Диса жи Әʹрд Ԝе Бьбә Щьнәт!

КʹЬТЕБА пашьн жь Кʹьтеба Пироз, наве кʹижани кӧ Әʹйанти йан Апокалипсис ә, шагьрте Иса Мәсиһ, Йуһʹәнна ньвисийә. Әв кʹьтеб гӧмане дьдә һʹәму мәрийа. Ве кʹьтебеда һатьнә ньвисаре дитьнок, йед кӧ кʹьфш дькьн пеканина ԛьрара Йаһоԝайә кʹӧтасийе.

Исайе сахбуйи, дитьнока пешьнда, пʹайе һьнә щьвата дьдә, у ӧса жи дьбежә кӧ чьда әԝана гәрәке рʹаст бьн. Дитьнокәкә дьн, дина мә дәрбази сәр тʹәхте Хԝәдейи әʹзмана дькә. Дора тʹәхте әʹзмана чарнькал, әʹфринед рʹӧһʹани сәкьнинә, йед кӧ Хԝәде һӧрмәт дькьн.

Бәрх, Иса Мәсиһ, кʹьтеба гӧломәтккьри дьстинә бь һʹәфт мора. Дәма дәрхьстьна чар море пешьн, ль сәр дькʹа дьнйайе кʹьфш дьбә чар сийаред симболик. Сийаре пешьн, йе сәр һәспе боз, Иса йә у мина Пʹадша йә. Пәй ԝирʹа тен сийаред сәр һәспед бь щурʹә-щурʹә рʹәнга, әв сийар тенә һʹәсабе: шәрʹ, хәлайи у нәхԝәши, йед кӧ нава рʹожед ахьрийа ве дьнйайе ԝе бьԛәԝьмьн. Ԝәʹде дәрхьстьна мора һʹәфта, дәнге һʹәфт борийа тен бьһистьне, йед кӧ әʹламәтийа диԝана Хԝәде дьдьн. Паше тен рʹетьне һʹәфт бәлайед симболик, кӧ һерса Хԝәде дьдьнә кʹьфше.

Зарʹа неринә тʹәзәбуйи, те һʹәсабе Пʹадшатийа Хԝәде, йа кӧ ль сәр әʹзмана кʹьфш буйә. Ԝедәре дәстпедьбә шәрʹ, Мире-щьна у мәләкед ԝийи зӧлм тенә авитьне сәр әʹрде. Жь әʹзмана дәнге бьльнд те бьһистьн: «Ԝәй ль әʹрде у ль бәре, чьмки Мирещьн жорда сәр ԝәда һатә авитьне у әԝ жь һерсе хԝә дьхԝә, кӧ занә ԝе һьндьки бьминә» (Әʹйанти 12:12).

Сәр әʹзмана, Йуһʹәнна Бәрх дьвинә, демәк Иса, у тʹәви ԝи 144 000 жь мәрийа бьжарти. Әва әԝ ьн, йед кӧ ԝе тʹәви Иса Мәсиһ пʹадшатийе бькьн. Бь ви щурʹәйи кʹьтеба Әʹйанти нишан дькә, ԝәки 144 000 жь мәрийа бьжарти, әв һәнә зӧрʹәта дӧда (Әʹйанти 14:1; 20:6).

Пʹадшед әʹрде тенә тʹопкьрьне сәр «шәрʹе ԝе Рʹожа Мәзьнә Хԝәдейе Һʹәму Зорайийе», наве ви шәрʹи Һармәгәдон ә. Пʹадшед әʹрде шәрʹ дькьн тʹәви сийаре сәр һәспе боз, демәк тʹәви Иса, кʹижан кӧ рʹебәрийе әскәред әʹзмана дькә. Һʹәму пʹадшед ве дьнйайе һатьнә ԛьрʹкьрьне, ле Мире-щьна һатә гьредане. Иса у 144 000 сәрԝертийе дькьн ль сәр әʹрдерʹа «һʹәзар сали», у хьлазийеда Мире-щьна ԝе сәр һʹәта-һʹәтайе бе кʹӧтакьрьне (Әʹйанти 16:14; 20:4).

Пʹадшатийа Мәсиһ у 144 000, йед кӧ ԝе тʹәви ԝи һʹәзар сала пʹадшатийе бькьн, чь ԝе бинә мәрьвед гӧһдаррʹа? Йуһʹәнна дьньвисә, ԝәки Йаһоԝа «жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4). Сәр әʹрде ԝе диса щьнәт бә!

Ӧса кʹьтеба Әʹйантида хьлаз дьбә тʹема Кʹьтеба Пирозә фәрз. Бь сайа ве Пʹадшатийе, ԝе һʹәта-һʹәтайе наве Йаһоԝа пироз бә у һьмзорийа ԝи ԝе бь тʹәмами избат бә!

​—Сәр һʹиме кʹьтеба Әʹйанти.