Иса Мәсиһ Кӧштьн

ИСА се сал у нив ль сәр әʹрде хьзмәт дькьр у һин дькьр. Әԝи заньбу ԝәки жийина ԝийә ль сәр әʹрде, зутьрәке ԝе хьлаз бә. Сәрԝеред дине Щьһуйа дьхԝәстьн Иса бькӧштана, ле жь щьмәʹте дьтьрсийан, чьмки щьмәʹте баԝәр дькьр кӧ Иса пʹехәмбәр ә. Ԝи чахи Мире-щьна, йәк жь 12 шагьртед Иса, Щьһуда Исхәрйоти, да шашкьрьне, ԝәки әԝ бона 30 зивед кӧ сәрԝеред дине Щьһуйа соз дабун ԝи, нәмамийа Иса бькә.

Рʹожәк пешийа мьрьне, шәв, Иса Мәсиһ тʹәви шагьртед хԝә щәжьна Нане Шкәва дәрбаз дькьр. Чахе Щьһуда дьчә, Иса щәжьна тʹәзә дькә ԛануне, демәк щәжьна Евара Биранина Мьрьна Иса. Ԝи чахи әԝи нан һьлда, дӧа кьр, нан кәр кьр у 11 шагьртед хԝәрʹа бәла кьр у гот: «Әва бәдәна мьн ә, кӧ бона ԝә те дайине. Ве йәке бона биранина мьн бькьн». Паше Иса кʹаса пе шәраве һьлда у гот: «Әва кʹаса пәймана ну йә, пе хуна мьн гьредайи» (Луԛа 22:19, 20).

Ԝе шәве гәләк тьшт һәбун, кʹижан кӧ Иса Мәсиһ дьхԝәст бьгота шагьртед хԝә. Һьнге Иса тʹәмийа тʹәзә да шагьртед хԝә, ԝәки әԝана гәрәке бе тьмайи һәвдӧ һʹьз бькьн, у сәрда гьлийед ӧса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:34, 35). Иса готә ԝан, ԝәки әԝана гәләки бәрхԝә нәкʹәвьн бона ԝан тьштед кӧ гәрәке бьԛәԝьмьн, у паше бь дьл у щан бона ԝан дӧа кьр. Паше, ԝана тʹәвайи кʹьлама пәсьндайине сьтран у чунә ль бахче Гетшәманийе.

Бахче Гетшәманида Иса бәр Хԝәде ль сәр чока бь дьл у щан дӧа кьр. Һьнә ԝәʹдә шунда кʹәшиш тʹәви әскәред чʹәккьри һатьн ль ԝьр. Щьһуда незики Иса бу әԝ рʹамуса, у бь ве йәке нишан да ԝан. Һьнге әскәр Иса гьртьн, ле шагьртед ԝи рʹәвин.

Иса ль бәр диԝана Щьһуйайә мәзьн гот, кӧ әԝ Кӧрʹе Хԝәде йә. Һʹакьма жи әԝ гӧнәкʹар дәрхьстьн, кӧ йанчь әԝ Хԝәде беһӧрмәт дькә, у сафи кьрьн кӧ Иса Мәсиһ һежайи мьрьне йә. Паше Иса бьрьн щәм сәрԝере Рʹоме, Пилато Понтийо. Пилато Исада гӧнәкʹари нәдит, ле бона хԝәстьна щьмәʹте тʹәви ԝан рʹази бу, ԝәки Иса бьдьнә кӧштьне.

Иса бьрьн ль сәр чʹийайе Голгота, кʹидәре кӧ әскәред Рʹоме Иса ль сәр кʹенар мьх кьрьн. Нивро, ль сәр тʹәмамийа әʹрде ньшкева бу тәʹри. У чахе Иса Мәсиһ мьр, әʹрд ԛайим һʹәжийа. Щьнйазе Иса кьрьнә шкәфте. Рʹожәкә дьн кʹәшиша шкәфт мор кьрьн, у әскәред нобәдар данә бәр. Ле Хԝәде, Кӧрʹе хԝә Иса тʹьрбеда нәһишт. Әԝи кʹәрәмәтәкә мәзьн кьр.

​—Сәр һʹиме кʹьтебед Мәтта сәре 26 у 27; Марԛос сәре 14 у 15; Луԛа сәре 22 у 23; Йуһʹәнна сәре 12 һʹәта 19.