Сәрһати 112

Һурдахԝәшибуна Гәмийе

ҺӘЛА дина хԝә бьдә гәми чь рʹожәкида нә! Әԝ һурдәхԝәши дьбә! Дьвини кӧ мәрьв жь гәмийе хԝә давежьнә аве? Һьнәка жь ԝан ида гьһиштьнә дәве бәʹре. Ле тӧ нав ԝан Паԝлос дьвини? Ԝәрә әм пебьһʹәсьн чь сәре ԝи ԛәԝьмибу.

Те бира тә кӧ дӧ сала Паԝлос дь кәле Ԛәйсәрийеда дәрбаз кьрьбу. Паши ве йәке һьнә гьртийа тʹәви Паԝлос бь гәми шандьнә Рʹоме. Ле чахе әԝана ида незики гьрава Кьрета дьбун, фьртонәкә ԛайим рʹабу. Пелед фьртоне ӧса ԛайим бун, кӧ гәмиван нькарьбун рʹебәрийа гәмийе бькьн. Рʹоже әԝана рʹонайа тәʹве нәдьдитьн, ле шәве жи стәйрк нәдьһатьн кʹьвше. Хьлазийе паши гәлә рʹожа гӧмана гәмивана ида тʹӧнә бу, кӧ ԝе хьлаз бьн.

Ԝи чахи Паԝлос рʹабу у гьлийед ӧса гот: «Тʹӧ кәс жь ԝә ԝе зийане настинә, ле тʹәне гәми ԝе һурдәхԝәши бә. Чьмки ишәв мьлйакʹәта Хԝәде һатьбу бал мьн у гьлийе ӧса гот: ‹Нәтьрсә, Паԝлос! Тӧ гәрәке ль бәр сәркʹаре Рʹоме Ԛәйсәр бьсәкьни. Ләма жи Хԝәде ԝе тә у һʹәмуйед тʹәви тә гәмийеда хьлаз кә›».

Паши дәстпебуна фьртоне ԝәкә 14 рʹож ида дәрбаз бу. Һинге ԝәкә ниве шәве гәмиван дина хԝә дан, кӧ кʹурайа аве ньмьз дьбә. Чьмки әԝана тьрсийан кӧ дь ве тәʹрийеда гәми дькарә кәвьра кʹәвә, ԝана һьлда у ләнгәрә авитьнә аве. Рʹожа майин сьбәһ зу ԝана дәлавәкә бәʹре дит, у сафи кьрьн бьчуна ԝе алийе ԝәки гәми ль сәр әʹрде бьдьнә сәкьнандьне.

Ле гава әԝана незики дәве бәʹре дьбун, гәми ль сәр гьрәки бьни аве кʹәт у сәкьни, позе гәмийе теда ма у иди нәһʹәжийа, пьшта ԝе жи жь дәст ԛайимийа пела һурдәхԝәши дьбу. Һинге сәрсәде әскәра гот: «Һәр кәс жь ԝә, йе кӧ собәкʹарийе занә, хԝә бавежьнә аве у һәрʹьнә бәрбь әʹрде. Ле йа дьн жи паши ԝан банздьн аве, дәсте хԝә бавежьнә пʹәрче тʹәхта, кӧ бькарьбьн хԝә ль сәр аве бьгьрьн». Ԝана һәма ӧса жи кьр, у бь ве йәке ԝәкә 276 мәри йе кӧ дь гәмийеда бун, хьлаз бун. Ӧса гьлийед мьлйакʹәт һатьн сәри.

Наве ве гьраве Малта бу. Ль ԝьр мәрийед гәлә ԛәнщ дьжитьн. Әԝана мьԛати ԝан мәрийа бун, йе кӧ жь фьртоне хьлаз бьбун. Пашԝәхтийе гава һәԝа баш вәбьбу, Паԝлос кʹәта гәмийе дьн у чу һәʹта Рʹоме.

Кʹаред Шандийа 27:1-44; 28:1-14.