Чь йә «Бабилона Мәзьн»?

ДЬ КʹЬТЕБА Әʹйантида һәнә гьли-готьнед ӧса йед кӧ әм гәрәке рʹастә-рʹаст фәʹм нәкьн, чьмки мәʹна ван гьлийа тьштәки дьн ә. Мәсәлә, дь кʹьтеба Әʹйантида те гьликьрьне дәрһәqа жьнәке кӧ ль сәр әʹнийа wе ньвисар ә «Бабилона Мәзьн». Әв жьн рʹуньштийә ль сәр «әʹлаләт» у мьләта (Әʹйанти 17:1, 5, 15). Ле чьмки бь рʹастийе тʹӧ жьн нькарә ль сәр әʹлаләте рʹуне, ләма жи фәʹмдари йә wәки хәбәра «Бабилона Мәзьн» бь симболик гәрәке фәʹм бькьн. Wәрә әм пебьһʹәсьн әв жьна qав чь те һʹәсабе?

Дь кʹьтеба Әʹйанти 17:18-да ль сәр ве жьна бь симболики ӧса те готьне: «Әw жьна кӧ тә дит, әw бажаре мәзьн ә, йе кӧ пʹадшатийе ль сәр пʹадшед дьнйайе дькә». Чьмки «бажаре мәзьн» сәрwертийа «пʹадшед дьнйайе» дькә, ләма жи әм дькарьн бежьн, кӧ әв жьна бь наве «Бабилона Мәзьн» һәйә тʹәшкиләтәкә мәзьнә һʹәмдьнйайе, йа кӧ ль сәр тʹәмамийа дьнйайе һʹӧкӧм дькә. Ле гәло әв чь тʹәшкиләт ә? Әв һәйә тʹәшкиләта һʹәму религийед qәлп. Wәрә әм бьньһерʹьн ча рʹезед жь кʹьтеба Әʹйанти, әве йәке избат дькьн.

Тʹәшкиләт дькарә бьбә йа политике (сийасәтийе), йа тʹӧщарәтийе у йа религийайе. Жьн бь наве «Бабилона Мәзьн» нькарә бьбә тʹәшкиләта политике, чьмки дь Хәбәра Хwәдеда ньвисар ә кӧ «пʹадшед дьнйайе» демәк тʹәшкиләтед политика ве дьнйайе, «тʹәви ве qави кьрьн». Qавийа ве жьна бь симболик дь wе йәкеда нә, кӧ әwе пәйман гьредайи йә тʹәви сәрwеред ве дьнйайе у әw һʹәму тьшти дькә кӧ qәwате һьлдә у бькарьбә ль сәр wан һʹӧкӧм кә. Аһан, ләма жи әw те навкьрьне «qава бь нав у дәнг» (Әʹйанти 17:1, 2; Аqуб 4:4).

Бабилона Мәзьн нә жи тʹәшкиләта тʹӧщарәтийе йә, чьмки «базьрганед дьнйайе», йан жи тʹәшкиләтед тʹӧщарәтийе wе бьгьрин чахе бьбиньн кӧ әw те һьлшандьне. Дь Әʹйантида ӧса жи те гьликьрьне, wәки базьрганед у пʹадшед дьнйайе жь Бабилона Мәзьн «wе дур бьсәкьньн» (Әʹйанти 18:3, 9, 10, 15-17). Жь вьр те кʹьфше, wәки Бабилона Мәзьн тʹәшкиләта политикайе у тʹӧщарәтийе нинә, әв һәйә тʹәшкиләта религийайе.

Диса избаткьрьнәк һәйә кӧ Бабилона Мәзьн, әв һәйә тʹәшкиләта религийайе. Дь Әʹйантида те готьне, кӧ әw «бь сербазийа» һʹәму мьләта дьхальфинә (Әʹйанти 18:23). Һʹәму щурʹед сербазийе жь щьна нә, ләма жи әʹщебмайи нинә кӧ Кʹьтеба Пироз ль сәр «Бабилона Мәзьн» дьбежә «щи-wар, мьскʹәне щьна» (Әʹйанти 18:2; Qануна Дӧщари 18:10-12). Әв тʹәшкиләт ӧса жи мьqабьли һʹәбандьна рʹаст дәрдькʹәвә, у пәй «пʹехәмбәр у щьмәʹта Хwәде» дькʹәвә (Әʹйанти 18:24). Бабилона Мәзьн һаqас зәʹф һʹәбандьна рʹаст нәфрʹәт дькә, кӧ бь зӧлми пәй «шәʹдед Иса» дькʹәвә у һәла wана дькӧжә жи (Әʹйанти 17:6). Ча те кʹьфше, жьн бь наве Бабилона Мәзьн, те һʹәсабе тʹәшкиләта һʹәбандьна qәлпә һʹәмдьнйайе, демәк һʹәму религийед кӧ мьqабьли Йаһоwа Хwәде дәрдькʹәвьн.