Йед Щаһьл Һун Һазьр ьн Бенә Ньхӧмандьне?

1, 2. а) Иро щьмәʹта Хwәде бона чь ша дьбьн? б) Ча де-баве Мәсиһи у рʹуспи дькарьн али щаһьла бькьн кӧ фәʹм кьн чь те һʹәсабе ньхӧмандьн?

РʹУСПИКИ щьвате готә Кристофере 12 сали: «Әз тә жь бьчʹуктайе нас дькьм, у әз гәләк ша мә кӧ тӧ дьхwази бейи ньхӧмандьне. Ле әз дьхwазьм жь тә бьпьрсьм: ‹Чьрʹа тӧ дьхwази әве гаве бьки?›» Пьрса wи рʹуспийи бь аqьлайи бу. Бәле, әм гьшк ша дьбьн чахе һәр сал бь һʹәзара щаһьл нав тʹәмамийа дьнйайе тенә ньхӧмандьне (Wаиз 12:1). Ле де-бав у рʹуспийед щьвате дьхwазьн баwәр бьн кӧ щаһьл дьле хwәда хwәха сафи кьрийә кӧ бе ньхӧмандьн, у ӧса жи фәʹм дькә кӧ чь те һʹәсабе бе ньхӧмандьн.

² Хәбәра Хwәде әʹйан дькә кӧ тʹәсмилбуйин у ньхӧмандьн дәстпека жийина Мәсиһити йә. Wәʹде wе жийина тʹәзә мәрьв wе гәләк кʹәрәма жь Йаһоwа бьстинә, ле ӧса жи wе жь Шәйтʹан пәйкʹәтьн һәбьн (Мәтʹлк. 10:22; 1 Пәт. 5:8). Ләма де-бавед кӧ Мәсиһи нә, зарʹед хwә һин дькьн кӧ чь те һʹәсабе бьбьнә шагьртед Мәсиһ. Ле әw щаһьлед кӧ де-баве wан Мәсиһи ниньн, дькарьн аликʹарийе жь рʹуспийа бьстиньн, сәва кӧ фәʹм бькьн чь те һʹәсабе тʹәсмилбуйин у ньхӧмандьн. (Бьхунә Луqа 14:27-30.) Чаwа кӧ лазьм ә пешда һʹәсаба бькьн сәва кӧ авайе баш ава кьн, ӧса жи лазьм ә пешда һазьр бьн кӧ «һʹәта хьлазийе» бь амьнийе Йаһоwарʹа хьзмәт кьн (Мәт. 24:13). Ле чь дькарә али щаһьла бькә кӧ сафи кьн һʹәта-һʹәтайе Йаһоwарʹа хьзмәт кьн? Wәрә әм шеwьр кьн.

3. а) Гьлийед Иса у Пәтрус ча дьдьнә кʹьфше кӧ ньхӧмандьн тьштәки фәрз ә? (Мәт. 28:19, 20; 1 Пәт. 3:21). б) Кʹижан пьрса әме шеwьр кьн дь ве тʹемайеда, у чьрʹа?

³ Һәрге тӧ щаһьл и у дьхwази бейи ньхӧмандьне, тӧ һежайи кӧ пʹайе тә бьдьн. Qәдьрәки мәзьн ә кӧ бейи ньхӧмандьне чаwа Шәʹде Йаһоwа. Һьн жи, ньхӧмандьн дәʹwакьрьн ә бона Мәсиһийа, у фәрз ә бона хьлазбуне (Мәт. 28:19, 20; 1 Пәт. 3:21). Һәрге тӧ тейи ньхӧмандьне, демәк тӧ дьди кʹьфше кӧ дьхwази созе хwә бини сери wәки тʹьме Йаһоwарʹа хьзмәт ки. Wе гәләк керһати бә һәрге тӧ сәр ван се пьрса бьфькьри, йед кӧ wе али тә бькьн тедәрхи һәла тӧ һазьр и бейи ньхӧмандьне, йан на. Пьрс әw ьн: 1) Гәло әз епʹещә гьһишти мә кӧ әве сафикьрьне бькьм? 2) Гәло әw хwастьна мьнә шәхси йә? 3) Әз бь рʹастийе фәʹм дькьм кӧ чь те һʹәсабе хwә тʹәсмили Йаһоwа бькьм? Wәрә әм әwан пьрса шеwьр кьн.

ЧАХЕ ТӦ ЕПʹЕЩӘ ГЬҺИШТИЙИ

4, 5. а) Чьрʹа ньхӧмандьн тʹәне бона мәрьвед мәзьн нинә? б) Гьһиштибун бона Мәсиһи чь те һʹәсабе?

⁴ Кʹьтеба Пирозда найе готьне кӧ тʹәне мәрьве мәзьн гәрәке бенә ньхӧмандьн, йан жи мәрьв гәрәке чәнд сали бә wәки бе ньхӧмандьне. Мәтʹәлок 20:11-да әм дьхуньн: «Һʹәта зарʹок жи бь лекәред [кьред] хwәва хwә дьдә хӧйакьрьн, гәло кьрьнед wи пʹак ьн у рʹаст ьн, йан на». Демәк, щаһьл жи дькарә фәʹм бькә кӧ чь те һʹәсабе тьштед рʹаст бькә у чь те һʹәсабе хwә тʹәсмили Хwәде бькә. Ләма, ньхӧмандьн әw гавәкә гәләк фәрз ә бона щаһьлед кӧ гьһишти нә у кӧ хwә тʹәсмили Йаһоwа кьрьнә (Мәтʹлк. 20:7).

⁵ Ле чь те һʹәсабе гьһиштибун? Гьһиштибун әw найе һʹәсабе чахе мәрьв тʹәне физики мәзьн дьбә. Кʹьтеба Пирозда те готьне кӧ мәрьвед гьһишти әw ьн, йед кӧ «сәwдайе хwәда кʹәтирʹабуйи нә, qәнщи у хьрабийе жь һәв дәрдьхьн» (Ибрн. 5:14). Мәрьве гьһишти занә кӧ чь рʹаст ә чʹәʹве Йаһоwада, у дьле хwәда сафи дькә кӧ һәма ӧса жи бькә. Ләма wирʹа чәтьн нинә хwә бьгьрә кӧ тьштед нәрʹаст нәкә. Һьн жи, әw һʹәwщә нинә кӧ кәсәк тʹьме wирʹа бежә кӧ әw тьштед рʹаст бькә. Бь рʹастийе, щаһьле кӧ дьхwазә бе ньхӧмандьне, принсипед Йаһоwа тинә сери wи чахи жи, чахе де-бав йан жи кәсәки мәзьн wи навиньн. (Бәрамбәр кьн Филипи 2:12.)

6, 7. а) Гьли кьн кӧ Данийел Бабилонеда рʹасти чь щерʹьбандьна дьһат. б) Чаwа Данийел да кʹьфше кӧ әw гьһишти йә?

⁶ Ле гәло щаһьл дькарә ӧса гьһишти бә? Wәрә мәсәла Данийел шеwьр кьн. Чахе әw чаwа дил бьрьнә Бабилоне, wи чахи дьqәwьмә әw wәкә 13-17 сали бу. Дор бәре wи мәрьвед ӧса бун, кӧ гӧрʹа Хwәде нәдькьрьн. Һьн жи, чәтьнайикә дьн жи һәбу. Бабилонеда Данийел щийе мәхсус дьгьрт. Жь гәләк щаһьла әw һатә бьжартьне кӧ бәр пʹадша бьсәкьнә (Дан. 1:3-5, 13). Бь рʹастийе Исраеледа мәщаләкә wийә ӧса wе тʹӧнәбуйа, чаwа кӧ Бабилонеда.

⁷ Ле Данийел ча дьньһерʹи сәр wан тьшта? Гәло әwи дьхwаст кӧ Бабилонеда wан тьшта qазанщ кә? Йан жи әwи һишт кӧ мәрьвед дор бәре wи ньһерʹандьна wи хьраб кьн у баwәрийа wи сьст кьн? Тʹӧ щар! Кʹьтеба Пироз дьбежә кӧ чахе әw Бабилонеда бу, әwи дьле хwәда сафи кьр кӧ хwә һʹәрам накә бь wан тьшта, чь кӧ пʹутпʹарьстийева гьредайи бун (Дан. 1:8). Бь рʹастийе жи әʹйан те кʹьфше кӧ Данийел гьһишти бу!

8. Щаһьлно, һун жь Данийел чь дькарьн һин бьн?

⁸ Һун чь дькарьн жь Данийел һин бьн? Йа пешийе, щаһьле гьһишти баwәрийа хwәда qәwи йә. Әw мина хамелион нинә, йе кӧ анәгори щи рʹәнге хwә дьгӧһезә. Демәк мәрьве гьһишти дӧрʹу нинә, мәсәлә, әw ӧса нинә кӧ Ода Щьватеда досте Хwәде йә, ле мәкʹтәбеда һәвале ве дьнйайе. Дәwсе, әw һәла һе щерʹьбандьнед qайимда жи Хwәдерʹа амьн дьминә. (Бьхунә Әфәси 4:14, 15.)

9, 10. а) Чьрʹа кʹар ә һәрге щаһьл бьфькьрә, кӧ әwи ча хwә кʹьфш дькьр чахе баwәрийа wи дьһатә щерʹьбандьне? б) Ньхӧмандьн чь те һʹәсабе?

⁹ Бәле, тʹӧ кәс беqьсур нинә. Щаһьл жи чаwа йед мәзьн щара шашийа дькьн (Wаиз 7:20). Ләма һәрге тӧ дьхwази бейи ньхӧмандьне, wе бь билани бә һәрге бьфькьри кӧ тӧ чьqас һазьр и сәва принсипед Йаһоwа бини сери. Тӧ ча дькари хwә бьщерʹьбини ве йәкеда? Жь хwә бьпьрсә: «Wан пашwәхтийа мьн принсипед Хwәде дьани сери?» Бьфькьрә тә чь кьр чахе баwәрийа тә һатә щерʹьбандьне. Тә дайә кʹьфше кӧ дькари рʹасти у нәрʹасти жь һәв дәрхи? Ле һәрге кәсәк тә һелан дькә чаwа Данийел һелан дькьрьн, кӧ ве дьнйа Шәйтʹанда пешдачуйи би, тӧйе чь бьки? Гәло тӧ дькари wәʹде щерʹьбандьнед wи щурʹәйида тедәрхи «чь йә qьрара» Йаһоwа? (Әфәс. 5:17).

¹⁰ Чьрʹа әм ван пьрса шеwьр дькьн? Чьмки әw пьрс али wә дькьн кӧ фәʹм бькьн ньхӧмандьн чь те һʹәсабе. Чаwа кӧ ида һатә готьне, ньхӧмандьн дьдә кʹьфше кӧ тә Йаһоwарʹа соз дайә, кӧ тʹьме wи һʹьз бьки у бь тʹәмамийа дьле хwә һʹәта-һʹәтайе wирʹа хьзмәт бьки (Марq. 12:30). Һәр кәс кӧ те ньхӧмандьне гәрәке әwи сози бинә сери. (Бьхунә Wаиз 5:4, 5.)

ӘW ХWӘСТЬНА ТӘЙӘ ШӘХСИ ЙӘ?

11, 12. а) Мәрьве кӧ дьхwазә бе ньхӧмандьне гәрәке чьда баwәр бә? б) Чь дькарә али wә бькә кӧ бь ньһерʹандьна Йаһоwа бьньһерʹьн сәр ньхӧмандьне?

¹¹ Кʹьтеба Пирозда те готьне кӧ щьмәʹта Хwәде, демәк йед щаһьл жи, wе бь рʹәзәдьли бьхwазьн wирʹа хьзмәт кьн (Зәб. 110:3). Ләма әwе кӧ дьхwазә бе ньхӧмандьне гәрәке баwәр бә, кӧ әw хwәстьна wийә шәхси йә. Чьмки дьбәкә тӧ нава рʹастийеда һати мәзьнкьрьне, ләма лазьм ә хwә кʹур бьщерʹьбини, һәла әw хwәстьна тә йә кӧ бейи ньхӧмандьне.

¹² Нава салада дьбәкә тә дитийә кӧ гәләк мәрьв һатьнә ньхӧмандьне, у нава wанда дьбәкә һәвал йан хушкбьред тәйи һʹәлал бун. Һәрге ӧса йә, тӧ гәрәке фәсал би. Тӧ гәрәке бьфькьри, гәло тӧ дьхwази бейи ньхӧмандьн сәва ве йәке, чьмки щаһьлед дьн wи әʹмьрида тенә ньхӧмандьн. Тӧ ча дькари баwәр би кӧ сәр ньхӧмандьне ӧса дьньһерʹи ча Йаһоwа дьньһерʹә? Wәʹдә хwәрʹа бьвинә кӧ бьсәкьни у бьфькьри дәрһәqа ве йәке, кӧ чьрʹа ньхӧмандьн ӧса фәрз ә. Һьнә мәʹнийед кӧ чьрʹа ньхӧмандьн фәрз ә, әме ве тʹемайеда у йа дьнда шеwьр кьн.

13. Тӧ ча дькари тедәрхи хwәстьна тә кӧ бейи ньхӧмандьне жь дьле тә йә?

¹³ Һәнә һьнә тьшт, бь сайа кʹижана тӧ дькари тедәрхи һәла хwәстьна тә кӧ бейи ньхӧмандьне, жь дьле те йә йан на. Мәсәлә, хwәстьна тә кӧ тӧ дьхwази Йаһоwарʹа хьзмәт бьки, wе дӧайед тәда әʹйан бьн. Һәрге тӧ тʹьме дӧа дьки у дӧайед тә конкрет ьн, әw йәк дьдә кʹьфше кӧ һәләqәтийа тә тʹәви Йаһоwа чьqас незик ә (Зәб. 25:4). Йаһоwа бь сайа Хәбәра хwә щаба дӧайед мә дьдә. Ләма һәрге тӧ тʹьме Кʹьтеба Пироз леколин дьки, әw жи дьдә кʹьфше кӧ тӧ дьхwази незики Йаһоwа би у бь тʹәмамийа дьле хwә жерʹа хьзмәт бьки (Йешу 1:8). Һәла жь хwә бьпьрсә: «Дӧайед мьн конкрет ьн? Һинбуна мьнә шәхси тʹьме һәйә?» У һәрге малбәта тә Qӧльхкьрьна тʹәви Малбәте дәрбаз дькә, жь хwә бьпьрсә: «Әз бь һазьрбуне темә сәр ве щьвина малбәте?» Щабед тәйә сәр wан пьрса wе али тә бькьн кӧ тедәрхи, һәла әw хwәстьна тәйә шәхси йә кӧ бейи ньхӧмандьне.

ЧЬ ТЕ ҺʹӘСАБЕ ТʹӘСМИЛБУЙИН

14. Гьли кьн дәрһәqа фьрqийа ортʹа тʹәсмилкьрьне у ньхӧмандьне.

¹⁴ Һьнә щаһьл дьбәкә рʹаст фәʹм накьн фьрqийа ортʹа тʹәсмилбуйине у ньхӧмандьне. Мәсәлә, һьнә щаһьл дьбежьн кӧ wана ида хwә тʹәсмили Йаһоwа кьрийә, ле йәкә һе һазьр ниньн кӧ бенә ньхӧмандьне. Гәло әw йәк рʹаст ә? Чахе мәрьв хwә тʹәсмили Йаһоwа дькә, әw те һʹәсабе кӧ әw Йаһоwарʹа соз дьдә, wәки wирʹа һʹәта-һʹәтайе хьзмәт кә. Ле чахе мәрьв те ньхӧмандьне, әw һʹәмушкарʹа әʹйан дькә кӧ әwи ида дӧайе хwәда хwә тʹәсмили Йаһоwа кьрийә. Ләма, чахе тӧ тейи ньхӧмандьне, тӧ гәрәке баwәр би кӧ тӧ фәʹм дьки тʹәсмилкьрьн чь те һʹәсабе.

15. Тʹәсмилкьрьн чь те һʹәсабе?

¹⁵ Чахе тӧ хwә тʹәсмили Йаһоwа дьки, тӧ хwә инкʹар дьки. Тӧ Йаһоwарʹа соз дьди кӧ qьрара wи wе жийина тәда сәр щийе пешьн бә. (Бьхунә Мәтта 16:24.) Бәле, әм гәрәке сәр һәр сози фәсал бьньһерʹьн, ле илаһи чьqас фәрз ә бона мә созе кӧ мә Йаһоwа Хwәдерʹа дайә! (Мәт. 5:33). Ле тӧ ча дькари бьди кʹьфше кӧ бь рʹастийе тә хwә инкʹар кьрийә у кӧ ньһа тӧ бона Йаһоwа дьжи? (Рʹом. 14:8).

16, 17. а) Шьровәкьн кӧ чь те һʹәсабе хwәинкʹаркьрьн. б) Чахе мәрьв хwә тʹәсмили Хwәде дькә, бь рʹастийе әw чь дьбежә?

¹⁶ Бьдьнә бәр чʹәʹве хwә кӧ һәвале wә wәрʹа әʹрәба пʹешкʹеш дьдә. Әw wәрʹа документа әʹрәба дьдә у дьбежә: «Әw әʹрәбә йа тә йә». Ле паше әw зедә дькә: «Кʹьлит wе щәм мьн бә. У тʹәне әзе әве әʹрәбе бажом, нә кӧ тӧ». Әw «пʹешкʹеш» wе wә хwәш бе? Һуне чь бьфькьрьн дәрһәqа wи һәвали?

¹⁷ Ньһа бьфькьрьн кӧ Йаһоwа һивийа чь йә жь wи мәрьви, кʹижан кӧ хwә тʹәсмили wи дькә, у жерʹа дьбежә: «Әз әʹмьре хwә дьдьмә тә. Мьн хwә тʹәсмили тә кьрийә». Ле һәрге әw мәрьв паше дәстпедькә нәрʹаст бьжи, мәсәлә дьзикава рʹасти нәбаwәра те? Йан һәрге әw хәбатәкә ӧса qәбул дькә, жь бо кʹижани wәʹде wи тʹӧнә кӧ һәрʹә хьзмәтийе у сәр щьвате? Гәло әw нә мина ве йәке йә, кӧ әw мәрьв кʹьлита әʹрәбе щәм хwә хwәй дькә? Мәрьве кӧ хwә тʹәсмили Йаһоwа дькә, бь рʹастийе wирʹа гьлийед ӧса дьбежә: «Әʹмьре мьн һе зәʹф йе тә йә, нә кӧ йе мьн. Һәрге ӧса  бьqәwьмә кӧ әз гәрәке бьжберьм кӧ qьрара тә биньм сери йан хwәстьна хwә, әзе тʹьме әwе йәке бькьм чь кӧ qьрара тә йә». Әw ньһерʹандьн мина ньһерʹандьна Иса йә, кʹижан кӧ чахе сәр әʹрде бу гот: «Әз жь әʹзмен һатьмә хwаре, нә кӧ хwәстьна хwә бькьм, ле хwәстьна wи, йе кӧ әз шандьмә» (Йуһʹн. 6:38).

18, 19. а) Ча гьлийед Рози у Кристофер дьдьнә кʹьфше кӧ ньхӧмандьн әw qәдьрәки мәзьн ә, кʹижан кӧ кʹәрәма тинә? б) Һун чь дьфькьрьн дәрһәqа wи qәдьри, демәк ньхӧмандьне?

¹⁸ Әʹйан ә, кӧ ньхӧмандьн әw гавәкә гәләк фәрз ә, у тʹӧ кәс гәрәке сәр ве йәке сәрʹа-бәрʹа нәньһерʹә. Ле тʹәсмилбуйин у ньхӧмандьн әw qәдьрәки мәзьн ә. Щаһьлед кӧ Йаһоwа һʹьз дькьн у фәʹм дькьн кӧ тʹәсмилбуйин чь те һʹәсабе, тʹӧ щар паш нахьн кӧ бенә ньхӧмандьне. У әwана нә жи пʹошман дьбьн жь бо сафикьрьна хwә. Хушкәкә щаһьл кӧ наве ве Роси йә, дьбежә: «Әз Йаһоwа һʹьз дькьм, у тʹӧ тьшт нькарә мьн ӧса бәхтәwар кә, чаwа кӧ хьзмәткьрьна wирʹа. Әз жийина хwәда тʹӧ тьштида ӧса баwәр нибум, чаwа сафикьрьна хwәда кӧ бемә ньхӧмандьне».

¹⁹ Wәрә биньн бира хwә Кристофер, дәрһәqа кʹижани жоре һатә готьне. Гәло әw чахе 12 салийа хwәда һатә ньхӧмандьне, әw сафикьрьна рʹаст бу? Ньһа Кристофер чахе тинә бира хwә тʹәсмилкьрьн у ньхӧмандьна хwә, әw пʹьрʹ рʹази йә. Әwи 17 салийа хwәда дәстпекьр ча пешәнг хьзмәт кә, у 18 салийеда һатә кʹьфшкьрьне ча бәрдәстийе щьвате. Иро әw Бәйтʹәледа хьзмәт дькә. Әw дьбежә: «Ньхӧмандьн, әw сафикьрьна рʹаст бу. Жийина мьн тʹьжә йә бь шьхӧлед һʹәwас бона Йаһоwа у тʹәшкиләта wи». Һәрге тӧ дьфькьри дәрһәqа ньхӧмандьне, тӧ ча дькари хwә һазьр ки бона ньхӧмандьне? Тʹема дьнда әме дәрһәqа ве пьрсе шеwьр кьн.