Сәрһати 46

Диԝаред Әриһайе

ГӘЛО диԝаред Әриһайе жь чь һурдәхԝәши бун? Ӧса те кʹьвше те бежи бомбәки мәзьн тʹәԛандьн. Ле әм заньн кӧ ԝан ԝәʹда нә бомбә нә жи сильһа тʹӧнә бун. Бь рʹастийе әв кʹәрәмәта Йаһоԝа бу! Ԝәрә әм пебьһʹәсьн әв йәк ча ԛәԝьми.

Бьньһерʹә Йаһоԝа чь дьвежә Йешурʹа: «Тӧ тʹәви әскәред хԝәва гәрәке шәш рʹожа, дора ви шәһәри рʹоже щарәки һәрʹи. Сьндоԛа пәймане жи тʹьме гәрәке тʹәви ԝә бә. Ӧса жи пешийа сьндоԛе бьра һʹәфт кʹәшиш һәрʹьн у бь стьруйа борʹийе хьн.

Ле рʹожа һʹәфта һун гәрәке ида һʹәфт щара дора ви шәһәри һәрʹьн. Паше бь дәнге бьльнд борʹийе хьн, у бьра һәр кәс бь дәнге ԛайим бькә ԛарʹә-ԛарʹ. Ԝи чахи Диԝаред Әриһайе ԝе бькʹәвьн у һурдәхԝәши бьн!»

Йаһоԝа ча гот, Йешу у щьмәʹте һәма ӧса жи кьрьн. Ԝәхте әԝана дора шәһәр дьгәрʹийан, һәр кәс жь ԝан дәнге хԝә дәрнәдьхьстьн у ԛә гьлик жи нәдьготьн. Тʹәне дәнге борʹийед у гавед ԝан дьһатә бьһистьне. Дә бьдә һʹәсаве хԝә дьжмьнед щьмәʹта Хԝәде, дь Әриһайеда чьԛас дьтьрсийан. Һәла дина хԝә бьдә ль сәр бәне сор йе кӧ пʹәнщәрева дардакьри йә? Гәло әв мала кʹе йә? Бәле, йа Рʹәхаб ә. Рʹәхаб тʹәви малбата хԝә дь мала ԝеда тʹоп бьбун у дина хԝә дьдан һәла ԝе чь бьԛәԝьмә.

Рʹожа һʹәфта, чахе кʹәшиш у әскәр дора шәһәр ида һʹәфт щара гәрʹийан, ԝана дәстпекьрьн ԛайим борʹийе хьн у бькьнә ԛарʹә-ԛарʹ. Ԝе дәме диԝаред Әриһайе жорда һатьнә хԝаре у һурдәхԝәши бун. Паше Йешу дьвежә: «Һәрʹьн у Һʹәмушка бькӧжьн, шәһәр у һʹәму тьштед ԝан жи бьшәԝьтиньн. Тʹәне зива, зерʹа, сьфьра у һʹәсьне ԝан бьһельн, сәва кӧ ван тьшта бьдьн хьзна коне Йаһоԝа».

Ле дӧ щәʹсусарʹа Йешу дьвежә: «Һәрʹьнә мала Рʹәхаб, кӧ ԝе малбате ԝева жь Әриһайе дәрхьн». Рʹәхаб малбате хԝәва хьлаз бу, демәк созе дӧ щәʹсуса һатә сәри.

Йешуа 6:1-25.