Ньхӧмандьн у Һәләqәтийа Тә Тʹәви Хwәде

1. Чьрʹа wәзире Әтйупийе хwәст бе ньхӧмандьне?

«ВА ЙӘ ав, иди чь наһелә кӧ әз бемә ньхӧмандьне?» Әва пьрса дь qьрʹна йәкеда wәзире Әтйупийе да. Даннасинкʹаре бь наве Филипо wирʹа избат кьрьбу, кӧ Иса йә Мәсиһе создайи. Гьлийед жь Ньвисаред Пироз ӧса дьле wи гьрт, кӧ әwи хwәст бе ньхӧмандьне! (Кʹаред Шандийа 8:26-36).

2. Чьрʹа тӧ гәрәке дьшьрмиш би дәрһәqа ньхӧмандьне?

² Һәрге тӧ бь дьл у щан тʹәви кәсәки жь Шәʹдед Йаһоwа ве кʹьтебе һʹәта ви сәри һин буйи, дьбәк тӧ жи тʹәхмин дьки кӧ һазьр и щаба хwә ль сәр ве пьрсе бьди: ‹Иди чь наһелә кӧ әз бемә ньхӧмандьне?› Тӧ пеһʹәсийайи кӧ Кʹьтеба Пироз әʹмьре һʹәта-һʹәтайе дь щьнәтеда, соз дьдә (Луqа 23:43; Әʹйанти 21:3, 4). Ӧса жи тӧ пеһʹәсийайи дәрһәqа һʹале мьрийа у дәрһәqа гӧмана бона wан (Wаиз 9:5; Йуһʹәнна 5:28, 29). Дьбә тӧ ида дьчи ль сәр щьватед Шәʹдед Йаһоwа у тʹәви wан незик буйи, у дьбини кӧ әwана ль гора һʹәбандьна рʹаст дьжин (Йуһʹәнна 13:35). Ле һе фәрз әв ә, кӧ тә ида дәстпекьрийә һәләqәтийа хwә тʹәви Йаһоwа Хwәде мәзьн ки.

3. (а) Иса чь фәрман да шагьртед хwә? (б) Ча ньхӧмандьн те кьрьне?

³ Ча тӧ дькари нишан ки кӧ дьхwази Хwәдерʹа qӧльх ки? Иса готә шагьртед хwә: «Ньһа һәрʹьн һʹәму мьләта һин кьн у wана . . . бьньхӧминьн» (Мәтта 28:19). Дь ве йәкеда Иса хwәха мәсәлә һишт, әw дь аведа һатә ньхӧмандьне. Чахе Иса һатә ньхӧмандьне, ав ль сәр сәре wида нәкьрьн, нә жи ль сәр wи рʹәшандьн (Мәтта 3:16). Хәбәра Йунани, йе кӧ те wәлгәрʹандьне «ньхӧмандьн», те һʹәсабе «кʹәтьна бьн аве». Ләма жи ньхӧмандьна мәсиһийа һәма ӧса те кьрьне, демәк чахе мәри те ньхӧмандьне әw педа гәрәке бькʹәвә бьн аве.

4. Ньхӧмандьн чь дьдә кʹьфше?

⁴ Ньхӧмандьн дь аведа, дәʹwакьрьнәкә фәрз ә сәва wан мәрийа кʹи кӧ дьхwазә wәки һәвалтийа wи тʹәви Йаһоwа Хwәде һәбә. Бь ньхӧмандьне тӧ бәр гьшка әшкәрә нишан дьки, кӧ дьхwази Хwәдерʹа qӧльх ки у wәки ша йи qьрара Хwәде пек бини (Зәбур 40:7, 8). Ле сәва кӧ тӧ һазьр би бейи ньхӧмандьне, тӧ гәрәке чәнд гавед фәрз бьки.

ЛАЗЬМ Ә ЗАНӘБУН У БАWӘРИ

5. (а) Гава пешийе чь йә, сәва кӧ бейи ньхӧмандьне? (б) Чьрʹа фәрз ә һәрʹи ль сәр щьватед мәсиһийа?

⁵ Бь рʹастийе, гава пешьн тә ида кьрийә. Зани чь щурʹәйи? Бь сайа һинбуна Кʹьтеба Пироз тʹәви Шәʹдед Йаһоwа, тӧ дәрһәqа Йаһоwа Хwәде у Иса Мәсиһ пеһʹәсийайи. (Бьхунә Йуһʹәнна 17:3.) Ле һәла һе гәләк тьшт һәйә тӧ диса һин би. Qӧльхкʹаред Хwәдейә рʹаст дьхwазьн, кӧ дь «занәбуна әʹмьре Хwәдеда гьһишти бьн» (Колоси 1:9). Бь сайа щьватед Шәʹдед Йаһоwа тӧйе бькарьби һе зедә занәбуне бьстини (Ибрани 10:24, 25). Һәрге тӧ һәр гав бейи ль сәр щьватед Шәʹдед Йаһоwа, әв wе али тә бькә кӧ занәбуне дәрһәqа Хwәде бьстини.

6. Занәбуна тә жь Кʹьтеба Пироз гәрәке чьqас бә, сәва кӧ бейи ньхӧмандьне?

⁶ Сәва кӧ бейи ньхӧмандьне, әʹсәйи нинә бьзаньби һʹәму тьшти чь кӧ дь Кʹьтеба Пирозда ньвисар ә. Ле әʹсәйи йә wәки бьзаньби һʹәму һинкьрьнед фәрз жь Кʹьтеба Пироз у qәбул ки ван һинкьрьна. Мәсәлә, бал wәзире Әтйупийе һьнә занәбун ида һәбу, ле wирʹа аликʹари лазьм һат кӧ рʹезед жь Кʹьтеба Пирозә майин жи фәʹм бькә (Кʹаред Шандийа 8:30, 31). Тӧйе жи паши ньхӧмандьне диса гәләк тьшт һин би. Фәʹмдари йә wәки әм тʹьме дькарьн дәрһәqа Хwәде занәбуна хwә зедәкьн (Wаиз 3:11). Ле сәва кӧ бейи ньхӧмандьне бәс ә кӧ бьзаньби у qәбул ки һьнә һинкьрьнед фәрз жь Кʹьтеба Пироз (Ибрани 5:12). Мәсәлә, һинкьрьна дәрһәqа һʹале мьрийа, фәрзбуна наве Хwәде у Пʹадшатийа wи.

7. Һинбуна Кʹьтеба Пироз ча гәрәке ль сәр тә һʹӧкӧм бә?

⁷ Ле тʹәне занәбун бәс нинә, лазьм ә ӧса жи баwәри, чьмки «бе баwәри тʹӧ щар набә кӧ инсан ль Хwәде хwәш бе» (Ибрани 11:6). Дь Кʹьтеба Пирозда те гьликьрьне, кӧ чахе бьнәлийед жь бажаре Корьнтʹийа кәвьн бьһистьн даннасинкьрьна шагьртед Иса, әwана «баwәр кьрьн у пе аве һатьнә ньхӧмандьне» (Кʹаред Шандийа 18:8). Һинбуна Кʹьтеба Пироз wе баwәрийе бал тә пешда бинә, кӧ Кʹьтеба Пироз жь бина бәр Хwәде йә. Һинбуна Кʹьтеба Пироз ӧса жи гәрәке али тә бькә кӧ баwәр бьки, wәки һʹәму созед Хwәде рʹаст ьн у qӧрбанбуна Иса Мәсиһ рʹасти жи хьлазкьрьне тинә (Йешуа 23:14; Кʹаред Шандийа 4:12; 2 Тимотʹейо 3:16, 17).

РʹАСТИЙА КʹЬТЕБА ПИРОЗ МӘРИЙАРʹА ГЬЛИ КӘ

8. Бь сайа чь хwәстьна тә wе һе зедә бә, сәва кӧ хәбәр ди тʹәви мәрийа дәрһәqа wе йәке, чь кӧ тӧ һин буйи?

⁸ Чьqас һе зедә дьле тәда баwәрбун мәзьн бә, һаqас те тʹәхмин ки кӧ тӧ нькари дьле хwәда хwәй ки wан тьшта, чь кӧ тӧ һин буйи (Йерәмийа 20:9). Хwәстьна тә хәбәр ди тʹәви мәрийа дәрһәqа Хwәде у qьрара wи, wе һе зедә бә. (Бьхунә 2 Корьнтʹи 4:13.)

9, 10. (а) Дәрһәqа рʹастийа Кʹьтеба Пироз пешийе тӧ дькари дәстпеки тʹәви кʹе хәбәр ди? (б) Чь тӧ гәрәке бьки, һәрге дьхwази тʹәви Шәʹдед Йаһоwа дәркʹәви даннасинкьрьне?

⁹ Дәрһәqа рʹастийа Кʹьтеба Пироз, пешийе тӧ дькари дәстпеки бь мәʹрифәти тʹәви бьра-пьсмамед хwә, һәвалед хwә, щинаред хwә у тʹәви һәвал-хәбаткʹаред хwә хәбәр ди. Паше тӧйе ида бьхwази тʹәви Шәʹдед Йаһоwа дәрейи у даннасин бьки. Дәрһәqа ве нета хwә бежә wи мәрьвирʹа, кʹи кӧ тʹәви тә һинбуна Кʹьтеба Пироз дәрбаз дьбә. Һәрге бе кʹьфше кӧ тӧ һʹәму тьшти ӧса дьки, чаwа жь тә те дәʹwакьрьне, сәва кӧ дәрейи даннасин бьки, wи чахи те тʹәви wи мәрьви, кʹи кӧ тʹәви тә һинбуна Кʹьтеба Пироз дәрбаз дькә, рʹасти дӧ рʹуспийед щьвате бейи у әwана wе тʹәви тә дәрһәqа ве йәке хәбәр дьн.

¹⁰ Әв йәк ве али тә бькә, кӧ һе рʹьнд нас ки рʹуспийед щьвате, йед кӧ шьвантийе кәрийед пәзед Хwәде дькьн (Кʹаред Шандийа 20:28; 1 Пәтрус 5:2, 3). Һәрге рʹуспи бьбиньн кӧ тӧ фәʹм дьки у баwәр дьки һинкьрьнед фәрз жь Кʹьтеба Пироз, дьqәдини ширәтед Хwәде у бь рʹастийе жи дьхwази бьби Шәʹде Йаһоwа, wи чахи әwана wе тәрʹа бежьн кӧ тӧ ида дькари дәркʹәви дәрһәqа мьзгинийа хере даннасин бьки ча даннасинкʹаре нә ньхӧманди.

11. Чь тӧ гәрәке дь әʹмьре хwәда бьгӧһези, сәва кӧ бькарьби дәрейи даннасин бьки?

¹¹ Сәва кӧ тӧ бькарьби дәрейи даннасин бьки, дьбәкә тәрʹа ӧса жи лазьм бә дь әʹмьре хwәда тьштәки бьгӧһези. Мәсәлә тӧ гәрәке тʹәрк бьди wан хәйсәтед хьраб, дәрһәqа кʹижана тʹәне тӧ зани. Ӧса жи пешийа кӧ бежи, wәки дьхwази бьби даннасинкʹаре нәньхӧманди, һәрге гӧнед тәйә ӧса гьран һәнә ча мәсәлә бенамуси, сәрхwәшбун у бь хьраби хәбьтандьна наркотике, тӧ гәрәке жь ван гӧнед гьран аза би. (Бьхунә 1 Корьнтʹи 6:9, 10; Галати 5:19-21.)

ТʹОБӘКЬРЬН У ВӘГӘРʹАНДЬН

12. Чьрʹа тʹобәкьрьн гәләк фәрз ә?

¹² Пешийа кӧ бейи ньхӧмандьне, лазьм ә диса тьштәки бьки. Пәтрусе шанди гот: «Тʹобә кьн у бәрбь Хwәде вәгәрʹьн, кӧ гӧнед wә бенә рʹәситкьрьне» (Кʹаред Шандийа 3:19). Тʹобәкьрьн те һʹәсабе wәки бона тьштәки кӧ тә ида кьрийә, пʹошман би. Ле тʹобәкьрьн нә тʹәне wан мәрийарʹа лазьм ә, кʹи кӧ бь бенамусийе дьжин. Чьмки һәр кәс жь мәрийа гӧнә дькьн у һʹәмушкарʹа бахшандьна Хwәде лазьм ә (Рʹомайи 3:23; 5:12). Пешийа һинбуна Кʹьтеба Пироз мә ньзаньбу qьрара Хwәде чь йә. Әв бу мәʹни кӧ мә нькарьбу бь qьрара Хwәде бьжита. Ләма жи пешийа ньхӧмандьне, һәр кәсирʹа лазьм ә тʹобәкьрьн.

13. Чь йә вәгәрʹандьн?

¹³ Паши тʹобәкьрьне лазьм ә вәгәрʹандьн. Бәс нинә тʹәне пʹошман би сәва кьред хwә. Гәләк фәрз ә wәки тӧ жийина хwәйә бәре инкʹар ки, у сафи ки тʹьме wе йәке бьки чь кӧ рʹаст ә. Тʹобәкьрьн у вәгәрʹандьн әв гавед фәрз ьн, йед кӧ тӧ гәрәке пешийа ньхӧмандьне бьки.

ХWӘТʹӘСМИЛКЬРЬН

14. Пешийа кӧ тӧ бейи ньхӧмандьне, кʹижан гавәкә фәрз тӧ гәрәке бьки?

¹⁴ Диса гавәкә фәрз һәйә, чь кӧ тӧ гәрәке пешийа ньхӧмандьне бьки. Тӧ гәрәке хwә тʹәсмили Йаһоwа Хwәде бьки.

15, 16. Чь те һʹәсабе хwә тʹәсмили Хwәде бьки, у чьрʹа мәри гәрәке бьхwазә әве йәке бькә?

¹⁵ Дь дӧакьрьнеда хwә тʹәсмили Йаһоwа Хwәде бьки, те һʹәсабе кӧ тӧ соз дьди Хwәде, wәки тʹьме wирʹа амьн би (Qануна Дӧщари 6:15). Ле чь йә мәʹни кӧ мәрьв дьхwазә Хwәдерʹа тʹьме амьн бә? Мәсәлә, чахе хорт һәвалтикә незик дькә тʹәви wе qизьке, кʹижане кӧ бәгәм дькә, әw чьqас зедә кәчʹьке нас дькә у тʹәхмин дькә хәйсәтед wейә баш, һаqас әw дьхwазә кӧ һәләqәтийа хwә тʹәви wе һе незик бькә. Wәʹдә шунда тʹәбийәти йә кӧ әw wе бьхwазә тʹәви кәчʹьке бьзәwьщә. Әw фәʹм дькә кӧ пәй зәwащерʹа һе зедә тьшт wе жь wи бе дәʹwакьрьне, ле һʹьзкьрьн wи һелан дькә әве щабдарийе һьлдә сәр хwә.

¹⁶ Чьмки тӧ дәрһәqа Йаһоwа педьһʹәси у һʹьзкьрьна хwә һьндава wи мәзьн дьки, ләма тӧ дьхwази бь дьл у щан у бе әгләкьрьн wирʹа qӧльх ки. Һәр кәс, кʹи кӧ дьхwазә бьбә пәйчуйе Кӧрʹе Хwәде Иса Мәсиһ, гәрәке «хwә инкʹар кә» (Марqос 8:34). Хwәинкʹаркьрьн, әв те һʹәсабе кӧ дь һʹәму тьштида гӧрʹа Хwәде бьки у нәһели wәки нет-хwәстьнед тә у мәрәмед тә дь ве йәкеда рʹе тә бьгьрьн. Ча те кʹьфше, ида пешийа ньхӧмандьне тӧ гәрәке бьхwази qьрара Хwәде бьqәдини, qәдандьна qьрара wи гәрәке дь әʹмьре тәда ль сәр щийе пешьн бә. (Бьхунә 1 Пәтрус 4:2.)

ТЬРСЕ БЬДӘ АЛИКИ

17. Чьрʹа һьнәк нәwерьн хwә тʹәсмили Хwәде кьн?

¹⁷ Һьнәк хwә тʹәсмили Хwәде накьн, чьмки дьтьрсьн әве йәке бькьн. Әwана дьбәк дьтьрсьн кӧ чахе бьбьнә мәсиһи, wе ида щабдар бьн бәр Хwәде. Әwана дьбәк жи дьшьрмиш дьбьн, кӧ wе шашийа бькьн у дьле Йаһоwа бешиньн. Ләма жи нәwерьн хwә тʹәсмили Йаһоwа бькьн.

18. Бь сайа чь тӧйе бьхwази хwә тʹәсмили Хwәде бьки?

¹⁸ Һәрге һун дьле хwәда һʹьзкьрьне һьндава Йаһоwа мәзьн дькьн, һуне бьхwазьн хwә тʹәсмили wи кьн у бьжин ӧса чаwа әw дьхwазә (Wаиз 5:4). Паши тʹәсмилбуне, бе шьк һуне һʹәму тьшти бькьн «wәки . . . бькарьбьн хwә ӧса хwәй кьн, чаwа лайиqи Хӧдан ә, һәр алийава ль wи хwәш бен» (Колоси 1:10). Һәрге һун Йаһоwа һʹьз дькьн һуне бьбиньн, кӧ чәтьн нинә qьрара Хwәде бьqәдиньн. Һуне qайил бьн тʹәви гьлийед Йуһʹәнне шанди, йе кӧ гот: «Бь ве йәке әм һʹьзкьрьна хwә һьндава Хwәдеда дьдьнә кʹьфше, гава әм тʹәмийед wи дьqәдиньн. У тʹәмийед wи нә гьран ьн» (1 Йуһʹәнна 5:3).

19. Чьрʹа гәрәке нәтьрси хwә тʹәсмили Хwәде бьки?

¹⁹ Сәва кӧ хwә тʹәсмили Хwәде бьки, лазьм нинә qәданди би. Йаһоwа рʹьнд занә мәщалед тә, у әв жь тә ван тьшта чь кӧ тӧ нькари бьки, дәʹwа накә (Зәбур 103:14). Йаһоwа qәнщийе тәрʹа дьхwазә, әw wе али тә бькә у тә qәwи кә. (Бьхунә Ишайа 41:10.) Тӧ дькари баwәр бьки кӧ һәрге бь тʹәмамийа дьле хwә гӧмана хwә бьди сәр Йаһоwа, «әw жи рʹийа тә» wе рʹаст кә (Мәтʹәлок 3:5, 6).

БЬ НЬХӦМАНДЬНЕ НИШАН КӘ КӦ ХWӘ ТӘСМИЛИ ХWӘДЕ ДЬКИ

20. Чьрʹа тӧ гәрәке паши хwәтʹәсмилкьрьне бейи ньхӧмандьне?

²⁰ Дьшьрмиш бә ль сәр wан тьшта чь кӧ жоре һатьбу готьне. Дьбә әв йәк али тә бькә, кӧ тӧ бьхwази дӧакьрьна хwәда хwә тʹәсмили Йаһоwа бьки. Ле һәр кәс кʹи кӧ бь рʹастийе Хwәде һʹьз дькә, паши тʹәсмилкьрьне ӧса жи гәрәке бәр тʹәмама дәрһәqа баwәрийа хwә «бь дәв иqрар» кә, сәва кӧ хьлазбуне бьстинә (Рʹомайи 10:10). Ле ча әве йәке бькьн?

21, 22. Ча тӧ дькари дәрһәqа баwәрбуна хwә бәр тʹәмама «бь дәв иqрар» ки?

²¹ Һәрге тӧ дьхwази бейи ньхӧмандьне, тӧ гәрәке әве йәке бежи кординаторе кʹома рʹуспийед щьвата хwә. Әw wе хәм кә, wәки чәнд рʹуспи тʹәви тә һинкьрьнед фәрз жь Кʹьтеба Пироз бьwәкʹьлиньн. Һәрге рʹуспи бьбиньн кӧ тӧ һʹәму тьшти ӧса дьки чаwа лазьм ә сәва ньхӧмандьне, әwана wе тәрʹа бежьн кӧ тӧ дькари ида сәр щьвата мәзьнә кӧ wе бьбә, хwә бьньхӧмини.a Пешийа ньхӧмандьне тӧйе готар, йане тʹемәке бьбьһейи, кʹидәре кӧ wе бе шьровәкьрьне wәки чьqас фәрз ә ньхӧмандьн. Паши готаре, хәбәрван дӧ пьрсед һеса дьдә wан, кʹи кӧ wе бенә ньхӧмандьне у әwана щаба хwә дьдьн. Бь ве йәке әwана дәрһәqа баwәрбуна хwә бәр тʹәмама «бь дәв иqрар» дькьн.

²² Бь ньхӧмандьне әw бәр тʹәмама әшкәрә дькьн, кӧ хwә тʹәсмили Хwәде дькьн у бунә Шәʹдед Йаһоwа. Wи мәрьви кʹи кӧ те ньхӧмандьне, педа дькьнә бьн аве. У бь ве йәке әшкәрә те кʹьфше кӧ әwи хwә тʹәсмили Йаһоwа кьр.

ЧЬ ТЕ ҺʹӘСАБЕ НЬХӦМАНДЬН

23. Чь те һʹәсабе бейи ньхӧмандьне «бь наве Бав, Кӧрʹ у Рʹӧһʹе Пироз»?

²³ Иса гот кӧ шагьртед wи «бь наве Бав, Кӧрʹ у Рʹӧһʹе Пироз» wе бенә ньхӧмандьне (Мәтта 28:19). Әв те һʹәсабе, wәки әw кʹи кӧ те ньхӧмандьне, qәбул дькә сәрwертийа Йаһоwа Хwәде у Иса Мәсиһ (Зәбур 83:18; Мәтта 28:18). Әв ӧса жи фәʹм дькә кӧ рола рʹӧһʹе пироз демәк qәwата Хwәде чьда нә (Галати 5:22, 23; 2 Пәтрус 1:21).

24, 25 (а) Чь те һʹәсабе ньхӧмандьн бь симболик? (б) Щаба кʹижан пьрса әме пебьһʹәсьн?

²⁴ Ле ньхӧмандьн найе һʹәсабе хwә тʹәне теки бьн аве. Мәʹна ньхӧмандьне бь симболик ә у әв тьштәки фәрз ә. Чахе мәри хwә педа дькә бьн аве, бь симболике әв те һʹәсабе кӧ мәри дьмьрә сәва жийина хwәйә бәре, демәк жийина хwәйә бәре дьһелә. Ле чахе әw жь аве дәрдькʹәвә әв ча бежи тʹәзәда те буйине, сәва кӧ qьрара Хwәде бьqәдинә. Фәрз ә бини бира хwә, кӧ тә әʹмьре хwә тʹәсмили Йаһоwа кьрийә, нә кӧ тʹәсмили мәрьвәки, шьхӧләки, йан жи тʹәшкиләтәке кьрийә. Тʹәсмилбуна у ньхӧмандьна тә, әв һәйә дәстпебуна һәләqәтийа тәйә незик тʹәви Хwәде, демәк достийа тә тʹәви Хwәде (Зәбур 25:14).

²⁵ Ле ньхӧмандьн найе һʹәсабе, кӧ тӧ ида хьлаз буйи. Сәва кӧ хьлазбуне жь Хwәде бьстини тӧ гәрәке «хwә нава wе һʹьзкьрьна Хwәдейә һьндава хwәда хwәй» ки (Щьһуда 21). Әв чь те һʹәсабе? Ча әм дькарьн хwә дь һʹьзкьрьна Хwәдеда хwәй кьн? Сәре пашьн wе щаба ве пьрсе бьдә.