейи, кӧрʹәки бини у наве ԝи Иса дайни».
Паше Щьбрайил шьровәкьр: «Әԝ ԝе гәлә мәзьн бә, у Кӧрʹе Йе Һәри Жорьн ԝе бе готьне. Йаһоԝа ԝе ԝи бькә пʹадша, ча мина Даԝьд. Ле Иса һʹәта-һʹәтайе ԝе пʹадшатийе бькә у хьлазийа пʹадшатийа ԝи ԝе тʹӧнәбә!»
Ле Мәрйәм мьлйакʹәтрʹа гот: «Әв һʹәму тьшт ԝе чаԝа бьбә, нә әз меркьри ниньм у һәла һе ԛиз ьм, әзе чаԝа зарʹ биньм?»
Мьлйакʹәт ле вәгәрʹанд у гот: «Ԛәԝата Хԝәде ԝе бе сәр тә, ләма жи әԝ Кӧрʹе Хԝәде ԝе бе готьне». Паше әԝи сәрда зедә кьр: «Елизабете мәрьве хԝә бинә бира хԝә. Ԝерʹа дьготьн кӧ әԝ ида әʹмьре хԝәда мәзьн ә у нькарә зарʹа бинә. Ле ньһа әԝ һʹәмлә йә у зутьрке ԝерʹа кӧрʹ бьбә. Дьвини, кӧ щәм Хԝәде тьштәки нәбуйи тʹӧнә».
Ԝи чахи Мәрйәме гот: «Әз хӧламе Хԝәде мә! Бьра әв һʹәму тьштед тә готийә, ль сәр мьн бенә сәри». Паши ван гьлийа мьлйакʹәт чу.
Мәрйәм жи перʹа-перʹа чубу щәм Елизабет. Гава Елизабет дәнге Мәрйәм бьһист, зарʹа зьке ԝеда львийа. Елизабет бь рʹӧһʹе Хԝәдева тʹьжи бу у готә Мәрйәм: «Тӧ дь нав кʹӧлфәтада бьмбарәк и». Мәрйәм ԝәкә се мәһ щәм Елизабет ма, у паше вәгәрʹийа мала хԝә Ньсрәте.
Мәрйәм тʹәви мерәк бь наве Усьв нишан кьри бу. Ле гава Усьв пеһʹәсийа кӧ Мәрйәм һʹәмлә йә, әԝ пʹошман бу у нәдьхԝәст бьзәԝьщийа. Ләма жи мьлйакʹәте Хԝәде Усьврʹа хӧйа бу у готә ԝи: «Нәтьрсә, кӧ дәргистийа хԝә Мәрйәме бьстини. Чьмки зарʹа кӧ ԝерʹа бьбә жь Хԝәде йә». Ӧса Усьв у Мәрйәм зәԝьщин, у һивийа буйина Иса дьбун.