Рʹәхабе Йаһоwа Баwәр кьр

Бьдә һʹәсабе хwә кö әм дь шәһәре Әриһайеда нә. Әв шәһәр дь әʹрде Кәнанеда нә. Дь ви шәһәрида мәрьв Йаһоwа баwәр накьн. У кʹöлфәт бь наве Рʹәхаб жи, ль вьр дьжи.

Чахе Рʹәхаб һе зарʹ бу, әwе бьһистьбу сәрһатийа дәрһәqа wе йәке кö чаwа Муса, Бәʹра Сор кьрә дö пʹара, у щьмәʹта Исрайеле жь Мьсьре дәрхьст. Әwе öса жи бьһистьбу wәки ча Йаһоwа али Исрайелийа дькьр, кö дь шәрʹада дьжмьнед хwә алт кьн. Ле ньһа әw дьбьһе кö Исрайели незики Әриһайе щиwар бунә!

Еварәке дö Исрайели кʹәтьнә шәһәре Әриһайе, wәки дьзикава әв шәһәр бьньһерʹьн. Мәрьвед öса, тенә навкьрьне щәʹсус. Әwана һатьнә мала Рʹәхабе. Әwе wана тʹәглиф кьр, сәва кö дь мала wеда бьсәкьньн. Еваре, пʹадше Әриһайе пеһʹәсийа кö щәʹсус дь шәһәрда ньн, у әwана дь мала Рәхабеда сәкьнинә. Ләма жи пʹадша һьнә мәри шандьн, wәки wан щәʹсуса бьгьрьн. Ле Рʹәхабе әван щәʹсуса, ль сәр банийа мала хwәйә пәʹн вәшарт. У wан мәрийарʹа, йед кö пʹадша шандьбу, Рʹәхабе öса гот: ‹Щәʹсус ль вьр бун, ле әwана ида жь шәһәр дәркʹәтьн чун. Һәрге һун ньһа пәй wан кʹәвьн, һуне wана бьгьрьн!› Ле тö зани Рʹәхаб чьрʹа әwан щәʹсуса вәдьшерә?~ Чьмки әw Йаһоwа баwәр дькә, у занә кö Йаһоwа әви әʹрде Кәнане wе бькә дәсте Исрайелийа.

Пешийа кö щәʹсус жь мала Рʹәхабе бьчуна, әwана соз данә wе, кö чахе шәһәре Әриһайе бе һьлшандьне, әwе тʹәви малбәта хwә хьлаз бьн. Ле тö зани щәʹсус чь wерʹа готьн, кö әw бькә?~ Әwана готне: ‹Һьлдә тʹога сор у ль сәр пʹәнщәрʹа мала хwә дарда кә. Һәрге тö öса бьки, һәр кәс кʹи кö wе дь мала тәда бә, wе хьлаз бьн›. Рʹәхабе һʹәму тьшт һәма öса кьр, чаwа кö щәʹсус wерʹа готьбун. Ле тö зани паше чь дьqәwьмә?~

Һьнә wәʹдә дәрбаз бу, у Исрайели дәстпекьрьн дорʹа шәһәр һәрʹьн-бен. Шәш рʹож әwана дорʹа шәһәр рʹоже щарәки дьчун-дьһатьн. Ле рʹожа һʹәфта әwана һʹәфт щар дорʹа шәһәр дьчун-дьһатьн. Һьнге әwана һʹәмуйа тʹәвайи бь дәнге qайим кьрьнә qарʹә-qарʹ. Wе дәме, Йаһоwа диwаред ви шәһәри һьлшандьн. Ле әw мала кö тʹога сор пева гьредайи бу, һьлнәшийа! Ле тö дькари әв йәк ль сәр шькьл бьвини?~ Рʹәхаб у малбәта wе хьлаз бун!

Тö чь дькари жь мәсәла Рʹәхабе һин би?~ Рʹәхаб, Йаһоwа баwәр кьр чьмки әwе дәрһәqа wи гәләк тьштед баш пеһʹәсийа. Тö жи дәрһәqа Йаһоwа гәләк тьштед баш педьһʹәси. Ле тö мина Рʹәхабе баwәрийа хwә Йаһоwа тини?~ Әм заньн, wәки тö һʹәма öса жи дьки!