Тимотʹейо Дьхwәст Али Мәрийа Бькә

Тимотʹейо хортәки щаһьл бу у әw бь шабун али мәрийа дькьр. Әw дькʹәтә рʹе у дьчу гәләк щийа, сәва кö али мәрийа бькә. У жь бо ве йәке әʹмьре wи, гәләк һʹәwас дәрбаз дьбу. Тö дьхwази дәрһәqа әʹмьре Тимотʹейо һе зедә пебьһʹәси?~

Тимотʹейо дь шәһәре Листрайеда мәзьн дьбу. Чахе әw һе зарʹ бу, пирька wи Лойис у дийа wи Әйньке, дәрһәqа Йаһоwа әw һин дькьрьн. Чахе Тимотʹейо мәзьн бу, әwи хwәст али мәрийа бькә wәки әwана дәрһәqа Йаһоwа пебьһʹәсьн.

Чахе Тимотʹейо һе гәләк щаһьл бу, Паwлос wи тʹәглиф кьр кö әw тʹәви wи рʹе кʹәвә у һәрʹә щурʹә щурʹә щийа, сәва кö даннасин бькьн. Тимотʹейо гот: ‹Бәле!› Ча те кʹьфше, Тимотʹейо һазьр бу тʹәви Паwлос бьчуйа у али мәрийа бькьра.

Тимотʹейо тʹәви Паwлос рʹе кʹәт у чу Македонйайе ль шәһәре Тʹесалоники. Әwана гәләк рʹе чун, сәва кö бенә ви щийи, у паше жи бь qәйике дәрбаз бун. Чахе әwана гьһиштьнә щи, дәстпекьрьн али гәләк мәрийа бькьн, wәки дәрһәqа Йаһоwа пебьһʹәсьн. Ле һьнә мәри гәләк ль сәр wан һерс кʹәтьбун, у дьхwәстьн зийане жи бьдана wан. Ләма жи Паwлос у Тимотʹейо жь ви шәһәри дәркʹәтьн у чунә щийед дьн, кö даннасин бькьн.

Чәнд мәһ дәрбаз бун у Паwлос готә Тимотʹейо, кö әw вәгәрʹә шәһәре Тʹесалоники у пебьһʹәсә, wәки һʹале бьра wе дәре чаwа нә. Бь рʹастийе жи мерхаси лазьм бу, wәки диса һәрʹи wи шәһәри, кʹидәре кö дьхwазьн зийане бьдьнә тә! Ле Тимотʹейо йәкә чу ви шәһәри, чьмки әw бәрхwә дькʹәт сәва wан бьра, йед кö дь ви шәһәрида дьман. Чахе Тимотʹейо жь Тʹесалоникийе вәгәрʹийа, әwи мьзгини Паwлосрʹа ани. Демәк һʹале wан бьра йед кö дь Тʹесалоникийада бун, баш бу!

Тимотʹейо гәләк сал тʹәви Паwлос шьхöлкʹари дькьр. Щарәке Паwлос ньвиси, кö Тимотʹейо мәрики гәләк баш бу, у кʹижани кö әwи дькарьбу бьшанда щийа, wәки али щьвата бькә. Тимотʹейо һʹьз дькьр Йаһоwа у öса жи мәрийа.

Ле тö мәрийа һʹьз дьки, у дьхwази али wан бьки кö дәрһәqа Йаһоwа пебьһʹәсьн?~ Һәрге тö öса бьки, wе әʹмьре тә жи мина йе Тимотʹейо, wе гәләк бәхтәwар у һʹәwас бә!