Әз һин бум, qәдьре жьна у qәдьре хwә бьгьрьм

ЖИЙИНА МЬНӘ БӘРЕ:

Әз дь Франсайеда бакʹура-рʹоһʹьлатеда, мьһала Мöлһауседа һатьмә буйине. Әw мьһал бь зöлмийа хwә әʹйан бу. Те бира мьн ча заротийа мьнда, ортʹа малбәта тʹьме шәрʹ-дәw бу. Дь малбәта мәда, qәдьра жьна нәдьгьртьн у мер жи wана ньмьз дькьрьн. Әз öса һатьмә һинкьрьне, wәки жьн гәрәке тʹәне хwарьне чекә, у мьqати мер у зарʹа бә.

Зарʹотийа мьн һеса нибу. Чахе әз дәһә сали бум, баве мьн жь бо ичʹкәвәхwарьне мьр. Пенщ сал дәрбаз бун, бьре мьни мәзьн хwә кöшт. Wе саледа, мьн пе чʹәʹве хwә дит, кö чаwа жь бо шәрʹ-дәwе малбәтәке, мәрьвәк һатә кöштьне. Әв йәк гәләк ль сәр мьн һʹöкöм кьр. Нәфәред малбәта мьн, әз һин кьрьм кö чаwа бьдьмә хәбате кʹер у силһә, сәва кö хwә бьпʹарезьм. Һьнге щаһьлтийа хwәда, мьн бәдәна хwә бь татуа нәqьш кьр у дәстпекьр ичʹке вәхwьм.

Чахе әз 16 сали бум, мьн һәр рʹож wәкә 10-15 бöтʹьл, бира (ава щәһ) вәдьхwәр у зутьрәке дәстпекьр наркотике жи бьдьмә хәбате. Сәва кö дәйна дадьм, мьн һʹәсьн дьфротьн у дьзи дькьр. 17 салийа хwәда әз ида кʹәтьм кәле. Бь тʹәмами жь бо дьзикьрьне у шәрʹ-дәwа, әз 18 щара һатьмә диwанкьрьне. Жь вана се щара әз кәледа рʹуньштьм у 15 щара жи әз һатьмә синоркьрьне, демәк һьнә тьшт бона мьн qәдәхә бун, мәсәлә әз жь бажер нькарьбум дәркʹәтама.

20 салийа хwәда, һале мьн һе хьраб бу. Мьн рʹоже 20 льб марихуана дькʹьшанд, öса жи һеройин у тьштед дьнә беqануни дьда хәбате. Чәнд щара һьндьк дьма әз бьмьрама жь бо гәләк кʹьшандьне. Мьн дәстпекьр наркотика бьфрошьм у ләма жи бәр дәсте мьн, тʹьме кʹер у силһа һәбун. Щарәке мьн хwәст мерькәки гöлә кьм, ле әw бьриндар нәбу! Чахе әз 24 сали бум, дийа мьн мьр у һерса мьн һе зедә бу. Мәрьвед кö дәрва мьн дьдитьн, дәрбази рʹийа дьн дьбун сәва кö жь мьн бьрʹәвьн. Жь бо шәрʹ-дәwа әз гәләк щара полисханеда бум йан жи нәхwәшханеда, кʹидәре кö бьринед мьн дьдрутьн.

28 салийа хwәда, әз зәwьщим. У һәмьки мьн qәдьре жьна хwә нәдьгьрт. Мьн ле беһöрмәт дькьр у дькʹöта. Чаwа щоте-зәwьщи, мә тʹö тьшт тʹәвай нәдькьр. Әз дьфькьрим, кö wе бәс бә, һәрге әз гәләк тьштед бьһа, кö мьн дьзи, wерʹа бьдьм. Паше ньшкева тьштәк qәwьми. Жьна мьн дәстпекьр тʹәви Шәʹдед Йаһоwа Кʹьтеба Пироз һин бә. Һәма паши һинкьрьна хwәйә пешьн, әwе щьхарә тʹәрьканд. Әwе öса жи нәхwәст һьлдә пʹәред мьнә дьзийе у һʹәму тьштед бьһа йе хәмьландьне, пашда да мьн. Әз гәләк һерс кʹәтьм. Әз мьqабьли wе йәке бум, кö әw Кʹьтеба Пироз һин бә. Чахе мьн щихаре дькʹьшанд, мьн дуйе щьхаре ль сәр чʹәʹве wе бәрдьда. Мьн öса жи бәр һʹәмуйа qәрфе wе дькьр.

Еварәке чахе әз сәрхwәш бум, мьн агьр мала хwә хьст. Жьна мьн әз у qиза мәйә пенщ сали жь агьр хьлаз кьрьн. Чахе әз һатьм сәр һʹьше хwә, исафа мьн әз дьчәрчьрандьм. Әз кʹурайа дьле хwәда дьфькьрим, wәки Хwәде wе тʹö щара мьн нәбахшинә. Гьлийе кʹәшишәки кʹәтә бира мьн, йе кö готьбу wәки һʹәму мәрьвед зöлм wе бькʹәвнә щәньме. Һәла һе дохдьра мьнә пʹсихийатри жи готә мьн: «Ида тʹö тьшт wе али тә нәкә! Тö һежайи бахшандьне нини».

КЬТЕБА ПИРОЗ ЧА ЖИЙИНА МЬН ГÖҺАСТ:

Паше әм дәрбази мала де-баве жьна мьн бун. Чахе Шәʹдед Йаһоwа һатьнә щәм жьна мьн, әз жь wана пьрсим, «Хwәде дькарә һʹәму гöнед мьн бьбахшинә?» Әwана жь Кʹьтеба Пироз мьрʹа нишан кьрьн 1 Корьнтʹи 6:9-11. Ве дәре те готьне дәрһәqа рʹабун-рʹуньштандьна кö бәр чʹәʹве Хwәде рʹәш ә. Ль wьр ньвисар ә: «У жь wә һьнәк öса бун». Әw гьли гәләк дьле мьн гьртьн у мьн данә баwәркьрьне, wәки әз дькарьм бемә гöһастьне. Шәʹдед Йаһоwа мьрʹа избат кьрьн, кö Хwәде мьн һʹьз дькә у нишан кьрьн 1 Йуһʹәнна 4:8. Әз гәләк һелан бум у паше мьн хwәст кö әwана тʹәви мьн һʹәфтийе дö щара һинкьрьна Кʹьтеба Пироз дәрбаз кьн. Мьн дәстпекьр һәрʹьм сәр щьватед wан у мьн Йаһоwарʹа дöа дькьр.

Нава мәһәкеда мьн сафи кьр наркотике у ичʹке бьһельм. Зутьрәке әв йәк хьраб ль сәр бәдәна мьн һʹöкöм кьр! Евара әз дьчәрчьрим жь бо хәwнед хоф, сәреше, тәвьзок мьн дьгьрт у гәләк тьштед дьн жи. Ле wи wәʹдәйда мьн öса жи тʹәхмин дькьр, wәки Йаһоwа дәсте мьн дьгьрт у мьн qәwи дькьр. Мьн хwә мина Паwлосе шанди тʹәхмин дькьр, кʹижани гот: «Әз һәр тьшти бь сайа wи дькарьм, йе кö qәwате дьдә мьн» (Филипи 4:13). Wәʹдә шунда мьн карьбу кʹьшандьна тʹутʹуне жи бьдьмә сәкьнандьне (2 Корьнтʹи 7:1).

Кʹьтеба Пироз нә кö тʹәне аликʹари да мьн сәва кö жийина хwә бькьмә бьн контроле, ле жийина малбәта мьн жи баш бу. Ньһерʹандьна мьн һьндава жьна мьн һатә гöһастьне. Мьн дәстпекьр һе зедә qәдьре wе бьгьрьм у гьлийед öса бьдьмә хәбате ча «жь кʹәрәма хwә» у «зәʹф рʹази мә». Әз öса жи бумә бавәки баш сәва qиза хwә. Саләк шунда паши һинбуна Кʹьтеба Пироз, мьн чʹәʹв да жьна хwә, жийина хwә тʹәсмили Йаһоwа кьрьм у һатьмә ньхöмандьне.

ЧЬ КʹАР МЬН СТАНД:

Принсипед Кʹьтеба Пироз жийина мьн хwәй кьрьн. Һәла һе нәфәред мала мьн, йед кö нә Шәʹдед Йаһоwа нә, дьбежьн кö әзе зудава бьмьрама жь бо ичʹке у наркотике, йан жи кәсәк шәрʹ-дәwада wе әз бькöштама.

Бь аликʹарийа һинкьрьнед Кʹьтеба Пироз, жийина мьнә малбәте бь тʹәмами һатә гöһастьне. Бь ве йәке мьн фәʹм кьр, wәки щабдарийа мьн ча мер у бав, чьда нә (Әфәси 5:25; 6:4). Мә ида дәстпекьр һʹәму тьшти тʹәвай бькьн. Ньһа әз фәʹм дькьм кö щабдарийа жьне тʹәне чекьрьна хwарьне нинә. Иро әз ша мә пьштгьрийа wе бькьм у тʹәви wе хьзмәт кьм ча пешәнге һәртʹьм. Әз рʹуспийе щьвате мә у дь ве йәкеда жьна мьн жи пьштгьрийа мьн дькә.

Һʹьзкьрьн у дьлрʹәмийа Йаһоwа Хwәде, гәләк ль сәр жийина мьн һʹöкöм кьрьн. Әз тʹьме дьхwазьм дәрһәqа хәйсәт-һöнöред wи гьли кьм wан мәрийарʹа, йед кö һаләки хьрабда ньн, чаwа кö әз бәре бум. Әз заньм wәки qәwата Кʹьтеба Пироз дьгьһиже, сәва кö али һʹәмуйа бькә нета жийине бьвиньн у бәхтәwар бьн. Кʹьтеба Пироз мьн һин кьр, мәрийа һʹьз бькьм у qәдьре жьна у мера бьгьрьм. Әw һьм али мьн кьр, wәки qәдьре хwә жи бьзаньбьм.