Әwана Дәрһәqа Иса Дьньвисин

Тö ван мәрийа сәр шькьл дьвини?~ Әв Мәтта, Марqос, Луqа, Йуһʹәнна, Пәтрус, Аqуб, Щьһуда у Паwлос ә. Әв һʹәму мәри һена Исада дьман. Хенщи wе йәке әwана дәрһәqа Иса дьньвисин. Wәре әм һе зедә дәрһәqа wан мәрийа пебьһʹәсьн.

Һәрсек жь ван мәрийа шагьрт бун, йед кö тʹәви Иса даннасин дькьрьн. Ле тö зани әв һәрсек кʹи бун?~ Мәтта, Йуһʹәнна у Пәтрус. Мәтта у Йуһʹәннайе шанди, рʹьнд Иса нас дькьрьн. У wана һәрда жи, дәрһәqа әʹмьре Иса кʹьтеб ньвисин. Йуһʹәннайе шанди öса жи кʹьтебәк ньвиси бь наве Әʹйанти. Öса жи се нәʹмә бь наве, Йуһʹәннайе Пешьн, Йуһʹәннайе Дöда у Йуһʹәннайе Сьсийа. Ле Пәтрусе шанди дö нʹәмә ньвисин. Нәʹмә бь наве, Пәтрусә Пешьн у Пәтрусә дöда. Дь нәʹма хwәйә дöдада, Пәтрусе шанди ньвиси дәрһәqа wи wәʹдәйи, чахе Йаһоwа жь әʹзмен хәбәр да у дәрһәqа Иса гьлийе öса гот: ‹Әв ә кöрʹе мьн. Әз wи һʹьз дькьм у wирʹа ша дьбьм›. Әв һʹәму нәʹмә йед кö шанди дьньвисин, дь Кʹьтеба Пирозда ньн.

Ле мәрьвед дьн йе кö тö сәр шькьл дьвини, әwана жи дәрһәqа Иса дь кʹьтебед хwәда ньвиси нә. Йәк жь wан мәрийа Марqос ә. Дьqәwьмә чахе Иса гьртьн, Марqос wе дәре бу, у дьдит һʹәму тьшт чь кö дьqәwьми. Ле йе майин Луqа йә. Луqа дохтор бу у дьбәкә паши мьрьна Иса бу Мәсиһи, йан qöльхкʹаре Иса.

Дö ньвискʹаред Кʹьтеба Пирозә дьн жи, кʹижана кö тö ль сәр шькьл дьвини, әwана бьред Исайи щаһьл бун. Тö навед wан зани?~ Навед wан Аqуб у Щьһуда йә. Пешийе wана Иса баwәр нәдькьр. У һәла һе дьшьрмиш дьбун кö әwи һʹьше хwә öндакьрийә. Ле һьнә wәʹдә шунда, wана Иса баwәр кьр у бунә Мәсиһи.

Ле ньвискʹаре Кʹьтеба Пирозә пашьн, йе кö тö ль сәр шькьл дьвини, Паwлос ә. Пешийа кö Паwлос бьбуйа Мәсиһи, наве wи Шаwул бу. Әwи Мәсиһийа нәфрʹәт дькьр у һьндава wан зöлмкʹар бу. Ле тö зани чьма Паwлос хwәст бьбуйа Мәсиһи?~ Щарәке, чахе Паwлос рʹе кʹәтьбу, ньшкева әwи бьһист кö кәсәк тʹәви wи жь әʹзмен хәбәр дьдә. Әв Иса бу! Иса жь Паwлос пьрс кьр: ‹Тö чьма дьзерини wан мәрийа, йед кö мьн баwәр дькьн?› Паши wе йәке Паwлос һатә гöһастьне у бу Мәсиһи. Паwлос 14 кʹьтеб ньвисин, жь Рʹомайи һʹәта Ибрани. Әв кʹьтеб кʹәтьнә нав Кʹьтеба Пироз.

Әм һәр рʹож Кʹьтеба Пироз дьхуньн. Чахе әм Кʹьтеба Пироз дьхуньн, әм гәләк тьшт дәрһәqа Иса педьһʹәсьн. Тö дьхwази дәрһәqа Иса һе зедә пебьһʹәси?~