Кәсед Рʹӧһʹ, бь Рʹастийе Рʹӧһʹед Мьрийа Ниньн
Бь рʹастийе рʹӧһʹ һәнә! Чаԝа рʹӧһʹед ԛәнщ һәнә, ӧса жи йед хьраб. Ле гәло әԝана бәре мәри бун, йед кӧ ԝәхтәке ль сәр әʹрде дьжитьн у паше мьрьн?
На! Чахе мәрьв дьмьрә, әԝ начә ль дьнйа рʹӧһʹани чаԝа кӧ гәләк баԝәр дькьн. Ле әве йәке әм жь кʹӧ заньн? Әв йәк дь Кʹьтеба Пирозда ньвисар ә. Чьмки Кʹьтеба Пироз, әв кʹьтеба рʹастийе йә. У әв кʹьтеб Хԝәдайе рʹаст дайә мә, наве ԝи Йаһоԝа йә. Йаһоԝа мәри әʹфьрандьн, ләма жи әԝ жь һʹәмушка баштьр занә чь тʹәви мәрийа дьԛәԝьмә, чахе әԝана дьмьрьн (Зәбур 83:18, АБ; 2 Тимотʹейо 3:16).
Дь Кʹьтеба Пирозда ньвисар ә, ԝәки Хԝәде мәрьве пешьн Адәм «жь аха әʹрде» әʹфьранд (Дәстпебун 2:7, ПКʹМ). Хԝәде әԝ дь щьнәтеда бахче Адәнеда щиԝар кьр. Һәгәр Адәм гӧрʹа ԛануна Йаһоԝа бькьра, әԝе нәмьра; ле һʹәта рʹожа иройин ԝе ль сәр әʹрде бьжита. Рʹаст ә Адәм заньбу кӧ гәрәке гӧрʹа ԛануна Хԝәде бькә, ле йәкә әԝи ԛанун инкʹар кьр. Ләма жи Хԝәде готе: «Тӧ вәгәрʹи ль ԝи әʹрди жь кʹӧ һати һьлдане, чьмки тӧ ах и у те диса бьби ах» (Дәстпебун 3:19, ПКʹМ).
Ле гәло әв гьли чь тенә һʹәсабе? Ԝәрен әм дьшьрмиш бьн: кʹидәре бу Адәм пешийа ԝе йәке, гава Йаһоԝа Хԝәде әԝ жь аха әʹрде әʹфьранд? Адәм тʹӧ щики жи нибу. Әԝ нә жи кәсе рʹӧһʹани бу ль әʹзменда. Әԝ тʹӧнә бу. Ләма жи чахе Йаһоԝа готә Адәм «те диса бьби ах», бь ве йәке әԝи дьхԝәст бьгота кӧ Адәм ԝе бьмьрә. Демәк паши мьрьне Адәм нәбу чаԝа кәсе рʹӧһʹани. Чьмки әʹмьре ԝи һатә сәкьнандьне у әԝ бәтавәбу. Жь вьр те кʹьфше, кӧ пәй мьрьнерʹа жийин тʹӧнә.
Ле чь ԛәԝьми тʹәви ԝан мәрийа, йед кӧ ида мьрьнә? Гәло әʹмьре ԝан бәрдәԝан дьбә? Кʹьтеба Пироз щаба ван пьрса дьдә:
«Гьшт [мәрьв у һʹәйԝан] дьчьн щиһәки; гьшт жь ахе нә у диса дьзьвьрʹьн ахе» (Ԝаиз 3:20).
«Мьри ... тьштәки ньзаньн» (Ԝаиз 9:5).
«Һʹәзкьрьна ԝан жи, нәйарийа ԝан жи, чʹавнәбарийа ԝан жи жь зува тʹӧнә буйә» (Ԝаиз 9:6).
«Ль ԝаре мьрийан, йа кӧ тӧйе һәрʹе кʹар у раман, занин у занйари нинә» (Ԝаиз 9:10).
«[Мәрьв] ... вәдьгәрʹә аха хԝә ... у һәма дь ԝе рʹожеда, тʹәваһийа фькрен ԝи тʹӧнә дьбьн» (Зәбур 146:4, АБ).
Тӧ бь ве йәке ԛаил и, чь кӧ дь ван рʹезада ньвисар ә? Һәгәр на, ԝәре әм дьшьрмиш бьн: дь гәләк малбәтада бав дьхәбьтә ԝәки пʹәра бинә мале, сәва кӧ малбәта хԝә тʹер-тʹьжә кә. Ле чахе хԝәйе мале дьмьрә, һьнге малбәта ԝи дькʹәвә тәнгасийе. Щар-щара, жьн-зарʹәд ԝирʹа пʹәрә тʹере накә кӧ нан-хԝарьне жи бькʹьрьн. У дьбәкә дьжмьнед ви мәрьви ньһа пәй малбәта ԝи дькʹәвьн. Һәла ль сәр ван пьрса дьшьрмиш бә: һәгәр әв мәрьв паши мьрьне бәрдәԝан дькә дьнйа рʹӧһʹанида дьжи, гәло чьрʹа әԝ ида дәрһәԛа малбәта хԝә, хәм накә? У чьрʹа әԝ малбәта хԝә жь мәрьвед зӧлм хԝәй накә? Кʹьтеба Пироз рʹастийе дьбежә. Әʹмьре ԝи мәрьви һатә сәкьнандьне, у әԝ ида тʹӧ тьшт нькарә бькә (Зәбур 115:17).
Ле гәло әв йәк те һʹәсабе, кӧ мьри ида тʹӧ щар ԝе вәнәгәрʹьн жийине? На. Дәрһәԛа сахкьрьна мьрийа әме паше хәбәр дьн. Ле әв мәсәла жоре готи, нишан дькә кӧ мьри ньзаньн әԝе йәке, чь кӧ мәрьвед сах дькьн. Әԝана нькарьн тә бьвиньн, бьбьһен йан жи тʹәви тә хәбәр дьн. Ләма жи, тӧ гәрәке ԝана нәтьрси. Хенщи ве йәке, әԝана нькарьн али тә бькьн у нә жи зьраре бьдьнә тә (Ԝаиз 9:4).
[Шькьл сәр рʹупʹела 4]
Адәм жь ахе һатә әʹфьрандьне у диса бу ах
[Шькьл сәр рʹупʹела 5]
Тʹәне йед сах дькарьн ван шьхӧла бькьн
[Шькьл сәр рʹупʹела 6]
Мьри нькарьн али бьрчийа бькьн, у жь мәрьвед зӧлм жи хԝәй кьн