Сәрһати 111
Хортәк Кӧ Хәԝрʹа Чу
ПӘЙ, әв чь ԛәԝьми? Әв гәде щаһьл чьрʹа ль сәр әʹрде йә? Бьньһерʹә, әԝ мере кӧ жь мале дәркʹәт Паԝлос ә! Ле тӧ Тимотʹейо дьвини? Дьбәк кӧ әв гәдә жь пʹәнщәре кʹәтийә?
Бәле, әв һәма ӧса жи ԛәԝьми. Ль вьр дь Тройада Паԝлос сәва шагьрта тʹема дьгот. Әԝи заньбу кӧ ида гәлә ԝәхт ԝе ԝана навинә, у һьн жи сьбе зу бь гәмийе әԝ гәрәке бьчуйа щики дьн. Ләма жи Паԝлос һʹәта ниве шәве тʹәви ԝан хәвәр дьда.
Ԝи чахи хортәк бь наве Әйтухо ль сәр пʹәнщәре рʹуньштьбу у һьн жи хәԝрʹа дьчу. Гава әԝ хәԝрʹа чу жь ԛәта сьсийа кʹәтә әʹрде! Ләма жи әԝ һʹәмушк дәркʹәтьн дәрва у зәндәгьрти дьньһерʹьн. Чахе мер ԝи данә дәсте хԝә, әԝана фәʹм кьрьн кӧ тьштәки гәлә бебәхт ԛәԝьми. Әԝ гәде щаһьл мьр!
Чахе Паԝлос дит кӧ гәдә мьр, әԝ хԝә авитә сәр ԝи у ԝи һʹәмез кьр. Паше әԝи гот: «Нәтьрсьн! Чьмки әԝ сах-сьламәт ә». Әԝ рʹасти жи сах ә! Паԝлос ԝи бь кʹәрәмәте сах кьрьбу! Жь бо ве йәке шабуна ԝан һʹәмушка беһʹәсав бу.
Паше әԝана гьшк һьлкʹьшийанә жоре кӧ һьнә хԝарьн бьхԝьн. Паԝлос диса жи, һʹәта сьбәһ зу, ԝанарʹа хәвәр дьда. Ле әм дькарьн гӧман бьн, кӧ паши ԝан ԛәԝьмандьна хәԝа гәде щаһьл ида ԛәт нәдьһат! Паше Паԝлос, Тимотʹейо у меред кӧ тʹәви ԝан рʹе кʹәтьбун рʹуньштьн гәмийе у чун. Ле гәло ньһа әԝана ԝе һәрʹьн кʹидәре?
Чьмки бь ве йәке Паԝлос рʹеԝитийа хԝәйә сьсийа хьлаз кьрьбу, әԝ ида вәдьгәрʹийа мала хԝә. Ԝәʹде рʹеԝитийа хԝәйә сьсийа, Паԝлос тʹәне дь Әфәсида ԝәкә се сал сәкьни. Ләма жи әм дькарьн бежьн, кӧ рʹеԝитийа ԝи йа сьсийа жь йа дӧда дьрежтьр бу.
Чахе әԝана жь Тройа дәркʹәтьн, гәмийа ԝан пешийе һьнә ԝәʹдә дь Миләтосда сәкьни. Чьмки жь Миләтос һʹәта Әфәс чәнд километьрʹ бу, Паԝлос шандә пәй рʹуспийед щьвата дь Әфәсида, сәва кӧ щара пашьн һьнәки тʹәви ԝан хәвәр дә. Бьдә һʹәсаве хԝә гава әԝана Паԝлос вәрʹедькьрьн, ча әԝана бәрхԝә дькʹәтьн у нәдьхԝәстьн жь һәв бьԛәтьн!
Хьлазийе гәми ԝана ани Ԛәйсәрийе. Ль ԝьр Паԝлос дь мала Филипойе мьзгиндарда дьма. Һинге пʹехәмбәрәки бь наве Һагабо готә Паԝлос, ԝәки чахе әԝ һәрә Оршәлиме ль ԝьр ԝи ԝе бькьнә кәле. Әԝ һәма ӧса жи ԛәԝьми. Паши ԝе йәке ча Паԝлос дь кәле Ԛәйсәрийеда дӧ сал дәрбаз кьр, әԝи шандьн Рʹоме, ԝәки бәр сәркʹаре Рʹоме Ԛәйсәр щава хԝә бьдә. Ԝәрә әм пебьһʹәсьн рʹева чь сәре ԝи ԛәԝьми.
Кʹаред Шандийа сәре 19 һʹәта 26.