Хьзмәткʹаред Дере, Бунә Хьзмәткʹаред Хwәдейе Рʹаст

Фелиса: Әз жь малбәтәкә гәләк баwәрмәнд бум. Жь пьcмаме мә 13 мәрьв кʹәшиш йан жи әндәме дера Католика бун. Кʹәшише мәзьн йе дера Католика, Поп Щон Поле II, һәла һе жи кӧрʹе хатийа дийа мьн пироз кьр. Әw кӧрʹхатийе дийа мьн, мәкʹтәба дера Католикида кʹәшиш бу. Малбәта мә дәwләти нибу. Баве мьн һәсьнгәр бу, ле дийа мьн чоле дьхәбьти. Жь нәһә зарʹа әз йа лапә мәзьн бум.

Чахе әз 12 сали бум, Испанйайеда шәрʹе мьләтийе дәстпебу. Паши шәрʹ баве мьн кʹәтә кәле. Әw мьqабьли сәрwертийа диктаторе дәрдькʹәт, чьмки әwи дьхwаст кӧ мәрьв бь азабуне бьжин. Дийа мьн анщах малбәт хwәй дькьр, ләма һәвала wе ширәт дайеда, кӧ мьн у се хушкед мьн Арасели, Лауре, у Рамоне, бьшинә дера Билбао, кʹидәре жьн хьзмәт дькьн. Чьмки wе дәре әме бьрʹчи нәмана.

Арасели: Чахе әм чунә дере, әм 14, 12, 10 сали бун. У мәрʹа гәләк чәтьн бу, чьмки әм жь малбәта хwә дур бун. Дера Билбаойеда, шьхӧле мә әw бу кӧ тʹәмьз кьн у бьдьнә һәв. Паши дӧ сала, хьзмәткʹаред дере әм щигӧһасти дера мәзьнә Зарагозайеда кьрьн, кʹидәре кӧ мьqати мәрьвед әʹмьрда мәзьн дьбун. Ль wе дәре шьхӧле мә әw бу кӧ хwарьнгәһе тʹәмьз кьн. Әw шьхӧл, бона мә щаһьла, гәләк гьран бу.

Фелиса: Чахе хушкед мьн чунә дера Зарагозайеда, дийа мьн у кʹәшише кӧ ӧса жи апе дийа мьн бу, сафи кьрьн кӧ әз жи һәрʹьмә ве дере кʹидәре хушкед мьн ьн. Әwана дьфькьрин кӧ ӧса wе мьн хwәй кьн жь wи гәдәйи, кʹижани әз бәгәм дькьрьм. У чьмки әз йәкә гәләк баwәрмәнд бум, ләма әw сафикьрьн мьн хwәш һат, кӧ әз һәрʹьмә дере сәр һьнә wәʹдә. Әз һәр рʹож дьчумә дере, у һәла һе жи мьн дьхwаст бьбьмә мисйонер, чаwа кӧрʹе хатийа мьн, йе кӧ Африкайеда хьзмәткʹаре дера Католики бу.

Ле хьзмәткʹаред дере һелан нәдьданә мьн, кӧ әз хwәстьна хwә биньмә сери, демәк Хwәдерʹа wәлате майинда хьзмәт бькьм. У дереда мьн ӧса тʹәхмин дькьр кӧ әз кәледа ньм. Ләма паши саләке, мьн сафи кьр вәгәрʹьмә мале, сәва мьqати хале хwә бьм, кʹижан кӧ кʹәшиш бу. Хенщи шьхӧле мале, һәр евар мьн тʹәви wи пе тʹьзбийе дӧа дькьр. Ӧса жи мьн хwәш дьһат кӧ һәрʹьм мьqати кӧлиркед дере бьм, у мьн шькьл у һәйкәлед Мәрйәме у кәсед дьнә «пироз» дьхәмьландьн.

Арасели: Wи wәʹдәйи, жийина мә дереда дьһатә гӧһастьне. Паши сондхwарьна мьнә пешийе бона хьзмәткьрьна дере, хьзмәткʹаред дере сафи кьрьн кӧ мә хушка башqә кьн. Рамони Зарагозайеда ма, Лаури дәрбази Валенсйайе бу, ле әз шандьмә дера Мадридеда, кʹидәре кӧ мьн сонда хwә wәкʹьланд. Ве дера Мадридеда одә һәбун сәва студент, мәрьвед әʹмьрда мәзьн, у меван теда бьминьн. Ләма жи, wе дереда шьхӧл гәләк бу. Ве дереда әз нәхwәшханеда дьхәбьтим.

Рʹаст бежьм, әз һивийе бум кӧ жийина мьн ча хьзмәткʹара дере һе керһати буйа. Әз һивийе бум кӧ ль wедәре әме Кʹьтеба Пироз бьхуньн у фәʹм бькьн. Ле qә тʹӧ кәси дәрһәqа Хwәде йан жи Иса хәбәрнәдьда, у мә нә жи Кʹьтеба Пироз дьда хәбате. Әз wе дәре тʹәне зьмане Латини һин бум, у дәрһәqа жийина йед «пироз» у дәрһәqа һʹәбандьна Мәрйәмерʹа. Ле бь тʹәмами wәʹде мьн дәрбаз дьбу сәр шьхӧлед гьран.

Һеди-һеди әз дьлтәнг дьбум, у ләма мьн тʹәви сәрәкдайике хәбәрда. Мьн wерʹа гот wәки әз фәʹм накьм, чьрʹа гәрәке әз гьран бьхәбьтьм сәва йед майин пʹәра текьнә щева хwә, ле малбәта мьн һʹәwще аликʹарийа мьн ә. Чахе мьн жерʹа әw гьли гот, әwе әз кьрьмә кәла дере, чьмки һивийе бу кӧ әз фькьред хwә бьгӧһезьм, у ӧса әве мьн бьгьрә wәки әз жь дере нәчьм.

Се щара хьзмәткʹаред ве дере әз аза кьрьм, тʹәне бона ве йәке кӧ бьвиньн һәла әз диса дьхwазьм жь дере һәрʹьм йан на. Ле мьн сафи кьрьбу кӧ әʹсә жь дере һәрʹьм. Wана әw йәк фәʹм кьр, ләма мьнрʹа готьн кӧ хwәстьна хwә ӧса бьньвисьм: «Әз жь дере дьчьм, чьмки дьхwазьм Шәйтʹанрʹа хьзмәт бькьн, нә кӧ Хwәдерʹа». Әз жь гьлийед wан әʹщебмайи мам, у рʹаст ә мьн гәләк дьхwаст жь дере һәрʹьм, ле йәкә мьн тʹӧ щар нькарьбу ӧса бьньвисийа. Ахьрийе, мьн тʹәви кʹәшишәки хәбәрда, у һʹәму тьшт жерʹа гьли кьр. Әwи жи ӧса кьр кӧ сәрwеред дере изьне бьдьн әз щигӧһасти дера Зарагозайеда бьм. Паши чәнд мәһа, бь изьна wан әз щигӧһасти бум. Һьнә wәʹдә шунда, Лаури у Рамони жи әw дер һиштьн.

КʹЬТЕБА «QӘДӘХӘКЬРИ» МӘ ҺӘВ ДЬQӘТИНӘ

Фелиса: Һьнә wәʹдә шунда, мьн мер кьр у дәрбази Кантабрйайе бум. Мьн бәрдәwам дькьр тʹьме һәрʹьмә дере. Щарәке рʹожа Ләʹде кʹәшишәки әʹламәти кьр. Әwи бь һерсе кьрә qажини: «Бьньһерʹьн ве кʹьтебе!», у нишан кьр кʹьтеба «Рʹастийа кӧ Дьбә бәрбь Жийина Һʹәта-Һʹәтайе». Паше бәрдәwам кьр гот: «Һәрге кәсәки әв кʹьтеб дайә wә, биньн бьдьнә мьн йан жи бавежьн!»

Әw кʹьтеб щәм мьн тʹӧнә бу, ле паши wан гьлийа мьн гәләк дьхwаст әве кʹьтебе дәстхьм. У чәнд рʹож дәрбаз бу, дӧ Шәʹдед Йаһоwа дәре мьн хьстьн, у әв кʹьтеба «qәдәхәкьри» данә мьн. Һәма wе шәве мьн әв кʹьтеб хwәнд. У чахе һәрдӧ жьн щара дӧда һатьн щәм мьн, әз qайил бум кӧ тʹәви мьн һинбуна Кʹьтеба Пироз дәстпекьн.

Зутьрәке рʹастийа Кʹьтеба Пироз дьле мьн гьрт. Амьнийа мьн һьндава рʹелигийа мьнә бәре, һатә гӧһастьне сәр һʹьзкьрьна кʹур һьндава Йаһоwа у хирәта хьзмәткьрьна wирʹа. Сала 1973 әз һатьмә ньхӧмандьне. Рʹаст ә мәщала мьн һьндьк бу малбәта хwәрʹа дәрһәqа рʹастийе гьли кьм, ле мьн чьqас карьбу әв йәк дькьр. Чаwа мьн дәстпекеда гот, малбәта мьн мьqабьли баwәрийа мьн бун, илаһи хушка мьн Арасели.

Арасели: Әз жь бо жийина хwәйә дереда бумә йәкә һерс. Ле йәкә, мьн бәрдәwам дькьр рʹожа Шәʹмийе дьчум дере, у мьн һәр рʹож бь тʹьсбийе дӧа дькьр. Хwәстьна мьн, кӧ Кʹьтеба Пироз фәʹм кьм диса һәбу, у мьн жь Хwәде һиви дькьр бона аликʹарийе. Ле чахе хушка мьн Фелиса тʹәви мьн хәбәрда дәрһәqа баwәрийа хwәйә тʹәзә, мьн әw һʹәсаб кьр ча фанатик, чьмки әwе гәләк бь емосийа гьли дькьр. У әз тʹәви wе qә qайил нә дьбум.

Паши чәнд сала, әз сәва хәбате вәгәрʹийамә Мадриде у wедәре мьн мер кьр. Һеди-һеди әз бумә мәрьвәкә дӧдьли. Мьн тʹәхмин кьр мәрьвед кӧ тʹьме тенә дере, пе һинкьрьнед Кʹьтеба Пироз нажин. Ләма әз ида нәдьчумә дере. Мьн ида баwәрийа хwә йед «пироз» нәдьани, нә жи кʹәшиша, нә жи щәʹньмә баwәр дькьр. У мьн һәла һе пʹут жи жь мала хwә дәрхьстьн. Мьн ньзаньбу әз рʹаст дькьм йан на. Әз гәләк дьлтәнг бум, ле мьн бәрдәwам дькьр Хwәдерʹа ӧса дӧа бькьм: «Әз дьхwазьм тә нас кьм. Али мьн бькә!» Те бира мьн кӧ Шәʹдед Йаһоwа чәнд щара дәре мьн хьстьн, ле мьн тʹӧ щар дәри wан вәнәдькьр. Мьн итʹбарийа хwә тʹӧ рʹелигийа нәдьани.

Дәстпека сала 1980, хушкед мьн Лаури у Рамони, йед кӧ дьжитьн Франсайеда у Испанйайеда, дәстпекьрьн тʹәви Шәʹдед Йаһоwа Кʹьтеба Пироз һин бьн. Әз дьфькьрим кӧ әwана тенә хальфандьне, чаwа Фелиса. Паше, әз рʹасти щинарәкә хwә һатьм, наве wе Анщелина бу, йе кӧ буйә һәвала мьнә незик. Әw жи Шәʹде Йаһоwа бу. Гәләк щар, Анщелина у мере wе мьнрʹа дьготьн кӧ һинбуна Кʹьтеба Пироз дәстпекьм. Wана тедәрдьхьст кӧ пьшти скептика мьн у дӧдьлибуне, мьн гәләк дьхwаст кӧ занәбуна Кʹьтеба Пироз бьстиньм. Ахьрийе, мьн wанрʹа гот: «Дә пʹак. Әзе qайил бьм тʹәви тә һин бьм, ле тʹәне һәрге әз Кʹьтеба Пироз йа хwә бьдьмә хәбате!», у мьн нишани wан кьр Кʹьтеба Пироз йа wәлгәрʹандьна Накар Колунга.

АХЬРИЙЕДА КʹЬТЕБА ПИРОЗ МӘ ДЬКӘ ЙӘКТИЙЕ

Фелиса: Чахе әз һатьмә ньхӧмандьне сала 1973, шәһәре Сантандерайеда провинсийа Кантабрийайеда, wедәре тʹәне 70 Шәʹдед Йаһоwа һәбун. Територийа мә сәва мьзгине бәла кьн, пʹьрʹ мәзьн бу. Ләма мә нав тʹәмамийа провинсийайе пе отобусе рʹеwити дькьр, ле паше һьнә wәʹдә шунда әм пе әʹрәба дьчун у гӧнд-гӧнд дьгәрʹийан. Ӧса әм ве регийонеда чунә бь сәда гӧнда.

Нава гәләк салада, qәдьрәки ӧса мьнрʹа һатьбу дайине кӧ мьн тʹәви гәләк мәрьва һинбуна Кʹьтеба Пироз дәрбаз дькьр. У жь wана 11 кәс һатьнә ньхӧмандьне. Һʹәчʹи зәʹф жь wан Католик бун. Чьмки бәре мьн хwәха жи qәwи рʹелигийа Католики баwәр дькьр, ләма мьн заньбу кӧ гәрәке wана фәʹм кьм у сәбьр кьм. Мьн фәʹм дькьр, кӧ wанрʹа wәʹдә лазьм ә сәва әw баwәрийед кӧ әwана теда кʹур бунә жь дьлед wан дәрен, wәки Кʹьтеба Пироз у рʹӧһʹе Йаһоwайи пироз дьле wан вәкә, сәва әwана рʹастийе нас кьн (Ибрн. 4:12). Мере мьн Биенвенедо полис бу, әw сала 1979 һатә ньхӧмандьне, у дийа мьн жи дәстпекьр һинбуна Кʹьтеба Пироз. Ле һьнә wәʹдә шунда әw мьр.

Арасели: Чахе мьн тʹәви Шәʹдед Йаһоwа дәстпекьр Кʹьтеба Пироз һин бьм, бона мьн һʹәму тьшт бьн шькеда бу. Ле чьqас һʹәфти дәрбаз дьбун, мьн тʹәхмин дькьр кӧ әз һеди-һеди нәрм дьбьм у һерса нав мьнда ӧнда дьбә. Чахе мьн дина хwә дьда сәр Шәʹдед Йаһоwа, әз гәләк әʹщебмайи дьмам, кӧ әwана хwәха жи ӧса дькьн, чаwа кӧ һин дькьн. Бал мьн дӧдьлибун һатә гӧһастьн сәр баwәрийа qәwи. Мьн хwә гәләк бәхтәwар тʹәхмин дькьр. Һәла һе һьнә щинара жи, мьнрʹа готьн: «Арасели, бәрдәwам кә бь ве рʹе һәрʹә, кʹижан тә бьжартийә!»

Дӧайе мьн те бира мьн, чахе мьн дьгот: «Зәʹф рʹази мә Йаһоwа кӧ тә пьшта хwә нәда мьн у тә гәләк мәщал да мьн, сәва әз бьвиньн әw чь кӧ мьн дьгәрʹийа, демәк занәбуна рʹаст йа Кʹьтеба Пироз». Мьн жь хушка хwә Фелисайе бахшандьн хwаст, кӧ мьн пе гьлийед хwә дьле wе ешандьбу. Бәре әм һәврʹа дькʹәтьнә дәʹwе, ле ньһа ида әм тʹәвайи дәрһәqа Кʹьтеба Пироз шеwьр дькьн. Әз һатьмә ньхӧмандьне сала 1989 чахе 61 сали бум.

Фелиса: Ньһа әз 91 сали мә, жьнәби мә у qәwата мьн һаqас тʹӧнә чаwа бәре. Ле әз һәр рʹож Кʹьтеба Пироз дьхуньм, темә щьвате чахе хьраб ниньм, у чьqас дькарьм дьчьмә хьзмәтийе.

Арасели: Мьн бәре дереда хьзмәт дькьр, дьбәкә ләма жи гәләк мьн хwәш те кʹәшишарʹа у жьнед кӧ дереда хьзмәт дькьн шәʹдәтийе бьдьм. Мьн гәләк әʹдәбйәт wанрʹа дьһишт у тʹәви wан һьнәка хәбәрдана гәләк һʹәwас дьчу. Те бира мьн, паши чәнд сәрледанед дӧбарә, кʹәшишәки мьнрʹа гот: «Арасели, әз бь тʹәмами тʹәви тә qайил ьм, ле әзе wи әʹмьре хwәйи мәзьн кʹӧда һәрʹьм? Йе дереда у малбәта мьн wе мьнрʹа чь бежьн?» Мьн жи щаба wи да: «Ле Хwәде wе чь бежә?» Әwи мәʹде хwә кьр у сәре хwә һәжанд, ле wәʹдә дәрбаз бу у мерхасийа wи һаqас тʹӧнә бу кӧ бәрдәwам кә рʹастийе бьгәрʹә.

Те бира мьн qәwьмандьнәкә мәхсус жийина мьнда. Әw qәwьмандьн әw бу, чахе мере мьн мьнрʹа щара пешьн гот, кӧ әw дьхwазә тʹәви мьн бе щьвате. Рʹаст ә wи чахи әw 80 сали бу, ле йәкә паше әw тʹӧ щар щьват нәдьһишт. Әwи дәстпекьр һинбуна Кʹьтеба Пироз, у бу хьзмәткʹаре нәньхӧманди. Әз ӧса бь дьл тиньм бира хwә wи wәʹдәйи, чахе әм тʹәвайи дьчунә щьвате. Ле йазьх әw мьр дӧ мәһ пешийа кӧ әw гәрәке бьһата ньхӧмандьне.

Фелиса: Жийина мьнда шабунәкә мьнә пʹьрʹ мәзьн әw бу, кӧ ча се хушкед мьнә щаһьл, йед кӧ бәре мьqабьли мьн бун, бунә хушкед мьнә рʹӧһʹани. Әм гәләк ша дьбун чахе мә тʹәвайи дәрһәqа Йаһоwа Хwәдейе хwәйи qимәт хәбәрдьда, у ӧса жи дәрһәqа Хәбәра wи! Бәле, ахьрийе әз у хушкед мьн ида рʹӧһʹанида йәктийеда ньн.a