Фьраксийед Хуне у Операси

Фьраксийед хуне. Фьраксийед хуне һьлдьдьн жь чар компонентед хуне: Жь еритросита, лейкосита, тромбосита у плазма. Мәсәлә, дь еритроситда һәйә протеин, һемоглобин. Әw препаратед кö жь һемоглобина мәрьва йан жи жь һемоглобина һʹәйwана һьлдьдьн, тенә хәбьтандьне чахе мәрьв гәләк хун öнда дькә йан жи чахе анемийа wийә гәләк qәwи һәйә.

Плазма 90 сәләф ав ә, дь плазмеда гәләк һормон һәнә, хwейед нәорганик, пʹермент у тьштед хöрәк (хöрдәмәни), öса жи тьштед минерал у шәкьр. Плазмеда öса жи һәнә факторед öса, йед кö хуне тир дькьн, антибәдән, йед кö али организме дькьн кö бькарьбьн тʹәви нәхwәшийа шәрʹ бькьн, öса жи протеинед öса һәнә, ча албумин. Мәсәлә, бона qәнщкьрьна һьнә нәхwәшийа һʹәким дькарьн нәхwәшрʹа кʹьфш кьн инексийед гама-глобулине, йе кö һьлдьдьн жь плазма wан мәрийа, имунитета кʹижана кö һьндава ве нәхwәшийе qәwи йә. Жь ләкосита һьлдьдьн интерферона у интерлейкина, йед кö дьдьнә хәбате wәʹде һьнә вирусед инфексийайи у wәʹде qәнщкьрьна нәхwәшийа кöла һʹәвпʹәнщә (рак).

Гәло Мәсиһи дькарә бьдә хәбате препаратед öса дь кʹижанада һәнә фьраксийед хуне? Кʹьтеба Пироз щаба ве пьрсе конкрет надә. Ләма жи, Мәсиһи гәрәке хwәха сафи кә кö чь щурʹәйи бькә, чьмки бона кьред хwә әw wе бәр Хwәде щабдар бә. Һьнә мәсиһи препаратед öса инкʹар дькьн, дь кʹижанада һәнә фьраксийед хуне. Чьмки әwана заньн кö qануна Хwәде, жь Исраелийа дәʹwа дькьр wәки хуне бьрʹежьн «ль сәр әʹрде» (Qануна Дöщари 12:22-24, ПКʹМ). Ле һьнәк дьбәкә инкʹар кьн хуне у чар компонентед хуне бәри хwә дьн, ле әwана дькарьн qайил бьн бьдьн хәбате wан препарата, дь кʹижанада йәк жь фьраксийа һәнә. Әwана дьбәк дьфькьрьн, кö әв фьракси йе кö жь бинбәрәки һатә һьлдане, ида найе һʹәсабе әʹмьре wи бинбәри.

Чахе тö сафи дьки фьраксийед хуне бьди хәбате йан на, пьрсед öса бьдә хwә: «Әз фәʹм дькьм, кö һәрге әз һʹәму фьраксийед хуне инкʹар кьм, әw те һʹәсабе кö әз wан һьнә препарата жи инкʹар дькьм, йед кö имунитете qәwи дькьн у аликʹарийе дьдьн кö хун тир бә? Әз дькарьм һʹәкимрʹа шьровәкьм, кö чьрʹа әз qайил набьм йан жи qайил дьбьм бьдьмә хәбате йәк йан жи һе зедә фьраксикә хуне?»

Операси. Wәʹде операсийе дьдьнә хәбате һемодилйусийа у ренфузийа. Wәʹде һемодилйусийе, хуне жь организме wәʹдәлу дәрдьхьн у дәwсе препарата öса бәрдьдьне чь кö хуне зедә дькә, паше жи әве хуна wийә дәрхьсти бәрʹдьдьн, wәки пашда бькʹәвә бәдәне. Чахе ренфузийе дьдьнә хәбате, әw хуна кö wәʹде операсийе öнда дьбә, тʹоп дьбә у пашда wәдьгәрʹә бәдәна мәрьве нәхwәш. Хуна кö жь брине һатә һьлдане тʹәмьз дьбә йан жи те филтьркьрьне, у паше пашда wәдьгәрʹә бәдәна мәрьве нәхwәш. Һәр һʹәкимәк бь щурʹе хwә әве метʹоде дьдә хәбате. Ләма жи Мәсиһи гәрәке һаш жь һʹәму тьшти һәбә, кö һʹәкиме wи wе чь бькә.

Чахе сафи дьки бьди хәбате ван проседура, пьрсед öса бьдә хwә: «Һәрге пʹарәк жь хуна мьн, жь бәдәна мьн дәрхьн у сиркулийасийа хуне һьнә wәʹдә бе сәкьнандьне, wи чахи исафа мьн wе изьне бьдә мьн, wәки әwе хуне диса һʹәсаб кьм пʹарәк жь бәдәна хwә,у мәщбур нәбьм кö ве ‹ль сәр әʹрде бьрежьм?›» (Qануна Дöщари 12:23, 24, ПКʹМ). «Һәрге wәʹде проседура һʹәкимтийе пʹарәк жь хуна мьн бе һьлдане, һьнә тьшт бе гöһастьне, у паше пашда бәри бәдәна мьн дьн, гәло исафа мьн кʹижан кö бь Кʹьтеба Пироз һатийә һинкьрьне wе мьн бьчәрчьринә? Әз фәʹм дькьм кö һәрге инкʹар кьм һʹәму проседуред һʹәкимтийе wәʹде кʹижани кö хуна мьн те хәбьтандьне, әw те һʹәсабе кö инкʹар дькьм тʹәсмил кьм хуна хwә бона анализе, һемодиализе йан хәбьтандьна апарата öса йед кö сиркуласийа хуне дькә?»

Мәсиһи гәрәке хwәха сафи кә, кö wәʹде операсийе хуна wи ча бьдьнә хәбате. Öса жи бона анализа у wан метʹодед qәнщкьрьне wәʹде кʹижана һьнә хун жь организм һьлдьдьн дьбәк тьштәки дьгöһезьн у пашда бәри ви дьдьн, һәр кәс гәрәке хwәха сафи кә.