Тö Һазьр и Баwәрийа Хwә Һьмбәри Һинкьрьна Кʹьтеба Пироз Бьки?
ТÖ ХWӘ һʹәсаб дьки ча Мәсиһи? Һәрге әре, тö нава һәжмара дö милиарда мәрьва зәдәтьрда ни, йед кö әʹйан qәбул дькьн, wәки әwана пәйчуйед Мәсиһ нә. Иро бь һʹәзара кʹом һәнә, йед кö хwә нав дькьн ча Мәсиһи, у һәла һе ортʹа wанда жи фьрqи һәйә чаwа һинкьрьнеда öса жи ньһерʹандьнеда. Дьбәк баwәрийа тә жи гәләк щöдә дьбә жь баwәрийа мәрьвед кö хwә нав дькьн Мәсиһи. Гәло лазьм ә кʹур бьфькьрьн һәла әм чь баwәр дькьн? Бәле, хут wи чахи һәрге тö дьхwази ль гора баwәрийа Мәсиһийа бьжий, у öса бьки чаwа кö Кʹьтеба Пироз һин дькә.
Пәйчуйед Иса Мәсиһ йе пешьн әʹйан бун ча «мәсиһи» (Кʹаред Шандийа 11:26). Нәлазьм бу навәки дьн wанарʹа бьдана, чьмки wи wәʹдәйда тʹәне баwәрийа Мәсиһти һәбу. Мәсиһи йәктийеда пәй һинкьрьн у рʹебәрийа Сазкʹаре Мәсиһийа дьчун, демәк Иса Мәсиһ. Ле дәрһәqа дера хwә чь дькари бежи? Тö баwәр дьки, wәки әw һин дькә әwе йәке чь кö Иса һин дькьр у дькә әw, чь кö пәйчуйед Мәсиһ дькьрьн? Ле чаwа тö дькари дь ве йәкеда избат би? Мәщәләкә баш һәйә у әв Кʹьтеба Пироз ә, чь кö али мә дькә баwәрийа хwә һьмбәри һинкьрьна wе бькьн.
Һәла дәрһәqа ве йәке бьфькьрьн: Иса Мәсиһ гәләк qәдьре Ньвисаред Пироз дьгьрт у әw һʹәсаб дькьр ча Хәбәра Хwәде. Иса qәбул нәдькьр wан мәрийа, йед кö һинкьрьнед Кʹьтеба Пироз дьданә алики, сәва кö рʹаw-рʹьзьмед хwә демәк qәйдед хwә, пешда биньн (Марqос 7:9-13). Жь ве йәке әм дькарьн бежьн, wәки пәйчуйед Исайи рʹаст, гәрәке баwәри у һинкьрьнед хwә, ль сәр һʹиме Кʹьтеба Пироз саз кьн. Ләма жи wе баш бә, wәки һәр Мәсиһи жь хwә бьпьрсә, ‹Гәло һинкьрьнед дера мьн ль сәр һʹиме Кʹьтеба Пироз ьн?› Сәва кö щаба ве пьрсе бьдьн, һун дькарьн һинкьрьнед дера хwә һьмбәри wе йәке кьн, чь кö бь рʹасти Кʹьтеба Пироз дьбежә.
Иса гот, кö һʹәбандьна мә Хwәдерʹа, гәрәке ль сәр һʹиме рʹастийе бә, демәк ль сәр һʹиме рʹастийа Кʹьтеба Пироз (Йуһʹәнна 4:24; 17:17). У Паwлосе шанди жи гот, кö хьлазкьрьна мә wе йәкева гьредайи йә, кö «рʹастийе нас кьн» (1 Тимотʹейо 2:4). Ләма жи гәләк фәрз ә, кö баwәрийа мә ль сәр һʹиме рʹастийа Кʹьтеба Пироз бә. Чьмки wе йәкева гьредайи йә, әме хьлаз бьн йан на!
ЧАWА БАWӘРИЙА ХWӘ ҺЬМБӘРИ КʹЬТЕБА ПИРОЗ КЬН
Әм wә тʹәглиф дькьн бьхуньн шәш пьрсед жере у дина хwә бьдьн, wәки Кʹьтеба Пироз чаwа ль сәр ван пьрса щаба хwә дьдә. Бьньһерʹьн рʹезед Кʹьтеба Пироз кö тенә wәкʹьландьне у бьфькьрьн дәрһәqа щабед пьрсед Кʹьтеба Пироз. Паше жь хwә бьпьрсьн: «Һинкьрьнед дера мьн ль сәр һʹиме Кʹьтеба Пироз ьн?»
Әв леколинкьрьна кьн дькарә али wә бькә һьмбәриһәвкьрьна лапә керһати бькьн. Һун дьхwазьн һинкьрьнед дьн йе дера хwә, һьмбәри Кʹьтеба Пироз кьн? Шәʹдед Йаһоwа wе дьлша бьн али wә бькьн, кö рʹастийа Кʹьтеба Пироз леколин бькьн. Һун дькарьн йәк жь Шәʹдед Йаһоwарʹа бежьн, кö тʹәви wә һинкьрьна Кʹьтеба Пирозә бепʹәрʹә дәрбаз кә. Йан жи һун дькарьн бькʹәвьнә малпәра мә, jw.org.