Сәрһати 85
Иса Дь Тʹәԝледа Һатә Буйине
ЗАНИ әв зарʹа бьчʹук кʹи йә? Бәле, әв Иса йә. Бьньһерʹә, әԝ дь тʹәԝледа һатә буйине, у Мәрйәм ԝи пʹечʹәкеда пʹечʹа у дани афьрʹе. Зани кӧ дь тʹәԝледа мәрьв һʹәйԝана хԝәй дькьн, ле дь афьрʹеда сәва чʹеләка у һʹәйԝанед дьне гиһа датиньн, кӧ әԝана бьхԝьн. Ле гәло чьрʹа Усьв у Мәрйәм һатьнә вьр? Нә әв щи сәва буйина зарʹ баш нинә, рʹаст ә?
Бәле, рʹаст ә. Ле ԝәки ӧса нә ԝәрә әм пебьһʹәсьн бь рʹастийе чь ԛәԝьмибу. Сәркʹаре Рʹоме Аԝгустойе Ԛәйсәр фәрман да, ԝәки һәр кәс бе навньвисаре дь ԝе шәһәреда, кʹидәре һатьбу буйине. Усьв ль Бәйтләһʹме һатьбу буйине ләма жи әԝана чунә ль ԝьр. Чахе әԝана гьһиштьнә шәһәр, ԝана отʹах хԝәрʹа нәдит сәва кӧ бьминьн, ләма жи һатьнә тʹәԝле тʹәви һʹәйԝана. Һәма ве шәве жи Мәрйәмрʹа Иса һатә буйине! Ле шькьр Хԝәдерʹа, әԝ сах-сьламәт ә.
Ньһа дина хԝә бьдә шьвана. Әԝана шәве дь чоледа мьԛати пәзед хԝә дьбун, у ньшкева дора ԝан шәԝԛ һатә хӧйане. Әв мьлйакʹәт бу! Шьван гәләк тьрсийан. Ле мьлйакʹәт готә ԝан: «Нәтьрсьн! Әз һатьм мьзгинийа шабунәкә мәзьн бьдьмә ԝә. Иро ль Бәйтләһʹме ԝәрʹа Мәсиһ Хӧдан һатә буйине. Әԝ ԝе бьбә Хьлазкʹаре мәрийа! Һуне ве зарʹоке пʹечʹәкеда пʹечʹайи афьрʹда бьбиньн». Паше ньшкева гәлә мьлйакʹәт кʹьвш бун у дәстпекьрьн Хԝәде рʹумәт кьн. Шьван жи ләз кʹәтьн кӧ Иса бьвиньн, у зарʹа тʹәзәбуйи дь тʹәԝледа дитьн.
Ле зани чьрʹа Иса мәрики ӧса гьринг ә? Зани бь рʹастийе әԝ кʹи йә ? Те бира тә, дь сәрһатийа пешьнда әм дәрһәԛа кӧрʹе Хԝәдейә пешьн пеһʹәсийан. Кӧрʹе Хԝәде ԝәʹде чекьрьна һʹәму тьшти сәр әʹзмана у сәр әʹрде, али баве хԝә дькьр. Аһан кʹи йә бь рʹастийе әԝ Иса, йе кӧ һежа һатә буйине!
Бәле, Йаһоԝа әʹмьре кӧрʹе хԝәйи пешьн жь әʹзмана дәрбази зьке Мәрйәм кьр. Рʹаст ә Иса мина зарʹед дьне ль зьке дийа хԝәда мәзьн дьбу, ле бь рʹастийе әԝ нә мина зарʹед дьн бу, чьмки әԝ кӧрʹе Хԝәде бу. Хьлазийе, ча әм ида пеһʹәсийан, Иса дь тʹәԝледа ль Бәйтләһʹме һатә буйине. Ньһа дьбәк жи тәрʹа һе фәʹмдари йә, чьрʹа мьлйакʹәт ӧса ша дьбун гава мәрийарʹа әʹламәти дькьрьн, дәрһәԛа буйина Иса.