Сәрһати 102
Иса Сах Ә
ЗАНИ әв кʹӧлфәт у дӧ меред кӧ пешийа ԝе сәкьнинә кʹи нә? Әв кʹӧлфәт шагьрте Иса йә, наве ԝе Мәрйәма Мәждәлани йә. Ле меред бь кʹьнщед сьпи, мьлйакʹәт ьн. Гава Мәрйәм кʹәтә тʹьрба кӧ бәдәна Иса теда дани бун, әԝе дит кӧ тʹьрбә вала йә. Гәло кʹи һьлда бәдәна Иса? Ԝәрә әм пебьһʹәсьн.
Паши мьрьна Иса кʹәшиша Пилаторʹа готьн: «Гава Иса һе сах бу, әԝи дьгот кӧ рʹожа сьсийа жь мьрьне ԝе рʹабә. Ньһа әʹмьр кә кӧ әскәр мьԛати тʹьрбе бьн, у нәбә кӧ шагьртед ԝи бен бәдәна ԝи һьлдьн у щьмәʹтерʹа бежьн, кӧ әԝ жь мьрьне рʹабуйә!» Пилато изьн да кʹәшишарʹа ԝәки әԝана әскәред нобәдар бәр тʹьрба Иса бьдьнә сәкьнандьне.
Паши мьрьна Иса, рʹожа сьсийа ԛәрәбәрбанга сьбәһе зу, ньшкева мьлйакʹәтәки Йаһоԝа һатә бәр тʹьрба Иса. Әԝи кәвьр жь бәр тʹьрбе ԝеда кьр. Әскәред нобәдар жи ӧса тʹәвиһәв бун, кӧ жь тьрса жь щийе хԝә нәләԛйан. Хьлазийе гава әԝана һьндӧрʹе тʹьрбе ньһерʹин, ль вьр бәдәна Иса ида тʹӧнә бу. Һьнә жь нобәдара чубун шәһәре у тьштед кӧ ԛәԝьмин кʹәшишарʹа гьли кьрьн. Зани әв кʹәшишед зӧльм чь кьрьн? Кʹәшиша пʹәрә данә нобәдара, сәва кӧ әԝана дәрәԝа бькьн. Ԝана готә әскәррʹа: «Бежьн, ԝәки гава әм хәԝрʹа чун, шагьртед Иса һатьн у бәдәнә ԝи дьзин»
Ԝе дәме һьнә жьнед кӧ шагьртед Иса бун, һатьн бәр тʹьрбе. Гава ԝана дит кӧ тʹьрбә вала йә, әԝана гәлә әʹщевмайи бун! Ньшкева дӧ мьлйакʹәт бь кʹьнщед ԛәрԛаш хӧйа бун у готьн: «Һун чьма Иса ль вьр дьгәрʹьн? Әԝ жь нав мьрийа рʹабуйә. Зу һәрʹьн әве йәке бежьнә шагьртед ԝи». Кʹӧлфәт жи ләзә-ләз жь тʹьрбе дәркʹәтьн у чун! Ле рʹева мерәк рʹасти ԝан һат. Зани әв кʹи бу? Бәле, әв Иса бу! Әԝи жи готә ԝан: «Һәрʹьн у һʹәму тьшт шагьртед мьнрʹа бежьн».
Гава кʹӧлфәта әв һʹәму тьшт шагьртарʹа гьли кьрьн, кӧ Иса сах ә у ԝана ԝи дит, әԝана баԝәр нәкьрьн. Ләма жи Пәтрус у Йуһʹәнна бе әгләкьрьне рʹәвин бәр тʹьрбе кӧ хԝәха һʹәму тьшти бьвиньн, ле чьмки тʹьрба Иса вала бу, Пәтрус у Йуһʹәнна пашда вәгәрʹийан у чун. Ле Мәрйәма Мәждәлани ль вьр ма. Гава әԝ кʹәтә һьндӧрʹе тʹьрбе, әԝе дӧ мьлйакʹәт дит.
Ле гәло бәдәне Иса ча бу? Хԝәде бәдәна ԝи бәтавәкьр. Гава Хԝәде Иса сах кьр әԝ пашда нәбу мәрьве бь бәдәне, Хԝәде Исарʹа бәдәна рʹӧһʹани да, у әԝ ида ча мьлйакʹәт һатә сах кьрьне. Ле сәва кӧ шагьртед ԝи бьзаньбьн кӧ әԝ ида сах ә, Иса бәдәне мәрийа дьда хәвате ԝәки шагьрт бькарьбьн ԝи бьвиньн. Дәрһәԛа ве йәке һе зедә әме паше пебьһʹәсьн.
Мәтта 27:62-66; 28:1-15; Луԛа 24:1-12; Йуһʹәнна 20:1-12.