Әʹламәтийе Зедә

Чь те Һʹәсабе Наве Хwәде у Ча Wи Дьдьнә Хәбате?

ДЬ КʹЬТЕБА Пироз Дәркʹәтьн 3:15-да, гьлийeд ӧса ньвисар ьн: «Диса Хwәде готә Муса: ‹Аһа бежи зарʹeд Исраел: Хӧдан, Хwәдейе кал-бавeд wә, Хwәдейе Бьраһим, Хwәдейе Исһаq у Хwәдейе Аqуб әз шандьм щәм wә. Һʹәта-һʹәтайе наве мьн әв ә у һʹәму ньсьлада әзе аһа бемә биранине (ПКʹМ)›». Һьнә тʹәрщьман, ль вьр дәwса наве Йаһоwа дьньвисьн «Хӧдан» йан жи «Хwәде», һьнәк жи наве Йаһоwа дьдьн хәбате. Ле гәло бь рʹастийе гәрәке ча бә? Гәрәке бе готьне «Йаһоwа», йан сәрнавeд ӧса, ча мәсәлә «Хӧдан»?

Тетраграмматон, щурʹе ньвисандьна наве Хwәде бь һʹәрфeд Ибрани — Наве Хwәде бь һʹәрфед Ибрани

Бь рʹастийе дь ве рʹезеда дәрһәqа наве Хwәде хәбәрдан дьчә. Сәре-серида, Кʹьтеба Пирозә орижинал ниве зәʹф ль сәр зьмане Ибрани һатийә ньвисаре, у дь ве орижиналеда наве Хwәде те хәбьтандьне. Әв нав бь һʹәрфeд Ибрани аһа те ньвисаре, יהוה демәк (ЙҺWҺ). Ле ль сәр зьмане Кӧрманщи, әв нав ӧса те ньвисаре «Йаһwәһ» йан «Йаһоwа». Ле гәло, әв наве Хwәде дь Кʹьтеба Пирозда тʹәне щарәке һатийә ньвисаре? На. Дь тʹәмамийа Кʹьтеба Пирозә орижиналеда әв нав wәкә 7 000 щар һатийә ньвисаре!

Гәло наве Хwәде чьqаси фәрз ә? Мәсәлә, Иса готә мәрийа wәки әwана ӧса дӧа бькьн: «Баве мәйи әʹзмана! Наве тә пироз бә» (Мәтта 6:9). Дәрбәке жи Иса хwәха ӧса Хwәдерʹа дӧа кьр: «Баво, наве хwә бьльнд кә». Һьнге дәнгәк жь әʹзмен һат: «Мьн бьльнд кьр у әзе диса бьльнд кьм!» (Йуһʹәнна 12:28). Жь вьр те кʹьфше, кӧ наве Хwәде гәләк фәрз ә. Ле wәки ӧса нә, чьрʹа һьнәк тʹәрщьмана әв нав жь Кʹьтеба Пироз дәрхьстьн у дәwса ве йәке сәрнавәки дьн ньвисин?

Мәʹнийа дӧда, кӧ чьма наве Хwәде жь Кʹьтеба Пироз дәрхьстьнә, тʹәвгьредайи йә тʹәви qәйде мьләте Щьһу. Наве «Йаһwәһ» йан «Йаһоwа», мьләте Щьһу бона мәзьнайа Хwәде нәдьданә хәбате. Әв баwәрбуна wана жь ве йәке дьһат, кӧ wана рʹаст нәдьданә хәбате әва qануна һан: «Наве Хӧдан Хwәдейе хwә бадиһәwа нәди сәр заре хwә, чьмки Хӧдан wе йе кӧ наве wи бадиһәwа дьдә сәр заре хwә, бе щәза наһелә» (Дәркʹәтьн 20:7, ПКʹМ).

Демәк әв qанун изьне надә мәрийа, wәки наве Хwәде нәрʹаст бьдьн хәбате. Ле гәло, һәрге мәрьв наве Хwәде сәва һӧрмәт-рʹумәткьрьна wи дьдә хәбате, демәк әв жи нәрʹаст ә? Әw мәрьвeд кӧ кʹьтебeд жь (Пәймана Кәвьн) ль сәр зьмане Ибрани ньвисин ә, амьн бун бәр Хwәде у бь Qанунeд wи дьжитьн. Ле wана тʹьме наве Хwәде дьда хәбате. Мәсәлә, wана наве Хwәде дьда хәбате чахе бәр гәләка кʹьламeд Зәбур дьстьран. Хенщи wе йәке, Йаһоwа хwәха готә qӧльхкʹарeд хwә, wәки әwана наве wи бьдьнә хәбате, у кʹи кӧ гӧрʹа wи дькьр наве wи дьда хәбате (Йоwел 2:32; Кʹарeд Шандийа 2:21). Ләма жи рʹожа иройин мәсиһи чʹәʹв дьдьнә Иса у наве Хwәде бь qәдьр дьдьн хәбате (Йуһʹәнна 17:26).

Әw тʹәрщьманeд Кʹьтеба Пироз, йeд кӧ дәwса наве Хwәде сәрнавeд wи дьдьн хәбате, шашикә мәзьн бәрʹдьдьн. Бь ве йәке әwана мәрийа жь Хwәде дур дьхьн, ле Кʹьтеба Пироз дьбежә, wәки незики Хwәде бьн (Зәбур 25:14). Һәла дьшьрмиш бә дәрһәqа һәваләки хwәйи незик. Тәйе бькарьбуйа незики wи буйа, һәрге тә наве wи ньзаньбуйа? Демәк, әw мәрьв йeд кӧ наве Хwәде, Йаһоwа, пьшт гӧһе хwәва давежьн у надьн хәбате, тʹӧ щар wе нькарьбьн незики Хwәде бьн. Хенщи ве йәке, гәләк qә ньзаньн наве Хwәде чь те һʹәсабе. Wәрә әм пебьһʹәсьн.

Хwәде хwәха qӧльхкʹаре хwәйи амьнрʹа, Мусарʹа әʹйан кьр, wәки наве wи чь те һʹәсабе. Чахе Муса дәрһәqа наве Хwәде пьрси, Йаһоwа ӧса щаба хwә да: «Әзе Бьбьмә Әw, Кʹе жи Бьхwазьм Бьбьм» (Дәркʹәтьн 3:14, ДТʹ). Демәк, Йаһоwа дькарә бьбә әw, кʹе жи лазьм те, сәва кӧ һʹәму нетeд хwә у созeд хwә бинә сери, әw ӧса жи дькарә ӧса бькә wәки әʹфрине wи бьбә әw кʹе жи Хwәде дьхwазә кӧ бьбә, сәва кӧ qьрара хwә бинә сери.

Һәла хwәрʹа бьдә һʹәсаб, йан чь тӧ дькари бьби әw, кʹе жи бьхwази бьби. Тӧйе сәва мәрьвeд хwәйи незик чь бьки? Һәрге кәсәк жь wан гьран нәхwәш кʹәвә, тӧйе бьби һʹәкимәки qайим, wәки wи qәнщ ки. Ле һәрге щәм һәваләки тә чәтьнайeд тʹәви пʹәра гьредайи һәбә, тӧйе бьби мәрьвәки гәләки дәwләти, wәки али wи бьки. Ле бь рʹастийе, тʹӧ кәс жь мәрийа нькарә бьбә әw кʹе жи бьхwазә. Wәʹде һинбуна Кʹьтеба Пироз те пебьһʹәси, wәки ча Йаһоwа дьбә әw, кʹе жи дьхwазә, сәва кӧ созeд хwә бинә сери. Йаһоwарʹа гәләк һʹәwас ә qәwата хwә бьдә хәбате сәва кʹара wан мәрийа, йeд кӧ wи һʹьз дькьн (2 Дирок 16:9). Ле әw кʹи кӧ дәрһәqа наве Хwәде ньзаньн, нә жи заньн дәрһәqа wан хәйсәт-һʹӧнӧрeд Хwәде, йeд кӧ әм һежа пеһʹәсийан.

Ида фәʹмдари йә, кӧ наве Йаһоwа дь Кʹьтеба Пирозда гәрәке бе ньвисаре. Чахе әм заньн кӧ наве Йаһоwа чь те һʹәсабе у наве wи дьдьнә хәбате wәʹде qӧльхкьрне, әм бь ве йәке незики Баве хwәйи әʹзмана, Йаһоwа дьбьн.a

a Сәва кӧ дәрһәqа наве Хwәде һе зедә әʹламәтийе бьстини, тӧ дькари бьхуни брошура бь наве, «Наве Хwәде wе Һʹәта-Һʹәтайe Һәбә», йе кӧ Шәʹдeд Йаһоwа ль сәр гәлә зьмана дәрхьстьнә. Бьньһерʹә ӧса жи пʹара 1 бьрошура «Рʹебәри бона Һинбуна Кʹьтеба Пироз».