Әм Гәрәке Чаwа бьн, Һьндава Wи Мәрьви йе кö жь Щьвате Дәрхьстьнә

Чахе мәрьве мә йан жи һәвале мәйи незик, гöнед хwә тʹобә накә у wи жь щьвате дәрдьхьн, дьле мә гәләк дешә. Ле чахе әм qәбул дькьн рʹебәрийа жь Кʹьтеба Пироз дәрһәqа дәрхьстьна жь щьвате, әм бь ве йәке дьдьнә кʹьфше, wәки Йаһоwа гәләк һʹьз дькьн у wирʹа амьн ьн.a Wәрә әм хәбәр дьн дәрһәqа һьнә пьрса, йед кö ван дәрәщава гьредайи нә.

Әм гәрәке чаwа бьн, һьндава wи мәрьви йе кö жь щьвате дәрхьстьнә? Кʹьтеба Пироз дьбежә: «Һун тʹәви wи нәбьн, йе кö наве хwәденасийе сәр ә, ле qав ә, тьма йә, пʹутпʹарьст ә, бöхданбеж ә, сәрхwәш ә, йан жи тʹаланкьр ә. Тʹәви йе öса һʹәта нен жи нәхwьн!» (1 Корьнтʹи 5:11). Дәрһәqа wи мәрьви кö «нава һинкьрьна Мәсиһда наминә», әм гьлийе öса дьхуньн: «Һун wи qәбул нәкьнә малед хwә у сьлаве нәдьнә wи. Чьмки кʹи сьлаве бьдә wи, әw тʹәви кьред wийә хьраб дьбә» (2 Йуһʹәнна 9-11). Әм хәбәр надьн тʹәви мәрьвед кö щьвате дәрхьстьнә, нә дәрһәqа пьрсед рʹöһʹани, нә жи дәрһәqа тьштед дьн. Дь «Бьрща Qәрәwьлийеда», йа сала 1981, 15 Илоне ль сәр рʹупʹела 25, һатийә готьне: «Һәрге тö кәсәки сьлав ки жи, әв дькарә бьбә гава пешьн, wәки дәстпеки тʹәви wи бькʹәви хәбәрдане йан жи һәвалтийе бьки. Гәло һежа йә wәки әм гава пешьн дайньн, wәки незики wи мәрьви бьн кö жь щьвате дәрхьстьнә?»

Гәло әʹсәйи йә, һʹәму алийава хwә дури ван мәрийа бьгьрьн? Бәле әʹсәйи йә, у сәва ве йәке чәнд мәʹни һәнә. Йа пешьн, бь ве йәке әм амьнийа хwә һьндава Йаһоwа у Хәбәра wи дьдьнә кʹьфше. Әм гöрʹа Хwәде дькьн нә тʹәне чахе мәрʹа һеса йә, ле öса жи чахе чәтьн ә. Һʹьзкьрьна һьндава Хwәде мә һелан дькә wәки һʹәму тʹәмийед Хwәде бьqәдиньн, чьмки әм фәʹм дькьн кö әw Хwәдайе һәq у бь һʹьзкьрьн ә у qанунед wи кʹарәкә мәзьн дьдьнә мә (Ишайа 48:17; 1 Йуһʹәнна 5:3). Йа дöда, чахе әм хwә жь wи мәрьви йе кö тʹобә накә, дур дьгьрьн, бь ве йәке әм хwә у щьвате алийе рʹöһʹанида у намусийеда хwәй дькьн у наве щьвате баш те хwәйкьрьне (1 Корьнтʹи 5:6, 7). Йа сьсийа, чахе әм хwә qәwи ль принсипед Кʹьтеба Пирозва дьгьрьн, әв йәк дькарә кʹаре wи мәрьвирʹа жи бинә йе кö жь щьвате һатийә дәрхьстьне. Кʹи кö аликʹарийа рʹуспийа инкʹар дькьр, дькарә пʹошман бә бона кьред хwә, чахе бьвинә кö әм жи пьштгьрийа сафикьрьна кʹома рʹуспийа дькьн. Чахе әw öнда дькә һәләqәтийа хwәйә баш тʹәви wан мәрийа кʹижана кö әw һʹьз дькә, әв йәк али wи дькә кö сәр һʹьше хwәда бе у фәʹм бькә кö гöне wи чьqас гьран ә, у паше жи wе qәwате бьдә хәбате, wәки диса вәгәрʹә бал Йаһоwа Хwәде (Луqа 15:17).

Һәрге мәрьве кö жь щьвате дәрхьстьнә мәрьве мә йә. Дь ве дәрәщеда амьнийа мә һьндава Йаһоwа Хwәде у qанунед wи дькарә бе щерʹьбандьне, чьмки һәләqәтийа нәфәред мале гәләк незик ә. Ле гәло әм гәрәке чаwа бьн һьмбәри мәрьве хwә кʹижан кö жь щьвате дәрхьстьнә? Әм нькарьн ньһа дәрһәqа һʹәму дәрәща хәбәр дьн йед кö дькарьн пешда бен, ле wәрен әм бона дö дәрәща хәбәр дьн.

Һәрге нәфәре мале йе кö жь щьвате дәрхьстьнә тʹәви wә дьжи, wи чахи һун дькарьн бона тьштед һәр рʹожи тʹәви wи хәбәр дьн, чьмки әв нәфәра малбәте йә. Ле һәләqәтийа wәйә рʹöһʹани тʹәви wи гәрәке тʹöнә бә. Чьмки чахе әwи гöнә кьр, бь ве йәке әwи хwәха һәләqәтийа хwәйә рʹöһʹани тʹәви малбәте qәтанд. Мәсәлә, һәрге малбәт тʹоп дьбә wәки qöльхкьрьна тʹәви малбәте дәрбаз кьн у әw мәрьве кö жь щьвате һатийә дәрхьстьне ль wе дәре йә, әw нькарә тʹәви шеwьркьрьне бә. Ле һәрге әwе кö жь щьвате һатийә дәрхьстьне зарʹа нәгьһишти йә, де-бав борщдар ьн wәки бәрдәwан кьн зарʹа хwә ширәт кьн у һин кьн. Ләма жи изьна де-бава һәйә, кö тʹәви зарʹа хwә һинбуна Кʹьтеба Пироз дәрбаз кьн (Мәтʹәлок 6:20-22; 29:17).b

Чахе йәк жь нәфәре мале, кö жь щьвате һатийә дәрхьстьне башqә дьжи, әw ида дәрәщәкә майин ә. Щарна öса дьqәwьмә, кö пьрсед бона мале гәрәке тʹәви wи сафи кьн. Wи чахи гәрәке чьqас дькарьн тʹәви wи кьн хәбәр дьн. Нәфәред малбәтейә амьн, мәʹнийа нагәрʹьн wәки хәбәр дьн тʹәви wи мәрьве хwә, йе кö жь щьвате һатийә дәрхьстьне у башqә дьжи. Ле дәwсе, әwана пьштгьрийа ван тʹәмийа дькьн, йед кö тʹәви пьрса дәрһәqа дәрхьстьна жь щьвате гьредайи йә. Чьмки әwана һьндава Йаһоwа у тʹәшкиләта wи амьн ьн. Әw йәк бона кʹара wи мәрьве гöнәкʹар ә жи, чьмки бь wе әw wе бькарьбә хwәрʹа жь ве щәзакьрьне дәрсе һьлдә (Ибрани 12:11).c