Паԝлос Дьшиньн Рʹоме

Рʹеԝитийа Паԝлосә сьсийа, Оршәлимеда хьлаз бу. Ԝедәре ԝи гьртьн у кьрьнә кәле. Шәвәке хәԝн-хәйаледа Иса готә ԝи: «Тӧ гәрәке һʹәрʹи Рʹоме у ԝедәре хьзмәт ки». Паԝлос жь Оршәлиме бьрьнә Ԛәйсәрйайе, ԝедәре әԝ дӧ сала кәледа рʹуньшт. Гава диԝана ԝи дькьрьн, Паԝлос Фесто сәрԝеррʹа гот: «Бьра Ԛәйсәр Рʹомеда диԝана мьн бькә». Фесто готе: «Дьхԝази Ԛәйсәр диԝана тә бькә, әме тә бьшиньн бал Ԛәйсәр». Паԝлос кьрьнә гәмийе у шандьнә Рʹоме. Дӧ Мәсиһи, Луԛа у Әристархо жи тʹәви ԝи чун.

Бәʹреда, фьртонәкә ԛайим рʹабу, у гәләк рʹож бәрдәԝам дьбу. Гьшк дьфькьрин, ԝәки ԝе бьмьрьн. Ле Паԝлос готә ԝан: «Мәләк хәԝнеда готә мьн: ‹Паԝлос, нәтьрсә, тӧйе бьгьһижи Рʹоме, у йед кӧ тʹәви тә гәмийеда ньн, әԝе жи хьлаз бьн›. Мерхас бьн! Әме нәмьрьн».

Фьртонә 14 рʹожа кʹьшанд. Ахьрийе әʹрд һатә кʹьфше. Әԝ гьрава Малта бу. Пʹелед бәʹре гәмийе хьст у гәми һурдәхԝәши бу. Ле әԝ 276 мәрьв бе зийан гьһиштьнә дәве бәʹре. Әԝед кӧ нькарьбун хԝә аве хьн, хԝә даред гәмйева дьгьртьн у бәрбь гьраве дьчун. Мәрьвед гьрава Малтайе гәләк дьлгәрм ԝана ԛәбул кьрьн у кӧчʹьк ԝанарʹа вехьстьн, ԝәки әԝана гәрм бьн.

Се мәһа шунда, әскәра Паԝлос пе гәмикә дьн бьрьнә Рʹоме. Рʹомеда бьра һивийа Паԝлос бун. Гава Паԝлос чʹәʹв ԝана кʹәт, әԝ гәләк жь Йаһоԝа рʹази бу у бь мерхасийе тʹьжә бу. Рʹаст ә Паԝлос гьрти бу, ле изьн дабунә ԝи, ԝәки маләкеда бьжи, кʹидәре әскәрәки нобәдарийа ԝи дькьр. Әԝ дӧ сала ԝедәре ма. Чахе мәрьв дьһатьн тʹәсәлийа ԝи бькьн, әԝи дәрһәԛа Пʹадшатийа Хԝәде у Иса Мәсиһ ԝанарʹа гьли дькьр. Ӧса жи әԝи щьватед Асйа Бьчʹук у йед Щьһустанерʹа, нәʹмә дьньвисин. Бь сайа Паԝлос, Йаһоԝа мьзгинийа хере һʹәму мьләтарʹа бәла кьр.