Нәʹма жь Кʹома Рʹебәрийе
Хушк-бьред дәлал:
Чаԝа һун заньн, Кʹьтеба Пирозда гәләк сәрһатийед мәрьва ньвисар ьн. Гәләк жь ԝан хьзмәткʹаред Хԝәде бун, әԝана жи рʹасти чәтьнайа дьһатьн чаԝа әм. Һәстед ԝан хут мина йед мә бун (Аԛуб 5:17). Һьнәк жь ԝана һәла һе дьлтәнг дьбун жь бо чәтьнайа у хәмгинийа. Һьнәки жи дьлтәнг дьбун, чьмки нәфәред ԝан у хушк-бьред ԝанә рʹӧһʹани дьле ԝан дешандьн. Ле һьнәкед дьн дьлтәнг дьбун жь бо гӧне хԝә у жь бо ԝе йәке кӧ хԝә сущдар дькьрьн.
Жь бо ԝан дәрәща һьнә хьзмәткʹар жь Йаһоԝа дур кʹәтьн. Ле гәло ԝана Йаһоԝа бь тʹәмами бир кьр? На. Гәләка жь ԝан хԝә мина зәбурбеж тʹәхмин дькьрьн, әԝи дӧа дькьр: «Мина пәза ӧндабуйи әз хальфим, ԛуле Хԝә бьгәрʹә, әз әʹмьред Тә бир накьм» (Зәбур 119:176). Гәло һәстед ԝи щурʹәйи тӧ жи сәр хԝә тʹәхмин дьки?
Йаһоԝа тʹӧ щар бир накә ԝан хьзмәткʹара, йед кӧ дур кʹәтьнә жь кәрийед пәзед ԝи. Ле дәԝсе Йаһоԝа гази ԝан дькә у бона ԝе йәке баԝәрмәндед дьн дьдә хәбате. Бинә бира хԝә чаԝа Йаһоԝа али хьзмәткʹаре хԝә Ибо кьр, йе кӧ рʹасти гәләк ԛәзийа һат. Әԝ алийе материйалида зьраре кʹәт, мәрьвед хԝәйи незик ӧнда кьр у нәхԝәшийа гьран станд. Хенщи ԝе йәке, әԝ мәрьв йед кӧ гәрәке дьлбини бьдана ԝи, ԝана дьле ԝи пе готьнед туж ешандьн. Рʹаст ә, щарна фькьред нәрʹаст бал ԝи пешда дьһат ьн, ле әԝи диса жи пьшта хԝә нәда Йаһоԝа (Ибо 1:22; 2:10). Чаԝа Йаһоԝа али Ибо кьр, ԝәки диса рʹӧһʹанида бьшьдә?
Йаһоԝа али Ибо кьр бь сайа һәвале ԝи Әлиһу. Чахе Ибо дәрһәԛа кӧл-дәрдед хԝә гьли дькьр, Әлиһу пешийе гӧһ дьда ԝи у паше жи хәбәр дьда. Гәло әԝи чь дьгот? Гәло әԝи Ибо нәһәԛ дькьр? Йан жи сәва кӧ фькьред ԝи рʹаст кә, ԝи дьда шәрме? Гәло Әлиһу хԝә сәр Иборʹа дьгьрт? Тʹӧ щар на! Әлиһу пе ԛәԝата рʹӧһʹе Хԝәдейи пироз, готә Ибо: «А вай, әз жи мина тә ԛуле Хԝәде мә, әз жи жь һʹәрʹийева һатьм ава кьрьн». Паше әԝи Ибо да баԝәркьрьне: «А вай, тоԛина мьн тә безар накә у пәстандьна мьн ль тә гьран найе» (Ибо 33:6, 7). Әлиһу бәр дьле Ибода һат рʹожед ԝийә чәтьнда, нә кӧ дәрде ԝи дьһа гьран кьр, әԝи бь нәрми ширәта ӧса да, кӧ Иборʹа лазьм бу.
Чахе мә әв брошур дьньвиси, мә дьхԝәст, ԝәки рʹӧһʹәки мина рʹӧһʹе Әлиһу ве брошуреда бә. Сәрида мә рʹьнд гӧһ да ԝан хушк-бьра, йед кӧ жь Йаһоԝа дур кʹәтьнә, у әм дәрһәԛа дәрәща у һәстед ԝан кʹур фькьрин (Мәтʹәлок 18:13). Паше мә дина хԝә да Кʹьтеба Пироз у мә дӧа дькьр у дьфькьри сәр ԝе йәке, кӧ чаԝа Йаһоԝа аликʹари дьда хьзмәткʹаред хԝә ԝәʹде бәре, чахе әԝана рʹасти чәтьнайед мина йед мә дьһатьн. У ахьрийе ве брошуреда мә мәсәлед жь Кʹьтеба Пироз у дәрәщед хушк-бьра бәрамбәри һәв кьр. Әм бь дьл у щан тә һелан дькьн ве брошуре леколин бьки. Әм дьхԝазьн һʹьзкьрьна хԝә тәрʹа избат кьн.
Кʹома Рʹебәрийе йа Шәʹдед Йаһоԝа