ПʹАРА 8
Щьмәʹта Исраел Дькʹәвә Кәнане
Йешу Исраелийа дьбә, ԝәки Кәнане зәфт кьн. Йаһоԝа ԛәԝате дьдә һʹакьма, ԝәки әԝана щьмәʹте жь чәрчьрандьне хьлаз кьн
ԜӘКӘ 470 сал пешийа ԝе йәке кӧ щьмәʹта Исраел бькʹәта Кәнане, Йаһоԝа соз да Бьраһим ԝәки әʹрде Кәнане бьдә зӧрʹәтед ԝи. Пе сәрԝертийа Йешу, щьмәʹта Исраели ида һазьр бун Әʹрде Создайи зәфт кьн.
Хԝәде һʹәсаб дькьр, ԝәки щьмәʹта Кәнане һежайи ԛьрʹкьрьне йә. Чьмки ԝана, әʹрд пе бенамусийа хԝәйә мьрʹдарʹ у бь хунрʹетьна кʹафьри тʹьжә кьрьбу. Ләма жи Хԝәде дьхԝәст, ԝәки бажаред Кәнане кӧ Исраелийа зәфт кьрьбун, педа бьһатана ԛьрʹкьрьне.
Пешийа ԝе йәке кӧ бькʹәвьнә Кәнане, Йешу дӧ щәʹсус шандьн Әриһайе. Әԝана щәм жьнәке ман, наве ԝе Рʹәхаб бу. Рʹәхабе заньбу ԝәки әԝана Исраели нә, ле йәкә әԝана мала хԝәда һиштьн у вәшартьн. Әԝе Хԝәдайе Исраелийа баԝәр дькьр, чьмки әԝе бьһистьбу ча Йаһоԝа щьмәʹта хԝә хьлаз кьрийә. Рʹәхабе әв щәʹсус данә сонде, ԝәки ԝәʹде шәрʹ, ԝе у нәфәред ԝе сах бьһельн.
Чахе щьмәʹта Исраел кʹәтә Кәнане у мьԛабьли Әриһайе чу, Йаһоԝа кʹәрәмәт кьр, диԝаред Әриһайе һьлшийан у жорда һатьн, әскәред Йешу кʹәтьнә шәһәр у Әриһа шәԝьтандьн. Ле Рʹәхаб у нәфәред ԝе сах һиштьн. Йешу нава шәш салада, Әʹрде Создайи ниве зәʹф зәфт кьр. Паше әʹрд нав бәрәкед Исраелийа һатьбу пʹарәвәкьрьне.
Чахе Йешу ида кал бу, әԝи щьмәʹта Исраел тʹоп кьр у кьрә бира ԝан, ԝәки Йаһоԝа чь кьрийә сәва кал-бавед ԝан. Паше ширәт да ԝан, ԝәки әԝана Хԝәдайе хԝә Йаһоԝарʹа хьзмәт кьн. Ле йәкә, паши мьрьна Йешу у рʹуспийед дьн, щьмәʹта Исраел бир кьр Хԝәдейе хԝә, у дәстпекьр хӧданед ԛәлпрʹа хьзмәт кә. Ԝәкә 300 сала, щьмәʹте гӧһ нәдьда ԛанунед Хԝәде, ләма жи Хԝәде нава ван салада изьн дьда дьжмьнед Исраелийа, мәсәлә Фьльстийана, ԝәки зоре бьдьнә ԝан. Ле чахе щьмәʹте лавайа Хԝәде дькьр сәва аликʹарийе, Хԝәде һʹакьм кʹьфш кьрьн, әԝ бь тʹәмами 12 һʹакьм бун, сәва кӧ щьмәʹте хьлаз кьн.
Дәрһәԛа һена һʹакьма кʹьтеба Һʹакьмтида те гьликьрьне. Һʹакьме пешьн Отнийел бу, ле йе пашьн Шьмшон, йе кӧ ль сәр әʹрде жь гьшка ԛәԝаттьр бу. Ԛәԝьмандьн, дәрһәԛа кʹижани кӧ кʹьтеба Һʹакьмтида те гьликьрьне, диса щарәке избат дькә, кӧ гӧһдарикьрьн Йаһоԝарʹа кʹәрәма тинә, ле нәгӧһдарикьрьн кӧл-дәрда.
—Сәр һʹиме кʹьтебед Йешу; Һʹакьмти; Ԛануна Кʹаһинтийе 18:24, 25.