Ль сәр Алийе Һʹәбандьна Рʹаст Бьсәкьнә

1, 2. Паши һиштьна һʹәбандьна нәрʹаст, тӧ гәрәке чь пьрсе бьди хwә у бь тʹәхмина тә чьрʹа фәрз ә кӧ әве пьрсе бьди хwә?

БЬДӘ һʹәсабе хwә, кӧ кәсәк дьзикава жәʹр кьрийә канийа ава тә. У ньһа гәлә хоф ә тӧ әве аве вәхwи. Тӧйе чь бьки? Һьлбәт тӧйе дәстпеки бьгәри канийа авейә тʹәмьз. Ле дьбәк жи паши wе йәке тӧйе пьрсе бьди хwә: ‹Дьбәк ида жәʹр гьһиштийә мьн у әз ида нәхwәш кʹәтьм ә?›

² Әве йәке әм дькарьн дәрһәqа һʹәбандьна нәрʹаст жи бежьн. Дь Кʹьтеба Пирозда те готьне кӧ һʹәбандьна нәрʹаст бь һинкьрьн у әʹйд-qәйдед нә тʹәмьз һатийә ләвьтандьне (2 Корьнтʹи 6:17). Аһан чьрʹа ӧса фәрз ә, wәки әм жь «Бабилона Мәзьн», кӧ һәйә тʹәшкиләта һʹәму һʹәбандьнед нәрʹаст, дәрен (Әʹйанти 18:2, 4). Ле тә ида әв йәк кьрийә? Һәрге бәле, гәлә баш ә, тӧ һежайи пәсьна. Ле сәва кӧ тӧ жь һʹәбандьна нәрʹаст дәреий, лазьм ә һе зедә тьшт бьки. Фәрз ә wәки тӧ дьшьрмиш би: ‹Гәло әз жь wан һʹәму тьшта чь кӧ бь һʹәбандьна нәрʹаства гьредайи йә, аза бумә?› Wәрә әм бьньһерʹьн чәнд мәсәла.

ШЬКЬЛ У ҺʹӘБАНДЬНА МЬРИЙА

3. (а) Чь дьбежә Кʹьтеба Пироз дәрһәqа хәбьтандьна шькьла, у чьрʹа сәва һьнәка чәтьн ә әве һинкьрьне qәбул кьн? (б) Чь тӧ гәрәке бьки тʹәви wан һʹәму тьшта, йед кӧ һʹәбандьна qәлпва гьредайи нә?

³ Гәләк мәрьв бь гәләк сала дь малед хwәда хwәй дькьн тьштед сәва һʹәбандьне. Мәсәлә һьнәк шькьла хwәй дькьн, һьнәк жи тьштед зийарәтийә майин, у бәр ван тьшта сәре хwә датиньн. Һьнәк жи тʹалисма хwәва дькьн, wәки чʹәʹв wан нәкʹәвьн. Дьбәк әwана ван тьшта ида гәләки qимәт дькьн. Ле бь рʹастийе тʹәне Хwәде дькарә сафи кә, кӧ ча мәрьв гәрәке wи бьһʹәбинә. Кʹьтеба Пироз дьбежә кӧ Хwәде нахwазә wәки wи бь сайа шькьла бьһʹәбиньн (Бьхунә Дәркʹәтьн 20:4, 5; Зәбур 115:4-8; Ишайа 42:8; 1 Йуһʹәнна 5:21). Ләма жи һәрге тӧ дьхwази хwә ль һʹәбандьна рʹаст бьгьри, тӧ гәрәке әw һʹәму тьштед кӧ һʹәбандьна qәлпва гьредайи нә, кʹӧта ки. Әм гәрәке ль сәр ван тьшта ӧса бьньһерʹьн ча Йаһоwа дьньһерʹә. Йаһоwа ван тьшта һʹәрам һʹәсаб дькә (Qануна Дӧщари 27:15).

4, 5. (а) Жь кʹӧ әм заньн кӧ нәрʹаст ә мьрийа бьһʹәбиньн? (б) Чьрʹа Йаһоwа изьн нәдьда щьмәʹта Исраели, wәки әwана бьщерʹьбиньн тʹәви мьрийа хәбәр дьн?

⁴ Мәрийед жь гәләк религийа мьрийа дьһʹәбиньн. Һьнәк мәрьв пешийа кӧ дәстпекьрана һин буна Кʹьтеба Пироз, баwәр дькьрьн кӧ мьри дьжин у дькарьн йан кʹаре, йане жи зийане бьдьнә мәрийа. Дьбәк тӧ жи гәләк щәфа дькʹьшини, wәки мьрийед хwә рʹази ки. Чахе кәсәки мә дьмьрә, тʹәбийәти йә кӧ әм шина wи бькьн у бона wи бьгьрин. Мәсәлә, чахе жьна Бьраһим пʹехәмбәр, Сәра мьр, «Бьраһим һат сәр Сәрайе гьрийа у шина wе кьр» (Дәстпебун 23:1, 2, ПКʹМ). Чахе Аqуб пʹехәмбәр мьр, кӧрʹе wи Усьв «әʹмьр ль хӧламед хwәйә һʹәким кьрьн, кӧ баве wи зьмьр кьн» у гьшк «һʹәфте рʹожи шина wи кьрьн». «Тʹәмамийа мала Усьв у бьрайед wи» дьхwәстьн кӧ Аqуб бь qәдьр бе дәфьн кьрьне, әwана һаqас гьрийан у кьрьн qарʹә-qарʹ, wәки һәла һе хәлqед дор-бәр жи дәрһәqа шина Аqуб пеһʹәсийан (Дәстпебун 50:1-11, ПКʹМ). Ӧса жи, бәре мәри паши дәфьнкьрьне жи дьчунә ль сәр мәзәл у шина мьрийед хwә дькьрьн (Йуһʹәнна 11:31).

⁵ Ча те кʹьфше, дь ван йәкада тьштәки хьраб тʹӧнә кӧ әм шина мьрийед хwә бькьн, бь qәдьр дәфьн кьн у паши дәфьнкьрьне жи бенә ль сәр мәзәл. Ле дь сәре 6-да әм ӧса жи пеһʹәсийан, wәки чахе мәрьв дьмьрә, әw ида нажи. Ләма набә кӧ әм тʹәви мьрийа хәбәр дьн у әw мә бьбьһен. Дьбәк жи тӧ ньһа дьшьрмиш дьби: «Ле wәки ӧса нә, әв әʹламәти кӧ мә тʹьре жь мьрийед мә нә, жь ки нә?» Бь рʹастийе әв әʹламәти жь щьна тен. Ләма Йаһоwа изьн нәдьда щьмәʹта Исраели, wәки әwана бьщерʹьбиньн тʹәви мьрийа хәбәр дьн, у гьредана тʹәви щьна тʹӧ щурʹәйи изьн тʹӧнә бу. (Бьхунә Qануна Дӧщари 18:10-12.)

6. Һәрге тә тʹьме бь шькьла Хwәде дьһʹәбанд, йан жи тә тʹьме мьри дьһʹәбандьн, ньһа чь тӧ гәрәке бьки?

⁶ Ле һәрге тә тʹьме бь шькьла Хwәде дьһʹәбанд, йан жи тә тʹьме мьри дьһʹәбандьн, ньһа чь тӧ гәрәке бьки? Бьхунә у дьшьрмиш бә дәрһәqа wан һинкьрьнед Кʹьтеба Пироз, йед кӧ нишан дькьн wәки Хwәде ча дьньһерʹә ль сәр ван тьшта. Һәр рʹож дӧа бькә Йаһоwа Хwәдерʹа у дәрһәqа хwәстьна хwәйә ль сәр алийе һʹәбандьна рʹаст бьсәкьни, wирʹа бежә. Дь дӧакьрьнеда ӧса жи жь Хwәде бьхwазә, wәки әw али тә бькә тӧ бькарьби ль сәр тьшта ӧса бьньһерʹи, ча әw дьньһерʹә (Ишайа 55:9).

ӘʹЙД-QӘЙДЕД НАВДАР У РʹОЖА БУЙИНЕ

7-9. (а) Жь кʹидәре тен әʹйда Сәре Сале у Нәwроз? (б) Чьрʹа qӧльхкʹаред Йаһоwа Хwәде гәрәке тʹәви wан әʹйд-qәйда нибьн, йед кӧ тʹәви әʹйда Сәре Сале у Нәwрозе гьредайи йә?

⁷ Һьнәк мәри бьһаре әʹйда Сәре Сале дәрбаз дькьн. Wи чахи щьмәʹт тʹоп дьбьн у дәстпека Сала Тʹәзә кʹьфш дькьн. Ле зани әв әʹйд жь кʹидәре те? Зандар әве йәке бь щурʹә-щурʹә шьровәдькьн. Мәсәлә кʹьтеба: «Езди-Дине wан, у Мьләт» ӧса дьбежә: «Ча мифоложийа Ездийа дьбежә, рʹожа әʹйда Сәре Сале хwәдан жь әʹзмана пәйа дьбьн ль сәр әʹрде. Wе еваре Хwәде рʹудьне сәр тʹәхте хwә, дор-бәре wи хwәданед дьн (мьлйакʹәт) дьсәкьньн, wәки шьхӧлед тʹәви әʹрде гьредайи сафи кьн . . . у wи чахи әwана сафи дькьн кӧ дь сала тʹәзәда, бәхте мәрийа wе чаwа бә». Паше дь ве кʹьтебеда те шьровәкьрьне һьнә qәйдед дәрбазкьрьна ве әʹйде, у хьлазийе ӧса те ньвисар: «Qәйдед дәрбазкьрьна әʹйда Сәре Сале мина йе әʹйда Сала Тʹәзә нә, йед кӧ дь Бабилона бәреда дьһатә дәрбазкьрьне».

⁸ Әʹйда Нәwроз жи йед кӧ дь гәләк wәлатада те дәрбазкьрьн, мина әʹйда Сәре Сале йә. Ле гәло Нәwроз жь кʹидәре һатийә? Дь кʹьтеба «Леколинкьрьна Әʹйд-Qәйдед Фарьса» рʹупʹела 217-да ӧса те готьне: «Мәсәла лапә бәре, бона дәрбазкьрьна Сала Тʹәзә, дь Азийайә Рʹоавада һатийә дитьне у әв әʹйд гьредайи буйә тʹәви малбәта пʹадшайе пешьн дь шәһәре Урда. Wәʹде ве әʹйде дәʹwата хwәдане аве у бәрдарийе дәрбаз дьбу . . . әв әйд паше бь Бабилонийа һатә хwәйкьрьне». Һьнә Антрополог баwәр дькьн, кӧ әʹйда Нәwроз сәре-серида әʹйда щоткʹарийе бу. Дь ве кʹьтебеда те готьне, кӧ әв әʹйд «гьредайи йә тʹәви ‹мьрьна› хwәдане Шумерийа Думуз [йан Тамуз]. Әв хwәдан һәр хьлазийа сале дьһатә кӧштьне, у дәстпека саледа дьһатә сахкьрьне. Сахбуна wи, йан чь, дьбу мәʹни кӧ һʹәму тьшт шин бә, ләма мәрьв ша дьбун у әʹйд дькьрьн».

⁹ Ле чь әм дькарьн бежьн дәрһәqа чекьрьна Клочʹ, wәʹде әʹйда Сәре Сале? Ча кʹьтеба «Езди-Дине wан, у Мьләт» дьбежә әва qәйда һане «һатә зедәкьрьне религийа Ездийада бь һʹӧкӧма мьләтед дьн. . . . Мәсәлә дьбәк жи жь мьләте Щьһу, йед кӧ wәʹде щәжьна дәрбазбуне, демәк щәжьна Нане Шкәва, нане пироз чедькьрьн . . . йан дьбәк жи жь щәжьна Нане Шкәва, йа мәсиһийа һатә һьлдане, wәʹде кʹижани тотька чедькьн». Фьрqи тʹӧнә мәʹни чь бу кӧ мәрийа әʹйда Сәре Сале у Нәwроз дькьрьн, сәва мә әʹйан ә кӧ qәйдед дәрбазкьрьна wан әʹйда гьредайи нә тʹәви религийед qәлп, у тʹәви һинкьрьна нәрʹаст дәрһәqа әʹмьре паши мьрьне. Ләма жи пьрс пешда те: ‹Изьн ә wәки qӧльхкʹаред Хwәде Йаһоwа тʹәви wан әʹйд-qәйда бьн?›

10. (а) Шагьртед Исайә бәре, ча дьньһерʹин ль сәр әʹйда рʹожа буйине? (б) Шьровәкә, чьда әʹйда рʹожа буйине тʹәви баwәрийед нәрʹаст гьредайи йә.

¹⁰ Ле ча Йаһоwа дьньһерʹә ль сәр әʹйда рʹожа буйине? «Әнсиклопедийа Кʹьтеба Дьнйайе» дьбежә, кӧ мәсиһийед бәре «әʹйда рʹожа буйина кәсәки дьданә һʹәсабе ча әʹйда пʹутпʹарьста». Дь Кʹьтеба Пирозда дәрһәqа әʹйда рʹожа буйине, тʹәне дӧ щара һатийә ньвисаре у һәр дӧ жи рʹожа буйина wан пʹадша бу, йед кӧ Йаһоwа Хwәдерʹа qӧльх нәдькьрьн (Дәстпебун 40:20; Марqос 6:21). Әʹйда рʹожа буйине ӧса жи гьредайи йә тʹәви һӧрмәткьрьна хwәданед пʹутпʹарьста. Мәсәлә, 24 мәһа Гӧлане мьләте Рʹомайи әʹйда рʹожа буйина хwәдане Диана дәрбаз дькьрьн. Рʹожа дьне жи, wана әʹйда рʹожа буйина Аполло дәрбаз дькьрьн, йе кӧ хwәдане тәʹве дьһатә һʹәсабе. Әʹйда рʹожа буйине ӧса жи гьредайи йә тʹәви баwәрийа нәрʹаст. Мәсәлә, Рʹомайед у Йунанийед бәре баwәр дькьрьн кӧ wәʹде буйина һәр мәрики рʹӧһʹәк те, wәки нава тʹәмамийа әʹмьре wи ле хwәй кә. Дь кʹьтебәкеда, йе кӧ дәрһәqа әʹйда рʹожа буйине дьбежә, һатийә ньвисаре кӧ «әв рʹӧһʹ гьредайи йә тʹәви хwәданәки, йе кӧ рʹожа буйина wи мәрьви һатийә буйине» («Тһе Lorе of Birthdays»). Йаһоwа тʹӧ щар wе qәбул нәкә wан qәйда, йед кӧ тʹәви баwәрийа нәрʹаст гьредайи нә (Ишайа 65:11, 12).a

ГӘЛО ӘʹСӘЙИ ЙӘ БЬДЬНӘ ҺʹӘСАБЕ ҺʹИМ У ДӘСТПЕБУНА ӘʹЙДА

11. Чьрʹа һьнә мәрьв әʹйда дәрбаз дькьн, ле чь сәва мә гәрәке һе фәрз бә?

¹¹ Һьнә мәрьв qайил дьбьн кӧ әʹйда Клочʹа Сәре Сале у Нәwроз жь религийед qәлп тен, ле йәкә бәрдәwам дькьн wан әʹйда бькьн. Әwана дина хwә надьнә wе йәке, кӧ гәләк әʹйд у щәжьн тʹәви религийед qәлп гьредайи нә. Әʹйд у щәжьн сәва wан мәщаләкә баш ә, wәки тʹәви нәфәред мале у бьра-пьсмама тʹоп бьн. Тӧ жи ӧса дьшьрмиш дьби? Һәрге бәле, демәк нә кӧ һʹьзкьрьн һьмбәри религийа qәлп рʹийа тә дьгьрә, wәки тӧ ль сәр рʹийа рʹаст бьсәкьни, ле һʹьзкьрьн һьндава малбәта тә. Ле баwәр кә wәки Хwәдайе кӧ малбәт саз кьрийә, дьхwазә wәки ортʹа тә у нәферед мала тә баш бә (Әфәси 3:14, 15). Бь рʹастийе тӧ дькари һәләqәтийа хwә тʹәви малбәта хwә жи qәwи ки, у мьqабьли qанунед Хwәде жи дәрнәкʹәви. Паwлосе шанди гот, кӧ әм тʹьме гәрәке дьшьрмиш бьн, wәки «бьзаньбьн кӧ чь ль Хӧдан хwәш те» (Әфәси 5:10).

12. Бь мәсәлә нишан кә кӧ чьрʹа әм гәрәке жь wан әʹйд-qәйда хwә дур бьгьрьн, йед кӧ жь нәтʹәмьзайийе дәркʹәтьн ә?

¹² Дьбәк тӧ дьшьрмиш дьби кӧ рʹожа иройин әʹйда бь щурʹәки майин дәрбаз дькьн у мәʹна ван әʹйда ӧса нинә ча бәре. Ле гәло фәрз ә бьзаньбьн кӧ әв әʹйд жь кʹӧ тен? Бәле фәрз ә! Wәрә әм мәсәләке биньн. Бьдә һʹәсабе хwә wәки тә дәрва ава гәнида ширьнайик дит. Тәйе әв ширьнайи һьлда у бьхwара? Фәʹмдари йә на, чьмки әв ширьнайи qьрʹеж ә. Әве йәке әм дькарьн бәрамбәри әʹйда бькьн. Мина ве ширьнайийе әwана дькарьн сәва мә һәwwас у хwәш бенә кʹьфше, ле бь рʹастийе әв әʹйд жь нәтʹәмьзайе дәркʹәтьн ә. Һәрге әм дьхwазьн хwә ль һʹәбандьна рʹаст бьгьрьн, ньһерʹандьна мә гәрәке мина ньһерʹандьна Ишайа пʹехәмбәр бә, йе кӧ qӧльхкʹаред Хwәдейи рʹастрʹа гот: «Ль тьштед һʹәрам нәкʹәвьн» (2 Корьнтʹи 6:17; Ишайа 52:11).

ЩАБЕД WӘ У ШЬХӦЛЕД WӘ БЬРА БЬ МАQУЛТИ БӘ

13. Һәрге тә сафи кьр кӧ әʹйд-qәйда дәрбаз нәки, жь бо ве йәке тӧ рʹасти кʹижан чәтьнайийа дькари бейи?

¹³ Әw йәк кӧ тӧ әʹйда дәрбаз наки, дькарә сәва тә бьбә щерʹьбандьн. Мәсәлә, бьра-пьсмамед тә дькарьн әʹщебмайи бьминьн кӧ чьрʹа тӧ тʹәви wана әʹйда дәрбаз наки. Йан жи кәсәк дькарә хера мьрийа бинә мала тә. Wи чахи тӧйе чь бьки? Гәло wе рʹаст бә әве хере һьлди? Ле те чь бьки һәрге мере тә, йан жьна тә ӧса Хwәде наһʹәбинә ча тӧ дьһʹәбини? Ча тӧ дькари али зарʹед хwә бьки, wәки әwана дьшьрмиш нәбьн кӧ тьштәк жь wана кем дьбә рʹийе ве йәкеда, кӧ тӧ ван әʹйд-qәйда дәрбаз наки?

14, 15. Тӧ чь гәрәке бьки һәрге кәсәк жь бо щәжьне тә бьмбарәк дькә, йан жи пʹешкʹешәке дьдә тә?

¹⁴ Лазьм ә әм дь һʹәму дәрәщада сәрwахт у маqул бьн. Һәрге ньшкева кәсәк жь бо щәжьне тә бьмбарәк дькә у qәнщийе тәрʹа дьхwазә, тӧ дькари тʹәне рʹазибуна хwә жерʹа әʹлам ки. Ле һәрге мәрикә кӧ тәрʹа рʹьнд нас ә, йан жи һәвале тәйә ль сәр хәбате, тә бьмбарәк дькә, дь ве дәрәщеда дьбәк тӧ сафи ки һьнәк зедә тьшт әʹлами wи ки. Чь жи һәбә, дь һʹәму дәрәщада фәсал у маqул бә. Кʹьтеба Пироз ширәт дькә: «Бьра хәбәрдана wә мәʹрифәти у хwекьри бә у бьзаньбьн кӧ чаwа щайиз ә щаба һәр кәси бьдьн» (Колоси 4:6). Фәсал бә wәки тʹәви мәрийа бе qәдьр ниби. Дәwсе бь маqултийе дәрһәqа ньһерʹандьна хwә wанарʹа шьровәкә. У зәлал кә, wәки тӧ мьqабьли wе йәке нини кӧ qәдьре мьрийа бьгьрьн, йан жи тʹәви мәрьвед хwәйә незик тʹоп бьн, ле тә сафи кьрийә әве йәке дь wәʹдәки дьнда бьки.

¹⁵ Ле тӧ чь дькари бьки һәрге кәсәк дьхwазә жь бо әʹйдәке пʹешкʹешәке бьдә тә? Дь ве пьрседа гәләк тьшт дәрәщева гьредайи йә. Әw, кʹи кӧ тәрʹа пʹешкʹеше дьдә дькарә ӧса бежә: «Әз заньм wәки тӧ әʹйда рʹожа буйине дәрбаз наки. Әз тʹәне дьхwазьм wәки әве пʹешкʹеше һьлди . Дьбә тӧ сафи ки кӧ һәрге әве пʹешкʹеше һьлди әв wе нәйе һʹәсабе кӧ тӧ әʹйде дәрбаз дьки. Ле һәрге әw мәри дәрһәqа ньһерʹандьна тә ньзанә, тӧ дькари бежи кӧ әве әʹйде дәрбаз наки. Әв йәк wе али тә бькә мәрийарʹа шьровәки кӧ чьрʹа тӧ жи пʹешкʹеша нади wан. Алийе дьнва жи wе бь аqлайи бә, кӧ әве пʹешкʹеше һьлнәди һәрге зани, wәки әв мәри әве пʹешкʹеше дьдә сәва кӧ избат кә, wәки тӧ һьндава баwәрийа хwә амьн нини, йан жи кʹара хwә дьгәрʹи.

ҺЬНДАВА НӘФӘРЕД МАЛБӘТА ХWӘ ГӘРӘКЕ ЧАWА БИ?

16. Ча тӧ дькари шәһрәзә би, чахе пьрс әʹйд-qәйдава тʹәв гьредай ә?

¹⁶ Ле тӧ чь гәрәке бьки һәрге һʹәбандьна нәфәред малбәта тә у йа тә нә йәкә? Һьндава малбәта хwә жи шәһрәза бә. Нә лазьм ә wәки тӧ сәва һәр әʹйд-qәʹйдәке тʹәви нәфәред мала хwә шәрʹ бьки. Чьмки изьна wан һәйә бь щурʹе хwә дьшьрмиш бьн у сафи кьн. Һәрге дьхwази wәки нәфәред мала тә qәдьре изьна тәйә сафикьрьне бьгьрьн, тӧ жи гәрәке qәдьре изьна wанә сафикьрьне бьгьри. (Бьхунә Мәтта 7:12.) Хwә жь wан һʹәму тьшта дур бьгьрә, чь кӧ дькарә тә текә нава шьхӧлед әʹйд-qәйдед религийава гьредайи. Ле сәрwахт бә чахе пьрс дәрһәqа тьштед ӧса ньн кӧ әʹйд-qәйдед религийава гьредайи ниньн. Бәле, тӧ гәрәке тʹьме ӧса бьки wәки исафа тә тʹәмьз бьминә. (Бьхунә 1 Тимотʹейо 1:18, 19.)

17. Ча тӧ дькари али зарʹед хwә бьки, wәки чахе әwана дьбиньн кӧ дор-бәред wан әʹйд-qәйда дәрбаз дькьн, жь бо ве йәке дьшьрмиш нәбьн кӧ тьштәк жь wана кем дьбә?

¹⁷ Чь тӧ дькари бьки, wәки зарʹед тә дьшьрмиш нәбьн кӧ тьштәк щәм wан кем ә рʹийе ве йәкеда, wәки ван әʹйд-qәйда дәрбаз накьн, йед кӧ нә ль сәр һʹиме Кʹьтеба Пироз ьн? Гәлә тьшт гьредайи йә тʹәви ве йәке, һәла wәʹде дьн нава сале тӧ чь бона wан дьки. Һьнә де-бав сафи дькьн wәки wәʹдәки дьн пʹешкʹеша бьдьнә зарʹед хwә. Ле пʹешкʹешәкә лапә баш йа кӧ тӧ дькари зарʹед хwәрʹа бьди, әв һәйә гӧһдайин у wәʹде тә.

ХWӘ ЛЬ ҺʹӘБАНДЬНА РʹАСТ БЬГЬРӘ

18. Ча щьватед мәсиһийа дькарьн али тә бькьн, кӧ хwә ль һʹәбандьна рʹаст бьгьри?

¹⁸ Сәва кӧ дьле Хwәде ша бьки, лазьм ә wәки тӧ жь һʹәбандьна нәрʹаст дәркʹәви у бьсәкьни ль алийе һʹәбандьна рʹаст. Әв чь те һʹәсабе? Дь Кʹьтеба Пирозда ньвисар ә: «Бьра әм бона һәвдӧ хәм бькьн, wәки һʹзкьрьне у qәнщикьрьнеда һелана бьдьнә һәв. Бьра әм дәст жь ль һәвщьвине нәкʹьшиньн, чаwа кӧ һьнәка хwәрʹа кьрийә хәйсәт, ле әм дьл бьдьнә һәв у һе зедә, чьмки әм дьбиньн кӧ Рʹожа Ахрәте незик дьбә» (Ибрани 10:24, 25). Щьватед мәсиһийа мәщаләкә баш дьдьн, кӧ бькарьби ӧса Хwәдерʹа qӧльх ки чаwа әw qәбул дькә (Зәбур 22:22; 122:1). Ль сәр ван щьвата, мәсиһийед рʹаст дьл дьдьнә «бәр һәв» (Рʹомайи 1:12).

19. Чьрʹа ӧса фәрз ә кӧ хәбәрди тʹәви мәрийа дәрһәqа ве йәке, чь кӧ тӧ жь Кʹьтеба Пироз пеһʹәсийайи?

¹⁹ Хwә ль һʹәбандьна рʹаст бьгьри, әв ӧса жи те һʹәсабе wәки хәбәр ди тʹәви мәрийа дәрһәqа wе йәке, чь кӧ тӧ пеһʹәсийайи жь һинбуна Кʹьтеба Пироз тʹәви Шәʹдед Йаһоwа. Иро һʹәчʹи зәʹф жь мәрийа «дьнальн», чахе дьбиньн кӧ дьнйайеда чьqас зӧлми һәйә (Һәзәqел 9:4). Дьбә тӧ жи мәрьвед ӧса нас дьки. Хәбәр дә тʹәви wан мәрийа дәрһәqа ахьрикә баш, йе кӧ Кʹьтеба Пироз соз дьдә. Һәрге тӧ тʹәви мәсиһийед рʹаст незик би у мәрийарʹа гьли ки дәрһәqа рʹастийа һʹәwас жь Кʹьтеба Пироз, тӧйе бьбини wәки һеди-һеди жь wан әʹйд-qәйдед нәрʹаст дур дькʹәви, йед кӧ дьле тәда мабун. Баwәр кә һәрге тӧ хwә ль һʹәбандьна рʹаст бьгьри, тӧйе бь рʹастийе жи бәхтәwар би у гәлә кʹәрәма бьстини (Малахи 3:10).