Хwә дь нава Һʹьзкьрьна Хwәдеда Хwәй кьн

1, 2. Рʹожа иройин кʹидәре әм дькарьн щи сьтʹаре бьбиньн?

БЬДӘ бәр чʹәʹве хwә әwрайи йә, байе qайим те у тӧ рʹеда дьчи. Ньшкева әʹзман дьбә тәʹри, бьруск шәwq дьдә, дьбә гӧрʹә-гӧрʹа әʹwр әʹзмана, у баранәкә qайим дьбарә. Тӧ бь ләзә-ләз дора хwә дьньһерʹи у щи сьтʹаре дьгәрʹи, сәва кӧ бьрʹәви хwә хwәй ки. Тӧ сьтʹарәке дьбини, кӧ дькарә тә жь ба у баране хwәй кә. Те чьqас ша би бона ве сьтʹаре!

² Рʹожа иройин жи әм дь wәʹде гьранда дьминьн. Чьмки рʹож бь рʹож һʹале дьнйайе һе чәтьн дьбә. Ле һәйә щи сьтʹар кӧ дькарә мә жь зийане хьлаз кә. Гәло әв чь щи сьтʹар ә? Дина хwә бьде чь те готьне дь Кʹьтеба Пирозда: «Әзе жь Йаһоwарʹа, бьбежьм: ‹Тӧ старгәһа кӧ әз хwә ле дьпʹарезьм у кәләһа мьни, Хwәдайе мьн, әw ә у әз ль wи әwлә мә›» (Зәбур 91:2, АБ).

3. Ча Йаһоwа сәва мә дькарә бьбә сьтʹар?

³ Тӧ тʹәне дьшьрмиш бә, кӧ Йаһоwа Әʹфьрандаре Һьмзор у һәри Жорьн дькарә сәва мә бьбә сьтʹар. Йаһоwа дькарә мә хwәй кә, чьмки әw жь wан кәсед, йан жи тьштед кӧ дькарьн зийане бьдьнә мә, qәwаттьр ә. Һәрге зийанәк жи бьгьһижә мә, Йаһоwа дькарә һʹале мә баш кә. Ле ча әм дькарьн Йаһоwа бькьн сьтʹара хwә? Әм гәрәке гӧмана хwә бьдьн ль сәр wи. Хенщи ве йәке Кʹьтеба Пироз мә һелан дькә: «Хwә нава wе һʹьзкьрьна Хwәдейә һьндава хwәда хwәй кьн» (Щьһуда 21). Бәле, әм гәрәке хwә дь нава һʹьзкьрьна Хwәдеда хwәй кьн, сәва ве йәке лазьм ә кӧ һәләqәтийа хwә тʹәви Баве хwәйи әʹзмана баш ки. У wи чахи әм дькарьн гӧман бьн, кӧ әw wе сәва мә бьбә сьтʹар. Ле ча әм дькарьн һәләqәтийа хwә тʹәви Хwәде баш кьн?

ПЕБЬҺʹӘСӘ ДӘРҺӘQА ҺʹЬЗКЬРЬНА ХWӘДЕ, У ЩАБА ҺʹЬЗКЬРЬНА WИ БЬДӘ

4, 5. Ча Йаһоwа һʹьзкьрьне һьндава мә нишан дькә?

⁴ Сәва кӧ хwә дь нава һʹьзкьрьна Хwәдеда хwәй кьн, әм гәрәке фәʹм бькьн кӧ ча Йаһоwа һьндава мә һʹьзкьрьне нишан дькә. Һәла дьшьрмиш бә ль сәр wан тьшта, чь кӧ тӧ жь Кʹьтеба Пироз бь сайа ве кʹьтебе пеһʹәсийайи. Әʹфьрандаре мә Йаһоwа маләкә хас, демәк дьнйа да мә. Әwи хәм кьр кӧ ль сәр әʹрде һәбә бе һʹәсаб хwарьн, ав, һʹәму тьштед тʹәбийәте, щурʹәщурʹә һʹәйwан у щийед гәләк бәдәw, йед кӧ бона дитьне һʹәwас ьн. Бь сайа Кʹьтеба Пироз, Хwәде наве хwә у һʹӧнӧред хwәйә баш мәрʹа әʹйан кьр. Дь Хәбәра wида ӧса жи те гьликьрьне, кӧ Хwәде Кӧрʹе хwәйи һʹьзкьри шандә әʹрде, йе кӧ гәлә чәрчьри у мьр сәва мә (Йуһʹәнна 3:16). Ле әв пʹешкʹеш чь те һʹәсабе сәва мә? Әв гӧмана әʹмьре баш дь ахьрийеда, дьдә мә.

⁵ Сәва кӧ ахьрийа мә баш бә, Хwәде диса тьштәк кьр. Әwи пʹадшати ль әʹзмана кʹьфш кьр, у Иса Мәсиһ кьрә Пʹадша. Зутьрәке әв пʹадшати wе һʹәму кӧл-дәрдед мәрийа кʹӧта кә у әʹрде бькә щьнәт. Һәла тӧ тʹәне дьшьрмиш бә, әм дькарьн дь әʹдлайеда у бәхтәwарийеда һʹәта-һʹәтайе бьжин! (Зәбур 37:29). Хенщи ве йәке иро жи Хwәде рʹебәрийе дьдә мә, wәки әм бькарьбьн бь әʹмьрәки рʹаст бьжин. Хwәде ӧса жи мәщала дӧакьрьне дайә мә, wәки әм бькарьбьн жерʹа хәбәр дьн у дәрһәqа нет-фькьред хwә бежьн. Әв тʹәне чәнд мәсәлә нә, йед кӧ нишан дькьн wәки ча Йаһоwа һʹьзкьрьна хwә һьндава инсанәте у һәр мә йәке нишан дькә.

6. Ча тӧ дькари щаба һʹьзкьрьна Йаһоwа бьди?

⁶ Wәре ньһа әм дьшьрмиш бьн ль сәр пьрсәкә фәрз: Ча әз дькарьм щаба һʹьзкьрьна Йаһоwа бьдьм? Гәләк wе бежьн: «Бәле, әз гәрәке Йаһоwа һʹьз бькьм». Тӧ жи ӧса дьшьрмиш дьби? Иса Мәсиһ гот, кӧ тʹәмийа һәрә мәзьн әв ә, кӧ: «Хӧдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә» (Мәтта 22:37). Бь рʹастийе жи, гәлә мәʹни һәнә кӧ тӧ Йаһоwа Хwәде һʹьз бьки. Ле ча әм дькарьн Йаһоwа бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә, һʹьз бькьн?

7. Һʹьзкьрьн һьндава Хwәде ве чьда мә һелан кә? Шьровәкә.

⁷ Ча жь Кʹьтеба Пироз те кʹьфше һʹьзкьрьн һьндава Хwәде гәлә фәрз ә. Ле тʹәне һʹьзкьрьна мә һәбә әв бәс нинә. Wәрә әм мәсәләке бежьн. Дәндька севе лазьм ә, сәва кӧ дачькини wәки дара севе мәзьн бә у севед хwәш бьдә. Ле һәрге тӧ сев бьхwази у кәсәк дәндька севе бьдә тә, те рʹази би? Фәʹмдари йә, на. Ӧса жи һʹьзкьрьна һьндава Хwәде, әw лазьм ә, ле әв тʹәне дәстпебун ә. Гәрәке һʹьзкьрьне нав хwәда мәзьн ки, wәки паше пе шьхӧлед хwә бәред хwәш бьди. Дь Кʹьтеба Пирозда ньвисар ә: «Чьмки бь ве йәке әм һʹьзкьрьна хwә һьндава Хwәдеда дьдьнә кʹьфше, гава әм тʹәмийед wи дьqәдиньн. У тʹәмийед wи нә гьран ьн» (1 Йуһʹәнна 5:3). Һәрге әм бь рʹастийе Хwәде һʹьз дькьн, һʹьзкьрьна мә һьндава wи тʹьме гәрәке мәзьн бә у бәред баш демәк кьред мәйә баш бьдә. Бәле, бь шьхӧлед мә гәрәке бе кʹьфше, wәки әм Хwәде һʹьз дькьн. (Бьхунә Мәтта 7:16-20.)

8, 9. Ча әм дькарьн һʹьзкьрьна у рʹазибуна хwә Хwәдерʹа нишан кьн?

⁸ Һәрге әм гӧһ дьдьнә тʹәмийед Хwәде у дь әʹмьре хwәда принсипед wи дьqәдиньн, бь ве йәке әм нишан дькьн кӧ Хwәде һʹьз дькьн. Чәтьн нинә әве йәке бьки, чьмки qанунед Йаһоwа нә гьран ьн. Әв qанун али мә дькьн кӧ әм дь әʹмьре хwәда ләзәте бьбиньн у бәхтәwар бьн (Ишайа 48:17, 18). Һәрге әм бь рʹебәрийа Хwәде дьжин, бь ве йәке әм нишан дькьн кӧ гәлә qимәт дькьн әве йәке, чь кӧ Баве мәйи әʹзмана сәва мә кьрийә. Ле йазьх, кӧ иро тʹәне һьнә мәри рʹазибуна хwә Хwәдерʹа нишан дькьн. Әм нахwазьн бьбьнә мина wан мәрьвед бе шекьр, йед кӧ дьжитьн wәʹде Иса Мәсиһ. Щарәке чахе Иса дәһә мәрьвед кʹӧти qәнщ кьр, жь wана тʹәне йәк вәгәрʹийа сәва кӧ рʹазибуна хwә Исарʹа әʹйан кә (Луqа 17:12-17). Бейи шьк әм жи дьхwазьн бьбьнә мина ви мәрьве шекьр, нә кӧ мина ван нәһә мәрьвед бе шекьр!

⁹ Кʹижан ьн тʹәмийед Йаһоwа кӧ әм гәрәке хwәй кьн? Дь ве кʹьтебеда мә хәбәр да дәрһәqа гәлә тʹәмийед Йаһоwа у wәрә әм диса чәнд жь ван тʹәмийа бьwәкʹьлиньн. Һәрге әм тʹәмийед Йаһоwа бьqәдиньн у хwәй кьн, әв йәк wе али мә бькә кӧ хwә дь нава һʹьзкьрьна Йаһоwада хwәй кьн.

ҺЕ ЗЕДӘ НЕЗИКИ ХWӘДЕ БӘ

10. Шьровәкә, чьрʹа ӧса фәрз ә диса жи бәрдәwам ки дәрһәqа Йаһоwа Хwәде пебьһʹәси?

¹⁰ Сәва кӧ тӧ незики Йаһоwа би, гәләк фәрз ә wәки пебьһʹәси дәрһәqа wи. Әв йәк тʹӧ щар гәрәке нәйе сәкьнандьне. Мәсәлә, бьдә бәр чʹәʹве хwә wәки тӧ дәрва руньштийи, еварәкә сар ә у тә агьр вехьстйә wәки хwә гәрм ки. Тәйе бьһишта кӧ агьр һеди-һеди кембуйа у бьтәмьрийа? Фәʹмдари йә на. Тәйе тʹьме дар бьавита сәр агьр, сәва кӧ агьр бьшхӧлә у тә гәрм кә. Чьмки әʹмьре тә ве йәкева гьредайи йә. Ча сәва кӧ агьр нәтәмьрә лазьм ә дар, ӧса жи сәва кӧ һʹьзкьрьна мә һьндава Хwәде кʹӧта нәбә, лазьм ә дәрһәqа Хwәде тʹьме занәбуне бьстиньн (Мәтʹәлок 2:1-5).

11. Ча гьлийед Иса һʹӧкӧм бу ль сәр шагьртед wи?

¹¹ Иса дьхwәст кӧ шагьртед wи һьндава Йаһоwа у Хәбәра wи һʹьзкьрьна хwә хwәй кьрана у һе мәзьн кьрана. Паши wе йәке кӧ Иса жь мьрьне рʹабу, әwи дӧ шагьртед хwәрʹа чәнд пʹехәмбәрти жь Ньвисаред Ибранийа шьровәкьр, йед кӧ ль сәр wи һатьбун сәри. Әв йәк ль сәр шагьртед wи ча һʹӧкӧм бу? Пәй һьнә wәʹдәрʹа wана гот: «Ләма, гава әwи рʹеда мәрʹа хәбәр дьда у ньвисар мәрʹа шьровәдькьрьн, агьр дьле мә дькʹәт» (Луqа 24:32).

12, 13. (а) Рʹожа иройин гәләк мәри дь һьндава һʹьзкьрьна Хwәде у Кʹьтеба Пирозда, чь ль сәр хwә тʹәхмин кьрьнә? (б) Чь әм дькарьн бькьн, кӧ һʹьзкьрьна мә сар нәбә?

¹² Чахе тӧ педьһʹәсийайи кӧ чь һин дькә Кʹьтеба Пироз, дьле тә бь шабуне у һʹьзкьрьна һьндава Хwәде тʹьжә дьбу, у тә дьхwәст мәрийарʹа дәрһәqа ве рʹастийе гьли кьра? Бейи шьк тә әв шабун у һʹьзкьрьн тʹәхмин кьрийә. Гәлә мәрийа жи әв йәк ль сәр хwә тʹәхмин кьрьнә. Ньһа жи гәлә фәрз ә, wәки тӧ Һʹьзкьрьна хwә дь һьндава Хwәдеда хwәй ки у мәзьн ки. Әм нахwазьн чʹәʹв бьдьнә ве дьнйайе. Иса Мәсиһ пешда гот кӧ «һʹьзкьрьна гәләка wе сар бә» (Мәтта 24:12). Ле чь әм дькарьн бькьн, сәва кӧ һʹьзкьрьна мә һьндава Йаһоwа у рʹастийа Кʹьтеба Пироз сар нәбә?

¹³ Бәрдәwан кә дәрһәqа Йаһоwа Хwәде у Иса Мәсиһ пебьһʹәсә (Йуһʹәнна 17:3). Дьшьрмиш бә ль сәр wан тьшта, чь кӧ тӧ жь Хәбәра Хwәде педьһʹәси, у пьрсе бьдә хwә: «Гәло әв йәк чь мьн һин дькә дәрһәqа Йаһоwа Хwәде? Чь мәʹнийа мьн һәйә, жь бо чь жи әз гәрәке Йаһоwа бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә Һʹьз бькьм?» (Бьхунә Зәбур 143:5.) Дьшьрмишбуна ӧса wе али тә бькә, кӧ һʹьзкьрьна тә һьндава Йаһоwа һе зедә бә у кем нәбә.

14. Ча дӧакьрьн дькарә али мә бькә, wәки хwә дь нава һʹьзкьрьна Хwәдеда хwәй кьн?

¹⁴ Сәва кӧ һʹьзкьрьна тә һьндава Йаһоwа һе мәзьн бә, лазьм ә һәр гав дӧа бьки (1 Тʹесалоники 5:17). Жь сәре 17 әм пеһʹәсийан, кӧ дӧакьрьн әв жь Хwәде пʹешкʹешәкә qимәт ә. Мәсәлә чахе мәри һәр гав һәврʹа хәбәр дьдьн у дьле хwә һәв дӧрʹа вәдькьн, әwана һе незики һәв дьбьн у һәләqәтийа wан мәзьн дьбә. Әве йәке әм ӧса жи дькарьн бежьн дәрһәqа Йаһоwа, һәрге әм һәр гав wирʹа дӧа дькьн, әв йәк һәләqәтийа мә тʹәви Йаһоwа һе qәwи дькә у мә незики wи дькә. Гәләк фәрз ә wәки дӧайед мә бе нет, пʹьрʹ хәбәр у бь әзбәри нибьн. Әм гәрәке ӧса Йаһоwарʹа хәбәр дьн, ча зарʹ тʹәви баве хwә хәбәр дьдә. Чахе әм дӧа дькьн әм гәрәке бь qәдьр у бь дьл у щан тʹәви Йаһоwа хәбәр дьн, аза дьле хwә wирʹа wәкьн у һʹәлал бьн (Зәбур 62:8). Бәле, һинбуна Кʹьтеба Пирозә хwәха, у дӧайед мәйә бь дьл у щан, әв һәйә пʹарәкә фәрз, жь qӧльхкьрьна мә, у али мә дькә кӧ әм хwә дь нава һʹьзкьрьна Хwәдеда хwәй кьн.

БЬ ШАБУН ЙАҺОWАРʹА QӦЛЬХ КӘ

15, 16. Чьрʹа даннасинкьрьн әв һәйә qәдрәки мәзьн у ча хьзнә?

¹⁵ Һинбуна Кʹьтеба Пирозә хwәха у дӧакьрьн, әв һәйә пʹарәкә жь qӧльхкьрьна мә, йе кӧ әм хwәха башqә дәрбаз дькьн. Ньһа wәрә әм хәбәр дьн, дәрһәqа ве qӧльхкьрьне, йа кӧ әм бәр тʹәмама дьдьнә кʹьфше, демәк хәбәр дьдьн мәрийарʹа дәрһәqа баwәрийа хwә. Тӧ ида хәбәр дьди мәрийарʹа дәрһәqа рʹастийед Кʹьтеба Пироз? Бь рʹастийе жи әв qәдрәки гәләк мәзьн ә! Чахе әм мәрийарʹа гьли дькьн рʹастийе дәрһәqа Йаһоwа Хwәде, йа кӧ әм һин бунә, бь ве йәке әм фәрманәкә фәрз пек тиньн, йа кӧ һʹәму мәсиһийед рʹастрʹа һатә дайине. Демәк даннасинкьрьна мьзгинийа хере, дәрһәqа Пʹадшатийа Хwәде. (Бьхунә Мәтта 24:14; 28:19, 20.)

¹⁶ Паwлосе шанди qӧльхкьрьна хwә Хwәдерʹа, гәләк qимәт дькьр, у әв бәрамбәри хьзне кьр (2 Корьнтʹи 4:7). Чахе тӧ хәбәр дьди мәрийарʹа дәрһәqа Йаһоwа Хwәде у qьрара wи, бь ве йәке тӧ шьхӧләкә лапә баш дьки. Әв һәйә qӧльхкьрьн Ахайе һәри башрʹа, qӧльхкьрьна ӧса кʹарәкә мәзьн тинә. Бь даннасинкьрьне тӧ али мәрьвед һʹәлал дьки, кӧ әwана бькарьбьн незики Баве хwәйи әʹзмана бьн у бьсәкьньн ль сәр рʹийа рʹастийе, йа кӧ дьбә бәрбь әʹмьре һʹәта-һʹәтайе! Жь ви шьхӧли фәрзтьр у четьр ида чь дькарә һәбә? Чахе тӧ гьли дьки мәрийарʹа дәрһәqа Йаһоwа у Хәбәра wи, тӧ баwәрийа хwә qәwи дьки у һʹьзкьрьна тә һьндава Йаһоwа һе мәзьн дьбә. Йаһоwа гәләк qимәт дькә һʹәму тьшти, чь кӧ тӧ сәва wи дьки (Ибрани 6:10). Бәрдәwан кә даннасинкьрьна бь дьл у щан, у әв йәк wе али тә бькә, кӧ хwә дь нава һʹьзкьрьна Хwәдеда хwәй ки. (Бьхунә 1 Корьнтʹи 15:58.)

17. Чьрʹа даннасинкьрьн, әв шьхӧләкә бе әгләкьрьнә?

¹⁷ Гәлә фәрз ә биньн бира хwә кӧ даннасинкьрьн дәрһәqа Пʹадшатийа Хwәде әв шьхӧләкә бе әгләкьрьн ә. Гәло чьрʹа? Хәбәра Хwәде мәрʹа дьбежә: «Рʹожа мәзьн йа Хӧдан нез ә, нез ә у зәʹф бьләзи те» (Сефанйа 1:14). Бәле, әв рʹожа кӧ Йаһоwа әве дьнйа нәһәq кʹӧта кә, зу незик дьбә! Ләма жи әм гәрәке дәрһәqа ве йәке мәрийарʹа әʹлам кьн. Wанарʹа лазьм ә бьзаньбьн wәки ньһа әw wәʹдә йә, кӧ әwана гәрәке Йаһоwа Хwәде qәбул кьн ча Сәрwере Һьмзор. Рʹожа Хwәде «дәрәнги» накʹәвә (Һәбаqуq 2:3).

18. Чьрʹа әм гәрәке незики мәсиһийед рʹаст бьн у әшкәрә тʹәвайи Йаһоwарʹа qӧльх кьн?

¹⁸ Йаһоwа дьхwазә wәки әм тʹәви qӧльхкʹаред wийи рʹаст бьбьнә йәк у тʹәвайи әм әшкәрә наве wи рʹумәт кьн. Ләма жи дь Кʹьтеба Пирозда ӧса те готьне: «Бьра әм бона һәвдӧ хәм бькьн, wәки һʹьзкьрьне у qәнщикьрьнеда һелана бьдьнә һәв. Бьра әм дәст жь льһәвщьвине нәкʹьшиньн, чаwа кӧ һьнәка хwәрʹа кьрийә хәйсәт, ле әм дьл бьдьнә һәв у һе зедә, чьмки әм дьбиньн кӧ Рʹожа Ахрәте незик дьбә» (Ибрани 10:24, 25). Бәле, чахе әм дь щьватеда тʹәви хушк-бьред хwәйә рʹӧһʹани тʹоп дьбьн, әв бона мә мәщаләкә баш ә, сәва кӧ Хwәдайе хwәйи һʹьзкьрирʹа qӧльх кьн у wи рʹумәт кьн. Ль сәр щьвата әм ӧса жи дькарьн һелана бьдьнә һәв у һәв qәwи кьн.

19. Ча әм дькарьн дь щьватеда һʹьзкьрьне һьндава һәв qәwи кьн?

¹⁹ Чахе әм незики щурʹә-щурʹә qӧльхкʹаред Йаһоwа дьбьн, бь ве йәке әм дь щьватеда һʹьзкьрьн у һәвалтийа хwә һьндава һәв һе qәwи дькьн. Гәләк фәрз ә, кӧ әм хәйсәтед баш нав һәвда бьгәрʹьн, чьмки хwәха Йаһоwа нав мәда тьштед баш дьгәрʹә. Һивийе нибә кӧ хушк-бьред тә дь щьватеда гәрәке qәданди бьн. Бинә бира хwә, кӧ һәр кәс бь щурʹә-щурʹә чапа незики Хwәде дьбә. Кәсәк дькарә зу дь рʹӧһʹанида пешда һәрʹә, һьнәк жи һеди-һеди у әм тʹәмам шашийа дькьн. (Бьхунә Колоси 3:13.) Һәвалтийе бькә тʹәви wан мәрийа, йед кӧ гәләк Йаһоwа һʹьз дькьн, әв йәк wе али тә бькә кӧ дь рʹӧһʹанида мәзьн би у пешда һәрʹи. Бәле, һәрге тӧ тʹәви хушк-бьред хwәйи рʹӧһʹани Йаһоwарʹа qӧльх ки, тӧйе бькарьби хwә дь нава һʹьзкьрьна Хwәдеда хwәй ки. Ле Йаһоwа ча wе хәлат кә wан мәрийа, йед кӧ бь амьнийе wирʹа qӧльх дькьн у бь ве йәке хwә дь нава һʹьзкьрьна Хwәдеда хwәй дькьн?

ХWӘ ЛЬ «ЖЬЙИНА» РʹАСТ БЬГЬРӘ

20, 21 Чь йә «жийина кӧ рʹасти жийин ә», у чьрʹа әв гӧманәкә баш ә?

²⁰ Йаһоwа qӧльхкʹаред хwәйә амьн wе бь әʹмьр хәлат кә. Ле дәрһәqа әʹмьрәки ча хәбәрдан дьчә? Мәсәлә, иро әм дькарьн бежьн кӧ әм рʹасти жи дьжин? Һьнәк дьбәк wе бежьн кӧ әм бина хwә дькʹьшиньн, дьхwьн, вәдьхьвьн, демәк әм дьжин ле чь дькьн. Һәла һе чахе тьштәки баш дьqәwьмә, дьбежьн: «Әва рʹасти жи жийин ә». Ле Кʹьтеба Пироз дьбежә wәки жийина рʹасти щурʹәки майин ә.

²¹ Хәбәра Хwәде мә һелан дькә, «жийина кӧ рʹасти жийин ә qазьнщ кьн» (1 Тимотʹейо 6:19). Ча жь ван гьлийа те кʹьфше, «жийина кӧ рʹасти жийин ә» әм дькарьн тʹәне дь ахьрийеда qазанщ кьн. Чахе әм бьбьнә qәданди, әме бь жийинәкә рʹасти бьжин, демәк ӧса чаwа Хwәде сәва мә qьрар кьрийә. Чахе әм дь щьнәтеда әʹмьре һʹәта-һʹәтайе бьстиньн, әме тʹӧ щар нәхwәш нәкʹәвьн у кал пир нәбьн. Әме дь әʹдьлайеда у бәхтәwарийеда бьжин. Һьнге әме бьстиньн «жийина кӧ рʹасти жийин ә», демәк әʹмьре һʹәта-һʹәтайе (1 Тимотʹейо 6:12). Бь рʹастийе жи гӧманәкә мәйә чьqас баш һәйә!

22 Ча тӧ дькари «жийина кӧ рʹасти жийин ә» qазанщ ки?

²² Ле ча әм дькарьн «жийина кӧ рʹасти жийин ә qазанщ кьн?» Пешийа кӧ Паwлосе шанди әв гьли бьгота, әwи готә мәсиһийа кӧ әwана гәрәке «qәнщийа бькьн» у «бь кьрьнед qәнщ дәwләти бьн» (1 Тимотʹейо 6:18). Әв гьлийед Паwлос найенә һʹәсабе, кӧ бь кьред хwәйә qәнщ әм һежайи жийина рʹаст дьбьн, чьмки жийина рʹаст әм тʹәне бь сайа «кʹәрәма Хwәде» дькарьн бьстиньн. Ле жь гьлийед Паwлос те кʹьфше, кӧ лазьм ә әм занәбунед жь Кʹьтеба Пироз рʹаст бьдьн хәбате (Рʹомайи 5:15). Йаһоwарʹа зәʹф һʹәwас ә хәлат кә wан мәрийа, кʹи кӧ бь амьнийе wирʹа qӧльх дькьн. Әw дьхwазә wәки тӧ «жийина рʹасти» бьстини. Һәр кәс кʹи кӧ хwә дь нава һʹьзкьрьна Хwәдеда хwәй дькә, дькарә жийинәкә ӧса бьстинә у бәхтәwар бә бь әʹмьре һʹәта-һʹәтайе.

23. Чьрʹа гәлә фәрз ә, хwә дь нава һʹьзкьрьна Хwәдеда хwәй ки?

²³ Һәр кәс жь мә гәрәке пьрсәкә ӧса бьдә хwә: «Әз qәwата хwә гьшки дьдьм хәбате wәки qӧльх кьм Хwәдерʹа ӧса, ча Кʹьтеба Пироз һин дькә?» Һәрге әм һәр рʹож әве пьрсе дьдьнә хwә у тʹәхмин дькьн кӧ щаба ве пьрсе бәле йә, демәк әм ль сәр рʹекә рʹаст сәкьнинә. Йаһоwа сьтʹара мә йә, ләма жи әм дькарьн баwәр бькьн wәки дь рʹожед ахьрийейә чәтьнда wе мә хwәй кә. Йаһоwа ӧса жи wе мә дәрбази дьнйа ну кә, йе кӧ ида гәлә незик ә. Бь рʹастийе жи әʹмьрәки чьqас баш һивийа мә йә у чьqас әме ша бьн кӧ wәʹде ахьрийа ве дьнйайе мә бьжартьнәкә рʹаст кьрийә! Һәрге тӧ ида иро бьжартьнәкә ӧса бьки, тӧйе жийина рʹасти бьстини, демәк әʹмьре һʹәта-һʹәтайе, йе кӧ Йаһоwа сәва инсанәте qьрар кьрийә!