Qьрара Хwәде сәва әʹрде чь йә?

1. Чьрʹа Хwәде әʹрд әʹфьрандийә?

Әʹрд һәйә мала мә. Чахе Йаһоwа Хwәде жьн-мере пешьн әʹфьранд, әwи wана ль сәр әʹрде щиwар кьр, нә кӧ ль сәр әʹзмана. Ле ль сәр әʹзмана Хwәде мьлйакʹәт әʹфьрандьн, кӧ ль wьр бьжин (Ибо 38:4, 7). Йаһоwа Хwәде ль сәр әʹрде бахчәки бәдәw бь наве Адән чекьр, сәва кӧ Адәм ль wьр бьжи (Дәстпебун 2:15-17). Йаһоwа һʹәму тьшт ӧса чекьр, wәки Адәм у зӧрʹәтед wи ль сәр әʹрде дь бәхтәwарийеда һʹәта-һʹәтайе бьжин. Бьхунә Зәбур 37:29; 115:16.

Мәрьвед пешьн бь зӧрʹәтед хwә әʹрд гәрәке тʹьжә кьрана. Паше wана гәрәке тʹәмамийа әʹрде мина бахче Адәне бәдәw кьрана у бькьрана щьнәт (Дәстпебун 1:28). Әʹрд тʹӧ щар wе нәйе һьлшандьне. Мәрьв һәр гав wе ль сәр бьжин. Бьхунә Зәбур 104:5.

Видео: Чьра Хwәде Әрд Әфьрандийә?

2. Чьрʹа ньһа әʹрд щьнәт нинә?

Адәм у Һеwайе гӧрʹа Йаһоwа Хwәде нәкьрьн, ләма жи Йаһоwа әwана жь щьнәте дәрхьстьн. Щьнәт һатә ӧндакьрьне, иди тʹӧ кәси нькарьбу әʹрд бькьра щьнәт. Дь Кʹьтеба Пирозда те готьне «дьне данә дәсте хьраба» (Ибо 9:24). Бьхунә Дәстпебун 3:23, 24.

Ле гәло qәwата Йаһоwа нагьһиже, wәки qьрара хwә дәрһәqа инсанәте бинә сәри? Тʹӧ тьштед ӧса кӧ Йаһоwа нькарьбә бькә тʹӧнә, чьмки әw Хwәдайе Һьмзор ә (Ишайа 45:18). Хwәде wе һʹәму тьштед кӧ сәре-сәрида дабу мәрийа wе диса wанарʹа вәгәрʹинә. Бьхунә Зәбур 37:11, 34.

3. Әʹрд ча wе бьбә щьнәт?

Чахе Иса дь Пʹадшатийа Хwәдеда пʹадшатийе бькә, әʹрд wе диса бьбә щьнәт. Дь нав шәрʹе Һармәгәдонеда Иса тʹәви мьлйакʹәтед Хwәде, wе qьрʹа wан һʹәму мәрийа кʹи кӧ мьqабьли Хwәде дәрдькʹәвә, бинә. Паше Иса wе Шәйтʹан 1 000 сали бавежә кәле. Дь ви шәрʹида щьмәʹта Хwәде wе хьлаз бә, чьмки Иса wе рʹебәрийе wан бькә у wана хwәй кә. Әwана дь щьнәтеда ль сәр әʹрде wе һʹәта-һʹәтайе бьжин. Бьхунә Әʹйанти 20:1-3; 21:3, 4.

4. Кӧл-дәрд кʹәнге wе хьлаз бьн?

Дьбәк тӧ жи дьшьрмиш дьби, гәло зӧлми ль сәр әʹрде һʹәта кʹәнге wе һәбә? Иса мәрʹа «нишан» һиштьн, бь сайа чь жи әм иро дькарьн те дәрхьн хьлази wе кʹәнге бе. Иро һʹале дьнйайе ӧса хьраб ә кӧ һәгәр дьреж бькʹьшинә, мәрьв wе ида нькарьбьн ль сәр әʹрде бьжин. Әв йәк диса жи мәрʹа избат дькә, кӧ ньһа әм рʹасти жи дь wәʹде «ахьрийа» ве дьнйайеда дьжин. Бьхунә Мәтта 24:3, 7-14, 21, 22.

Wәʹде пʹадшатийа Исайә 1 000 салийе, әwе кʹӧтасийа һʹәму кӧл-дәрда бинә (Ишайа 9:6, 7; 11:9). Wәʹде пʹадшатийа хwә, Иса wан мәрийа кʹи кӧ Хwәде һʹәз дькә, wе жь гӧнә тʹәмьз кә. Ӧса Хwәде бь Иса һʹәму нәхwәши, калбун-пирбун у мьрьне wе бьдә һьлдане. Бьхунә Ишайа 33:24; Әʹйанти 21:4.

5. Кʹи wе дь щьнәтеда бьжи?

Кʹи кӧ гӧрʹа Хwәде дькә, wе дь щьнәтеда бьжи (1 Йуһʹәнна 2:17). Иса шьхӧл да шагьртед хwә, wәки әwана мәрьвед мьлук бьбиньн у һин кьн wана, ча бьбьнә мәрьвед ӧса, йед кӧ Хwәде хwәш тен. Иро Йаһоwа Хwәде бь милйона мәрьва һазьр дькә, wәки әwана дь щьнәтеда ль сәр әʹрде бьжин (Сефанийа 2:3). Шәʹдед Йаһоwа ль сәр щьвата һин дьбьн, чаwа бьбьнә мер у бавед баш, ӧса жи жьн у дайикед баш. Зарʹ у де бав ль сәр щьвата тʹәвайи Хwәдерʹа qӧльх дькьн, у һин дьбьн ча кʹаре бьстиньн жь wан мьзгинийа, йед кӧ әwана педьһʹәсьн. Бьхунә Миха 4:1-4.