ДӘРС 11

Бь Дьл у Щан Хәбәр Дә

(Рʹомайи 12:11)

ФЬКЬРЕД СӘРӘКӘ: Бь дьл-щан хәбәр дә, у ӧса гӧһдаред хԝә һелан кә, ԝәки һʹәԝаса ԝан пешда бе.

ӘВЕ ЙӘКЕ ЧАԜА БЬКЬН:

Бь Дьл Һазьр бә. Пешийа кӧ пе тʹема хԝә дәрейи, кʹур бьфькьрә дәрһәԛа ԝе йәке, кӧ әʹламәтийа тә чьда фәрз ә. Рʹьнд хԝә һазьр кә, тʹемайе леколин кә, у ӧса ԝе тәрʹа һеса бә, бь дьл хәбәр ди.
Дәрһәԛа гӧһдаред хԝә бьфькьрә. Бьфькьрә, ԝәки чаԝа әԝ әʹламәтийа кӧ тӧйе бьхуни йан һин ки, дькарә мәрийарʹа кʹаре бинә. Тʹема хԝә ӧса шьроԝәкә, кӧ рʹазибуна гӧһдаред тә һьндава ве йәке даһа пешда бе.
Һәстед хԝә тʹемайеда әʹйан кә. Бь дьл у щан хәбәр дә. Сәва бькарьби һәстед хԝә тʹемайеда әʹйан ки, ԝе баш бә ԝәʹде хәбәрдане дәсте хԝә ӧса бьви бини, кӧ әв тʹәбйәти бә у бәшәра хԝә жи лайиԛ бьдә кʹьфше.

Бьра тәрʹа нәбә хәйсәт, ԝәки гәләк щар тʹәне бь щурʹәки дәстед хԝә бьви-бини, чьмки әв йәк дькарә дина гӧһдара дәрбази ль сәр тьштәки дьн кә. Хԝә лайиԛ бьгьрә. Хут ԝи чахи бь дьл у щан хәбәр дә, гава фькьред сәрәкә һин дьки у гӧһдара һелан дьки тьштәки бькьн. Фәсал бә, ԝәки ԝәʹде тʹемайе, емосийед хԝә гәләк нәди кʹьфше, чьмки жь бо ԝе йәке гӧһдаред тә дькарьн бьԝәстьн.