Кʹьламед кӧ жь Бина бәр Хԝәде Һатьнә Ньвисаре

КʹЬТЕБА лапә мәзьн, Кʹьтеба Пирозда әв һәйә тʹопкьрьна кʹьламед пироз. Сәва һазьркьрьне у ньвисара ве кʹьтебе, ԝәкә 1 000 сал лазьм һат. Ве кʹьтеба Зәбурада, гәләк кʹьламед дьлгәрм һәнә, у ӧса жи кʹьламед дәрһәԛа баԝәрийе. Әв кʹьлам дәрбази мә дькьн щурʹә-щурʹә емосийед ԝан мәрийа, йед кӧ әв зәбур ньвисинә. Мәсәлә, нав ԝанда һәнә кʹьламед дәрһәԛа шабуне, рʹазибуне, дӧакьрьне, бәрхԝәкʹәтьне у тʹобәкьрьне. Ча те кʹьфше зәбурбежа итʹбарийа хԝә Хԝәде дьанин, у һәләԛәтийа ԝанә незик тʹәви Хԝәде һәбу. Ԝәрә әм ньһа бьньһерʹьн, ван Зәбурада дәрһәԛа чь те готьне.

Йаһоԝа һʹӧкӧмдаре ԛануни йә, йе кӧ һежа йә ԝәки әм ԝи һӧрмәт кьн у ԝирʹа хьзмәт кьн. Зәбура 83:18-да, әм дьхуньн: «Наве тә Йаһоԝа йә, у ль сәр тʹәмамийа әʹрде йе Һәри Жорьн тʹәне тӧ йи, ДТʹ». Һьнә зәбур, наве Йаһоԝа пироз дькьн сәва әʹфринед ԝи, мәсәлә сәва кʹәрәмәтед тʹәбийәте, стәйркед әʹзмана у әʹфьрандьна бәдәна мәрийа (Зәбур 8, 19, 139, 148). Һьнәк жи Йаһоԝа Хԝәде һӧрмәт дькьн, ча Хԝәдейе кӧ хьлаз дькә у хԝәй дькә ԝан мәрийа, кʹи кӧ ԝирʹа амьн ьн (Зәбур 18, 97, 138). Йед дьн жи Йаһоԝа һӧрмәт дькьн сәва рʹастийа ԝи, чьмки әԝ мәрийа жь чәтьнайа хьлаз дькә, у мәрьвед хьраб жи щәза дькә (Зәбур 11, 68, 146).

Йаһоԝа аликʹарийе у бәрдьлийе дьдә ԝан мәрийа, йед кӧ ԝи һʹьз дькьн. Зәбура 23-да, йе кӧ жь зәбуред дьнена гәләк навдар ә, Даԝьд, Йаһоԝа һьмбәри шьванәки дьлгәрм дькә, йе кӧ рʹебәрийа бәрхед хԝә дькә, ԝана хԝәй дькә у мьԛати ԝан дьбә. Зәбура 65:2 дина мә дьдә сәр ԝе йәке, кӧ Йаһоԝа әԝ Хԝәде йә, «йе кӧ дӧайа дьбьһизә, ИМ». Гәләк жь ԝан мәрийа йед кӧ гӧне гьран кьрьнә, һесабуне у дьлгәрмийе дьвиньн жь Зәбура 39 у 51. Ван Зәбурада те шьровәкьрьне, кӧ Даԝьд жь гӧнед хԝәйи гьран пʹошман дьбә у тʹобә дькә, ӧса жи гӧмана ԝи һәбу, ԝәки Йаһоԝа ԝе бьбахшинә ԝи. Зәбура 55:22 жи мә һелан дькә, ԝәки тʹьме итʹбарийа хԝә Йаһоԝа биньн у һʹәму баред хԝә тʹәсмили ԝи бькьн.

Бь сайа Пʹадшатийа Мәсиһ, Йаһоԝа ԝе һʹале дьнйайе бьгӧһезә. Зәбурада һьнә щийа, дәрһәԛа Мәсиһ, Пʹадшайе создайи һатьнә ньвисаре. Зәбура 2-да ньвисар ә, ԝәки әв Пʹадша ԝе ԛьрʹ кә ԝан мьләта, йед кӧ мьԛабьли ԝи дьчьн. Зәбура 72 дьбежә, ԝәки әв Пʹадша ԝе бьрчибуне, нәрʹастийе у зӧлмийе бьдә һьлдане. Зәбура 46:9-да те готьне, ԝәки Хԝәде ԝе бь сайа Пʹадшатийа Мәсиһ, һʹәму шәрʹа бьдә сәкьнандьне у һʹәму чʹәка жи бьдә һьлдане. Зәбура 37-да жи әм дьхуньн, кӧ мәрьвед зӧлмкʹар ԝе бьмьрьн, ле мәрийед ԛәнщ ԝе ль сәр әʹрде һʹәта-һʹәтайе бьжин у әʹдьлайеда у бәхтәԝарийеда ша бьн.

​—Сәр һʹиме кʹьтеба Зәбур.