Де-Бавно, Һун Али Зарʹед Хwә Дькьн wәки Бенә Ньхöмандьне?

1. Де-бав чьда дьхwазьн баwәр бьн пешийа кö зарʹед wан бенә ньхöмандьне?

ХУШКӘКӘ мә бь наве Блосом Брант дәрһәqа сафикьрьна хwә кö бе ньхöмандьне гьли кьр: «Мьн бь мәһа, де-баве хwәрʹа дьгот wәки әз дьхwазьм бемә ньхöмандьне, у гәләк щар wана тʹәви мьн дәрһәqа wе йәке хәбәр дьдан. Wана дьхwәст баwәр буна кö әз рʹьнд фәʹм дькьм wәки әw сафикьрьн гәләк фәрз ә. Сала 1934-да, 31 Кануна Пешьн бона мьн бу рʹожәкә мәхсус, чьмки әз һатьмә ньхöмандьне». Иро жи де-бавед кö Мәсиһи нә, дьхwазьн али зарʹед хwә бькьн, wәки әwана сафикьрьнед билани бькьн. Ле һәрге бе мәʹнийа фәрз ньхöмандьне дәрәнги хьн, әw йәк wе хьраб һʹöкöм бә сәр рʹöһʹанийа зарʹа (Аqуб 4:17). Ле йәкә де-бав дьхwазьн wәки зарʹа wан пешийа ньхöмандьне бь рʹасти һазьр бә сәва борщдарийа Мәсиһити һьлдә сәр хwә.

2. а) Һьнә бәрпьрсийаред мьһале дина хwә данә сәр чь? б) Ве готареда әме дәрһәqа чь шеwьр кьн?

² Һьнә бәрпьрсийаред мьһале дина хwә дан wәки гәләк щаһьл, йед кö рʹастийеда мәзьн бунә, ньхöманди ниньн. Гәләк жь wан щаһьла тенә сәр щьвата, хьзмәт дькьн, у хwә һʹәсаб дькьн ча Шәʹдед Йаһоwа. Ле йәкә һәнә мәʹни кö әwана хwә дьгьрьн кö хwә тʹәсмили Йаһоwа бькьн у бенә ньхöмандьне. Ле гәло әw чь мәʹни нә? Щара де-бав хwәха wана дәрәнги дьхьн. Ве готареда әме чар мәʹнийа шеwьр кьн, кʹижан кö рʹе де-бава дьгьрьн wәки али зарʹед хwә бькьн бенә ньхöмандьне.

ГӘЛО ЗАРʹА МЬН ЕПʹЕЩӘ МӘЗЬН Ә?

3. Де-баве Блосом дәрһәqа чь бәрхwә дькʹәтьн?

³ Де-баве Блосом бәʹса кʹижана мә абзаса пешьнда кьр, бәрхwә дькʹәтьн чьмки дьфькьрин, кö дьбәкә qиза wан һе рʹьнд фәʹм накә, wәки ньхöмандьн гавәкә гәләк фәрз ә. Ле гәло ча де-бав дькарьн бьзаньбьн wәки зарʹ һазьр ә хwә тʹәсмили Хwәде кә?

4. Чаwа тʹәмийа Иса кö Мәтта 28:19, 20-да ньвисар ә, али де-бава дькә wәки зарʹед хwә һин кьн?

⁴ Бьхунә Мәтта 28:19, 20. Чаwа мә готара дьнда дит, Кʹьтеба Пирозда найе готьне, wәки мәрьв гәрәке чәнд сали бә сәва бе ньхöмандьне. Ле wе баш бә wәки де-бав кʹур бьфькьрьн кö чь те һʹәсабе бьбьнә шагьрт. Хәбәра Йунани кö те wәлгәрʹандьне «бькьн шагьрт» кʹижан кö Мәтта 28:19-да те готьне, фькьрәкә öса дьдә кʹьфше ча кәсәки һин кьн бь ве нете сәва әw бьбә шагьрт. Шагьрт әw ә, йе кö һин дьбә у фәʹм дькә һинкьрьнед Иса, у сафи дькә wан тьшта бинә сери. Демәк, нета һʹәму де-бава гәрәке әw бә кö зарʹед хwә жь зарʹотийе һин кьн бь ве нете кö бьбьнә шагьртед Иса. Рʹаст ә зарʹа вьрʹни нькарә бе ньхöмандьне, ле Кʹьтеба Пироз дьдә кʹьфше wәки һәла һе зарʹа бьчʹук жи дькарә рʹастийед Кʹьтеба Пироз фәʹм кә у һʹьз кә.

5, 6. а) Сәрһатийа Тимотʹейо дәрһәqа ньхöмандьне чь мә һин дькә? б) Де-баве сәрwахт ча дькарьн аликʹарийе бьдьнә зарʹед хwә?

⁵ Тимотʹейо һәла һе щаһьлтийеда рʹасти qәбул кьр у сафи кьр кö Хwәдерʹа хьзмәт кә. Паwлосе шанди гот, кö Тимотʹейо рʹастийа Хәбәра Хwәде бьчʹуктайеда пеһʹәсийайә. Рʹаст ә баве Тимотʹейо нәбаwәр бу, ле дийа wи у пирька wи али wи кьрьн, wәки әw Хәбәра Хwәде һʹьз кә. Öса баwәрийа wи qәwи бу (2 Тимтʹ. 1:5; 3:14, 15). Чахе әw бу wәкә 20 сали, әwи ида щьватеда щабдарийед мәхсус дьстанд (Кʹар. Шанд. 16:1-3).

⁶ Һәр зарʹәк щурʹәки йә, демәк һʹәмушк нә мина һәв дьгьһижьн. Һьнә зарʹ зу рʹастийе фәʹм дькьн, сафикьрьнед аqьлайи дькьн у дьхwазьн бенә ньхöмандьне. Һьнәк жи һʹәта кö һьнәки мәзьн нәбьн һазьр ниньн бенә ньхöмандьне. Ләма жи де-бавед сәрwахт тʹö щар зоре зарʹед хwә накьн, кö бенә ньхöмандьне. Ле әwана алийе рʹöһʹанида аликʹарийе дьдьнә зарʹед хwә, wәки зарʹ хwәха пешда һәрʹьн. Де-бав гәләк ша дьбьн чахе зарʹед wан һьлдьдьнә һʹәсаб гьлийе жь Мәтʹәлок 27:11. (Бьхунә.) Йәкә, де-бав гәрәке бир нәкьн кö нета wан әw ә, wәки али зарʹед хwә бькьн, кö әwана бьбьнә шагьрт. Ләма жи де-бав гәрәке пьрсәкә öса бьдьнә хwә: «Гәло занәбуна зарʹа мьн һаqас һәйә, wәки әw хwә тʹәсмили Хwәде кә у бе ньхöмандьне?».

ГӘЛО ЗАНӘБУНА ЗАРʹА МЬН ЕПʹЕЩӘ ҺӘЙӘ?

7. Гәло әʹсәйи йә мәрьве кö дьхwазә бе ньхöмандьне, Кʹьтеба Пироз бь тʹәмами бьзаньбә? Шьровәкьн.

⁷ Чахе де-бав зарʹед хwә рʹастийе һин дькьн, әwана дьхwазьн зарʹед wан дәрһәqа рʹастийе рʹьнд бьзаньбьн. Чьрʹа? Чьмки әw занәбун wе али зарʹа бькә wәки хwә тʹәсмили Хwәде кьн. Ле сәва кö мәрьв хwә тʹәсмили Хwәде кә у бе ньхöмандьне, әʹсәйи нинә әw һәр тьшти һур бь һур бьзаньбә. Йәкә паши ньхöмандьне жи һʹәму шагьрт гәрәке занәбуна хwә зедә кьн. (Бьхунә Колоси 1:9, 10.) Ле гәло чьqас занәбуна мәрьв гәрәке һәбә сәва бе ньхöмандьне?

8, 9. Әм чь дәрсе дькарьн һин бьн жь сәрһатийа дәрһәqа Паwлос у сәрwере кәле?

⁸ Сәрһатийа малбәтәкә qьрʹна йәке, дькарә иро али де-бава бькә (Кʹар. Шанд. 16:25-33). Паwлос wәʹде рʹеwитийа хwәйә дöда, незики сала 50 Д.М., тʹәсәлийа Филипйайе кьр. Чахе әw wедәре бу, тʹәви Силас һатә гьртьне у кʹәтә кәле. Шәв, ньшкева әʹрд qайим һәжийа у һʹәму дәрен кәле вәбун. Сәрwере кәле тьрсийа кö гьрти wе бьрʹәвьн у дьхwәст хwә бькöшта, ле Паwлос wи да сәкьнандьне. Паше Паwлос тʹәви Силас дәрһәqа Иса шәʹдәти да wи у малбәта wи. Әwе малбәте рʹастийа кö пеһʹәсийан qәбул кьрьн у qимәт кьрьн. Бь wе йәке әwана һелан бун у перʹа-перʹа һатьнә ньхöмандьне. Гәло әм жь ве сәрһатийе чь һин дьбьн?

⁹ Әw сәрwере кәле дьqәwьмә бәре әскәре Рʹоме бу. Әwи Хәбәра Хwәде ньзаньбу. Ләма жи сәва кö әw бьбуйа Мәсиһи, әwи гәрәке рʹастийед сәрәкә бьзаньбуйа, фәʹм кьра кö чь те һʹәсабе бьбә хьзмәткʹаре Хwәде у бьхwаста һинкьрьнед Иса пек бинә. Wәʹдәки кьнда, әw рʹастийед сәрәкә пеһʹәсийа у һʹьз кьр, ләма жи әwи хwәст бе ньхöмандьне. Бешьк дькарьн бежьн, wәки паши ньхöмандьне жи әwи бәрдәwам кьр занәбуна хwә зедә кә. Де-бавно, ле һун чь гәрәке бькьн чахе зарʹа wә дьбежә кö әw дьхwазә бе ньхöмандьне, чьмки Йаһоwа һʹьз дькә у дьхwазә гöрʹа wи бькә? Һун дькарьн жерʹа бежьн, wәки незики рʹуспийед щьвате бә, сәва әwана бьньһерʹьн һәла әw һазьр ә бе ньхöмандьне йан на.a Чаwа һʹәму Мәсиһийед ньхöманди, әw жи wе бәрдәwам кә тʹәмамийа әʹмьре хwәда, дьqәwьмә һʹәта-һʹәтайе жи, дәрһәqа Йаһоwа һе зедә пебьһʹәсә (Рʹом. 11:33, 34).

ГӘЛО БОНА ЗАРʹА МЬН ХWӘНДЬНА ЛАПӘ БАШ ЧЬ ЙӘ?

10, 11. а) Һьнә де-бав дәрһәqа чь дьфькьрьн? б) Де-бав пешийе дәрһәqа чь гәрәке бьфькьрьн?

¹⁰ Һьнә де-бав дьфькьрьн wәки һе баш ә зарʹа wан пешийе хwәндьна бьльнд бьстинә у хәбатәкә баш хwәрʹа бьвинә, паше бе ньхöмандьне. Рʹаст ә бь ве йәке де-бав зарʹа хwәрʹа хьрабийе нахwазьн, ле һәрге зарʹ пешийе әwан нета дайнә пешийа хwә, гәло бь рʹастийе wе пешдачуйи у бәхтәwар бә? Wе баш бә де-бав пьрсед öса бьдьнә хwә: Гәло әw йәк ль гора Хәбәра Хwәде йә? Гәло Йаһоwа ча дьхwазә әм әʹмьре хwә дәрбаз кьн? (Бьхунә Wаиз 12:1.)

¹¹ Гәләк фәрз ә бир нәкьн wәки әв дьнйа у тьштед ве дьнйайе, мьqабьли qьрар у ньһерʹандьна Йаһоwа нә (Аqуб 4:7, 8; 1 Йуһʹн. 2:15-17; 5:19). Чахе һәләqәтийа зарʹе тʹәви Йаһоwа незик ә, әw йәк дькарә wи жь Шәйтʹан у дьнйа wи, у öса жи жь ньһерʹандьна ве дьнйа хьраб хwәй кә. Һәрге де-бав хwәндьна бьльнд у хәбате датиньн сәр щийе пешьн, зарʹ дькарә бьфькьрә wәки әw тьшт жь һәләqәтийа тʹәви Йаһоwа фәрзтьр ьн. Әw йәк гәләк хоф ә. Де-бавед кö зарʹед хwә һʹьз дькьн, wе тʹö щар нәхwазьн wәки зарʹед wан ве дьнйайеда пешдачуйи бьн. Бь рʹастийе бәхтәwари у пешдачуйина рʹаст тʹәне һьнге йә, чахе Йаһоwа йә сәр щийе пешьн әʹмьре мәда. (Бьхунә Зәбур 1:2, 3.)

ҺӘРГЕ ЗАРʹ ГÖНӘ БЬКӘ

12. Чьрʹа һьнә де-бав дьхwазьн зарʹа wан ньхöмандьне паш хә?

¹² Хушкәкә мә гьли кьр кö чьрʹа әwе нәдьхwәст qиза wе бе ньхöмандьне. Әwе гот: «Әз шәрм дькьм бежьм, ле мәʹнийа сәрәкә әw бу кö әз дьтьрсийам әw гöнә бькә у жь щьвате бе дәрхьстьне». Һьнә де-бав мина ве хушке дьфькьрьн, wәки һе баш ә ньхöмандьна зарʹа wан паш кʹәвә һʹәта әw мәзьн бә, wәки бефәʹмтийа нәкә (Дәстп. 8:21; Мәтʹлк. 22:15). Әwана дьбәкә öса дьфькьрьн: «Һʹәта кö зарʹа мьн нәньхöманди йә, әw wе жь щьвате нәйе дәрхьстне». Ле гәло чьрʹа ньһерʹандьна öса нәрʹаст ә? (Аqуб 1:22).

13. Һәрге кәсәк ньхöмандьна хwә паш дьхә, гәло әв те һʹәсабе wәки әw бәр Йаһоwа щабдар нинә? Шьровәкьн.

¹³ Фәʹмдари йә wәки де-бавед кö Мәсиһи нә, нахwазьн зарʹа wан бе ньхöмандьне һʹәта әw епʹещә гьһишти нибә сәва хwә тʹәсмили Хwәде кә. Ле нә рʹаст ә бьфькьрьн кö зарʹа нәньхöманди бона кьред хwә бәр Йаһоwа щабдар нинә. Чьрʹа? Чьмки әw йәк ньхöмандьнева гьредайи нинә. Чахе зарʹ занә кö бәр чʹәʹве Йаһоwа чь рʹаст ә у чь хьраб ә, әw ида бәр Хwәде щабдар ә. (Бьхунә Аqуб 4:17.) Ләма жи дәwса рʹе зарʹа бьгьрьн кö бенә ньхöмандьне, де-бавед сәрwахт wе һәр тьшти бькьн сәва мәсәла баш бьн бона зарʹед хwә. Әwана зарʹа хwә һе жь зарʹотийеда һин дькьн кö Йаһоwа һʹьз бькьн у принсипед wи биньн сери (Луqа 6:40). Һʹьзкьрьна зарʹа һьндава Йаһоwа wе wана хwәй кә, wәки гöнә нәкьн у хwә ль рʹийа Йаһоwа бьгьрьн (Иша. 35:8).

АЛИКʹАРИЙА МӘРЬВЕД ДЬН

14. Рʹуспи ча дькарьн аликʹарийе бьдьнә де-бава, йед кö дьхwазьн зарʹед wан бенә ньхöмандьне?

¹⁴ Рʹуспи дькарьн аликʹарийе бьдьнә wан де-бава, йед кö пьштгьрийа зарʹед хwә дькьн, wәки нетед рʹöһʹани дайньн пешийа хwә. Хушкәкә мә йа кö 70 сала зедәтьр ча пешәнг хьзмәт дькьр, дәрһәqа хәбәрдана хwә тʹәви Чарлз Т. Рассел гьли кьрийә, чахе әw шәш сали бу. Әwе гот: «Әwи 15 дәqә тʹәви мьн хәбәр дьда дәрһәqа нетед мьнә рʹöһʹани». Әw хәбәрдан гәләк сәр wе һʹöкöм бу. Бәле, гьлийед баш у дьлдайин дькарә гәләк wәхт бира мәрьвада бьминә (Мәтʹлк. 25:11). Щьватеда рʹуспи дькарьн де-бава у зарʹед wан тʹәглиф кьн, wәки Ода Щьватеда һәвкʹарийе бькьн. Бәʹса хәбәре, шьхöл бьдьнә wан зарʹа йан жи щаһьла анәгори сал у фәрәсәтед wан.

15. Чь щурʹәйи хушк-бьред щьвате дькарьн аликʹарийе бьдьнә щаһьла?

¹⁵ Хушк-бьред щьватеда жи дькарьн аликʹарийе бьдьнә щаһьла. Әwана дькарьн дина хwә бьдьне кö ча щаһьл рʹöһʹанида пешда дьчьн. Бәʹса хәбәре, чахе зарʹ сәр щьвате щаба хwә рʹьнд дьдьн, йан жи щьватеда пе дәрсе дәрдькʹәвьн, йан жи дьбәкә мәкʹтәбеда шәʹдәтийе дьдьн, йан жи щерʹьбандьнеда амьн дьминьн, хwә нәгьрьн у пʹайе wан бьдьн. Wе керһати бә кö әм нете хwәрʹа дайньн, wәки пешийа йан жи паши щьвате тʹәви щаһьла хәбәр дьн. Wи щурʹәйи әwана wе тʹәхмин кьн wәки пʹара «щьвата мәзьн» ьн, демәк тʹәшкиләта Хwәде (Зәб. 35:18).

АЛИ ЗАРʹА ХWӘ БЬКЬН WӘКИ БЕ НЬХÖМАНДЬНЕ

16, 17. а) Чаwа ньхöмандьн әʹмьрва гьредайи йә? б) Һʹәму де-бав кö Мәсиһи нә, дьхwазьн чь шабуне бьстиньн? (Бьньһерʹә шькле әʹwльн.)

¹⁶ Зарʹед хwә «бь ширәт у һинкьрьна Хöдан» мәзьн кьн, әw qәдьрәки мәзьн ә бона де-бава (Әфәс. 6:4; Зәб. 127:3). Исраела бәреда, чахе зарʹ дьһатьнә буйине, әwана ида тʹәсмилкьрийе Йаһоwа бун. Ле иро öса нинә. Хенщи ве йәке, һʹьзкьрьна де-бава һьндава Хwәде у рʹастийе, дәрбази зарʹа набә. Жь рʹожа буйина зарʹе, нета де-бава гәрәке әw бә, кö зарʹед wан ахьрийеда бьбьнә шагьрт, демәк, хwә тʹәсмили Йаһоwа кьн у бенә ньхöмандьне. Ле чь дькарә жь ве йәке фәрзтьр бә? Тʹәсмилбуйин, ньхöмандьн, у хьзмәткьрьн Хwәдерʹа, мәщала дьдә зарʹе, wәки wәʹде тәнгасийа мәзьн хьлаз бә (Мәт. 24:13).

¹⁷ Чахе Блосом Брант сафи кьр кö әw дьхwазә бе ньхöмандьне, де-баве wейә хwәдехоф, дьхwәстьн баwәр буна, wәки әw бь рʹастийе һазьр ә гавәкә öса фәрз бавежә. Чахе wана дит кö әw ида һазьр ә бона ве гаве, wана пьштгьрийа сафикьрьна wе кьрьн. Еваре пешийа рʹожа ньхöмандьне, баве wе тьштәки öса кьр кö гәләк wәхт бира wеда ма. Блосом гьли кьр: «Әwи гот wәки әм сәр чока рʹунен, у дәстпекьр дöа кә. Әwи дöада Йаһоwарʹа гот, wәки әw гәләк бәхтәwар ә кö qиза wийә бьчʹук сафи кьр әʹмьре хwә тʹәсмили Wи кә». Паши ве йәке 60 сали зедәтьр дәрбаз бу у Блосом гьлийед öса гот: «Әз дьхwазьм бежьм, wәки чьqас сал жи дәрбаз бьн, әзе тʹö щар бир нәкьм әве еваре!». Де-бавно, бьра зарʹед wә жи хwә тʹәсмили Йаһоwа кьн у бенә ньхöмандьне, у һун жи wанрʹа ша бьн.