Чьрʹа Кʹар ә кö Мәрьв Рʹаст у Нәqәлп бә

Дь Кʹьтеба Пирозда, хәбәра Йунани кʹижан кö һатийә wәлгәрʹандьне ча «нәqәлпи», рʹастә-рʹаст те һʹәсабе һьндöрʹва баш. Әw öса жи дькарә бе һʹәсабе бәдәwбун алийе намусийеда.

Паwлос бь рʹебәрийа Хwәде гьлийед öса ньвиси: «Әм дьхwазьн кö һәр тьшти рʹаст бькьн». Мәсиһи wан гьлийед Паwлос бь тʹәмамийа дьле хwә һьлдьдьн. Ле әw гьлийед Паwлос чь тенә һʹәсабе?

ШӘРʹ ТʹӘВИ QАЛЬБЕ ХWӘЙИ СЬСТ

Һʹәчʹи зәʹф мәрьв һәр шәбәq пешийа кö дәрен дәрва, хwә нәйникерʹа дьньһерʹьн. Чьрʹа? Чьмки әwана дьхwазьн рʹьнд бенә кʹьфше. Ле хенщи пʹорчекьрьна бәдәw йан кʹьнщхwәкьрьна модерн, тьштәки һе фәрз һәйә. Бь рʹастийе, әw йәк кö әм дьле хwәда чь мәри нә, дькарә бәдәwбуна мә һе зедә кә йан һе кем кә.

Хәбәра Хwәде әʹйан дькә, кö дьле мә бәрбь хьрабийе мә дькʹьшинә. Дь Дәстпебун 8:21-да те готьне: «Сьтqе дьле мерьв жь зарʹотийеда хьраб ә, ПКʹМ». Ләма, һәрге әм дьхwазьн мәрьве рʹаст бьн, әм гәрәке мьqабьли qальбе хwәйи гöнәкʹар дәрен. Паwлос дәрһәqа хwә гьли кьр кö әw ча мьqабьли гöнә дәрдькʹәт: «Әз бь кʹурайийа дьле хwә qануна Хwәде бәгәм дькьм, ле qанунәкә дьн нава хwәда дьбиньм кö мьqабьли wе qануна һʹьше мьн бәгәм кьрийә дькә шәрʹ у мьн дькә һесире qануна гöна, йа кö нава мьнда йә» (Рʹомайи 7:22, 23).

Мәсәлә, һәрге дьл мә һелан дькә кö әм тьштәки хьраб бькьн, у хwәстьна мәйә qайим һәйә кö qәлпийе бькьн, әм дькарьн гöрʹа дьле хwә нәкьн, чьмки әw зоре мә накә. Демәк әм хwәха дьжберьн чаwа бькьн. Чахе әм хwәрʹа сафи дькьн, кö фькьред хьраб жь хwә дур хьн, әм дькарьн нәqәлп бьминьн, у фьрqи тʹöнә кö мәрьв дор бәре мә qәлп ьн йан на.

СӘРКʹӘТЬН ДЬ ВИ ШӘРʹИДА

Сәва кö әм мәрьвед нәqәлп у рʹаст бьн, әм гәрәке хwә ль намусийе бьгьрьн. Ле йазьх, гәләк мәрьв иро һе зәʹф дьфькьрьн кö чь щурʹә кʹьнща хwә кьн, нә кö чь щурʹәйи бь намус бьжин. Ләма жи, әwана сәр гәләк qәлпи у нәрʹастийе чʹәʹве хwә дадьдьн ча wанрʹа дәст дьдә. Кʹьтебәкә дәрһәqа намусийеда («Thе (Honеst) Truth About Dishonеsty»), һатә готьне: «Гәләк щар, әм нәрʹастийе дькьн у хwәха хwә дьхапиньн кö йанчь әм мәрьвнә рʹаст у нәqәлп ьн, чьмки әм дьфькьрьн кö кьред мә рʹаст ьн». Ле гәло һәнә принсипед рʹаст, кʹижан кö дькарьн али мә бькьн, wәки әм бьзаньбьн гәло qәлпикьрьн qә те qәбулкьрьне йан жи чьqас те qәбулкьрьне? Бәле, принсипед öса һәнә.

Бь милйона мәрьв избат бун кö Кʹьтеба Пироз бона намусийе принсипед рʹаст дьдә. У әw принсип найенә бәрамбәрикьрьне (Зәбур 19:7). Әw рʹебәрийа рʹаст дьдә, мәсәлә бона малбәте, хәбате, намусийе у рʹöһʹани. Әw рʹебәри щерʹьбанди йә. Qанун у принсипед Кʹьтеба Пироз бона һʹәму мьләта, раса, у бәрәка нә. Һәрге әм Кʹьтеба Пироз бьхуньн, бьфькьрьн сәр ве, у ширәтед wе бьдьнә хәбате, әме бькарьбьн дьле хwә һин кьн кö нәqәлп у рʹаст бә.

Хенщи занәбуна рʹастә жь Кʹьтеба Пироз, диса һәнә һе зедә тьшт, кʹижан кö дькарьн али мә бькьн wәки әм мьqабьли нәрʹастийе у qәлпийе дәрен. Әм дьжин дь ве дьнйайеда, кʹижан кö зоре мә дькә кö әм принсипед нәрʹаст qәбул кьн. Ләма жи әм гәрәке Хwәдерʹа дöа бькьн, wәки әw али мә бькә (Филипи 4:6, 7, 13). Һәрге әм öса бькьн, әме мерхасийе бьстиньн сәва кö бькьн чь кö рʹаст ә у һʹәму тьштида нәqәлп бьн.

ХӘЛАТА ХWӘЙКЬРЬНА РʹАСТИЙЕ У НӘQӘЛПИЙЕ

Һитоши, дәрһәqа кʹижани кö тʹема пешьнда һатә готьне, кʹар станд жь ве йәке кö наве хwә хwәй кьр чаwа хәбаткʹаре рʹаст у нәqәлп. Әw ньһа дьхәбьтә, у мәзьне хәбата wи гәләк дьшекьринә кö әw ча нав-намус дьхәбьтә. Һитоши дьбежә: «Әз гәләк рʹази мә, кö мьн дит хәбатәкә öса, кʹидәре кö исафа мьн тʹәмьз те хwәйкьрьне».

Мәрьвед дьн жи дитьнә кö әw йәк гәләк керһати йә. Wәрә әм һьнә мәсәлед wан мәрьва шеwьр кьн, йед кö данә хәбате әв принсипа Кʹьтеба Пироз кö «һәр тьшти рʹаст бькьн» у кʹар же стандьнә.

• Исафа Тʹәмьз

  

  «Чахе әз 13 сали бум, әз жь мәкʹтәбе дәркʹәтьм сәва кö тʹәви дьза бьхәбьтьм. Мьн һәбуна хwә 95 сәләф бь qәлпийе qазанщ кьр. Паше, мьн мер кьр. Мьн у мере мьн дәстпекьрьн һинбуна Кʹьтеба Пироз тʹәви Шәʹдед Йаһоwа. Әм пеһʹәсийан кö Йаһоwаa Хwәде кьред нәрʹаст у qәлп нәфрʹәт дькә. Ләма мә сафи кьр кö жийина хwә бьгöһезьн. Сала 1990 мә хwә тʹәсмили Йаһоwа кьр у һатьнә ньхöмандьне чаwа Шәʹдед Йаһоwа» (Мәтʹәлок 6:16-19).

  «Бәреда, мала мьн бь тьштед дьзийе тʹьжә бу, ле ньһа мала мьн жь тьштед öса аза йә, у жь ве йәке исафа мьн тʹәмьз ә. Чахе әз дьфькьрьм дәрһәqа гәләк сала кö мьн qәлпи дькьр, әз гәләк жь Йаһоwа рʹази мә бона рʹәʹма wи. Öса хwәш ә чахе һәр шәв дьчьм кö рʹазем, әз заньм кö Йаһоwа жь мьн рʹази йә» (Шерил, Ирләнд).

  

  «Чахе мәзьне хәбата мьн бьһист кö мьн жь бькʹьрчи рʹöшәт һьлнәда, әwи готә мьн: ‹Хwәдайе тә, тә дькә мәрьвәки амьн! Рʹасти жи кʹәрәм ә кö мәрьвәки мина тә компанйа мәда нә›. Чахе әз һәр тьшти рʹаст дькьм, исафа мьн тʹәмьз дьминә бәр Йаһоwа Хwәде. Әw йәк öса жи али мьн дькә кö әз али малбәта хwә у мәрьвед дьн бькьм кö әwана жи öса бькьн» (Сони, Һон-Конг).

• Әʹдьлайи Һʹьшда

  

  «Әз дьхәбьтьм дь банка интернасйоналида, чаwа аликʹарчийе администраторе. Ве бизнеседа, мәрьв рʹастийе у нәqәлпийе дьдьнә алики, сәва кö дәwләти бьн. Ньһерʹандьна öса бәлабуйи йә: ‹Чьрʹа wе чь бә мәрьв һьнәки qәлпийе бькә, һәрге әв һәбуне у пʹәра тинә?› Ле әз qәлпийе накьм, у ләма әз гәләк рʹьһʹәт ьм. Чь жи һәбә, мьн сафи кьрийә кö тʹьме рʹаст бьминьм у qәлпийе нәкьм. Мәзьне хәбата мьн заньн, кö әз тʹö щар wана нахапиньм у нә жи әзе бона wана кәсәки бьхапиньм» (Том, Дәwләтед Йәкбуйи).

• Qәдьрехwәгьртьн

  

  «Һәвалхәбаткʹаре мьн, әз һелан кьрьм кö әз бьхапиньм йанчь һьнә тьшт сәр хәбате öнда бун, ле мьн инкʹар кьр кö бьхапиньм. Чахе әwед кö дьзин әʹйан бун, мәзьне хәбата мьн жь мьн рʹази бу кö әз нәqәлп ьм. Сәва кö бьбьн мәрьве нәqәлп дь ве дьнйа qәлпда, лазьм ә мерхаси, ле ахьрийеда әм итʹбарийе у qәдьр qазанщ дькьн чахе нәqәлп ьн» (Каоре, Жапонйа).

Исафа тʹәмьз, әʹдьлайи һʹьшда, у qәдьрехwәгьртьн, әw һʹәму тьшт дьдьнә кʹьфше кö һежа йә мәрьв нәqәлп у рʹаст бә. Һун жи qайил ьн ве йәкеда?