Чьрʹа Гәрәке Бь Наве Иса Дӧа Бькьн?

ЧАХЕ Иса сәр әʹрде бу, әԝи гәләк тьшт дәрһәԛа дӧакьрьне һин дькьр. Ԝи чахи сәрԝеред религийа Щьһуйа, һʹьз дькьрьн «мәйданада бьсәкьньн» у дӧа бькьн. Гәло чьрʹа ԝана ӧса дькьр? Сәва «кӧ бәр мәрьва бенә кʹьфше». Бь ве йәке ԝана дьхԝаст, ԝәки мәрьв рʹӧһʹанийа ԝанрʹа фьрнаԛ бьн. Гәләк жь ԝан дӧайед дьреж дьготьн у хәбәра дьԝәкʹьландьн, чьмки ԝана тʹьре, ԝәки бь сайа ве йәке дӧайед ԝан ԝе бенә бьһистьне (Мәтта 6:​5-8). Иса дьхԝаст бьда кʹьфше, кӧ дӧайед ӧса пʹучʹ ьн. Ӧса әԝи али мәрьвед дьлсах кьр, кӧ әԝана бьзаньбьн ԝәки чь щурʹәйи дӧа нәкьн. Ле Иса нә тʹәне ве йәке һин дькьр, кӧ ча гәрәке дӧа нәкьн.

Иса һелан дькьр, ԝәки мәрьв дӧайед хԝәда бьхԝазьн, ԝәки наве Хԝәде пироз бә, Пʹадшатийа Ԝи бе у ԛьрара Ԝи бе сери. Ӧса жи Иса һин дькьр, ԝәки дӧайед хԝәда әм дькарьн дәрһәԛа һʹәԝщед хԝәйә шәхси жи Хԝәдерʹа дӧа бькьн (Мәтта 6:​9-​13; Луԛа 11:​2-4). Бь сайа мәсәла, Иса да кʹьфше, ԝәки чьԛас фәрз ә бәрдәԝам кьн дӧа бькьн, баԝәри у мьлуктийе бьдьнә кʹьфше сәва кӧ дӧайед мә бенә бьһистьне (Луԛа 11:​5-​13; 18:​1-​14). У һәр тьшт чь кӧ Иса һин дькьр, әԝи хԝәха пе кьред хԝә дьани сери (Мәтта 14:23; Марԛос 1:35).

Бешьк бь сайа ширәтед Иса, дӧайед шагьртед ԝи дьһа баш дьбун. Ле шәва пашьн йа жийина хԝәйә сәр әʹрде, Иса дәрһәԛа дӧа шагьртед хԝә һин кьр.

«Ԝәʹдә кӧ Щурʹе Дӧакьрьне Һатә Гӧһастьне»

Ве шәве Иса гәләк ԝәʹдә тʹәви шагьртед хԝәйи амьн хәбәр дьда у ԝана дьшьданд. Әԝ ԝәʹде лайиԛ бу, сәва кӧ тьштәки тʹәзә ԝана һин кә. Иса гот: «Әз ьм, рʹе, рʹасти у жийин». «Тʹәне пе мьн йәк дькарә бе щәм Баве». Паше әԝи созәки ӧса да ԝан: «Пе наве мьн һун чь бьхԝазьн, әзе бькьм, ԝәки Бав пе Кӧрʹ бе рʹумәткьрьне. Һәгәр һун пе наве мьн тьштәки бьхԝазьн әзе бькьм». Хьлазийа хәбәрдане әԝи гот: «Һʹәта ньһа ԝә пе наве мьн тʹӧ тьшт нәхԝәстийә. Бьхԝазьн, һуне бьстиньн, ӧса ԝәки шабуна ԝә тʹәмам бә» (Йуһʹәнна 14:​6, 13, 14; 16:24).

Әԝ хәбәр гәләк фәрз бун. Фәрһәнгәкә Кʹьтеба Пирозда те готьне, ԝәки әԝ бу «ԝәʹдә кӧ щурʹе дӧакьрьне һатә гӧһастьне». Иса нәдьхԝаст бьгота, ԝәки ԝана ида гәрәке ԝирʹа дӧа кьра, нә кӧ Хԝәдерʹа. Дәԝсе әԝи ԝанарʹа рʹекә тʹәзә вәкьр, кӧ ча әԝана дькарьн дьһа незики Йаһоԝа Хԝәде бьн.

Һәмьки, Хԝәде тʹьме дӧайед хьзмәткʹаред хԝәйә амьн дьбьһист (1 Самуйел 1:​9-​19; Зәбур 65:2). Ле чахе Хԝәде тʹәви щьмәʹта Исраеле пәйман гьреда, әԝ мәрьвед кӧ дьхԝастьн, ԝәки Хԝәде дӧайед ԝан бьбьһе гәрәке ԛәбул кьрана, ԝәки щьмәʹта Исраел, щьмәʹта бьжарти йә. Һьнә ԝәхт шунда, һена Сьлеманда ԝана гәрәке ԛәбул кьра, ԝәки ԛӧрбан гәрәке тʹәне пʹарьстгәһа Оршәлимеда бьанийана, чьмки әԝ йәк Хԝәде дәʹԝа дькьр (Ԛануна Дӧщари 9:​29; 2 Дирок 6: 32, 33). Ле әԝ щурʹә һәбандьн ԝәʹдәлу бу. Паԝлосе шанди ньвиси, ԝәки ԛанун кʹижан кӧ Исраелийарʹа һатьбу дайине, ӧса жи ԛӧрбанед кӧ дьанинә пʹарьстгәһе «сийа ԝан тьштед ԛәнщ ә, кʹижанә кӧ тен, ле нә хут мина ԝан йәка йә» (Ибрани 10:​1, 2). Си гәрәке рʹе бьда тьштәкә реали (Колоси 2:​17). Ләма жи жь сала 33 Д.М., һәләԛәтийа тʹәви Йаһоԝа ида хԝәйкьрьна Ԛануна Мусава гьредайи нибу. Дәԝсе, һәләԛәтийа незик тʹәви Йаһоԝа ида ԝи кәсива гьредайи бу, дәрһәԛа кʹижани Ԛануне дьгот, демәк Иса Мәсиһва (Йуһʹәнна 15:14-​16; Галати 3:​24, 25).

Нав, «кӧ жь Һʹәму Нава Бьльндтьр ә»

Иса һʹиме дьһа баш дани, сәва кӧ әм бькарьбьн һәләԛәтийа незик тʹәви Йаһоԝа саз кьн. Әԝ бона мә бу достәки ԛәԝи бь сайа кʹижани рʹе мәрʹа вәбу, сәва кӧ Хԝәде дӧайед мә бьбьһе у щаба дӧайед мә бьдә. Ле чь изьн дьдә Иса, кӧ ве йәке бона мә бькә?

Әм һәмушк жи гӧнәкʹар тенә буйине, ләма жи тʹӧ шьхӧл у ԛӧрбан нькарьн мә жь гӧнә паԛьж кьн у мәщале бьдьн, ԝәки тʹәви Хԝәдайе пироз Йаһоԝа достийе бькьн (Рʹомайи 3:​20, 24; Ибрани 1:​3, 4). Ле Иса әʹмьре хԝәйә кʹамьл бәрва да у мә жь гӧна аза кьр, сәва кӧ әм бькарьбьн ль Хԝәде һәв бен (Рʹомайи 5:​12, 18, 19). У ньһа һәр кәс, кʹе кӧ дьхԝазә бәр чʹәʹве Хԝәде паԛьж бе һʹәсабе у мәщала ԝи һәбә бь меркʹими незики Хԝәде бә, гәрәке баԝәрийа хԝә ԛӧрбана Иса бинә у бь наве Иса дӧа бькә (Әфәси 3:​11, 12).

Чахе әм бь наве Иса дӧа дькьн әм дьдьнә кʹьфше, ԝәки баԝәр дькьн кӧ бь сайа Иса ԛьрара Хԝәде ԝе бе сери. Мәсәлә, бь сайа ԝан се рола Иса ԛьрара Хԝәде тинә сери: 1) Иса «Бәрхе Хԝәде» йә, ԛӧрбана кʹижани кӧ бу һʹим бона бахшандьна гӧна. 2) Иса һатә сахкьрьне у ньһа «сәрәккʹаһинәки» мәйи мәзьн ә у бь сайа ԛӧрбанбуна ԝи әм кʹәрәма дьстиньн. 3) Иса әԝ һәйә «рʹе», кʹижан кӧ мәщал мәрʹа вәкьр, ԝәки әм пе дӧа незики Йаһоԝа бьн (Йуһʹәнна 1:​29; 14:6; Ибрани 4:​14, 15).

Дӧайед кӧ пе наве Иса тенә готьне, рʹумәте дьдьнә ԝи. У ве йәкеда тьштәки хьраб тʹӧнә йә, чьмки хԝәха Йаһоԝа дьхԝазә, «ԝәки һәр чок ль бәр наве Иса бьтәԝә . . .  у һәр зар-зьман иԛрар кә, кӧ Иса Мәсиһ Хӧдан ә, бона рʹумәта Бав Хԝәде» (Филипи 2:​10, 11). Ле дьһа фәрз әԝ ә, кӧ чахе әм пе наве Иса дӧа дькьн, әм рʹумәте дьдьнә наве Йаһоԝа, йе кӧ Кӧрʹе хԝә бона мә бәрва да (Йуһʹәнна 3:​16).

Әм Кʹьтеба Пирозда сәр Иса гәләк нав у сәрнава дьвиньн, кʹижан кӧ али мә дькьн фәм бькьн, кӧ әԝ щики чьԛас бьльнд дьгьрә. Әԝана али мә дькьн, бьдьнә бәр чʹәʹве хԝә әԝ һәр тьшт чь кӧ Иса ани сери, тинә сери у диса ахьрийеда ԝе бинә сери бона кʹара мә (Бьньһерʹьн чаргошә «Рола Исайә Фәрз» ). Бь рʹасти жи, Исарʹа навәки «кӧ жь һʹәму нава бьльндтьр ә» һатийә дайине.a Һʹәму һʹӧкӧмед сәр әʹрде у әʹзмана ԝирʹа һатийә дайине (Филипи 2:9; Мәтта 28:18).

Бьра Нә Тʹәне Бьбә Хәйсәт

Һәрге әм дьхԝазьн Йаһоԝа дӧайе мә бьбьһе, әм гәрәке бь наве Иса дӧа бькьн (Йуһʹәнна 14:13, 14). Ле әм нахԝазьн, кӧ готьна мәйә «бь наве Иса» тʹәне мәрʹа бьбә хәйсәт. Ле чьма?

Ԝәрен әм мәсәләки шеԝьр кьн. Бьдьнә бәр чʹәʹве хԝә кӧ ԝә нәʹма стандийә, кʹидәре ӧса ньвисийә «бь һʹьзкьрьне жь . . . ». Бь тʹәхмина ԝә әв гьли-готьна кӧ хьлазийа нәʹмеда йә, бь рʹасти һәстед ԝи мәрьви әʹйан дькә йе кӧ ԝәрʹа нәʹма шандийә? Йан әԝи ӧса ньвиси, чьмки әԝ йәк ԛәйдә йә? Хәбьтандьна наве Иса дӧайед хԝәда гәрәке дьһа зедә тьшт бе һʹәсабе, нә кӧ ча хәбәред кӧ ԛәйде йә хьлазийа нәʹме бьньвисьн. Рʹаст ә, әм гәрәке һәргав дӧа бькьн, ле гәрәке ве йәке бь дьл у щан бькьн. Ле нә кӧ чьмки әԝ мәрʹа буйә хәйсәт (1 Тʹесалоники 5:​17; Зәбур 119:145).

Чь бькьн сәва кӧ гьли-готьна «бь наве Иса» мәрʹа нәбә ча ԛәйдә? Ԝе баш бә һәрге әм кʹур бьфькьрьн сәр хәйсәт-һʹӧнӧред Иса, кӧ гәләк ԛимәт ьн. Бьфькьрьн ԝәки әԝи ида чь бона ԝә кьр у диса ԝе чь бькә. Дӧада рʹазибуна хԝә Йаһоԝарʹа бьдьнә кʹьфше у пәсьна бьдьнә ԝи, ԝәки әԝи роләкә ӧса мәзьн у мәхсус дайә Кӧрʹе хԝә Иса. Әԝ йәк ԝе баԝәрийа ԝә һьндава ԝе созе Иса ԛәԝи кә: «Һун пе наве мьн чь жь Баве бьхԝазьн, әԝе бьдә ԝә» (Йуһʹәнна 16:23).