Сәрһати 89
Иса Пʹарьстгәһе Тʹәмьз Дькә
ҺӘЛА бьньһерʹә Иса чьԛас һерсә. Ле тӧ зани чьрʹа? Чьмки мәрийед йе кӧ дь пʹарьстгәһеда ль Оршәлиме дьхәвьтин, гәлә тьмакʹар бун, у әԝана ль сәр ԝан мәрийа пʹәрә чедькьрьн, йе кӧ дьһатьн пʹарьстгәһе сәре хԝә ль бәр Хԝәде дайньн.
Һәла дина хԝә бьдә пәз дәԝара у кәвотка. Әв мәрийед тьмакʹар ԝан һʹәйԝана, һәма ль вьр дь пʹарьстгәһеда дьфьрошьн. Ле зани чьрʹа? Чьмки исраелийарʹа сәва ԛӧрбанкьрьне һʹәйԝан лазьм бун.
Ԛанунәки Хԝәде ӧса һәбу кӧ әԝ кәс йе кӧ шаши дькьр гәрәке Хԝәдерʹа ԛӧрбан бьанийа. У диса дәрәще дьн һәбун чахе исраели ԛӧрбане дьанин. Ле исраелийа жь кʹидәре гәрәке ван һʹәйԝана сәва ԛӧрбане дәстхьста?
Щәм һьнәка һʹәйԝан һәбун у ԝана дькарьбу һʹәйԝанед хԝә Хԝәдерʹа ԛӧрбан кьра. Ле ниве зәʹф йане һʹәйԝанед ԝан тʹӧнә бун йане ӧса жь дурва дьһатьн кӧ нькарьбун тʹәви хԝә һʹәйԝана һьлдьн. Ләма жи әԝана дьһатьн пʹарьстгәһе у һәма ль вьр һʹәйԝана дькʹьрийан. Ле әԝ кʹи дьфротьн баһе һʹәйԝана зедә дькьрьн, мәрийа дьхапандьн у пʹәрә ль сәр ԝан чедькьрьн. Ле бь рʹастийе изьна ԝан ԛә тʹӧнәбу дь пʹарьстгәһеда тьшта бьфьрошьн.
Аһан чьма Иса ӧса һерс кʹәтьбу. Әԝи пʹәрʹед сәрафа рʹет у тʹәхтед ԝан ԝәлгәрʹанд. Әԝи ӧса жи жь бәна ԛамчик чекьр, у ԝана һʹәмушка тʹәви пәз у дәԝаред ԝанва жь пʹарьстгәһе дәрхьст. Паше әԝи кәвоткфьрошарʹа фәрман да: «Вана жь вьр һьлдьн! Иди мала Баве мьн нәкьнә базаргәһ».
Һьнә жь шагьртед Иса жи ԝи чахи тʹәви ԝи бун. Әԝана жь кьред Иса гәлә әщев ман. Ԝи чахи һатә бира ԝан кӧ дәрһәԛа Кӧрʹе Хԝәде ӧса һатьбу ньвисар: «Һʹәзкьрьна һьндава мала Хԝәдеда ԝе мина агьре ԝида бьшьхӧлә».
Гава Иса ԝәʹде әʹида Щәжьне ль Оршәлиме бу, әԝ гәлә кʹәрәмәта дькьр. Паше Иса жь Щьһустане дәркʹәт у рʹе кʹәт һʹәта Щәлиле. Рʹева әԝ ль Самәрйайерʹа дәрбаз дьбу, у ԝәрә әм пебьһʹәсьн ль вьр чь дьԛәԝьмә.