Әз Мьрьне Дьхԝазьм; Гәло Кʹьтеба Пироз Дькарә Али Мьн Бькә, Чахе Әз Дьфькьрьм Хԝә Бькӧжьм?

Щаба Кʹьтеба Пироз

Бәле! Кʹьтеба Пироз жь Хԝәде йә «кӧ бәр дьле шкәстийада те» (2 Корьнтʹи 7:6). Һәмьки Кʹьтеба Пироз кʹьтеба сьһʹәт-ԛәԝате нинә, ле әԝе али гәләка кьрийә, кӧ фькьред хԝәкӧштьне жь хԝә дур хьн. Ширәтед ве кʹьтебе дькарьн али тә жи бькьн.

• Гәло Кʹьтеба Пироз чь ширәтед керһати дьдә?

• Гәло Кʹьтеба Пирозда те готьне, дәрһәԛа мәрийа, кʹижан кӧ нәдьхԝәстьн бьжин?

• Кʹижан рʹезед жь Кʹьтеба Пироз дькарьн али тә бькьн фькьред хԝәкӧштьне жь хԝә дур хи?

• Тӧ чь дькари бьки, һәрге һәвале тә дьбежә, «Әз дьхԝазьм бьмьрьм»?

• Чь бькьм, һәрге бәре әз дьфькьрим хԝә бькӧжьм?

Гәло Кʹьтеба Пироз чь ширәтед керһати дьдә?

• Дьле хԝә мәрийарʹа вәкә.

  Кʹьтеба Пироз чь дьбежә: «Һәвал һәр гав һьз дькә, бьра буйә бона рʹожа охьрме гьран» (Мәтʹәлок 17:17).

  Әв чь те һʹәсабе: Чахе фькьред нәрʹаст дькʹәвьнә һʹьше мә, әм гәрәке аликʹарийе жь мәрьвед дьн бьхԝазьн.

  Һәрге тӧ дьле хԝә мәрийарʹа вәнәки, фькьред хьраб дькарьн тә зәфт кьн. Ле чахе тӧ һʹале хԝә гьли дьки, тӧ дьһа баш хԝә тʹәхмин дьки у сәр дәрәща хԝә щурʹәки майин дьньһерʹи.

  

  Ширәт: Һәрге фькьред нәрʹаст дькʹәвьнә һʹьше тә, һәма иро жи кәсәкирʹа дәрһәԛа ве йәке бежә; мәсәлә нәфәрәкә хԝәрʹа йан жи һәваләкирʹа.a Тӧ ӧса жи дькари һәстед хԝә, сәр кʹахазе бьньвиси.

• Аликʹари жь дохдьра бьхԝазә.

  Кʹьтеба Пироз чь дьбежә: «Сахләм нә һʹәԝще һʹәким ьн, ле нәхԝәш» (Мәтта 9:12).

  Әв чь те һʹәсабе: Чахе әм нәхԝәш ьн, әм гәрәке һәрʹьн сәр дохдьр.

  Фькьред хԝәкӧштьне, нишана нәхԝәшийа психики у емосийали йә. Тӧ гәрәке жь ве йәке шәрм нәки, чьмки әв мина нәхԝәшийед дьн ә. Нәхԝәшийед психики у емосийали тенә ԛәнщкьрьне.

  Ширәт: Паш нәхә у дәрберʹа, жь дохдьра аликʹарийе бьхԝазә.

• Бир нәкә, Хԝәде бона тә хәм дькә.

  Кʹьтеба Пироз чь дьбежә: «Нә пенщ чʹьвик бь дӧ дьравед чарԛӧруше тенә фьротане? Ле Хԝәде жь ԝан йәки жи бир накә. . . . Нәтьрсьн, һун жь гәләк чʹьвика ԛимәттьр ьн» (Луԛа 12:6, 7).

  Әв чь те һʹәсабе: Тӧ сәва Хԝәде ԛимәт и.

  Дьбә кӧ тӧ дьфькьри, ԝәки кәсәк тә һʹәз накә у бона тә нафькьрә, ле Хԝәде һʹале тә дьвинә у бона тә хәм дькә һьнге жи, гава тӧ нахԝази бьжийи. Зәбура 51:17-да те готьне: «Хԝәде, тӧ дьле шьканди у тʹобәкʹар бьчʹук набини». Хԝәде дьхԝазә ԝәки тӧ бьжийи, чьмки әԝ тә һʹәз дькә.

  Ширәт: Кʹьтеба Пироз лекʹолин кә, кӧ избат би ԝәки Хԝәде тә һʹәз дькә. Мәсәлә, бьньһерʹә сәре 24 жь кʹьтеба Незики Йаһоԝа бьн.

• Дӧа бькә.

  Кʹьтеба Пироз чь дьбежә: «Һʹәму хәмед хԝә бавежьнә сәр ԝи [Хԝәде], чьмки әԝ бона ԝә хәм дькә» (1 Пәтрус 5:7).

  Әв чь те һʹәсабе: Хԝәде дьхԝазә ԝәки тӧ дьле хԝә ԝирʹа вәки у һʹәму дәрд-кӧле хԝә ԝирʹа гьли ки.

  Хԝәде дькарә әʹдьлайа дьл бьдә тә у ӧса жи тә ԛәԝи кә, кӧ бькарьби дәрәща хԝәда тәйах ки (Филипи 4:6, 7, 13). Хԝәде те һәԝара ԝан, ки кӧ бь лавайа бәрбь ԝи дьчьн (Зәбур 55:22).

  

  Ширәт: Ирода дәстпекә Хԝәдерʹа дӧа бькә. Наве ԝи һьлдә, демәк Йаһоԝа, у дәрде дьле хԝә ԝирʹа бьрʹежә (Зәбур 83:18). Жь ԝи бьхԝазә, кӧ али тә бькә һәр тьшти сәбьр ки.

• Бьфькьрә дәрһәԛа созед Хԝәде.

  Кʹьтеба Пироз чь дьбежә: «Әв һевийа мә ԝәк ләнгәре щан е сахләм у әԝләдар ә» (Ибрани 6:19).

  Әв чь те һʹәсабе: Емосийед мә дькарьн бенә гӧһастьне, анәгори ве йәке кӧ әм ԝәʹде фьртоне гәмийеда ньн, йа кӧ вьрда-веда давежә. Ле һевийа Кʹьтеба Пироз, али мә дькә ԛәԝи сәр ньга бьсәкьньн.

  Әв һеви, мәрәма пʹучʹ нинә, ле сәр һʹиме созе Хԝәде йә, кӧ дьбежә, ԝәки ԝе һәр мәʹнийе еша дьле мә, бьдә һьлдане (Әʹйанти 21:4).

  Ширәт: Бьхуньн готара «Һевийа Баш бона Рʹожа Сьбе».

• Тьштед башва мьжул бә.

  Кʹьтеба Пироз чь дьбежә: «Дьле ша мина дәрмане керһати йә» (Мәтʹәлок 17:22).

  Әв чь те һʹәсабе: Чахе әм тьштед ӧсава мьжул ьн кӧ мә ша дькьн, ӧса әм сьһʹәт-ԛәԝата хԝә баш дькьн.

  

  Ширәт: Ԝан тьшта бькә, чь кӧ тәрʹа һʹәԝас ә. Мәсәлә, гӧһ бьдә мьԛаме рʹьһʹәт, бьхунә тьштед һʹәԝас, йан жи тьштәкә дьн бькә. Һьм жи тӧйе дьһа бәхтәԝар би, һәрге сәва мәрьвед дьн тьштәки бьки, һәла һе тьштед бьчʹук жи (Кʹаред Шандийа 20:35).

• Мьԛати сьһʹәт-ԛәԝата хԝә бә.

  Кʹьтеба Пироз чь дьбежә: «Һиндарийа ԛальб кери һьндьк тьшти те» (1 Тимотʹейо 4:8).

  Әв чь те һʹәсабе: Әм һьнге кʹаре дьстиньн, гава әм спортева мьжул дьбьн, епʹещә хәԝа хԝә дьстиньн, у хԝарьна керһати дьхԝьн.

  Ширәт: Мәсәлә, ԝе баш бә ԝәки бь ләз 15 дәԛа ре һәри.

• Бир нәкә, ԝәки жийина мәда, һәст у тьштед дьн тенә гӧһастьне.

  Кʹьтеба Пироз чь дьбежә: «Һун ньзаньн ԝе сьбе чь бе сәре ԝә» (Аԛуб 4:14).

  Әв чь те һʹәсабе: Һәрге те кʹьфше кӧ шьхӧле ԝә хьраб ә у сафикьрьна ве тʹӧнә, бир нәкьн ԝәки әв ԝәʹдәлу йә.

  Һәрге иро дәрәща тә хьраб ә, сьбе дькарә алийе башда бе гӧһастьне. Ләма жи бьхәбьтә кӧ сьст нәби (2 Корьнтʹи 4:8). Ԝәʹдә шунда әв дәрәща кӧ тә дьлтәнг дькә, ԝе бе гӧһастьне, ле һәрге бо ԝан проблема тӧ хԝә бькӧжи, ӧса проблемед тә ԝе сафи нәбьн.

  Ширәт: Бьхунә сәрһатийед Кʹьтеба Пироз дәрһәԛа ԝан мәрийа, йед кӧ дьлтәнг дьбун у нәдьхԝәстьн бьжин. Рʹаст ә ԝана пешда ньзаньбу кӧ һʹале ԝан ԝе чаԝа бә, ле ахьрийе жийина ԝан алийе башда һатә гӧһастьне. Ԝәрен әм чәнд мәсәла шеԝьр кьн.

Гәло Кʹьтеба Пирозда те готьне, дәрһәԛа мәрийа, кʹижан кӧ нәдьхԝәстьн бьжин?

Бәле. Бь рʹасти Кʹьтеба Пироз гьли дькә дәрһәԛа һьнә мәрийа, йед кӧ нәдьхԝәстьн бьжин. Хԝәде сәва ве йәке ԝана рʹәзил нәдькьр, ле али ԝан дькьр. Хԝәде дькарә али тә жи бькә.

Елйас

• Әԝ кʹе бу? Елйас пʹехәмбәрәки мерхас бу. Ле һәбу ԝәдә, кӧ әԝ жи дьлтәнг дьбу. Аԛуб 5:17 дьбежә, кӧ «Елйас хут мәрьвәки мина мә бу».

• Елйас чьма мьрьне дьхԝәст? Щарәке Елйас ӧса дьлтәнг бу, кӧ хԝә тʹәне тʹәхмин кьр, әԝ кʹәтә бәр байе тьрсе у дьфькьри кӧ әԝ нәһежайи тьштәки йә. Әԝи лавайа Йаһоԝа кьр: «Бәс ә, йа Хӧдан, ньһа щане мьн бьстинә» (1 Пʹадшати 19:4).

• Чь али Елйас кьр? Елйас дьле хԝә Хԝәдерʹа вәкьр. Гәло Хԝәде чаԝа әԝ ԛәԝи кьр? Хԝәде хәмгини у ԛәԝата хԝә һьндава ԝида да кʹьфше. Әԝи ӧса жи Елйас да баԝәркьрьне, ԝәки әԝ хьзмәткʹарәки һежайи йә кӧ дькарә диса гәләк тьшта бькә. Йаһоԝа ӧса жи аликʹарчийе бь итʹбар да Елйас.

• Бьхунә дәрһәԛа Елйас: 1 Пʹадшати 19:2-18.

Ибо

• Әԝ кʹе бу? Ибо мәрьвәки дәԝләмәнд бу, әԝ хԝәйе малбәта мәзьн бу, һьм жи әԝ бь амьни Хԝәде дьһʹәбанд.

• Ибо чьма мьрьне дьхԝәст? Жийина ԝида ньшкева һʹәму тьшт һатә гӧһастьне. Әԝи һәбука хԝә ӧнда кьр. Һʹәму зарʹед ԝи хәзәбеда мьрьн. Әԝ бь нәхԝәшийа гьран, нәхԝәш кʹәт. Хенщи ԝе йәке, ԝи нәһәԛ дькьрьн, ԝәки йан чь әԝ хԝәха нәһәԛ ә һʹәму проблемед хԝәда. Паши ԝан һʹәму тьшта Ибо гот: «Әз жь жийана хԝә вә дькәрьһьм: Һʹәта һʹәтайийе жийане нахԝазьм» (Ибо 7:16).

• Чь али Ибо кьр? Ибо Хԝәдерʹа дӧа дькьр у тʹәви мәрийа хәбәр дьда (Ибо 10:1-3). Һәвале ԝийи амьн, Әлиһу пьштгьрийа ԝи дькьр, у али ԝи кьр бь щурʹәки майин сәр дәрәще хԝә бьньһерʹә. Ле һе фәрз әԝ бу, ԝәки Ибо ширәт у аликʹарийа Хԝәде ԛәбул кьр.

• Бьхунә дәрһәԛа Ибо: Ибо 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Муса

• Әԝ кʹе бу? Муса рʹебәре щьмәʹта Исраеле бу у пʹехәмбәрәки амьн бу.

• Муса чьма мьрьне дьхԝәст? Шьхӧләки гьран сәр стийе Муса бу, у мәрьва жь бо шьхӧле ԝи, тʹьме ԝи рʹәзил дькьрьн. Жь бо ве йәке Муса гәләк дьлтәнг бу у ԛьдум кʹәт. Ләма жи әԝи лавайа Хԝәде кьр у гот: «Дьһа рʹьнд ә мьн бькӧжә» (Жьмар 11:11, 15).

• Чь али Муса кьр? Муса дьле хԝә Хԝәдерʹа вәкьр. Хԝәде али ԝи кьр у баре ԝи сьвьк кьр, бь сайа чь жи Муса хԝә дьһа баш тʹәхмин кьр.

• Бьхунә дәрһәԛа Муса: Жьмар 11:4-6, 10-17.