Гәло Һʹәйԝан Дьчьн Сәр Әʹзмана?
Щаба Кʹьтеба Пироз
Кʹьтеба Пироз һин дькә, ԝәки жь һʹәму әʹфринед сәр әʹрде, тʹәне кʹомәкә мәрьва ԝе һәрә сәр әʹзмана (Әʹйанти 14:1, 3). Әԝана ԝе ча пʹадша у кʹаһин тʹәви Иса сәр әʹзмен сәрԝертийе бькьн (Луԛа 22:28-30; Әʹйанти 5:9, 10). Ле ниве зәʹф жь мәрьва ԝе бенә сахкьрьне, сәва кӧ сәр әʹрде щьнәте бьжин (Зәбур 37:11, 29).
Кʹьтеба Пирозда тʹӧ щийа найе готьне, ԝәки паши мьрьне һʹәйԝанед мале, бәʹса хәбәре кучʹьк дьчьн сәр әʹзмана. Әԝ йәк әʹщебмайи нинә, чьмки һʹәйԝан нькарьн бьбьн «һәвал-пʹаред ԝе газийа әʹзмен» (Ибрани 3:1). Сәва кӧ һәрʹьн сәр әʹзмана гәрәке занәбуне бьстиньн, баԝәрийе әʹйан кьн у ԛьрара Хԝәде биньн сери (Мәтта 19:17; Йуһʹәнна 3:16; 17:3). Тʹәне мәрьв ӧса һатьнә әʹфьрандьне, ԝәки һʹәта-һʹәтайе бьжин (Дәстпебун 2:16, 17; 3:22, 23).
Сәва кӧ әʹфринед сәр әʹрде бькарьбьн һәрʹьн сәр әʹзмана әԝана гәрәке бенә сах кьрьне (1 Корьнтʹи 15:42). Кʹьтеба Пирозда дәрәщә һәнә кʹидәреда дәрһәԛа сахкьрьне те готьне (1 Пʹадшати 17:17-24; 2 Пʹадшати 4:32-37; 13:20, 21; Луԛа 7:11-15; 8:41, 42, 49-56; Йуһʹәнна 11:38-44; Кʹаред Шандийа 9:36-42; 20:7-12). Ԝан һʹәму дәрәщада мәрьв һатьбун сахкьрьне, нә кӧ һʹәйԝан.
Гәло нәфса һʹәйԝана һәйә?
На. Кʹьтеба Пирозда те готьне, ԝәки һәрдӧ жи ча һʹәйԝан ӧса жи мәрьв тенә һʹәсабе нәфс (Жьмар 31:28). Чахе мәрьве пешьн Адәм һатә әʹфьрандьне, ԝирʹа нәфс нә һатә дайине, ле әԝ «бу бинбәрәки сах» (Дәстпебун 2:7). Нәфс жь дӧ әләмәнта һатийә чекьрьне: «жь аха әʹрде» у «бина жийине».
Гәло нәфс дькарә бьмьрә?
Әре. Кʹьтеба Пироз һин дькә, ԝәки нәфс дькарә бьмьрә. (Ԛануна Кʹаһинтийе 21:11; Һәзәԛел 18:20). Чахе һʹәйԝан у мәрьв дьмьрьн әԝана һәрдӧ жи диса дьбьнә аха әʹрде (Ԝаиз 3:19, 20). Бь гьлийед майин бежьн әԝана жийина хԝә ӧнда дькьн.
Гәло һʹәйԝан гӧна дькьн?
На. Гӧнәкьрьн, те һʹәсабе фькьр, һәст йан кьред ӧса чь кӧ мьԛабьли нормед Хԝәде нә. Әм заньн ԝәки щәм һʹәйԝана фәрәсәтед ӧса тʹӧнә нә, кӧ пьрсед нав-намусийева гьредайи фәʹм бькьн у сафи кьн, ләма жи әԝана гӧна накьн. Һʹәйԝан бь инстинкте дьжин (2 Пәтрус 2:12). Рʹаст ә, һʹәйԝан гӧна накьн, ле диса жи әԝана дьмьрьн.
Гәло изьн ә, ԝәки һʹәйԝана бьзериньн?
На. Рʹаст ә, Хԝәде изьн да мәрьва кӧ һʹӧкӧми сәр һʹәйԝана бькьн, ле әԝи изьн нәда ԝан, һʹәйԝана бьзериньн (Дәстпебун 1:28; Зәбур 8:6-8). Хԝәде бона һʹәму һʹәйԝана хәм дькә, һәла һе бона чʹьвикед бьчʹук жи (Уньс 4:11; Мәтта 10:29). Әԝи хьзмәткʹаред хԝәрʹа тʹәми да, ԝәки мьԛати һʹәйԝана бьн (Дәркʹәтьн 23:12; Ԛануна Дӧщари 25:4; Мәтʹәлок 12:10).