Чьрʹа Фәрз ә Тʹьмe Рʹöһʹанида Пeшда Һәрʹьн?

1, 2. а) Ча гьлийeд жь Ишайа 60:22 рʹожeд мәда тeнә сeри? б) Иро чь һʹәwщәти һәйә тʹәшкиләта Йаһоwада?

«ЖЬ ҺЬНДЬКИ we бьбә һʹәзар, у жь йe бьчʹук we бьбә мьләтәки qәwи» (Иша. 60:22, ДТʹ). Әw пʹeхәмбәрти иро wан рʹожeд ахьрийeда тe сeри. Нава сала 2015-да, нав тʹәмамийа дьнйайe 8 220 105 хьзмәткʹарeд Йаһоwа мьзгинийа Пʹадшатийe бәла дькьрьн! Йаһоwа пeшда гот кö щьмәʹта wи we зeдә бә. Әwи гот: «Әз Йаһоwа, әвe йәкe wәʹдәда ләз хьм». Бәлe, чьqас wәʹдә дьчә, һаqас зәʹф шьхöлe мә зeдә дьбә, wәки әм бькьн. Лe гәло әм һʹәму тьшти дькьн, сәва бь хирәт мьзгинийe бәла кьн? Гәләк хушк-бьрeд мә хьзмәт дькьн ча пeшәнгeд һәртʹьм йан кʹомәкдар. Әм öса жи ша дьбьн чахe гәләк бь рʹәзәдьли хьзмәт дькьн wан щийа, кʹидәрe һʹәwщәти һәйә, у öса жи шьхöлe авакьрьнeда кʹар дькьн.

² Әм дьвиньн кö шьхöл гәләк ә, у ләма мәрʹа һe зeдә хәбатчи лазьм ьн. Бьдьнә һʹәсабe хwә кö һәр сал 2 000 щьватeд тʹәзә тeнә сазкьрьнe. Бәʹса хәбәрe, һәргe әм һʹәсаб кьн кö һәр щьватәкида 5 рʹуспи гәрәкe хьзмәт кьн, дeмәк 2 000 щьватарʹа 10 000 бьра лазьм ьн сәва хьзмәт кьн ча рʹуспи. Әw тe һʹәсабe кö öса жи бь һʹәзара бьра лазьм ьн сәва хьзмәт кьн ча бәрдәстийeд щьватe. Бәлe, фьрqи тʹöнә әм хушк ьн йан бьра, «шьхöлe Хöданда» әм дькарьн гәләк тьшт бькьн (1 Корн. 15:58).

ЧЬ ТЕ ҺʹӘСАБЕ РʹÖҺʹАНИДА ПЕШДА ҺӘРʹЬН?

3, 4. Чь бона wә тe һʹәсабe рʹöһʹанида пeшда һәрʹьн?

³ Бьхунә 1 Тимотʹeйо 3:1. Вe рʹeзeда әw хәбәра Йунани, кö сәр зьманe мә һатә wәлгәрʹандьнe ча «тәм», тe һʹәсабe чахe мәрьв дьхwазә бьгьһижә тьштәки, у хwәстьна wийә гәләк qайим һәйә. Паwлос бь ви гьли да кʹьфшe, кö һәргe мәрьв дьхwазә рʹöһʹанида пeшда һәрʹә, әw гәрәкe гьран сәр хwә бьхәбьтә. Бьдьнә бәр чʹәʹвe хwә кö бьрак дьхwазә бьбә бәрдәстийe щьватe. Әw фәʹм дькә кö wирʹа лазьм ә сәр хwә бьхәбьтә, wәки һʹöнöрeд хwә һe баш кә. Wәʹдә шунда әw дьбә бәрдәстийe щьватe. Пашe, әw ида сәр хwә гьран дьхәбьтә wәки бьбә рʹуспи. Wан һәрдö дәрәщада әw бьра сәр хwә дьхәбьтә, wәки һʹöнöрeд öса щәм wи һәбьн, кʹижан кö гәрәкe һәбьн щәм wан, йeд кö дьхwазьн щьватeда һe зeдә щабдарийа һьлдьнә сәр хwә.

⁴ Иро гәләк хушк-бьра әʹмьрe хwәда гöһастьна дькьн, чьмки дьхwазьн һe зeдә Йаһоwарʹа хьзмәт кьн. Мәсәлә, гәләк нeтeд öса датиньн пeшийа хwә кö бьбьнә пeшәнг, Бәйтʹәлeда хьзмәт кьн, йан аликʹарийe бьдьн бона шьхöлe авакьрьна Одeд Щьвата. Wәрә әм шewьр кьн кö ча Кʹьтeба Пироз мә һʹәмушка һeлан дькә, кö хьзмәтийа хwәда әм һe пeшда һәрʹьн.

НЕТ ДАЙНЬН ПЕШИЙА ХWӘ, WӘКИ ТʹЬМЕ РʹÖҺʹАНИДА ПЕШДА ҺӘРʹЬН

5. Ча йeд щаһьл qәwата хwә дькарьн бьдьнә хәбатe, сәва һe зeдә хьзмәт кьн?

⁵ Щаһьл дькарьн гәләк тьшт бькьн хьзмәтийeда, чьмки eнeржийа у сьһʹәт-qәwата wан баш ә. (Бьхунә Мәтʹәлок 20:29.) Һьнә бьрeд мәйи щаһьл Бәйтʹәлeда хьзмәт дькьн wан идарада, кʹидәрe кö әʹдәбйәтeд мә у Кʹьтeба Пироз нәшьр дькьн у һәвва дькьн. Гәләк хушк-бьрeд щаһьл аликʹарийe дьдьнә шьхöлe авакьрьн у тʹәзәкьрьна Одeд Щьвата. Öса жи чахe хәзәб дьqәwьмьн, йeд щаһьл аликʹарийe дьдьнә хушк-бьра. У гәләк щаһьл йeд кö пeшәнг ьн, зьманe хәриб һин дьбьн, йан жи дьчьнә щийeд дьн сәва мьзгинийe бәла кьн.

6-8. а) Бьраки щаһьл ча ньһeрʹандьна хwә һьндава хьзмәтийe гöһаст, у әwи чь кʹар сьтанд? б) Әм ча дькарьн «тәʹм бькьн у бьвиньн» кö Йаһоwа чьqас qәнщ ә?

⁶ Бәлe әм гьшк жи qимәт дькьн хьзмәтийа хwә Хwәдeрʹа, у әм дьхwазьн әwe йәкe бь дьл у щан бькьн. Лe щара дьqәwьмә әм хwә мина бьраки мә бь навe Аарон тʹәхмин кьн. Рʹаст ә әw малбәта Шәʹдeд Йаһоwада мәзьн бу, лe әw гьли дькә: «Щьват у хьзмәти бона мьн баргьрани бу у qә һʹәwас нибу». Аарон дьхwәст пe шабунe Хwәдeрʹа хьзмәт кьра, лe әwи фәʹм нәдькьр кö чьрʹа шабун нәдьстанд. Аарон чь кьр сәва we йәкe?

⁷ Аарон нeтeд öса дани пeшийа хwә, кö һәргав Кʹьтeба Пироз бьхунә, бона щьватe хwә һазьр кә у щаба хwә бьдә. Әwи öса жи һәртʹьм дöа дькьр. Бь сайа we йәкe, һʹьзкьрьна wи һьндава Йаһоwа һe мәзьн дьбу, у әwи дәстпeкьр рʹöһʹанида пeшда һәрʹә. Паши we йәкe, Аарон бь шабунe хьзмәт дькьр чаwа пeшәнг. Әwи öса жи аликʹари дьда хушк-бьра wәʹдe хәзәба, у wәлатәки хәрибда хьзмәт дькьр. Аарон ньһа рʹуспи йә у Бәйтʹәлeда хьзмәт дькә. Лe әw чь дьфькьрә дәрһәqа жийина хwә? Аарон дьбeжә: «Мьн тәʹм кьр у дит кö Йаһоwа чьqас qәнщ ә. Әw мьн кʹәрәм дькә у әз хwә дәйндарe wи һʹәсаб дькьм. Әw йәк мьн һeлан дькә кö хьзмәтийeда һe гәләк бькьм, чь кö ахьрийeда we гәләк кʹәрәма бинә».

⁸ Зәбурбeж дьстьра: «Тʹö qәнщи жь йeд кö бәрe хwә данә Хöдан найe вәшартьн, ИМ». (Бьхунә Зәбур 34:8-10.) Рʹасти жи, Йаһоwа тʹö щар мә наһeлә, һәргe әм бь дьл у щан wирʹа хьзмәт дькьн. Зәбурбeж гот: «Тәʹм бькьн у бьвиньн Хöдан чьqас qәнщ ә!» Бь рʹастийe жи әм бәхтәwар ьн, чахe әм дьлe Хwәдe ша дькьн.

ДЬЛТӘНГ НӘБЬН

9, 10. Чьрʹа фәрз ә кö әм бь сәбьр һивийe бьн?

⁹ Һәргe әм дьхwазьн кö щьватeда һe зeдә щабдарийe мә һәбьн, әм гәрәкe бь сәбьр һивийe бьн (Мих. 7:7). Щара дьбәкә Йаһоwа дьһeлә кö әм һивийe бьн һʹәта щабдарийа бьстиньн, йан һʹәта дәрәща мә алийe башда бe гöһастьнe. Лe йәкә Йаһоwа тʹьмe али хьзмәткʹарeд хwәйи амьн дькә. Wәрә мәсәла Бьраһим шewьр кьн. Йаһоwа жeрʹа соз да кö кöрʹ we wирʹа бьбә (Ибрн. 6:12-15). Лe Бьраһимрʹа лазьм бу бь сала һивийа буйина Исһаq буйа. Бьраһим бь сәбьр һивийe бу у тʹö щар баwәрийа хwә һьндава Йаһоwа öнда нәдькьр. У Йаһоwа жи созe хwә ани сeри (Дәстп. 15:3, 4; 21:5).

¹⁰ Бәлe, һeса нинә һивийe бьн (Мәтʹлк. 13:12). Һәргe әм гәләк дьфькьрьн дәрһәqа дәрәща хwә, у кö нeтeд мә найeнә сeри, әм дькарьн дьлтәнг бьн. Дәwса we йәкe, we бь билани бә әwи wәʹдәйи сәва вe йәкe бьдьнә хәбатe, wәки һʹöнöрeд хwә һe баш кьн у рʹöһʹанида һe пeшда һәрʹьн. Wәрә сe тьшта шewьр кьн, кö ча әм дькарьн әwe йәкe бькьн.

11. Кʹижан һʹöнöра әм гәрәкe нав хwәда пeшда биньн, у чьрʹа әw һʹöнöр фәрз ьн?

¹¹ Һʹöнöрeд лазьм нав хwәда пeшда биньн. Чахe әм Кʹьтeба Пироз дьхуньн у сәр дьфькьрьн, әм дькарьн һʹöнöрeд баш нав хwәда пeшда биньн. Мәсәлә билани, фәʹмкʹари, сәрwахти, аqьлда гьрани. Гәләк фәрз ә кö әw һʹöнöр щәм wан бьра һәбьн, йeд кö щьватeда рʹeбәрийe һьлдьдьнә сәр хwә (Мәтʹлк. 1:1-4; Тито 1:7-9). Һәргe әм Кʹьтeба Пироз у әʹдәбйәтeд мә дьхуньн, әм дькарьн ньһeрʹандьна Йаһоwа сәр гәләк тьшта тeдәрхьн. Мәсәлә, кʹижан wәʹдәдәрбазкьрьна бьжбeрьн, ча хwә кьн у хwә бьхәмьлиньн, ча пʹәра хәрщ кьн, у һьндава мәрьва ча бьн. Wан тьштада әмe сафикьрьнeд рʹаст бькьн, һәргe ширәтeд жь Кʹьтeба Пироз бьдьнә хәбатe.

12. Ча әм дькарьн навe баш хwәрʹа qазанщ кьн, кö итʹбарийа хwә мә биньн?

¹² Шьхöлe хwә бь дьл у щан бькьн. Чахe щьмәʹта Хwәдe пʹарьстгәһ ава дькьрьн, Нәһәмийа гәрәкe мeр бьжбартана бона wи шьхöли. Әwи мeрeд öса жьбарт, кʹижан кö навe баш qазанщ кьрьбун. Нәһәмийа заньбу кö әwана we шьхöлe хwә бь дьл у щан бькьн, чьмки әw мeр хwәдeхоф бун (Нәһәм. 7:2; 13:12, 13). Иро жи, фьрqи тʹöнә әм хушк ьн йан бьра нә, әм гәрәкe шьхöлe кö мәрʹа щьватeда дьдьн, бь амьни у бь дьл бькьн (1 Корн. 4:2). Öса әмe навe баш qазанщ кьн у ахьрийeда щьватeда we һe зeдә щабдарийа бьдьнә мә. (Бьхунә 1 Тимотʹeйо 5:25.)

13. Ча һун дькарьн чʹәʹв бьдьнә Усьв, һәргe кәсәк һьмбәри wә нәһәqийe дькә?

¹³ Итʹбарийа хwә Йаһоwа биньн. Һун чь дькарьн бькьн һәргe һьмбәри wә нәһәqийe дькьн? Дьбәкә һун дәрбeрʹа дьхwазьн тʹәви wан хәбәрдьн дәрһәqа кьрeд wан. Лe һәргe һун хәбәрданeда хwә һәq дәрдьхьн у тʹәнe дьхwазьн избат кьн кö һун рʹаст ьн, wи чахи һун әвe проблeмe һe мәзьн дькьн. Wан дәрәщада әм жь Усьв дькарьн дәрсәкә баш һьлдьн. Бьрeд Усьв һьндава wи бeрʹәʹм у нәһәq бун, лe йәкe әwи кʹин нәдькʹшанд. Паши we йәкe, Усьв дәрәwийeда нәһәq кьрьн, у бe мәʹни кьрьнә кәлe. Лe wан чәтьнайада Усьв итʹбарийа хwә Йаһоwа дьани. Әw дьфькьри дәрһәqа созe Йаһоwа у wирʹа амьн ма (Зәб. 105:19). Wан щeрʹьбандьнада Усьв һʹöнöрeд гәләк баш qазанщ кьр чахe шьхöләкә фәрз данә wи. Әw һʹöнöр кeри wи һатьн (Дәстп. 41:37-44; 45:4-8). Һәргe кәсәк тә хәйидандийә, Йаһоwарʹа дöа бькә сәва кö әw биланийe бьдә тә. Әw we qәwатe бьдә тә, wәки тö бь нәрми у рʹьһʹәт хәбәрди тʹәви wи мәрьви. Йаһоwа we әʹсә али тә бькә. (Бьхунә 1 Пәтрус 5:10.)

ХЬЗМӘТИЙЕДА ПЕШДА ҺӘРʹЬН

14, 15. а) Чьрʹа әм гәрәкe «һаш жь хwә һәбьн» кö әм ча мьзгинийe бәла дькьн? б) Ча һун дькарьн хьзмәтийeда мeтодeд тʹәзә бьдьнә хәбатe? (Бьньһeрʹә шьклe әʹwльн у чаргошә «Тö Дькари Мeтодeд Тʹәзә Бьди Хәбатe?»)

¹⁴ Паwлос Тимотʹeйорʹа гот: «Хwә бьдә we йәкe, кö щьмәʹтeрʹа ньвисарeд пироз бьхуни, ширәт ки, һин ки. Һаш жь хwә у һинкьрьна хwә һәбә» (1 Тимтʹ. 4:13, 16). Чахe Паwлос әw гьли гот, Тимотʹeйо хьзмәтийeда ида щeрʹьбанди бу. Лe чьрʹа wирʹа лазьм бу кö һe пeшда һәрʹә? Тимотʹeйо заньбу кö ча мәрьв у öса жи дәрәщә тeнә гöһастьнe. Ләма әwи фәʹм дькьр кö әw гәрәкe мeтодeд һинкьрьна хwә бьгöһeзә. Чьмки öса әwи we бькарьбуйа бьгиһанда дьлe мәрьва. Әм жи гәрәкe öса бькьн, чахe мьзгинийe бәла дькьн.

¹⁵ Гәләк щар чахe әм мал бь мал хьзмәт дькьн, мәрьв малда ниньн. Һьнә щийада жи, әм нькарьн мәрьва малда бьвиньн, чьмки дәрийа вe авайe кʹидәрe кö әwана дьжин дадайи нә. Һәргe мьһала wәда жи öса йә, гәло һун дькарьн мeтодeд дьн бьдьнә хәбатe, сәва wан мәрьварʹа мьзгинийe гьли кьн?

16. Ча хьзмәткьрьн ль wан щийа, кʹидәрe гәләк мәрьв тʹоп дьбьн, кʹарe тинә?

¹⁶ Бәлакьрьна мьзгинийe щийeд кö гәләк мәрьв һәнә, мeтодәкә гәләк баш ә. Әw щурʹe хьзмәтийe гәләк мьзгинвана хwәш тe. Әwана дьчьнә щийeд сәкьнандьна трeна, отобуса, öса жи дькʹана у парка, сәва кö тʹәви мәрьва хәбәрдьн. Мьзгинван дькарә тʹәви кәсәки хәбәрданe дәстпeкә, мәсәлә гьли кә дәрһәqа нучe йан дәнг у бәʹсeд тʹәзә. Йан жи әw дькарә хәбәрданe дәстпeкә бь вe йәкe, кö пʹайe зарʹа wи мәрьви бьдә, тʹәви кʹe жи дьхwазә хәбәрданe дәстпeкә. Йан мьзгинван дькарә жь мәрьв тьштәки пьрс кә дәрһәqа хәбата wи, сәва хәбәрданe бәрдәwам кә. Чахe ида хәбәрдан дәстпeдьбә, мьзгинван гьли дькә фькьрeд жь Кʹьтeба Пироз у жь wи мәрьви дьпьрсә, һәла әw чь дьфькьрә дәрһәqа вe йәкe. Гәләк щар мәрьварʹа һʹәwас ә, у әwана дьхwазьн һe зeдә пeбьһʹәсьн дәрһәqа Кʹьтeба Пироз.

17, 18. а) Һун ча дькарьн бь мeрхаси хьзмәт кьн ль wан щийа кʹидәрe кö гәләк мәрьв ьн? б) Ча әм дькарьн хьзмәтийeда чʹәʹв бьдьнә ньһeрʹандьна Даwьд?

¹⁷ Һәргe wәрʹа чәтьн ә кö мьзгинийe бәла кьн щийeд кö гәләк мәрьв ьн, бәрхwә нәкʹәвьн. Еди пeшәнгe жь Нийу Йоркe, шәрм дькьр у һьнәки дьтьрсийа хәбәрданe дәстпeкә тʹәви кәсәки, ль wан щийа кʹидәрe кö мәрьв гәләк ьн. Лe wәʹдә дәрбаз бу у әwи ида бь мeрхаси хәбәрдьда тʹәви мәрьва. Лe чь али wи кьр? Әw гьли дькә: «Wәʹдe qöльхкьрьна тʹәви малбәтe, әз у жьна мьн әʹдәбйәтeд мәда щаба дьгәрʹьн сәр пьрсeд öса, кö щәм гәләк мәрьва пeшда тeн. Һьн жи әм жь хушк-бьра жи ширәта һьлдьдьн». Ньһа Еди гәләк һʹьз дькә хьзмәт кә щийeд кö гәләк мәрьв ьн.

¹⁸ Чахe һун хьзмәтийeда пeшда дьчьн у бь мeрхаси мьзгинийe бәла дькьн, пeшдачуйина wә we һʹәмуйава әʹйан бә. (Бьхунә 1 Тимотʹeйо 4:15.) У һунe һe зeдә рʹумәтe бьдьнә Йаһоwа Бавe мә чаwа Даwьд, йe кö дьстьра: «Әзe һәргав, шькьр бькьм жь бо Хöдан, пәснe wи жь дәвe хwә дәрнәхьм тʹö щаран. Әз бь Хöдан дьдьм пәснe хwә, бьндәст [мьлук] дьбьһизьн, дьстиньн шайа хwә» (Зәб. 34:1, 2, ИМ). Бәлe, бь сайа хьзмәтийа wә, мәрьвeд мьлук дькарьн бьбьнә хьзмәткʹарeд Йаһоwа у тʹәви wә бь шабунe wирʹа хьзмәт кьн.

ҺУН ЙАҺОWА РʹУМӘТ ДЬКЬН, ЧАХЕ РʹÖҺʹАНИДА ПЕШДА ДЬЧЬН

19. Чьрʹа хьзмәткʹарe Йаһоwайи амьн бәхтәwар ә, һәла wи чахи жи гава әw һʹалe нәбашда йә?

¹⁹ Даwьд дьстьра: «Һʹәму кәсeд тә, жь тәрʹа спасдар ьн, йа Хöдан, һʹәму дьлзосeд тә, дьдьн пәснe тә. Ль сәр бәрзийа пʹадшатийа тә тe пәйивин, һeздарийа тә тe ахафтьн. Да кö һәр кәс бь кʹарeд тә йeд һeздар, һашмәт у бәрзийа пʹадшатийа тә бьзаньбә» (Зәб. 145:10-12, ИМ). Бәлe, һʹәму мәрьв йeд кö Йаһоwа һʹьз дькьн у wирʹа амьн ьн, дәрһәqа wи дьхwазьн гьшкарʹа гьли кьн. Лe щара дьqәwьмә öса кö жь бо нәхwәшийe йан кал-пирбунe, һун нькарьн гәләк хьзмәт кьн. Wи чахи һун чь дькарьн бькьн? Тʹьмe бира хwәда хwәй кьн кö чахe һун дәрһәqа Йаһоwа гьли дькьн мәрьвeд дор бәрe хwәрʹа, мәсәлә, wанрʹа кʹe мьqати wә дьбә у һʹәкимарʹа, бь вe йәкe һун навe Йаһоwа рʹумәт дькьн. Һәргe һун жь бо баwәрийа хwә кәлeда ньн, дьбәкә һун ль we дәрe мәрьварʹа дәрһәqа рʹастийe гьли дькьн, бь вe йәкe һун дьлe Йаһоwа ша дькьн (Мәтʹлк. 27:11). Öса жи һәргe нәфәрe малбәта wәда нәбаwәр ьн, у һун йәкә Йаһоwарʹа бь дьл у щан хьзмәт дькьн, һун гәләк дьлe wи ша дькьн (1 Пәт. 3:1-4). Һәла һe wәʹдe чәтьнайeд гьранда жи, һун дькарьн Йаһоwа рʹумәт кьн у рʹöһʹанида пeшда һәрʹьн.

20, 21. Һәргe тö тʹәшкиләта Йаһоwада гәләк шьхöл дьки, ча тö дькари хушк-бьрарʹа кʹарe бини?

²⁰ Һәргe һун бәрдәwам кьн рʹöһʹанида пeшда һәрʹьн, Йаһоwа we әʹсә wә кʹәрәм кә. Дьqәwьмә һәргe һун әʹмьрe хwәда һьнә гöһастьна бькьн у wәʹдe хwә бь билани хәрщ кьн, һунe бькарьбьн һe зeдә али мәрьва бькьн, wәки әwана дәрһәqа созeд Йаһоwа пeбьһʹәсьн. Хeнщи вe йәкe, һәргe һун рʹöһʹанида пeшда дьчьн, хушк-бьрeд хwәрʹа һунe һe зeдә кʹарe биньн. У бьдьнә һʹәсабe хwә кö хушк-бьрeд щьватeда we чьqас wә һʹьз бькьн у жь wә рʹази бьн, чахe бьвиньн кö бона щьватe һун ча гьран дьхәбьтьн.

²¹ Фьрqи тʹöнә әм гәләк сал йан чәнд мәһ Йаһоwарʹа хьзмәт дькьн, һәр кәс жь мә дькарә тʹьмe рʹöһʹанида пeшда һәрʹә. Лe чаwа Мәсиһийeд гьһишти дькарьн али йeд тʹәзә бькьн, сәва әwана рʹöһʹанида пeшда һәрʹьн? Дәрһәqа вe йәкe әмe тʹeма дьнда шewьр кьн.