Сәрһати 103
Һьндӧрʹе Отʹаха Дадайи
ЧАХЕ Пәтрус у Йуһʹәнна жь тʹьрба Иса дәркʹәтьн у чун, Мәрйәм ль ԝьр тʹәне ма. Әԝе дәстпекьр бьгьри. Паше, ча әм ида пеһʹәсийан, әԝе хԝә куз кьр у һьндӧрʹе тʹьрбе ньһерʹи. Ԝи чахи әԝе дӧ мьлйакʹәт дит! Ԝана готә ԝе: «Тӧ чьма дьгьри?»
Мәрйәме гот: «Ԝана Хӧдане мьн һьлданә у әз ньзаньм әԝ данинә кʹӧ дәре». Гава әԝе әв йәк гот, ль пьшт хԝәва зьвьрʹи у мерәк дит, йе кӧ ԝерʹа гот: «Тӧ ль кʹе дьгәрʹи?»
Мәрйәме тʹьре кӧ әв мер рʹәзван ә, у дьбәк жи кӧ әԝи бәдәна Иса бьр, ләма жи әԝе готә ԝи мерьки: «Һәгәр тә әԝ һьлдайә, мьнрʹа бежә тә әԝ данийә кʹӧ». Ле бь рʹастийе әв мер Иса бу. Әԝ бь бәдәна мәрьвәки һатә хӧйане, ләма жи Мәрйәм ԝи нас нәкьр. Ле гава Иса наве Мәрйәме һьлда, әԝе те дәрхьст кӧ әԝ Иса йә. Мәрйәм перʹа-перʹа рʹәви щәм шагьрта, у готә ԝан: «Мьн Хӧдан дит!»
Һьнә ԝәʹдә шунда һәма ԝе рʹоже, дӧ шагьрт чубун гӧндәки бь наве Әмԝас. Ль ԝьр мәрик рʹасти ԝан һат. Шагьрт гәлә бәрхԝә кʹәтьбун, сәва кӧ Иса һатьбу кӧштьне. Ле рʹева әԝ мер жь Кʹьтеба Пироз ԝанарʹа гәлә тьшт шьровәкьр, у бь ве йәке дәрде ԝан һьнәки сьвьк кьр. Хьлазийе, гава әԝана дь маләкида хԝарьне дьхԝарьн, ԝи мерьки нан һьлда, дӧа кьр, нан кәр кьр у да ԝан. Ӧса ԝана фәʹм кьр кӧ әԝ Иса йә. Һинге Иса бәр чʹәʹве ԝан бәтавәбу. Ле шагьрт ләз кʹәтьн чунә пашда Оршәлиме, ԝәки һʹәму тьшт шандийарʹа гьли кьн.
Һʹәта әԝана гьһиштьн щи, Иса ӧса жи Пәтрусрʹа һатә хӧйане. Гава шагьртед майин дәрһәԛа ве йәке пеһʹәсийан шабун кʹәтә дьле ԝан. Чахе әԝ дӧ шагьрт гьһиштьн Оршәлиме у шандийа дитьн, ԝана жи гьли кьр, кӧ Иса чаԝа рʹева рʹасти ԝан һат. Әԝ хәвәрдана ԝан һе хьлаз нәбьбу у ньшкева тьштәки бь кʹәрәмәт ԛәԝьми. Зани әв чь бу?
Һәла дина хԝә бьдә шькьл. Дәрийе отʹахе дадайи йә, ле Иса бь кʹәрәмәте кәʹтә отʹахе! Бьдә һʹәсаве хԝә, шагьртед Иса чьԛас ша дьбьн! Рʹасти жи шькьр ве рʹожерʹа! Ӧса нинә? Һәла һʹәсав кә чьԛас щара Иса хԝә нишани шагьрта кьр. Ԝәкә пенщ щара дәркʹәт, йан на?
Чахе Иса шандийарʹа һатә хӧйане, шандики Иса бь наве Тʹума, нә ль ԝьр бу. Ләма жи шагьрта ԝирʹа гьли кьрьн: «Мә Хӧдан дит!» Ле әԝи ԝанарʹа гот, кӧ һʹәта әԝ хԝәха пе чʹәʹве хԝә ԝи нәвинә, ԝе баԝәр накә. Ԝәкә һʹәйшт рʹожа шунда, шагьрт диса жи дь отʹахеда тʹоп бун у дәри пьшт хԝәва дадан. Ԝи чахи Тʹума жи тʹәви ԝан бу. Ньшкева, Иса һәма нав ԝан дь отʹахеда хӧйа бу. Ижар Тʹума ида баԝәр кьр кӧ Иса рʹасти жи сах ә.
Йуһʹәнна 20:11-29; Луԛа 24:13-43.