Ньхöмандьн; Дәʹwакьрьн ә бона Мәсиһийа
«Ньхöмандьн . . . кʹижан ньһа wә хьлаз дькә» (1 ПӘТ. 3:21).
1, 2. а) Һьнә де-бав чьрʹа бәрхwә дькʹәвьн чахе зарʹед wан дьбежьн кö дьхwазьн бенә ньхöмандьне? б) Чьрʹа пьрсе дьдьнә wан йед кö гәрәке бенә ньхöмандьне, һәла wана хwә тʹәсмили Йаһоwа кьрьнә йан на? (Бьньһерʹә шькле әʹwльн.)
ДЕ-БАВ qиза хwә дьньһерʹьн, кʹижан кö сәкьни йә тʹәви wан, йед кö гәрәке бенә ньхöмандьне. Әw кәчʹьк бь дәнге бьльнд щаба дö пьрсед готарван дьдә. Паши ве йәке, әw те ньхöмандьне.
2 Де-баве ве кәчʹьке qиза хwәрʹа фьрнаq дьбьн, чьмки әве сафи кьрийә хwә тʹәсмили Йаһоwа кә у бе ньхöмандьне. Пешийа ве йәке дийа кәчʹьке бәрхwә дькʹәт бона qиза хwә. Әw дöдьли дьбу у пьрсед öса дькʹәтьнә һʹьше wе: «Дьбәкә qиза мә һе бьчʹук ә сәва бе ньхöмандьне? Гәло әw фәʹм дькә wәки әв йәк гавәкә гәләк фәрз ә? Һе баш нинә әw һьнәки мәзьн бә у паше бе ньхöмандьне?» Пьрсед öса бал гәләк де-бава пешда тен чахе зарʹед wан дьбежьн, кö дьхwазьн бенә ньхöмандьне (Wаиз 5:5). Бәле, тʹәсмилбуйин у ньхöмандьн әw һәйә гавәкә лапә фәрз әʹмьре Мәсиһитида (Бьньһерʹьн чаргошә бь наве «Тә Хwә Тʹәсмили Йаһоwа Кьрийә?»).
3, 4. а) Чаwа Пәтрус да кʹьфше, кö ньхöмандьн гәләк фәрз ә? б) Чьрʹа Пәтрус ньхöмандьн бәрамбәри авакьрьна гәмийа wәʹде Нöһ кьр?
3 Пәтрус ньхöмандьн бәрамбәри авакьрьна гәмийа Нöһ кьр. Әwи гот: «Әw . . . сурәте ньхöмандьне бу, кʹижан ньһа wә хьлаз дькә». (Бьхунә 1 Пәтрус 3:20, 21.) Әве гәмийе әшкәрә избат дькьр кö Нöһ хwә тʹәсмили Хwәде кьрьбу, wәки qьрара wи бинә сери. Нöһ бь амьни әw шьхöл ани сери, кʹижан кö Йаһоwа дабу wи. Бәле, Нöһ бь кьред хwә у баwәрийа хwә, һьн хwә һьн жи нәфәред хwә хьлаз кьр. Гәло бь ве йәке Пәтрус чь дьхwәст мә һин кә?
4 Гәмийе избат дькьр баwәрийа Нöһ һьндава Хwәде. Ле ньхöмандьн чь избат дькә? Чахе мәрьв те ньхöмандьне, әw бь ве йәке избат дькә wәки хwә тʹәсмили Йаһоwа кьрийә сәр һʹиме баwәрийа һьндава Мәсиһ у рʹабуна wи жь мьрьне. Йед ньхöманди жи мина Нöһ гöрʹа Хwәде дькьн у шьхöле wи тиньн сери. Йаһоwа Нöһ жь Селаве хьлаз кьр, у әw wе мәрьвед амьн жи йед кö ньхöманди нә, хьлаз кә чахе qьрʹа ве дьнйа зöлм бинә (Марq. 13:10; Әʹйан. 7:9, 10). Демәк, әʹйан ә кö тʹәсмилбуйин у ньхöмандьн гәләк фәрз ьн. Кәсе кö бе мәʹни ньхöмандьне дәрәнги дьхә, мәщала wийә кö әʹмьре һʹәта-һʹәтайе бьстинә дькʹәвә бьн хофе.
5. Ве готареда әме дәрһәqа чь шеwьр кьн?
5 Мә фәʹм кьр кö ньхöмандьн гәләк фәрз ә, ләма жи wәрә дина хwә бьдьн сәр wан се пьрса: Кʹьтеба Пироз дәрһәqа ньхöмандьне чь дьбежә? Мәрьв пешийа ньхöмандьне чь гава гәрәке бавежә? Чьрʹа гәрәке бир нәкьн кö ньхöмандьн гәләк фәрз ә, чахе зарʹед хwә йан жи кәсәки дьн Кʹьтеба Пироз һин дькьн?
КʹЬТЕБА ПИРОЗ ДӘРҺӘQА НЬХÖМАНДЬНЕ ЧЬ ДЬБЕЖӘ?
6, 7. а) Шьровәкьн чь дьһатә һʹәсабе ньхöмандьна кö Йуһʹәннна дькьр? б) Кʹижан ньхöмандьн лапә мәхсус бу?
6 Кʹьтеба Пирозда дәрһәqа ньхöмандьне щара пешийе те готьне чахе Йуһʹәннайе Ньхöмдар мәрьв дьньхöманд (Мәт. 3:1-6). Мәрьв дьһатьнә бал wи хwә дьньхöмандьн сәва әʹйан кьн, wәки тʹобә дькьн гöнед хwә, чьмки Qануна Муса нәдьанин сери. Ле ньхöмандьнәкә лапә фәрз у мәхсус кʹижан кö Йуһʹәнна кьр, бона тʹобәкьрьне нибу. Бона Йуһʹәнна qәдьрәки гәләк мәзьн бу кö әwи Кöрʹе Хwәдейи беqьсур ньхöманд (Мәт. 3:13-17). Иса бегöнә бу, ләма жерʹа тʹобәкьрьн нәлазьм бу (1 Пәт. 2:22). Иса бь ньхöмандьне нишан кьр, wәки хwә тʹәсмил ве йәке дькә кö qьрара Хwәде бинә сери (Ибрн. 10:7).
7 Жь дәстпека хьзмәтийа Исада, шагьртед wи жи мәрьв дьньхöмандьн (Йуһʹн. 3:22; 4:1, 2). Әw мәрьв жи дьһатьнә ньхöмандьне бона тʹобәкьрьне, чьмки Qануна Муса нәдьанинә сери. Ле паши мьрьн у рʹабуна Иса, ньхöмандьн ида сәва нетәкә дьн бу бона шагьртед Иса.
8. а) Иса паши рʹабуне чь тʹәми да шагьртед хwә? б) Шьровәкьн чь те һʹәсабе ньхöмандьна Мәсиһити.
8 Сала 33 Д.М., Иса кö жь мьрьне рʹабу, хәбәр да тʹәви 500 мәрьва зедәтьр, нава wанда бун мер, жьн, у дьqәwьмә зарʹ жи. Дьqәwьмә Иса һәма һьнге әw гьли гот: «Ньһа һәрʹьн һʹәму мьләта һин кьн у wана бь наве Бав, Кöрʹ у рʹöһʹе пироз бьньхöминьн у wан һʹәму тʹәмийед кö мьн данә wә мьләта һин кьн, wәки әw хwәй кьн» (Мәт. 28:19, 20; 1 Корн. 15:6). Бәле, ча те кʹьфше бь сәда шагьртед wи wедәре бун чахе Иса тʹәми да, wәки әwана һәрʹьн мәрьва һин кьн. Иса öса жи гот кö ньхöмандьн дәʹwакьрьн ә бона wан, йед кö нире Мәсиһ qәбул дькьн, демәк дьхwазьн бьбьнә шагьртед wи (Мәт. 11:29, 30). Һәр кәсе кö дьхwазә Хwәдерʹа хьзмәт кә, гәрәке рʹьнд фәʹм кә чь йә рола Иса qьрара Йаһоwада. Паши ве йәке әw мәрьв дькарә бе ньхöмандьне. Тʹәне ньхöмандьна öса Хwәде qәбул дькә. Кʹьтеба Пирозда гәләк избаткьрьн һәнә кö qьрʹна йәкеда шагьртед Мәсиһ фәʹм дькьрьн фәрзбуна ньхöмандьне. У wана бе мәʹни тʹö щар ньхöмандьн паш нәдьхьстьн (Кʹар. Шанд. 2:41; 9:18; 16:14, 15, 32, 33).
ДӘРӘНГИ НӘХЬН
9, 10. Әм чь һин дьбьн жь ньхöмандьна мәрьвәки Әтийупи у Паwлосе шанди?
9 Бьхунә Кʹаред Шандийа 8:35, 36. Дина хwә бьдьн мәсәла Әтийупийе прозелит, йе кö жь пʹарьстгәһа Оршәлиме дьчу мала хwә. Пе рʹебәрийа мьлйакʹәте Йаһоwа, Филипо незики Әтийупи бу у «дәрһәqа мьзгинийа Исада wирʹа шьровәкьр». Ле гәло Әтийупи чь кьр паши ве йәке? Әшкәрә йә, әwи фәʹм кьр wәки чь кö әwи бьһист, рʹастийа qимәт ә, ләма жи әwи ль гора qьрара Йаһоwа чь лазьм бу кьр. Әwи хwә паш нәхьст у дәрберʹа һатә ньхöмандьне.
10 Мәсәла дöда әw һәйә мәрьвәки Щьһу, кʹижани кö Мәсиһи дьзерандьн. Мьләте Щьһу бь тʹәмами тʹәсмили Хwәде бьбу, ле паше wана һәләqәтийа хwә тʹәви Йаһоwа öнда кьрьн. У әwи мәрьви тʹьре мьләте wи диса жи рʹаст Хwәде дьһʹәбинә. Ле щарәке Иса Мәсиһ, кö жь мьрьне рʹабьбу, жь әʹзмана тʹәви wи хәбәр да. Гәло әwи мәрьви хwә ча да кʹьфше? Әwи бь дьл аликʹарийа Һананийа qәбул кьр. Кʹьтеба Пироз дәрһәqа wи мәрьви дьбежә: «Рʹабу пе аве һатә ньхöмандьне» (Кʹар. Шанд. 9:17, 18; Галт. 1:14). Дьбәкә һун ида сәрва чун wәки әw мәрьв Паwлосе шанди бу. Ле диса жи бьфькьрьн, гава әwи фәʹм кьр чь йә рола Иса qьрара Хwәдеда у рʹасти qимәт кьр, һьнге әw дәрберʹа һатә ньхöмандьне. (Бьхунә Кʹаред Шандийа 22:12-16.)
11. а) Әwед кö Кʹьтеба Пироз һин дьбьн, ча һелан дьбьн бенә ньхöмандьне? б) Әм ча хwә тʹәхмин дькьн гава кәсәк те ньхöмандьне?
11 Иро жи öса нә, гәләк мәрьвед кö Кʹьтеба Пироз һин дьбьн, фьрqи тʹöнә щаһьл ьн йан әʹмьрда мәзьн, чахе рʹастийа Кʹьтеба Пироз qәбул дькьн у баwәр дькьн, һелан дьбьн кö хwә тʹәсмили Хwәде кьн у бенә ньхöмандьне. Сәр щьватед мәзьн готара бона wан, йед кö гәрәке бенә ньхöмандьне рʹасти жи мәхсус ә. Шәʹдед Йаһоwа ша дьбьн чахе шагьрт рʹастийе qәбул дькьн у ахьрийеда тенә ньхöмандьне. Де-бав гәләк ша дьбьн чахе дьвиньн кö зарʹед wан тенә ньхöмандьне. Сала 2017-да, 284 000 мәрьва зедәтьр бь ньхöмандьне әʹмьре хwә тʹәсмили Йаһоwа кьрьн (Кʹар. Шанд. 13:48). Әʹйан ә wәки әw шагьртед тʹәзә фәʹм дькьрьн кö ньхöмандьн те дәʹwакьрьне жь Мәсиһийа. Ле пешийа ньхöмандьне wана кʹижан гав авитьнә?
12. Шагьрт пешийа ньхöмандьне гәрәке кʹижан гава бавежә?
12 Шагьрте кö дьхwазә бе ньхöмандьне, гәрәке занәбуна рʹаст дәрһәqа Хwәде qазанщ кә, бьзаньбә qьрара Wи чь йә, у öса жи Хwәде чь кьр сәва инсанәте хьлаз кә (1 Тимтʹ. 2:3-6). Баwәрийа шагьрт гәрәке һәбә сәва кö wи һелан кә һәр тьшти бьтʹәрькинә чь кö Хwәде хwәш найе, у пе принсипед Йаһоwа бьжи (Кʹар. Шанд. 3:19). Һәрге әw тьштәки öса дькә чь кö бәр чʹәʹве Хwәде рʹәш ә, фәʹмдари йә кö әw нькарә Хwәдерʹа созе тʹәсмилбуйине бьдә (1 Корн. 6:9, 10). Әwе кö дьхwазә хwә тʹәсмили Хwәде кә, öса жи гәрәке бе сәр щьвата у хирәт бә бәлакьрьна мьзгинийеда. Әw йәк дәʹwакьрьн ә, чьмки Иса гот кö шагьртед wи әwи шьхöли wе бькьн (Кʹар. Шанд. 1:8). Шагьрт гәрәке әван һʹәму тьшта бькә, у тʹәне паши ве йәке дькарә дöада хwә тʹәсмили Йаһоwа кә у тʹәсмилбуйина хwә пе ньхöмандьне избат кә.
БЬРА ШАГЬРТ НЬХÖМАНДЬНЕ БЬКӘ НЕТА ХWӘ
Чахе тö кәсәки һин дьки, тö wирʹа дьди кʹьфше, wәки ньхöмандьн гәләк фәрз ә? (Бьньһерʹә абзаса 13)
13. Чьрʹа чахе әм мәрьва һин дькьн, гәрәке бир нәкьн кö ньхöмандьн дәʹwакьрьн ә бона Мәсиһийа?
13 Чахе әм аликʹарийе дьдьнә зарʹед хwә у wан, тʹәви кʹе һинбуна Кʹьтеба Пироз дәрбаз дькьн, әм гәрәке бир нәкьн кö сәва бьбьнә шагьртед Иса, лазьм ә бенә ньхöмандьне. Öса әме һе незики wан бьн у хwә нәгьрьн тʹәви wан шеwьр кьн дәрһәqа фәрзбуна тʹәсмилбуйине у ньхöмандьне. Бәле, әм дьхwазьн зарʹед мә у әw тʹәви кʹе әм һинбуна Кʹьтеба Пироз дәрбаз дькьн, рʹöһʹанида пешда һәрʹьн у бенә ньхöмандьне.
14. Чьрʹа әм зоре кәсәки накьн сәва бе ньхöмандьне?
14 Ле әв йәк нәрʹаст ә һәрге кәсәк зоре зарʹа хwә бькә йан жи тʹәви кʹе һинбуне дәрбаз дькә, wәки бе ньхöмандьне. Йаһоwа тʹö щар зоре мә накә, кö әм жерʹа хьзмәт кьн (1 Йуһʹн. 4:8). Чахе мәрьва һин дькьн, әм гәрәке wанрʹа нишан кьн кö гәләк фәрз ә әwана һәләqәтийа хwәйә шәхси тʹәви Йаһоwа qәwи кьн. Паше, чахе әw кәс рʹастийа дәрһәqа Хwәде qимәт кә у бьхwазә әwан борщдарийа бинә сери, кʹижан кö лазьм ьн сәва бьбә Мәсиһи, әwе һелан бә бе ньхöмандьне (2 Корн. 5:14, 15).
15, 16. а) Гәло һәйә qанун, wәки мәрьв гәрәке чәнд сали бә сәва бе ньхöмандьне? Шьровәкьн. б) Чьрʹа әwе кö Кʹьтеба Пироз һин дьбә гәрәке ча Шәʹде Йаһоwа бе ньхöмандьне, һәрге жи әw религийакә дьнда һатийә ньхöмандьне?
15 Сәва мәрьв бе ньхöмандьне, qанун тʹöнә кö әw гәрәке чәнд сали бә. Һәр мәрьв щурʹәки йә, һьнәк зу рʹöһʹанида пешда дьчьн һьнәк жи һеди-һеди. Гәләк мәрьв щаһьлтийеда тенә ньхöмандьне, у чахе мәзьн дьбьн жи Йаһоwарʹа амьн дьминьн. Һьнәк жи ида әʹмьрда мәзьн ьн чахе рʹастийе педьһʹәсьн у тенә ньхöмандьне, у wан һьнәк һәла һе жи 100 сали зедәтьр ьн!
16 Жьнькәкә әʹмьрда мәзьн кö тʹәви хушкәкә мә Кʹьтеба Пироз һин дьбу, жь хушке пьрсибу кö әʹсәйи йә wәки әw диса бе ньхöмандьне, чьмки бәре әw религийакә дьнда һатьбу ньхöмандьне. Хушка мә тʹәви wе чәнд рʹезед жь Кʹьтеба Пироз шеwьр кьрьбу, у әwе жьньке фәʹм кьрьбу, wәки әw дәʹwакьрьна Кʹьтеба Пироз ә, у әw зутьрәке һатьбу ньхöмандьне. Рʹаст ә әw wәкә 80 сали бу, ле нәфькьри кö нәлазьм ә бе ньхöмандьне. Бәле, ньхöмандьна рʹаст әw ә чахе мәрьв занәбуна рʹаст дәрһәqа qьрара Йаһоwа стандийә. Демәк, һәрге жи кәсәк бәре религийакә дьнда һатийә ньхöмандьне, йәкә гәрәке диса бе ньхöмандьне ча Шәʹде Йаһоwа. (Бьхунә Кʹаред Шандийа 19:3-5.)
17. Рʹожа ньхöмандьне лазьм ә дәрһәqа чь бьфькьрьн?
17 Рʹожа ньхöмандьне, рʹожәкә шабуне йә. Ле ве рʹоже öса жи мәрьв гәрәке кʹур бьфькьрә дәрһәqа борщдарийед хwә чаwа Мәсиһи, чьмки һеса нинә мәрьв һʹәму дәʹwакьрьна бинә сери кʹижан кö Мәсиһи гәрәке бькьн. Ләма жи Иса борщдарийа Мәсиһити бәрамбәри нир кьр. Шагьртед Иса гәрәке бьжин «иди нә жь бо хwә, ле бәле жь бо wи, йе кö жь бо wан мьр у һат рʹакьрьн» (2 Корн. 5:15; Мәт. 16:24).
18. Кʹижан пьрса әме шеwьр кьн готара дьнда?
18 Дийа ве кәчʹьке бәʹса кʹижане мә жоре кьр, бона qиза хwә бәрхwә дькʹәт, чьмки заньбу кö ньхöмандьн гавәкә гәләк фәрз ә. Һәрге зарʹед wә һәнә, пьрсед öса бьдьнә хwә: «Гәло зарʹа мьн рʹасти һазьр ә бе ньхöмандьне? Занәбуна wи еʹпещә һәйә сәва хwә тʹәсмили Хwәде кә? Гәло лазьм ә зарʹа мьн нете хwәрʹа дайнә wәки хwәндьна бьльнд бьстинә у бьхәбьтә? Әз чь гәрәке бькьм һәрге зарʹа мьн бе ньхöмандьне, ле паше гöнәки гьран бькә?» Готара дьнда әме wан пьрса шеwьр кьн у öса жи пебьһʹәсьн чаwа де-бав дькарьн али зарʹа бькьн кö рʹаст бьньһерʹьн сәр ньхöмандьне.