Бь Дӧакьрьне Незики Хwәде бә

1, 2. Чьрʹа дӧакьрьн qәдрәки гәләк мәзьн ә сәва мә, у чьрʹа фәрз ә кӧ бьзаньбьн, чь һин дькә Кʹьтеба Пироз дәрһәqа дӧакьрньне?

СӘВА Йаһоwа «кӧ әʹрд у әʹзман әʹфьрандийә», һʹәму мьләт мина дьлопәкә жь аве нә (Зәбур 115:15; Ишайа 40:15). Дь Кʹьтеба Пирозда ӧса ньвисар ә: «Йаһоwа незике һʹәму кәсед кӧ гази ль wи дькьнә; һʹәму кәсед, кӧ бь рʹастийе гази ль wи дькьн. Әw хwәстәка кәсед кӧ жь wи дьтьрсьн, пек тинә у qиринед wанед жь бо аликʹарийе дьбьһизә» (Зәбур 145:18, 19, АБ). Тӧ тʹәне бьдә һʹәсабе хwә, wәки Әʹфьрандаре һьмзор кӧ һәр тьшт әʹфьрандийә, незики мә йә у гӧһ дьдә мә, һәрге әм рʹаст гази wи дькьн. Бь рʹастийе жи сәва мә qәдрәки чьqас мәзьн ә, кӧ әм дькарьн Хwәдерʹа дӧа бькьн!

² Һәрге әм дьхwазьн кӧ Йаһоwа дӧайед мә бьбьһе, әм гәрәке ӧса wирʹа дӧа бькьн чаwа әw дьхwазә. Ле һәрге әм ньзаньн, чь һин дькә Кʹьтеба Пироз дәрһәqа дӧакьрьне, әме ча бькарьбьн рʹаст дӧа бькьн? Ләма жи фәрз ә кӧ пебьһʹәсьн жь Кʹьтеба Пироз ча гәрәке дӧа бькьн, чьмки дӧакьрьн али мә дькә wәки әм незики Йаһоwа бьн.

ЧЬРʹА ГӘРӘКЕ ЙАҺОWАРʹА ДӦА БЬКЬН?

3. Чьрʹа әм гәрәке Йаһоwарʹа дӧа бькьн?

³ Әм гәрәке Йаһоwарʹа дӧа бькьн, чьмки әw хwәха мә тʹәглиф дькә кӧ әве йәке бькьн. Дь Хәбәра Хwәдеда ньвисар ә: «Бона тʹӧ тьшти хәм нәкьн, ле хwәстьна wә бьра бь дӧа-дьрозга, рʹазибунева тʹәвайи, Хwәдева әʹйан бә. У әʹдьлайийа Хwәде кӧ жь һәр һʹьш-аqьли дәрбазтьр ә, wе дьл у фькьред wә йәктийа Мәсиһ Исада хwәй кә» (Филипи 4:6, 7). Ләма жи әм нахwазьн әве пешкʹеше, йа кӧ Сәрwере һьмзор дайә мә, ӧнда кьн.

4. Чь щурʹәйи, дӧакьрьн һәләqәтийа мә тʹәви Йаһоwа qәwи дькә?

⁴ Дӧакьрьн ӧса жи али мә дькә, wәки һәләqәтийа мә тʹәви Йаһоwа һе бьшьдә. Мәсәлә, һәвалед рʹаст рʹасти һәв тен у тʹәви һәв хәбәр дьдьн нә тʹәне wи чахи гава wанарʹа тьштәк лазьм ә. Wанарʹа гәләк һʹәwас ә тʹәви һәв wәʹдә дәрбаз кьн, чьмки әwана дькарьн һеса дьле хwә һәв дӧрʹа вәкьн, у дәрһәqа проблемед хwә у нет-фькьред хwә һәврʹа бежьн. Әв йәк һәвалтийа wан гәләки дьшьдинә. Һәвалтийа мә тʹәви Йаһоwа жи һәма ӧса дькарә бьшьдә. Бь аликʹарийа ве кʹьтебе тӧ гәләк тьшт пеһʹәсийайи, кӧ чь һин дькә Кʹьтеба Пироз дәрһәqа Йаһоwа, һʹӧнӧр-хәйсәтед wи у ӧса жи дәрһәqа qьрара wи. Ньһа тӧ ида зани кӧ Йаһоwа һәйә у әw йәки ча нә, у дькари һәләqәтийа хwә тʹәви wи qәwи ки. Дӧакьрьн мәщале дьдә тә, кӧ дәрһәqа нет-фькьред хwә Баве хwәйи әʹзманарʹа бежи. У бь ве йәке тӧйе һе незики wи би (Аqуб 4:8).

ЧЬ ЖЬ МӘ ТЕ ДӘʹWАКЬРЬНЕ?

5. Жь чь те кʹьфше, кӧ Йаһоwа нә һʹәму дӧакьрьна дьбьһе?

⁵ Гәло Йаһоwа һʹәму дӧа дьбьһе? Дина хwә бьде кӧ wәʹде Ишайа пʹехәмбәр, Йаһоwа чь готә щьмәʹта Исраели, чахе wана нәдьхwәст гӧрʹа wи бькьрана: «Дәма һун зәʹф дӧа бькьн жи әзе гӧһдари нәкьм; дәстед wә бь хунева тʹьжи йә!» (Ишайа 1:15). Жь вьр те кʹьфше wәки кьред мәрийа дькарьн бьбьнә мәʹнийа wе йәке, кӧ Йаһоwа гӧһ нәдә дӧайед wан. Һәрге әм дьхwазьн кӧ дӧайед мә дьле Йаһоwа хwәш бен, әм гәрәке бьзаньбьн чәнд дәʹwакьрьнед фәрз.

6. Сәва кӧ Хwәде дӧайед мә бьбьһе, чь дәʹwакьрьнәкә фәрз һәйә, у ча әм гәрәке нишан кьн кӧ әве дәʹwакьрьне пек тиньн?

⁶ Дәʹwакьрьнәкә фәрз әв ә, кӧ баwәрийа хwә нишан ки. (Бьхунә Марqос 11:24.) Паwлосе шанди ньвиси: «Бе баwәри тʹӧ щар набә кӧ инсан ль Хwәде хwәш бе, чьмки әwе кӧ незики Хwәде дьбә, гәрәке баwәр бькә, кӧ Хwәде һәйә у wе wан хәлат кә, кʹижан кӧ ль wи дьгәрʹьн» (Ибрани 11:6). Бәле, сәва кӧ баwәрийа рʹаст нишан ки, гәрә нә кӧ тʹәне бьзаньби wәки Хwәде һәйә у кӧ әw дӧайед мә дьбьһе у щаба wан дьдә. Әм гәрәке баwәрбуне бь кьред хwә избат кьн. Демәк бь әʹмьре хwәйи һәр рʹожи гәрәке бьдьнә кʹьфше, кӧ баwәрбуна мә һәйә (Аqуб 2:26).

7. (а) Чьрʹа әм гәрәке бь qәдьр Йаһоwарʹа дӧа бькьн? (б) Ча әм дькарьн нишан кьн һʹәлали у мьлуктийа хwә, чахе Хwәдерʹа дӧа дькьн?

⁷ Йаһоwа ӧса жи дьхwазә кӧ әм бь мьлуктийе у һʹәлалийе wирʹа дӧа бькьн. У әw һежа йә, wәки әм бь мьлуктийе тʹәви wи хәбәр дьн. Мәсәлә чахе мәри бәр wәзир йан жи бәр сәроке wәлат дьсәкьнә, тʹьме бь qәдьр тʹәви wан хәбәр дьдә, чьмки әw занә кӧ фьрqийа ортʹа wи у wан чь йә. Ле чьqас һе зедә әм гәрәке бь qәдьр тʹәви Йаһоwа хәбәр дьн! (Зәбур 138:6). Чьмки әw «Хwәдейе Һәри» Зор ә (Дәстпебун 17:1, ПКʹМ). Чахе әм дӧа дькьн, әм гәрәке бь мьлуктийе бьдьнә кʹьфше, wәки заньн кӧ әм һьмбәри Хwәде кʹи нә. Мьлукти wе али мә бькә кӧ дӧайед мә пʹьрʹхәбәр йан жи бь әзбәри нибьн, дәwсе әме бь һʹәлали у бь дьл у щан wирʹа дӧа бькьн (Мәтта 6:7, 8).

8. Ча әм дькарьн анәгори дӧайед хwә бьжин?

⁸ Сәва кӧ Хwәде мә бьбьһе, әм ӧса жи гәрәке анәгори дӧайед хwә шьхӧл бькьн. Йаһоwа һивийе йә кӧ әм qәwата хwә гьшки бьдьн хәбате, wәки анәгори дӧайед хwә бьжин. Мәсәлә, чахе әм дӧа дькьн у дьбежьн: «Нане мәйи рʹоже, рʹож бь рʹож бьдә мә», демәк әм гәрәке бьхәбьтьн у хәбатһʹьз бьн (Мәтта 6:11; 2 Тʹесалоники 3:10). Һәрге дь тьштәкида сьстбуна мә һәйә, у дәрһәqа ве йәке әм Хwәдерʹа дӧа дькьн у аликʹарийе жь wи дьхwазьн, әм хwәха жи гәрәке жь wан һʹәму тьшта хwә дур бьгьрьн, чь кӧ дькарә мә бьдә шашкьрьне (Колоси 3:5). Хенщи ван йәка диса һьнә пьрс дәрһәqа дӧакьрьне һәнә, у әм гәрәке бьзаньбьн щаба ван пьрса.

ЩАБЕД ЧӘНД ПЬРСА ДӘРҺӘQА ДӦАКЬРЬНЕ

9. Кʹерʹа әм гәрәке дӧа бькьн у бь наве кʹе?

⁹ Кʹерʹа әм гәрәке дӧа бькьн? Иса Мәсиһ шагьртед хwә һин дькьр дӧа бькьн: «Баве мәйи әʹзманарʹа» (Мәтта 6:9). Ләма жи әм гәрәке тʹәне Йаһоwарʹа дӧа бькьн. Йаһоwа дьхwазә wәки әм бь наве Кӧрʹе wи, Иса Мәсиһ wирʹа дӧа бькьн. Гәло чьрʹа? Чьмки ча әм жь сәре 5 пеһʹәсийан, Иса Мәсиһ һатә ль сәр әʹрде сәва кӧ әʹмьре хwә бьдә ча кʹьрʹин у мә жь гӧнә у мьрьне хьлаз кә (Йуһʹәнна 3:16; Рʹомайи 5:12). Әw һәйә сәрәккʹаһине кʹьфшкьри, кӧ дькарә шашийед у гӧнед мә бьбахшинә. Әw ӧса жи һатә кʹьфшкьрьне ча Һʹакьм (Йуһʹәнна 5:22; Ибрани 6:20). Аһан чьрʹа Кʹьтеба Пироз мә һин дькә, кӧ бь наве Иса Мәсиһ Хwәдерʹа дӧа бькьн. Дәрһәqа хwә Иса гот: «Әз ьм, рʹе, рʹасти у жийин. Тʹәне пе мьн йәк дькарә бе щәм Баве» (Йуһʹәнна 14:6). Һәрге әм дьхwазьн кӧ дӧайед мә бенә бьһистьне, әм гәрәке тʹәне Йаһоwарʹа дӧа бькьн у бь наве Кӧрʹе wи Иса Мәсиһ.

10. Чьрʹа әʹсәйи нинә, кӧ чахе Хwәдерʹа дӧа дькьн бьсәкьньн йан рʹунен?

¹⁰ Гәло чахе Хwәдерʹа дӧа дьки, фәрз ә хәм бьки һәла тӧ ча дьсәкьни йан рʹудьнейи? На. Йаһоwа жь мә дәwа накә кӧ wәʹде дӧакьрьне әм әʹсәйи гәрәке бь щурʹәки бьсәкьньн, йан жи рʹунен, йан жи дәсте хwә һьлкʹьшиньн. Кʹьтеба Пироз мә һин дькә, кӧ чахе мәри дӧа дькә, әв дькарә рʹуньшти дӧа бькә, йан ль сәр пʹийа бьсәкьнә, йан сәре хwә бәржер кә, йан жи ль сәр чока дӧа бькә (1 Дирок 17:16; Нәһәмийа 8:6; Данийел 6:10; Марqос 11:25). Фәрз нинә, мәри чаwа сәкьнийә гава Хwәдерʹа дӧа дькә, фәрз ә кӧ әw бь дьле хwә дӧа бькә. Әм кʹидәре жи бьн, һәр рʹож чахе әм шьхӧл дькьн йан жи чахе ньшкева рʹасти чәтьнайа тен, әм дькарьн дьле хwәда дӧа бькьн. Дьбә тʹӧ кәс һаш пе тʹӧнә бә кӧ әм дӧа дькьн, ле Йаһоwа дӧайед ӧса жи дьбьһе (Нәһәмийа 2:1-6).

11. Дәрһәqа чь әм дькарьн дӧа бькьн?

¹¹ Дәрһәqа чь әм дькарьн дӧа бькьн? Дь Кʹьтеба Пирозда ньвисар ә: «Һәгәр әм тьштәки ль гора хwәстьна . . . [Йаһоwа] же бьхwазьн, әw дәнге мә дьбьһе» (1 Йуһʹәнна 5:14). Демәк чь кӧ мьqабьли qьрара Хwәде начә, әм дькарьн дәрһәqа wан һʹәму тьшта дӧа бькьн. Ле гәло һәрге әм дәрһәqа чәтьнайед хwә wирʹа дӧа бькьн, әв жи wе ль гора qьрара Хwәде бә? Бәле, wе ль гора qьрара wи бә! Дӧакьрьн әв мина хәбәрдана тʹәви һәваләки незик ә. Әм дькарьн бь дьлсахи Хwәдерʹа дӧа бькьн у «дьле хwә ль бәр wи вәкьн» (Зәбур 62:8, АБ). Әм гәрәке рʹӧһʹе пироз жь Хwәде бьхwазьн, чьмки бь сайа ве йәке әме хьрабийе нәкьн (Луqа 11:13). Әм ӧса жи дькарьн рʹебәрийе жь wи бьхwазьн, сәва кӧ һʹәму тьшти бь аqлайи сафи кьн у сәва кӧ qәwате бьдә мә, wәки дь чәтьнайада тәйах кьн (Аqуб 1:5). Һәрге әм гӧнә бькьн, әм гәрәке ль сәр һʹиме qӧрбанбуна Иса Мәсиһ бахшандьне жь Хwәде бьхwазьн (Әфәси 1:3, 7). Ле фәʹмдари йә, wәки әм нә тʹәне гәрәке дәрһәqа хwә дӧа бькьн. Әм ӧса жи гәрәке дәрһәqа нәфәред мала хwә у дәрһәqа хушк-бьред хwәйә рʹӧһʹани, дӧа бькьн (Кʹаред Шандийа 12:5; Колоси 4:12).

12. Пешийе әм гәрәке дәрһәqа чь дӧа бькьн?

¹² Йа пешьн, әм гәрәке дәрһәqа wан тьшта дӧа бькьн чь кӧ Йаһоwа Хwәдева гьредайи йә. Бал мә гәләк мәʹни һәнә, жь бо чь жи әм гәрәке бь зарʹе хwә Хwәде рʹумәт кьн у сәва һәр qәнщийа wи, рʹазибуна хwә wирʹа әʹйан кьн (1 Дирок 29:10-13). Дь кʹьтеба Мәтта 6:9-13-да, те гьликьрьне кӧ Иса һин дькьр дӧа бькьн, wәки наве Хwәде пироз бә. (Бьхунә.) Ӧса жи Иса һин кьр кӧ әм гәрәке дӧа бькьн wәки Пʹадшатийа Хwәде бе, у wәки qьрара wи пек бе чаwа ль әʹзман ӧса жи ль сәр әʹрде. У тʹәне паши ван пьрсед фәрз, Иса дәстпедькә бежә дәрһәqа проблемед гәнди. Һәрге әм жи ӧса дӧа бькьн, демәк пешийе сәва пьрсед кӧ Хwәдева гьредайи нә дьшьрмиш бьн, әме нишан кьн кӧ әм нә тʹәне дәрһәqа һʹалхwәшийа хwә дьшьрмиш дьбьн.

13. Чь те готьне дь Кʹьтеба Пирозда, дәрһәqа ве йәке кӧ чьqас wәʹдә әм гәрәке дӧа бькьн?

¹³ Дӧайед мә чьqас wәʹдә гәрәке бькʹьшинә? Фьрqи тʹӧнә әм тʹәви мәрийед дьн дӧа дькьн, йан жи хwәха хwәрʹа, дь Кʹьтеба Пирозда найе ньвисаре чьqас wәʹдә әм гәрәке дӧа бькьн. Мәсәлә, пешийа хwарьне дькари кьн дӧа бьки, ле чахе дьле хwә Хwәдерʹа вәдьки, дькари һе дьреж wирʹа дӧа бьки (1 Самуйел 1:12, 15). Иса Мәсиһ сущдар дькьр мәрьвед хwәрʹази у кʹӧбар, йед кӧ бәрбь һʹәмуйа дьсәкьнин дӧа дьреж дьготьн, сәва кӧ дӧайед wан бенә кʹьфше (Луqа 20:46, 47). Дӧайед ӧса дьле Хwәде хwәш найен. Сәва wи фәрз ә, wәки әм бь дьл у щан дӧа бькьн. Ча те кʹьфше әм дькарьн һаqас Хwәдерʹа дӧа бькьн, чьqас дьхwазьн у кʹәнге дьхwазьн, әв дәрәщева у мәщалева гьредайи йә.

14. Чь те һʹәсабе «һәр гав дӧа бькьн» у ча әв йәк мә дьл ша дькә?

¹⁴ Рʹоже чьqас щара гәрә дӧа бькьн? Дь Кʹьтеба Пирозда ньвисар ә кӧ әм гәрәке «һәр гав дӧа бькьн» (Рʹомайи 12:12; 1 Тʹесалоники 5:17). Ле әв найе һʹәсабе кӧ әм гәрәке 24 сьһʹәта Хwәдерʹа дӧа бькьн. Һәйнәсәр, Кʹьтеба Пироз мә һелан дькә, кӧ һәр рʹож дӧа бькьн, тʹьме рʹазибуна хwә wирʹа әʹйан кьн бона рʹәʹмтийа wи, ӧса жи рʹебәрийе у аликʹарийе жь wи бьхwазьн. Бь рʹастийе жи шабунәкә чьqас мәзьн ә бьзаньби кӧ дькари Хwәдерʹа дӧа бьки, кʹәнге дьхwази у чьqас дьхwази! Һәрге әм бь рʹастийе әв пʹешкʹеша жь Хwәде, демәк дӧакьрьне qимәт дькьн, әме әʹсәйи wәʹдә бьбиньн, сәва кӧ Баве хwәйи әʹзманарʹа хәбәр дьн.

15. Чьрʹа әм гәрәке бежьн «Амин» паши дӧакьрьна хwә, йан жи чахе дӧайед кәсәки дьбьһен?

¹⁵ Чьрʹа хьлазийа дӧакьрьне әм гәрәке бежьн «Амин»? Хәбәра «амин» те һʹәсабе «бәле», йан «бьра ӧса бә». Ча жь мәсәлед Кʹьтеба Пироз те кʹьфше, wәʹде бәре мәрийа паши дӧакьрьне тʹьме дьготьн «Амин» (1 Дирок 16:36; Зәбур 41:13). Чахе әм жи паши дӧакьрьне дьбежьн «Амин», бь ве йәке әм нишан дькьн кӧ гьлийед мә һʹәлал бун. Ле чахе кәсәк дӧа дькә у хьлазийе әм бь дәнге бьльнд йан дьле хwәда дьбежьн «Амин», бь ве йәке әм дьдьнә кʹьфше кӧ әм qайил ьн бь ван гьлийа, чь кӧ готьн (1 Корьнтʹи 14:16).

ЧА ХWӘДЕ ЩАБА ДӦАЙЕД МӘ ДЬДӘ?

16. Чь әм дькарьн баwәр бькьн чахе дӧа дькьн?

¹⁶ Гәло Йаһоwа бь рʹастийе щаба дӧайед мә дьдә? Бейи шьк, бәле! Әм дькарьн бь тʹәмамийа дьле хwә баwәр бькьн, кӧ Хwәде «йе кӧ дӧа дьбьһизә», щаба милйона мәрийа дьдә, йед кӧ бь һʹәлали wирʹа дӧа дькьн (Зәбур 65:2). Йаһоwа дькарә щаба мә бьдә бь сайа щурʹә-щурʹә тьшта у кәса.

17. Чьрʹа әм дькарьн бежьн, кӧ Хwәде щаба дӧайед мә бь сайа мьлйакʹәта у qӧльхкʹаред хwә дьдә?

¹⁷ Йаһоwа бь сайа мьлйакʹәтед хwә у ӧса жи бь сайа qӧльхкʹаред хwә, дькарә щаба дӧайед мә бьдә (Ибрани 1:13, 14). Һәнә гәләк qәwьмандьн, чахе мәрийа Хwәдерʹа дӧа дькьр, аликʹари жь wи дьхwастьн сәва кӧ Кʹьтеба Пироз рʹьнд фәʹм бькьн, у һьнә wәʹдә шунда әwана рʹасти Шәʹдед Йаһоwа дьһатьн. Жь мәсәлед ӧса те кʹьфше, кӧ шьхӧле даннасинкьрьне мьлйакʹәт рʹебәри дькьн (Әʹйанти 14:6). Йаһоwа ӧса жи сәва кӧ щаба дӧайед мә бьдә, дькарә qӧльхкʹаре хwә һелан кә, wәки әw дь wәʹде гьранда аликʹарийе бьдә мә (Мәтʹәлок 12:25; Аqуб 2:16).

18. Ча Йаһоwа бь аликʹарийа рʹӧһʹе хwәйи пироз у бь аликʹарийа Кʹьтеба Пироз, щаба дӧайед qӧльхкʹаред хwә дьдә?

¹⁸ Йаһоwа ӧса жи щаба дӧайед мә, бь аликʹарийа рʹӧһʹе хwәйи пироз у бь Кʹьтеба Пироз, дьдә. Мәсәлә, әв дькарә бь рʹӧһʹе пироз рʹебәрийа мә бькә у дь чәтьнайада мә qәwи кә (2 Корьнтʹи 4:7). Щарна әме щаба дӧайед хwә жь Кʹьтеба Пироз бьстиньн. Бь сайа ве кʹьтебе Йаһоwа рʹебәрийе дьдә мә, сәва кӧ сафикьрьнед мә бь аqлайи бьн. Рʹезед кӧ wе али мә бькьн, әм дькарьн бьбиньн wәʹде һинбуна Кʹьтеба Пирозә хwәха у чахе әм әʹдәбйәта дьхуньн, йед кӧ ль сәр һʹиме Кʹьтеба Пироз ьн, мәсәлә ча әв кʹьтеб. Фькьред жь Кʹьтеба Пироз йед кӧ wе али мә бькьн, әм дькарьн ль сәр щьвата бьбьһен, жь хушк-бьра дь щьватеда йан жи жь рʹуспийа, йед кӧ хәм дькьн дәрһәqа һʹалхwәшийа мә (Галати 6:1).

19. Чь әм гәрәке тʹьме биньн бира хwә, һәрге мә тʹьре кӧ Йаһоwа щаба дӧайед мә дәрәнги дьхә?

¹⁹ Һәрге мә тʹьре кӧ Йаһоwа щаба дӧайед мә дәрәнги дьхә, әв найе һʹәсабе кӧ Хwәдерʹа чәтьн ә щаба мә бьдә. Фәрз ә wәки тʹьме дь бира мәда бә, кӧ Йаһоwа щаба дӧайед мә дь wәʹдәда у ль гора qьрара хwә wе бьдә. Әw рʹьнд занә һʹәwщед мә, у жь мә четьр занә кӧ ча али мә бькә. Щарна әw мәрʹа мәщала дьдә, wәки әм бь кьред хwә нишан кьн кӧ дьqәдиньн ширәтед жь Кʹьтеба Пироз, кʹидәре кӧ те готьне wәки әм гәрәке нәсәкьньн, демәк «бьхwазьн . . . бьгәрʹьн . . . дәри хьн» (Луqа 11:5-10). Һәрге әм әве ширәте пек биньн, әме нишан кьн баwәрийа хwә у бьдьнә кʹьфше, кӧ әв йәк чь кӧ әм жь wи дьхwазьн, мәрʹа гәләк фәрз ә. Дькарә бьqәwьмә кӧ Йаһоwа щаба дӧайед мә ӧса нәдә, чаwа әм һивийе нә. Мәсәлә чахе әм рʹасти щерʹьбандьна тен, дьбә Йаһоwа перʹаперʹа мә жь щерʹьбандьна хьлаз нәкә, ле wе qәwате бьдә мә wәки әм бькарьбьн тәйах кьн. (Бьхунә Филипи 4:13.)

20. Чьрʹа әм гәрәке пʹешкʹеша жь Хwәде, демәк дӧакьрьне qимәт кьн?

²⁰ Бь рʹастийе жи, әм чьqас бәхтәwар ьн кӧ Әʹфьрандаре әʹрде незики wан һʹәму мәрийа дьбә, йед кӧ дь рʹастийеда wирʹа дӧа дькьн. (Бьхунә Зәбур 145:18). Wәрен әм тʹьме qимәт кьн әве пʹешкʹеша жь Хwәде, демәк дӧакьрьне. Әв йәк wе али мә бькә, wәки әм һе незики wи Хwәдейи бьн, йед кӧ дӧа дьбьһе.